Ayịzaya 22
22
Jeruselemu Gboloma Oku
1Mie Ịkịan Ẹrị Tụndụ-suku mẹ gboloma oku mẹẹ. Tiye ẹrẹsị ama mẹ ḅo atomi mamgba warị isun-isun ḅụ sime tẹ tii-arị? 2Bebe ama mẹ yeke-yekearị, ẹkwẹn pẹlẹ-a ḅara kẹ ye sịḅịḅio sọ ḅara mịẹarị?
Ọmịna atomi ma tẹ mịẹ ọmụ mẹ ḅio fịị apụ ma ini owu sọarị ogbo fịị-a. 3Ọmịna sịḅịdapụ mamgba mangị-soarị ogbo ini in kunm, gbọrụ ḍiein sọ tẹịn-a ḅara ḅụ. 4Mịọkụ ọ̀ wẹrịso tẹ arị ngẹrị sime tẹ tẹmẹ-akụ ḅara kẹ ị̀ atomi mamgba tẹ fịtẹ apụ owu. Ọmịnị ì dedema ma. 5Mie ḅụụ-gbiripuma ḅalafaa na, owu-ḅara-sii na ḅioḅẹngbọ pikiri na sakịị, Ịkịan Ẹrị Tụndụ suku mẹ ḅio, tẹ Kụrọmamgba nyana KỊNỊNYANAḄỌ, Tẹịn ḅẹrẹtọnḅọ anị kẹ fịrịma wamịna ọgọnọ gbanam. Wamịna ama mẹ ḅẹ onu ma ini arị fomu gbin tẹ, ḅarasụa ḅii owu oloku tụndụ ma ọgọnọ fiema muarị.
6Ẹlamụ amakiri ḅụ ḅo ọmụapụ, asụ kpọlị, kpọlị tẹ iboli na ḍiein ọlọ tẹ ḅom. Ka-a amakiri ḅụ ọmụapụ, ịna ekpeke tẹlẹma tẹ ḅom. 7Juda ḅẹ iḅi ye-ḍiḅi lẹsẹrẹ-akiri ma ọgọnọ kirimẹnjị-ọmụarụ ḅinm; asụ-dọkụ-ọmụapụ nwẹnị Jeruselemu mẹ ḅẹ onu aḅọkọ ma tọrọkọ sịẹsime. 8Juda kẹ amịna ḅụụ ḍụa ḅẹ aị mamgba ḅịkị saram.
Anie paka tẹso, ị́ ọmụ-aị koko yọ mẹ ḅẹ aị ma pakama ḅom. 9Ọmịnị ẹrịm mịnẹ Devidi opu ama mẹ ḅụ tọnwa anga kan-sara wararị ama mẹ ḍụa ḅụ, minji koko wẹrị suku-jụ ḅẹ olulu mẹ ḅio. 10Ó Jeruselemu ḅẹ awarị ma kịẹn nimi tẹ ja awarị kan tẹ onu mẹ nama kụrọma ḅẹm, 11ó minji koko anga namam ama mẹ ḅio, elemu ḍaḅa mẹ ḅio sara, sara ideri-ḅo minji mẹ daasịẹ ḅẹ anga. Kụma ọ́ Tamụnọ kẹ ye-sịn-a, anie iḅere-iḅerea kụra ḅio mie-mẹmgba tọn tẹ mịẹ tẹ anị paka-ḅo ḅe.
12Ọkọ ẹrẹsị, Kụrọmamgba nyana KỊNỊNYANAḄỌ, Tẹịn ḅẹrẹtọnḅọ ḅe ọ́ sịn simem mịnẹ ọmịnị owu tẹ kururuu, ọmịna sịḅị-ḅẹ-inume sẹịn-siin tẹ akpa ḅirii. 13#1 Kọr 15.32Anie nakara, ọ́ ḍẹrị, ḍẹrị tẹ tiim. Ọmịnị anana na opu anama na ḅaa pẹị tẹ iru ḅuum. Ọ́ ḅẹẹm, “Wa paa fị-na-ḅuu-na ḅarị ya! Ḅaa ḅụ wa fịị tẹ apụ sọ ḅarị sakị.” 14Kụrọmamgba nyana KỊNỊNYANAḄỌ, Tẹịn ḅẹrẹtọnḅọ ḅe, ẹkwẹn ị̀ pịrị tẹ ḅẹẹm, “Mị si mẹ gbala-gbala à wẹrịso ịn pịrị ḅịa, in ḍumo mu la ḅiri, la ḅiri. Yẹrị, Kụrọmamgba nyana KỊNỊNYANAḄỌ, Tẹịn ḅẹrẹtọnḅọ ḅe, ḍuko tẹ.”
Kẹ Sẹbụna Ḅeri Nụnụ Ye
15Kụrọmamgba nyana KỊNỊNYANAḄỌ, Tẹịn ḅẹrẹtọnḅọ ḅe, ḍuko ị̀ pịrị tẹ mịnẹ à Sẹbụna amadaḅọ ḅe warị-kpo mẹ ḍikiḍikiarị ḅọ ḅe dama-mu tẹ ọ̀ ḅẹẹ, 16“Ị́ kuromarị ị́yẹrị tụḅọ? Ị́ tọ kụrọ nyana, ḅarana ịkụ tụndụ mẹ akaka ḍuḅu sọkị ị́ ḅụụ pịrị? 17Ẹbịsịya tomi ị́ kẹ ye-sịn-arị, kụma KỊNỊNYANAḄỌ ḅe ị́ saakị ọkị tẹ ị́ kẹ gbin nguma ḅa. 18Ò futubọlị saakị ọkị ḅara kẹ ị́ saakị ọkị tẹ ị́ kẹ kpọma ḍụḅa ị́ sịẹ nẹngị sịẹ ḅio gbin ḅa. Anị anga ḅụ ị́ kẹ ḅụụ-boma sime kiri mẹnjị ọmụ arụ ma akaka ị́ fịị ḅa. Ị́yẹrị anie ị́ sịḅịdaḅọ ḅe warị-kpo mẹ tọrụ-tuuarịḅọ. 19KỊNỊNYANAḄỌ ḅe fịrị ḅụ í siin tẹ í geletẹ kiri mẹ ḅụ iderima-ḅo ḅa.”
20KỊNỊNYANAḄỌ ḅe nwẹnị Sẹbụna ḅẹẹ, “Anie mẹ paka sakị, à ḅịḅị kẹ ị̀ fịrịmẹnjịḅọ Hilikaya owiḅọtụḅọ Ẹlịyakịmụ fịrịma ḅo ḅa. 21Àrị ị́ fịrị kiri mẹ ḅẹ opu kapa mẹ kẹ ọ̀ sụa ḅa, pịkị ḅiri-ponoye mẹ kẹ ò ḅiri pono ḅa, tẹ ị́ nyana sime kụrọ mẹ sakị ọ̀ pịrị ḅa. Ọ̀ ḍa sọ kẹ Jeruselemu na Juda na ḅẹ apụ ma pịrị ḅa. 22#Mịẹ 3.7Ama-da Devidi furo paka-ḅo ḅọ ḅe, suku ḅio ḅẹ kụrọ mẹmgba à kẹ ọ̀ pịrị fama ḅa. Ọ̀ fịrị kiri mẹ ḅẹ asambị ma ọlọ ḅa; ò finji tẹ ye gbaịn ḅẹ ḅọ ofori; tẹ ọ̀ gbaịn tẹ ye finji ḅẹ ḅọ ofori. 23À mịẹ tẹ ọ̀ kụrọma kiri ḅụ lẹgị ḅarị ḅara anie, warị akaka ḅụ sọkị pokoloma tẹ kẹ ḅakụ suu kụrọma sịn ọkụ, tẹ ò bebe warị mẹ ḅẹ apụ ọ̀ ḅụụ ḅọrọtẹ kụn nyana ḅa.
24“Kụma ọmịnị ori amịnapụ mamgba na ọ̀ ḅụ sịrẹrẹ wararị apụ ma na nwẹnị ikutẹ dogiye sọ ọ̀ pịrị ḅa. Ini ọ̀ ḅụụ sịrẹrẹ ḅarị ḅara anie ḅẹlẹ na bọlị na warị akaka sololo ḅara! 25Aniemẹ paka sakị, ịn kụrọma ḅakụ suu wararị ye-sụkaye mẹ foo-foo tẹ ḅarị inetẹ sime ḅịa tẹ pụkọ-so ḅa. Anie nwẹnị anị ḅụ sololo sime aị mamgba ḅẹ kunoma sọ ḅa.” KỊNỊNYANAḄỌ ḅe ọkọ ḅẹẹm.
Currently Selected:
Ayịzaya 22: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria