Habakọkụ 3
3
Habakọkụ Tẹkẹm
1Mie ịkịankoro Habakọkụ kọn tẹkẹ:
2“KỊNỊNYANAḄỌ, ị́ mịẹtẹ ye mẹ à naa tẹ,
tẹ ẹgwẹ ị̀ ḅaa tẹ.
Mịọkụ siin mịẹẹ wamịna asakị ḅụ,
ị́ kọrị-kọrị opu aị.
Ọkụrụkụrụ nyanaa, ị́ ịganịarị sakị mẹ ḅụ sọ.”
3Tamụnọ Idọmụ ḅụ sime tẹ siin-ḅoarị,
fịafịa Tamụnọ ḅe siin-ḅoarị Paranị ḅẹ tụndụ ma ḅụ.
Ori ebube So ma gbaịn-arị,
tẹ ò tokini ḅịḅị kiri mẹ ḅin wararị.
4Bele ḅịya ḅụ ò ḅoarị;
Ọ̀ ḅara ḅụ bele kọrị-kọrị pakarị,
anịanga ọ̀ kụrọ ḅọị sime wararị.
5Ori obi kẹ ọ̀ tọrọkọ tarị fịrịmarị
tẹ tọn-arị fị ò ḍuka ḅoo.
6Ọ̀ daasịẹarị sakị kiri jikearị;
ọ̀ tọrụ pịkị sịẹ ma ḍiki kụma ini oju sẹkịarị.
Sime gbamaso tụndụ ma puu-puu sararị;
ḅụọ fa ḅụọ atụndụ ma kiri sọ faarị,
ọ̀ mẹnjị-mẹnjị tụndụ ma, elemu sakị ḅụ.
7Àrị ẹrịm Kusani ḅẹ apụ ḅalafaam
tẹ Midiya ḅẹ apụ oju sẹkịm.
8KỊNỊNYANAḄỌ, tọrụ ma mịẹ tẹ ị́ ịganị mụnọọ?
Abajị mẹ ḅọrọ mịẹ tẹ ị́ ịganị ḅụra mụnọọ?
Oḅuto ma ọgọnọ ḅụ mie ị́ dọkụ yee;
erise oḅuto mẹ anie í kirimẹnjị-ọmụarụ,
í owu-ḅara-iḅi ọkị-ḅo ị́ atomi pịrị sakị mẹ ḅụ.
9Ị́ tẹlẹmam í iboli kẹ ye mịẹ,
ị́ tẹlẹmam ị́ aḍịẹịn tẹịn.
Í so-ḅalapụ mẹ kọrị mu kiri puu finjim.
10Tụndụ ma ị́ ẹrị sakị arị jikem;
minji paịn-saram So-tọrụ ma ḅụ.
Kiri suku-ḅio ḅẹ aminji ma ḍarịm,
arịḅẹ ọnụngọ ma gele-faam.
11Ị́ aḍịẹịn ma fọnya kọrị ḅọrọ
tẹ ị́ ḅịyarị aḅẹkẹrẹ nwanam ḅọrọ sakị,
ịrụa mẹ na akalụ mẹ na sịẹsimem.
12Ị́ mẹnjị kiri mẹ saḅa-ḅọrọm ịganị ḅụ;
owi ịganị ḅụ ị́ sịẹ-sịẹ ma nanga ḅọrọm.
13Ị́ ị́ atomi ḅọrọma ḅẹ tẹ paka mum,
sẹlẹ ọkị amadaḅọ ḅe ḅọrọma ḅẹm.
Í si-sịḅịḅio-sụapụ ma sịḅịdaḅọ ḅe fomu gbinm
tẹ ye-kọnma-a ḅara kẹ in ḍukamẹnjị apụ ma
ḅaa gulugulumam.
14Ị́ aḍịẹịn ma ori ọmụ-ogbo sịḅịdaḅọ ḅe kan sọ-mum
anị erise ḅara kẹ wa gala-galama ḅẹ ḅo sakị,
nwẹnị ḅọị ḅara kẹ igoin-apụ ma ponomarị apụ
kịka tẹ wa ḍikiḍiki tẹ ḅioḅẹlẹarị.
15Ị́yẹrị asụ ma ḅụ abajị mẹ nanga ḅọrọm,
tẹ opu kụrọ nyana aminji ma fiko pakamam.
16À mie mẹmgba naa tẹ oju sẹkịarị,
ị̀ ḅịḅị-apakịrị ma jikearị ḅalafa ḅụ.
Ì oju fịịarị,
tẹ ị̀ aḅụọ pụmbụarị ì suku-ḅio ḅụ.
À yaụ-sime tẹ ḅo ḅarị sakị mẹ koruarị
Tamụnọ owu kẹ wa pakarị apụ ma fomu ḅẹ sakị mẹ.
17Anị nwẹnị karakaraye tẹ figi asịn ma mgbọlụ sụa-a sọ,
tẹ gbọrụ girepu sọ vaịnị asịn ma ḅụ paka-a sọ
anị nwẹnị karakaraye tẹ olivu ḍiḅi-aị ma ye sụa-a sọ,
tẹ ḍụọ ḍiḅi akiri ma mbịaka pakama-a sọ,
anị nwẹnị karakaraye tẹ anana mamgba fịị sọ,
tẹ opu anama koko ayọ ma ḅụ gberie-sọ ofori sọ,
18À paa ḍereku tẹ ḅioḅẹlẹ ḅa,
KỊNỊNYANA-TAMỤNỌ ḅe anie ị̀ ḅọrọmaḅọ ẹrẹsị
19 #
2 Sam 22.34; Dev 18.33 KỊNỊNYANAḄỌ ḅe ịnyọ kẹ ị̀ pịrịarị.
Ori ị̀ mịẹ tẹ ị̀ aḅụọ kiri ḅụ kụrọ sịẹarị, tụḅụra aḅụọ ọkụ,
tẹ ye-ḅụụ-la-a ḅara ì koko kpaịnmarị
tụndụ ma ọgọnọ ḅụ.
Currently Selected:
Habakọkụ 3: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria