Ẹfisọsị 2
2
Fịị Ḅụ Ḅọrọ Mu Ḍumo Ḅụ Sọ
1 #
Kọl 2.13
Ọmịna ḅịḅịpoki-a na ọmịna asi na gotẹ, ḅọrọtẹ sakị mẹ ḅụ ọ́ tẹmẹ ḅụ fịịm. 2Anị sakị mẹ ḅụ tomikiri ḅẹ si etela mẹ mie ó ḍukamẹnjị sime ye; ọ́ ḅẹrẹtọn So-tọrụ simearị tẹmẹ akụrọ ma pịrịarị ḅọ ḅe, tẹ mịọkụ ḅẹrẹtọn Tamụnọ ḅịḅịpoki-a apụ ma pịrịarị tẹmẹ ḅe, ḅịḅịpokim. 3Karakaraye ḍuko ḅụ, wamịnị-mgba ịn mịẹ ḅara mịẹ tẹ tomḅọ si sime-ḅara mẹ ḅụ wa ḅiiarị aị ma ḍiki angam, wamịna meni-oju na wamịna akuroma na ḅụụ-ḅẹlẹ aị mịẹ ḅụ. Wamịna tomḅọ si sime-ḅara mẹ ḅụ wa ḅẹ tomḅọ, tomḅọ na kịka ḅara ḅụ; wa sime Tamụnọ ịganị pịrịm.
4Kụma Tamụnọ ọkụrụkụrụ mẹ ḅaka ḅara na, ọ̀ nyana wa pịrị ḅẹlẹma mẹ ḍụḅa la ḅara na 5mịẹtẹ wa ḅịḅịpoki-a ḅụ tẹmẹ ḅụ fịị wararị ogbo ọ̀ wa kẹ Kịrayịsị ḅụ sụa ḍumomam. Tamụnọ ḍiki-ḅụụjịrị ḅụ mie ọ́ ḅọrọma ye. 6Wa Kịrayịsị Jizọsị na gbọrụ ḅụ sime ye ḅụ, ọ̀ wa kẹ ori na sụa saakịmam, wa ori na So-ḅio ḅụ ḅẹrẹtọn ḅẹ ḅara. 7Ò gotẹ miemẹ mịẹ ye, kẹ kịnị ḍie mu ḅẹẹ-sakị ḅẹẹ-sakị la, kẹ Kịrayịsị Jizọsị ḅụ ọ̀ kẹ wa ḅẹlẹma ye mẹ ḍie-pakama, ọ̀ ḅakatẹ, inetẹ go ḅịa opu ḍiki-ḅụụjịrị ḅẹlẹma mẹ ḅụ. 8Kẹ gotẹ ọkọ ḍukoarị, Tamụnọ ḍiki-ḅụụjịrị ḅụ mie ọ́ ḅọrọ tẹ ḅọrọma ye, minini nyana ḅụ, ọmịna aḅụụ ḅụ ḅo ye-a, kụma Tamụnọ ḍiepịrịye; 9kọrịnama ḅụ-a, mịẹtẹ gbọrụḅọ-sọ inetẹ ḅụụ boma ḅịa ḅara. 10Tamụnọ wa kẹ wa simearị ḅara mẹ wẹrịm, tẹ Kịrayịsị Jizọsị na gbọrụ ḅụ sime ḅụ, ọ̀ wa tẹmẹ tẹ kẹ iḅi amịẹaị ḍumo pịrị tẹẹ, anie ọ̀ tẹlẹma wẹrị wa pịrị tẹ wa mịẹ ḅẹ aị ma.
Kịrayịsị Ḅụ Wamịnị-mgba Gberie
11Ọmịnị Ja asịẹ ḅẹ apụ ma, ọmịnị iyi ḅara ḅụ — Juu-ḅẹ-apụ ma kẹ ọ́ sịn-arị ye anie, “tarị-ḅụụ sin-a apụ”, tẹ nwẹnị “tarị-ḅụụ sin apụ” kẹ ịna aḅụụ sịn-arị (anie tomi kẹ ịna ameni-oju ma mịẹarị ye gboloma ye) — ọ́ ḅọrọ tẹ sakị ḅụ ó sime-ḅara kẹ ḅiokoromaa. 12Anị sakị mẹ ḅụ ọ́ Kịrayịsị ḅụ ḅele wararị. Ọmịnị Ja asịẹ ḅẹ apụ, tẹ ọ́ pịkị sime Tamụnọ sẹlẹ-ọkị tẹ apụ ma ogbo mẹ pịrị-a. Ọḅọkụ ma ḅụ sọ ó kiri nyana-a, anie Tamụnọ minini ori atomi pịrị aị ma ḅụ sịrẹrẹ aị ma, anịsakị mị tomikiri mẹ ḅụ ḅiokpọma ye ofori ḅara na Tamụnọ nyana-a ḅara na mie ọ́ kẹ anga ye. 13Kụma mịọkụ, ọmịnị ala-jụ sime, sime apụ ma, Kịrayịsị fịị ọ́ kẹ ḅo kpekima tẹ, ọ́ Kịrayịsị Jizọsị na gbọrụ ḅụ sime tẹẹ. 14Kẹ gotẹ ọkọ ḍukoarị, Kịrayịsị ḅarana dein ọkị-ḅo wa pịrị tẹ, Juu-ḅẹ-apụ na Ja asịẹ ḅẹ apụ na kẹ ḅo gbọrụ atomi mịẹ ḅụ. Ori oju mie ọ̀ kẹ kiki-pẹlẹ onu mẹ tẹ in puu-ḅelema tẹ ịn kẹ fịya-a apụ sọma sime ye mẹ sukuruma gbin ye. 15#Kọl 2.14Ò Juu-ḅẹ-apụ Oloko mẹ, anị ḅio ịn sụa kịrị-kịrị oloko ma na, ịn tọn koroma aị mamgba na, kẹ kụrọ nyana-a kiri ḅụ wẹrịm, mịẹtẹ ọ̀ maa tomi aḅara ma kẹ gbọrụ ịwọ atomi sọma ḅẹ ḅara, ò ḅioju na ini na gbọrụ ḅụ sime ḅụ, mị ḅọkọ ḅụ nwẹnị dein mịẹ. 16#Kọl 1.20Ori ẹngbẹsẹ-sịn ọgọnọ kọn fịị mie Kịrayịsị kẹ fịya-a mẹ kan sin ye. Ẹngbẹsẹ-sịn mẹ ḅụ mie ọ̀ ḅọrọ tẹ maa kịrị-kịrị atomi ma kẹ gbọrụ oju mịẹ ye, tẹ mịẹtẹ ịn pịkịma Tamụnọ ḍọkụma-ḅo ye. 17#Ayị 57.19Mie ḅụ Kịrayịsị ḅo tẹ dein Iḅi Oku mẹ ḍuko kịnị mamgba pịrịm-o ḍuko ọmịnị Ja asịẹ ḅẹ apụ tẹ Tamụnọ ḅụ ḅele fa sime apụ ma pịrị, pịkị ḍuko Juu-ḅẹ-apụ tẹ ó kpeki sime apụ pịrịị. 18Kịrayịsị ḅụ mie wamịnị-mgba, Juu-ḅẹ-apụ na Ja asịẹ ḅẹ apụ na, inetẹ gbọrụ Tẹmẹ ḅe ḅụ ḅo Ḍaḅọ ḅe tọrọkọ laarị.
19Anie ḅụ, ọmịnị Ja asịẹ ḅẹ apụ ma, ḅarị jen kẹ kịnị tọrụ nimi-a apụ-a, anịanịa bịan apụ-a; mịọkụ ó ḅo Tamụnọ atomi ma na gbọrụ ama ḅẹ apụ na Tamụnọ warị-kpo mẹ ḅẹ apụ na sọ tẹ. 20Ọmịnị sọ warị nama aḍụḅarị sọ tẹ fịrịmẹnjịapụ ma na ịkịankoroapụ ma na saakị warị-suku mẹ ọgọnọ nama tẹ, anie Kịrayịsị Jizọsị ḅioju ịkọlị palị ḍụḅarị sọ pịrị wararị warị mẹ. 21Ori anie bebe warị mẹ ọlọ kpesi wararị ḅọ, tẹ anị mịẹtẹ anị gele paka-ḅo Tamụnọ fịafịa warị sọ tẹ, saakị sikima KỊNỊNYANAḄỌ ḅe pịrị tẹ ye sọarị ḅọ. 22Ori na gbọrụ ḅụ sime ḅụ ọmịnị sọ, ini ọ́ kẹ osi apụ mamgba na sụa nama gbolomarị tẹ anị ḅo Tamụnọ ọ̀ Tẹmẹ ḅe ḅụ ḅọrọ tẹ angarị warị sọarị.
Currently Selected:
Ẹfisọsị 2: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria