Hosiya 7
7
1“Àrị ị̀ atomi Izirẹlị gwọ tẹ ịn mịẹ tẹ ịn sin lọkọlọkọ ḅẹ sakị goyegoye àrị ẹrị ye anie ịna si-sịḅịḅio na ịn mịẹarị siye na. Ịn jụmọ-jụmọ mingirimarị; ịn warị-warị kan sọ-sọ tẹ furuarị, etela ma ḅụ ịn kịnị aḅara ye pụkọ-pụkọ ọkịarị. 2Gbala-gbala anị ịna aḅioḅẹngbọ sọ-sọa mịnẹ mị siye mẹmgba à kẹ ḅiokoroma ḅa; kụma ịna asi in gbori-ikelema wararị, tẹ àrị inetẹ àrị ẹrị ḅịa ọkụ ofori.”
Amada-Opu-warị Mẹ Ḅio Si-ḅẹrẹ ḅiya Emi
3KỊNỊNYANAḄỌ ḍukoarị, “Kịnị oḅori kẹ amadaḅọ ḅe na ọ̀ fịrịmẹnjị-opuapụ na sịn-arị in ḅiyarị si aḅẹrẹ ḅụ. 4Inimgba mbasị-apụ tẹ sịḅị-tuu amadaḅọ ḅe pịrị-a apụ famam. Ịn nyana ḍiki-ḅioḅu mẹ fịturu fọị ye ḅio kẹlẹkẹlẹ kọrịarị fịnị kịkarị, anie fịturu mịẹ ḅọ ḅe sụkama-a nwenii ọ̀ fịturu kpoo mẹ tẹlẹma fama tẹ fọị ḅẹ sakị la ye. 5Amadaḅọ ḅe tii gboo koroma eneḅaka mẹ ḅụ ini iru kẹ ori na ọ̀ fịrịmẹnjị-opuapụ na pịrị ḅuu tọrụ-ḅaama tẹ ini oḅori ḅara simem. 6Inn, si-ḅẹrẹ ḅiya ịna ḅụụ ḅio fịturu fọị yọ ḅẹ fịnị kịka tẹ kọrịm. Bebe ḍin ḅụ ịna ịganị rụrụma-rụrụmam, tẹ dede-ḅio ḅụ anị veremuma kọrị pakam.
7“Ịna ịganị ọfịrị ḅụra tẹ ini ịna ḅẹrẹtọn-apụ ḅaam. Ịna amadapụ ma ogboku ịn gbọrụḅọ nini tẹso, ịn pịkị osi ḅọ ninim; kụma ịna ḅụ gbọrụḅọ-sọ ị̀ tẹkẹ tẹ ḅarasụa ḅii-a.”
Izirẹlị na Sịẹ-sịẹ Ma Na
8KỊNỊNYANAḄỌ ḅe ḍukoarị, “Izirẹlịapụ ma kịkarị ye anie iḅiọkụ fọị ḅịyama-a fịturu kpoo. Ini in gbori-ikelema wararị asịẹ ma ḅụ sịrẹrẹarị, 9tẹ nimi ḅo-a mịnẹ ja sịẹ ḅụ sịrẹrẹ mẹ ịna ịnyọ famarị. Ịna ene ma fama ḅẹ-yearị, kụma ịn paa anị nimi-a. 10Izirẹlịapụ ma opu-amịẹaị mẹ ḅẹrẹ oloku ịna ọgọnọ gbanarị. Paka tẹ ye goyegoye ḅụ sọ, amụ ịn pịkị ị̀ ḍọkụma-ḅoa, KỊNỊNYANAḄỌ ịna Tamụnọ ḅe. 11Izirẹlị gberie-sọ nimi-a wẹẹrẹsị kịka tẹ fiin ikelekelearị; árị atomi tarị mu Ijiputi laarị ḅarasụa gotẹ, anị tẹso, ịn mangị Asiriya muarị! 12Kụma arị ịgbọ sụa tẹ in feni amẹẹ kịka tẹ anị ḅio kuro ḅa ịn mẹnjị ḅọrọ muarị ogbo. Arị in fomu ḅa ịn mịẹ tẹ siye mẹ gotẹ.
13“Ịn fatẹ! Ini ì koroma-so tẹ pịkị kọngọ-kụrọma ị̀ pịrị tẹ. In gulugulu ḅa. Àrị ịn ḅọrọma ḅẹ ḅiim, kụma ịn kẹ sunsin ị̀ pịrịarị ḅara mẹ kura-a. 14Amụ ịn tẹmẹ-la ḅara kẹ ị̀ tẹkẹ-a, kụma ịn tẹmẹ-la ḅara kẹ ị̀ tẹkẹ ḅẹ nakara ini ịna aḅụụ sẹma-kiri-gbin-gbin tẹ pee-peema owuarị oru nimi apụ ma mịẹarị ḅara. Ini mbịaka na iru na gotẹ tẹkẹarị sakị ini ịna oju pẹlẹ-pẹlẹ sọ-muarị Tamụnọ nimi-a apụ ḅara mẹ. Ịn kọngọ-kụrọma la ḅara ḍikii! 15Karakaraye yẹrị anie in ḍikiḍiki pakama-ḅo tẹ ịn mịẹ kụrọma ḅọ sọ, in si ḅẹrẹ-ḅiya ị̀ pịrịm. 16Ini ị̀ ḅụụ pịkị so-so tẹ kụrọ nyana-a tamụnọ dama-muarị. Ḅioḅẹngbọ kẹ ịna ḅụụ ḅụ gbana na-iḅi-a ḅara mẹ gbala fangala-fangalatẹ iboli ḅụ ḅioḅẹngbọ kẹ gbana na-iḅi-a ḅara ọkụ. Ịna sịḅịdapụ ma opu ẹkwẹn opu ẹkwẹn kọn-arị ye mẹ ẹrẹsị ịn kụrọ-kụrọ fịị kọn ḅa, tẹ Ijiputi ḅẹ apụ ma ḍẹrị ḅa.”
Currently Selected:
Hosiya 7: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria