Ayịzaya 16
16
Mohabụ Ḅiokpọ Nyana-a Ḅara Sime Wararị
1Sẹla ama mẹ ḅụ, ịkpa mẹ ḅio mie Mohabụ ḅẹ apụ ma anana kẹ kpọma-ḅẹlẹmarị Jeruselemu ḅụ ḅẹrẹtọn-arị ḅọ ḅe fịrịmarị ye, ḍiepịrịye ḅara ḅụ. 2Ini Anọnị Tọrụ Akaka ma ḅụ sime tẹ koru tẹ mu ḅẹ anga nimi-a apụ ḅara kẹ mẹnjị iwo-na-ideri-naarị, tẹ feni-warị ḅio dee-pakama tẹ afeni kịkarị.
3In Juda ḅẹ apụ ḅẹẹarị, “Ọ́ wa mịẹ ḅẹ ye ḍuko wa pịrị. Ọmịnị eneḅaka ogbo ḅụ deinma ịrụa ofori kikima kịnị pịrịarị sịn kịka tẹ wa gbaịn ḅọrọma, tẹ yee wa ọmịna sịḅị-kikima-yọ ḅụ ịnyọsara. Wamịnị amịna ama koroma ḍumo-mangị kọn-arị apụ; ọ̀ wa kẹ gbọrụḅọ-sọ inetẹ wa ḍọkị-ẹrị ḅịa anga ḅụ ḅọị. 4Yee wa ọmịna amakiri ḅụ sime. Ọ́ wa gbaịn ḅọrọma, wa ḅaa guluguluma ḅẹ-ḅiiarị apụ ma ḅara-ḅio.”
(Ponoma na ḅaa-guluguluma na kunoma ḅa, tẹ ama ma famarị apụ so ḅa. 5Anịtẹso Devidi furo-ḅẹ-apụ ma ḅẹ gbọrụḅọ amadaḅọ sọ ḅa, tẹ ò ḅioḅẹngbọ kẹ ḅụụ ḅụ gbana na-iḅi ḅara na ḅẹlẹma na kẹ ḅẹrẹtọn ḅa. Ọ̀ sarasarama kuraye mịẹ tẹ ẹrị ḅa mịnẹ jụmọ ḅarị jụmọ inoma-a).
6Juda ḅẹ apụ ḅẹẹarị, “Wa naa tẹ mịnẹ Mohabụ ḅẹ apụ anie opu-amịẹaị mịẹ-mịẹ apụ. Wa nimi wararị inima anie opu ẹkwẹn kọn, kọn apụ, pịkị amịna ḅụụ ọkị jen-apụ nẹngịma, nẹngịma apụ, kụma ịna aḅụụ boma ma ḅio ye ofori.”
7Mohabụ ḅẹ apụ ma owu ḅa ini ẹrịarị atọrụsiẹrị ma ẹrẹsị. Inimgba owu ḅa, in Ka-Hẹrẹsị opu ama ḅio ịn fị-fị iḅi fịye mẹ kẹ ḅiokoroma sakị. Anị mịẹ tẹ in ḅioḅẹngbọ-ḅịkị nyana ḅa. 8Hẹsịbọnị na kpeki ḅụ in ḍiḅi aḍụọ ma na Sibima ḅẹ kụrọ aḍụọ ma na in guluguluma famam — arị kụrọ aḍụọ ma ḅụ paka-ḅo iru mie tomikiri ḅẹ asịẹ ma ḅẹ ḅẹrẹtọn-apụ ma ḅuu tọrụ-ḅaama-ḅaama ye. Gbọrụ sakị ḅụ kụrọ mgbọlụ ma wasa mu Jaza opu ama jụ ḅio sọ lam, tẹ ịrụa saakị pakarị anga da aị ma mẹnjị mu ịkpa mẹ lam, ịrụa-ideriarị-anga da aị ma mẹnjị mu Fịtẹ Tọrụ mẹ ḅẹ osi saḅa anga lam. 9Mịọkụ à Sibima ḅẹ akụrọ asịn ma gotẹ owuarị, à wẹrịtẹ owu Jaza pịrị ḅara mẹ. Ị̀ tọrụ ḅẹ owu minji mẹ sara Hẹsịbọnị na Helehale na pịrịarị, fịye soku sakị ḅụ in soku tẹ ḅio ḅẹlẹ ḅẹ ye paka ḅịa gotẹ. 10Gbọrụḅọ sọ fịye pakama, pakama iḅi kiri mẹ gotẹ ḅioḅẹlẹ à mịọkụ. Kụrọ-aḍụọ ma ḅio gbọrụḅọ-sọ oloku-a pịkị nume-su-a. Gbọrụḅọ sọ kụrọ mgbọlụ nanga-nanga tẹ kẹ waịnị nwẹn-sịn iru mịẹ-a; ḍereku oloku ma kuno tẹ. 11Mohabụ gotẹ arị iningiarị tẹ ḅioḅẹlẹ-a; à kururu Kiri Herisi pịrịarị. 12Mohabụ ḅẹ apụ ma ịnyọ ịna ḅụ fa tẹ, tẹkẹ gotẹ tụndụ ọgọnọ ḅẹ tẹkẹ-ayọ ma mẹnjị iwo-na-ideri-na pịkị ịna tamụnọ awarị mu ma mẹnjị iwo-na-ideri-na pịkị ịna tamụnọ awarị mu ma ḅọrọ na ḅụ, tẹkẹ ẹrẹsị, kụma gbọrụ iḅi sọ anị kẹ ịn mịẹ ḅịa.
13Anie KỊNỊNYANAḄỌ ḅe tarị fịrịma oku mẹ Mohabụ gboloma ye ḅụ. 14Tẹ mịọkụ KỊNỊNYANAḄỌ ḅe ḅẹẹarị. “Tẹra kụra gbasị ḅụ, Mohabụ kọọn sara ngọ ma ịmaịn-faa ḅa. Ini tọnwa atomi ma ḅụ boowa apụ kịngẹ kọn ḅa, tẹ ịn pịkị kpọkọrọ-kpọkọrọ ḅa.”
Currently Selected:
Ayịzaya 16: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria