Ayịzaya 47
47
Babịlọnị Ọgọnọ Gbana Ḅẹrẹkọn
1 #
Ayị 13.1—14.23; Jer 50.1—51.64 KỊNỊNYANAḄỌ ḅe mẹẹ,
“Babịlọnị, í emine ọgọnọ koro ḅoo,
tẹ kiri ḅio ḅẹ fọọn ḅio lẹgịị.
Gbọrụ sakị ị́ ḅụụ-gboloa ẹrẹḅọ kịkam,
kịnị kan-kan-a opu ama,
kụma ị́ ḅarị jen kẹ lọkọ tẹ ḅẹtẹ-ḅẹtẹ ḅara sime-a!
Mịọkụ í omoniḅọ sọ tẹẹ!
2Ye gbẹẹ ḍụḅarị mẹ pịkịị! Mbịaka gbẹẹ!
Ị́ tọrụ-gbaịn-ḅịtẹ siin! Í iḅi kapa wọrọ-siin!
Í suku-ḅio ḅẹ akapa kporima tẹ mẹnjị okolo ma saḅa!
3Kịnị ị́ paụ kẹ ị́ ẹrị ḅa;
ini í iderimatẹ ḅụụ-jịrị tẹ mẹ kẹ ị́ ẹrị ḅa.
À gbẹẹfị ḅii ḅa, tẹ ì kiki ḅẹ gbọrụḅọ sọ paka ḅịa.”
4Izirẹlị tẹkẹarị Fịafịa Ḅọ ḅe wa kẹ
wamịna asịḅị nyana atomi mịẹ ḅa;
ori ẹrẹ anie Kụrọmamgba nyana KỊNỊNYANAḄỌ ḅe.
5KỊNỊNYANAḄỌ ḅe Babịlọnị ḅẹẹarị:
Gbọsime na kanakana na ḅio lẹgịị;
ịn ḅarị jen sịẹ-sịẹ ma amada-ẹrẹḅọ
kẹ ị́ sịn ḅịa!
6Àrị ịganị ị̀ atomi pịrịm,
à kẹ ịn mịẹ ḅara ịn ḅarị sime ị̀ pịrị-a ye ọkụ;
àrị ịn kẹ ị̀ kụrọ suku-ḅio suum,
tẹ ị́ ọkụrụkụrụ nyana ịn pịrị-a;
omongitẹ apụ ma kịngẹ sọ ị́ guda-guda ḅara kẹ ịn mịẹm.
7Í kuromam ị́ amada-ẹrẹḅọ sọ gbamaso ḅa,
tẹ mịna aị ma kẹ í ḅioḅẹngbọ suu wẹrị-a,
anịanịa kuroma mịnẹ mie mẹmgba kuno ḅa.
8 #
Mịẹ 18.7,8 Miemẹ pokii, tomikiri ḅẹ tọrụ-ḅẹlẹ ḅẹlẹmarịḅọ,
í kuromarị ị́ la-la ye ofori, tẹ ị́ kpaịn sime wararị.
Ị́ ọkịarị ị́ Tamụnọ ḍụḅa ḅara ḍụḅa wararị,
tẹ í pembema jụmọ ofori.
Í kuromarị mịnẹ gbala-gbala í diḅọ-fịtẹ-ẹrẹḅọ sọ ḅịa,
anịanịa ị́ awọmẹ ḅarị ofori ḅụụ-fụka da.
9Kụma tọrụ-gbaịn finji ḅụ, kpọkpọ gbọrụ ene ḅụ,
ma maaịn mamgba paka ḅa.
Í pile ḅarị agba mẹmgba ḅụ sọ,
í di na ị́ awọmẹ na paa fịị ḅa.
10Í si mẹ ḅio sime tẹ ọkị lamam mịnẹ ị́ la-la ye ofori;
Í kuromam mịnẹ gbọrụḅọ-sọ inetẹ ị́ ẹrị ḅịa.
Í nimi na ḍawọye na ị́ da irimam,
tẹ ị́ ị́ ḅụụ ḅẹẹm: Yẹrị Tamụnọọ,
jụmọ tẹ ị̀ kịka ḅọ ofori.
11Opu ḅụụ-fụka ḅo ị́ la ḅa,
tẹ í pilearị agba ma ḅẹ gberie-sọ inetẹ anị dasịẹma ḅịa.
Ḅiotọn-a ḅara ḅụ opu fa ḅo ị́ la ḅa
opu fa tẹ gbala-gbala ḍawọ-jụ sọ amụ ị́ ẹrị-a ye!
12Í pile aị ma na agba poku-poku mamgba na
mịẹ-aị ma mịẹ ma-mu;
ị́ ịwọ sakị kụra ḅio ị́ mịẹ sime aị ma.
Ẹbịsịya arị nyana ị́ pịrị ḅẹ ḅarasụa paka ḅa;
ẹbịsịya ị́ mịẹ tẹ ị́ na fịya-a apụ ḅalafaa ḅa.
13Ịn ḅẹrẹ ḍuko í toluma tẹ sọ ị́ paa kụrọ
nyana-a ḅara simearị.
Yee í lolia-ḍikiapụ ma paka-ḅo tẹ ị́ ḅọrọma
Ini tẹ lolia gboloma ye ḍawọarịapụ ma,
So ḅio ye ọrụ-ọrụ ḅụ sime-ḅara kẹ ye ọgọnọ puuarị apụ ma,
tẹ nwẹnị ḍuko ị́ pịrịarị akalụ-akalụ
ị́ ḅụ paka ḅarị aị ma.
14Ini anyịma sara wararị asịra kịka
tẹ fịnị ịn dọkịma fama ḅa!
Ịna aḅụụ ḅọrọma kịngẹ sọ ini inetẹ ḅọrọma ḅịa
fịnị-ḅẹlẹ mẹ ịna ḅụ ọfịrị ḅaka ḅa,
deinma kọrịarị tẹ kẹ ịna ḅụụ-sọnsọnma ḅẹ fịnị-a.
15Anie ịn kẹ ọ́ mịẹ ḅarị iḅi mamgba;
anị lolia ḍikiapụ ma tẹ ọmịnị ịna ḅara
ye gbelarị apụ ma, ọmịna ḍumo mamgba ḅụ.
Ini ó koroma tẹ so in muarị anga mu ḅa,
tẹ kiri kọn tẹ ọ́ ḅọrọma ḅẹ gbọrụḅọ sọ paka ḅịa.
Currently Selected:
Ayịzaya 47: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria