Hosiya 4
4
KỊNỊNYANAḄỌ Ḅe Ḅẹrẹ Ḍuko Izirẹlị Sịḅị Sẹịnm
1KỊNỊNYANAḄỌ ḅe kẹ amakiri mẹ ḅụ angarị apụ ma sịḅị sẹịn ḅẹ ḅẹrẹ nyana wararị. Izirẹlị, ọmịnị ò ḍukoarị ye pokii: “Amakiri mẹ ḅụ mininiye-mịẹ na ḅẹlẹma na ofori, tẹ tomi ma pịkị ị̀ kẹ ịna Tamụnọ ḅara ọkị-a. 2In ye minini-minini tẹ in minini ḅara kan-arị; ini iruoarị, kịnị ḅaarị, furuarị, tẹ pịkị sẹfịarị. Si amịẹaị ḅaka-ḅaka-ḅakarị tẹ in tomi ḅaa-ḅaa sararị. 3Tẹ mie ḅụ amakiri mẹ samụnọ-kpakịkị ḅa, tẹ anị ḅụ angarị ye goyegoye fịị ḅa. Nama mamgba na feni ma na pịkị inji sọ fịị ḅa.”
KỊNỊNYANAḄỌ Ḅe Ḅẹrẹ Ḍuko Agbamịẹapụ Ma Sịḅị Sẹịnm
4KỊNỊNYANAḄỌ ḅe ḅẹẹarị, “Yee gbọrụḅọ-sọ ḅẹrẹ kẹ tomi ma sịḅị sẹịn ma, anịanịa in ḍiki-ịganị — ọmịnị agbamịẹapụ ma mie à ḍuko-sụa nyana pịrị apụ. 5Ḍin na eneḅaka na ḅụ ó zuzu ma tọrọkọ-tọrọkọ muarị, tẹ ịkịankoroapụ ma iḅi ḅara mịẹ ọ́ nẹngị-a. Àrị Izirẹlị guluguluma ḅẹ-yearị, ọmịna iyingiḅọ ma. 6Ị̀ atomi ma ịn fa tẹẹ ini ị̀ kẹ ye-sịn-a ẹrẹsị. Ọmịnị agbamịẹapụ ma ḍụkụ tẹ ị̀ kẹ ye-sịn-a tẹ ì tolumaye sịkịtẹ, tẹ mie ḅụ àrị ọ́ sịkị tẹ ọmịna owiapụ-awọmẹ kẹ ị̀ agbamịẹapụ ḅara ọkị ḅịa.”
7“Ọmịnị agbamịẹapụ ma kịẹn-ḅịḅị ḍụḅa tọrọkọ-tọrọkọ muarị ḅara anie ọ́ kẹ ị̀ mịẹarị asi ma pịkị ḅaka-ḅaka-ḅakarị ḅara, tẹ mie ḅụ à mịẹ tẹ ọmịna kụn ḅo tọrụ-tuu sọ ḅa. 8Ị̀ atomi asi ḅụ mie ọ́ ḅọrọ tẹ ngọ-kọn-arị, tẹ mie ḅụ ó ḅiiarị in si mịẹ tọrọkọ-tọrọkọ mu. 9Tomi ma daarị gbọrụ fomu-ḅara mẹ mie ọmịnị sọ da ḅarịye! Arị ó fomu tẹ mịẹtẹ ọmịnị ọ́ mịẹ tẹ si mẹ gbẹẹ-ye nyana ḅa. 10Ọmịnị agba mịẹ aị ma ḅụ ọ́ la kiri mẹ fị ḅa kụma ḅuru paa ọ́ tarị ḅa. Ó sunsin awọ-kẹ-kịnị-pịrị oru-atamụnọ ma pịrị ḅa, kụma ó paa awọmẹ iyi ḅịa, ọmịnị ị̀ ḅụ pịkị-so mu oru-atamụnọ ḍukamẹnjị tẹẹ ẹrẹsị.”
KỊNỊNYANAḄỌ Ḅe Sunsin Oru Pịrị Ḍiki Ịganịm
11KỊNỊNYANAḄỌ ḅe ḅẹẹarị, “Iru — elemu ye na ịwọ ye na gboloma — mịẹ tẹ ị̀ atomi ḅarị sịḅịḅio nyana-a ḅara simearị! 12Oru-fụḅara ḅara mie ịn tọrọkọ-jụ paka ḅẹ ye nimi ḅẹ tẹ gbelarị. Oru-fụḅara nwẹnị in nimi ḅẹ-ḅiiarị ye ḍuko ịn pịrịarị! Ini ị̀ ḅụ so tẹẹ. Ini ẹrẹḅọ kịka tẹ akụnakụna sọarị, ini ịna aḅụụ saakị oru-atamụnọ pịrị tẹẹ. 13Tụndụ ọgọnọ-jụ ma tẹ ịn tọn-tọn ḅara wẹrị wararị ayọ ma ḅụ ini agba mịẹ-mịẹ-mịẹarị tẹ tụndụ ma ọgọnọ ḅụ ḅara wasamatẹ geletẹ asịn ma suku ịn kụnụaị dọkịmarị, anị sịḅị kikima tẹ dein wararị ẹrẹsị!”
“Anị dogi-ḅo ye anie ọmịna eremịna-awọmẹ ma tẹkẹ-warị ḅẹ akụnakụna mịẹarị, tẹ ọmịna owiapụ-awọmẹ tapụ nwẹnị sẹfịarị. 14Anịsọ à fomu-ḅara kẹ ịn pịrị ḅịa ọmịnị ma ḅioju sọ tẹkẹ-warị ḅẹ akụnakụna mịẹarị ẹrẹsị, tẹ ọmịnị ini na sọ tẹ agba mịẹ-mịẹ oru pịrịarị. Anie egberi mẹ ḅẹẹarị ḅara, ‘Sịḅịḅio nyana-a apụ ma anie faa ḅarị apụ.’ ”
15“Izirẹlịapụ ma nwẹnị ḅioḅẹngbọ-kẹ-sịrẹrẹ-niḅi-a ḅara sime ị̀ pịrịarị sọ, yee Juda paa anị gbọrụ si mẹ mịẹ ma. Giligalị anịanịa Bẹtẹlị ḅụ sunsin oru pịrị ma, anịanịa anị anga ḅụ ḍumo wararị Tamụnọ ḅe ẹrẹ ḅụ ye minini.”
16Izirẹlịapụ ma kụrọ-sịḅịsụa-asụ kịka tẹ ḅẹrẹ ḍụkụ-ḍụkụ-a opu anama ma kọngọ-kụrọma ḅara kẹ kọngọ-kụrọmarị. Ndẹẹ àrị inetẹ ịn kẹ anana awọmẹ kịkama tẹ tẹịn-tẹịntẹ osuka ḅio fịye kẹ ịn pịrị fị ḅẹ ḅara? 17Izirẹlịapụ ma oru-afụḅara ịn pilema wararị. Wẹrịso ini ịna ḅara-kuḅu ḅẹ etela mu. 18Ini iru ḅuu bulu-buluma tẹ ḅẹḅẹ ini ịna akụnakụna mẹnjị mẹ ḅụ tọrụ-ḅẹlẹ tẹ, nwẹnị tọrụ-tuu ḅẹlẹma kụn nẹngịarị. 19Fẹrụ fun fọnọ so ḅara mie ịn kẹ ịn fọnọ so ḅarị ḅara, tẹ ịna oru nimi apụ agba ma nwẹnị ịna aḅụụ jịrịma ḅa.
Currently Selected:
Hosiya 4: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria