Ayịzaya 26
26
Tamụnọ Owu-ḅara-iḅi Kẹ Ori Atomi Pịrị ḅa
1Anị ene mẹ ḅụ, Juda amakiri mẹ ḅụ tomi mị nume mẹ su ḅa:
Wamịna opu ama kụrọ wararị!
Tamụnọ ḅarana anị ḅẹ onu ma ḍụarị!
2Ama mẹ onu aḅọkọ ma finji
tẹ ḅioḅẹngbọ-kẹ-sịrẹrẹ-niḅi sịẹ mẹ sọ-mu,
sịẹ tẹ anị ḅẹ apụ ma kuraye mịẹarị ye mẹ.
3Ị́yẹrị, KỊNỊNYANAḄỌ, bebetẹ dein kẹ amịna mịẹ
ḅẹ ye mẹ ọlọ kụrọma tẹ ị́ kẹ ḅiokpọmarị apụ ma pịrịarị. 4KỊNỊNYANAḄỌ ḅe kẹ ḅiokpọma gbamasoo;
sakị mamgba ori ị́ gbaịn ḅọrọma ḅa.
5Ori opu amịẹaị mịẹ apụ ma iderima tẹ;
ori ini anga sime opu ama mẹ guluguluma tẹ;
pịkị anị ḅẹ onu ma sukuruma ḅịkịma
gbere-gedeima fọọn ḅio sara tẹ.
6Ja apụ ponoma sime apụ ma mịọkụ anị ḅụ mẹnjị saḅa
tẹ ḅụọ kẹ anị nanga ḅa.
7KỊNỊNYANAḄỌ, ị́yẹrị mẹnjị-ḅọrọ-anga mịẹ kpaịnma iḅi atomi pịrịarị;
ịn ḅọrọ in muarị anga muarị etela mẹ ị́ lẹsẹrẹma wararị.
8Wa í ḅiiarị ye ḍuka mẹnjị tẹ ị́ kẹ ḅiokpọmarị;
í sikima wa jen ḅii-a.
9Ḍin ḅụ arị ì ḅioḅẹngbọ mẹmgba kẹ ị́ ḍọkịarị;
í tomikiri mẹ na anị ḅẹ atomi ma na kọn ḅarị sakị, inimgba karakara ḅẹrẹkọn ḍawọ ḅa. 10Í iḅi ḅara kẹ si-sịḅịḅio-sụa atomi ma na mịẹarị sọ,
gbala-gbala ịn ḍawọ tẹ kuraye mịẹ-a.
Mie karakaraye-mịẹapụ amakiri mẹ ḅụ sọ
in kura-aye mịẹarị;
ịn ḍụkụ tẹ í opu kẹ ye-sịn-a.
11 #
Hib 10.27
Si kẹ ị́ tọn apụ ma nimi-a mịnẹ í fomu-ḅara kẹ ịn pịrị ḅa.
KỊNỊNYANAḄỌ, ịna ḅụụ-jịrịma tẹ mịẹtẹ ịn tọrụsiẹrị;
yee ini ị́ tẹlẹma ịn wẹrịma tẹ fomu-ḅara
mẹ ḅẹ tọrụsiẹrị da.
Kẹ in ḍie ị́ ị́ atomi ma ḅẹlẹma la ḅara.
12KỊNỊNYANAḄỌ, ị́ lọkọlọkọ kẹ wa pịrị ḅa;
wa nyana ḅo ye goyegoye,
ị́ mịẹ wa pịrịarị ye ḅụ ḅoarị.
13KỊNỊNYANAḄỌ wamịna Tamụnọ, ja apụ ḅẹrẹtọn wa pịrị tẹ,
Kụma kịngẹ mie wa Nyanaḅọ.
14Mịọkụ ịn fịị tẹ ḅarị jen kẹ ḍumo ḅịa,
ịna tẹmẹ oju ma ḅarị saakị ḅịa,
ị́ ịna fomu tẹ ịn ḅaa guluguluma tẹ ẹrẹsị.
Jen kẹ ịn kẹ ḅiokoromarị ḅọ ofori.
15KỊNỊNYANAḄỌ, ị́ mịẹ tẹ wamịna ama ḍụḅa tẹ,
pakịrị, pakịrị ḅụ ye kẹ anị ḅẹ kiri ḅụ sụarị,
tẹ miemẹ kụn ọkị-ḅo ị́ pịrị tẹ.
16KỊNỊNYANAḄỌ, í fomu-ḅara kẹ ị́ atomi pịrịm
tẹ ḅioḅẹngbọ akụ ḅụ ịn nwẹnị ị́ tẹkẹ.
17Ị́yẹrị, KỊNỊNYANAḄỌ, mịẹtẹ wa owu pakam, anie iyi la tẹ ẹrẹḅọ akụye ḅụ owu pakama ḅara.
18Akụye na ḅụụ-ḅalaḅala na ḅụ wa simem,
kụma wa iyi kuroma-ḅo gberie-sọ ofori.
Wa owu iḅi nyana ḅo wamịna amakiri pịrị-a;
wa mịẹ pakama-ḅo gberie-sọ ofori.
19Wamịna atomi ḅụ fịị tẹ apụ ma in sin ḍumo ḅa!
Ịna oju akpakpa ma pịkị-ḅo ḍumo ḅụ sọ ḅa.
Inimgba tẹ amịna aḍuḅu ḅio monoarị apụ ma
saakị tọ nume su, su ḍereku ḅa.
Ḅịya tọrụngbọ ḅio sọarị igirigi mẹ ịwọ ịnyọ
kẹ kiri pịrịarị ḅara,
anị ḅara mie KỊNỊNYANAḄỌ ḅe kẹ ala lamatẹ
sakị ḅụ fịị apụ mịẹtẹ in sin ḍumo ḅarị ḅara.
Ḅẹrẹkọn Na Ye Kẹ Tarị Anị Sime Ḅara Wẹrị Na
20Ó mu ọmịna awarị ḅio sọọ, ị̀ atomi, tẹ ḅọkọ mẹ gbaịn ọmịna aḅụụ pịrịị. Ó boowa kala-sakị kẹ ọmịna aḅụụ ḅọị wẹrị nwenii Tamụnọ ịganị ḅọrọ. 21KỊNỊNYANAḄỌ ḅe So-ḅio ò sime yọ ḅụ ḅo tomikiri ḅẹ apụ ma asi gotẹ in fomu ḅa. Ḅọị ḅara ḅụ tomikiri ḅụ ịn ḅaa apụ mamgba paka ḅa, tẹ kiri mẹ ḅarị jen kẹ ịn ḅaa tẹ apụ kikima ḅịa.
Currently Selected:
Ayịzaya 26: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria