Nimi Tolumaḅọ 2
2
1Àrị ì ḅioḅẹngbọ ḅụ kuromam mịnẹ, à tọrụ-ḅẹlẹ sime-ḅara ḍọkị-nimi tẹ tọrụ-ḅẹlẹ ḅa. Kụma ḍikii, à ḍọkị-ẹrịm, Miemẹ sọ ḅintẹ ḅara kẹ anị fieye nimi-a ye. 2À ḍọkị ẹrịm mịnẹ ḍẹrị anie nọmụ, anịsakị tọrụ-ḅẹlẹ sọ gbọrụ iḅiye sọ mịẹ-a. 3Ị̀ tẹmẹ paa nimi ịgbanịarị ye ḅụ à tọn-pẹlẹm mịnẹ arị iru ḅuu, ḅuu tọrụ-ḅẹlẹ-ḅẹlẹ tẹ tii ma ḅọrọ ḅa. À kuromam mịnẹ mie iḅitẹịn ḅara tẹ tomi inetẹ kẹ tomikiri ḅụ ịna kpụlụ, kpụlụtẹ aḍumo ma sime na-iḅi ḅara.
4 #
1 Ama 10.23-27; 2 Pkị 9.22-27 À tọnwa opu akọrịnama kọrị sọmam. À warị nama sịra, tẹ pịkị kụrọ aḍụọ ḍiḅi ị̀ ḅụụ pịrịm. 5À warị akaka ḅẹ aḍụọ ḍiḅi, pịkị sara-sime na-iḅi anga pakama ị̀ ḅụụ pịrị tẹ arị ḅio tọrụ-kịrịkịrị mgbọlụ sụarị asịn ḍiḅim. 6À suḅe soku-soku sara ị̀ ḅụụ pịrịm, minji ḍuu-ḍu kẹ ḍiḅi wararị asịn ma suku sara ḅẹ ḅara. 7#1 Ama 4.23À tọnwa omoniapụ fẹm, owiapụ na ereme na; anịsakị ị̀ warị-kuḅu ḅụ iyi omoniapụ sọ à nwẹn nyanam. Jeruselemu ḅụ tarị anga tẹ so tẹ ḅọ tẹ à nyana anambulo ogbo na, anana na oḅori na ogbo-ogbo na la kịẹn-ḅịḅị la ye nyana ḅọ ofori. 8#1 Ama 10.10,14-22À ḅaka ḅara kẹ ngọ kọnm, tẹ tọnwa seleḅa na, golu na tan-tan kobiri kpolima ị̀ ḅụụ pịrịm; anie à ḅẹrẹtọn pịrịarị amadapụ ma ngọ awarị ma ḅụ ḅo aị. Owiapụ na ereme na tẹ nume su-su ì ḅioḅẹlẹma apụ sọ à nyanam, anịsakị owiapụ ḅụụ ḅẹlẹ-ḅẹlẹ ḅara ḅụ arị à ḅii ḅara kẹ tọnwa ereme sọ na ịgwam.
9 #
1 Pkị 29.25
Anieḅụ à gburo-gburom, tẹ gburo-gburo kẹ tarị ị̀ tọrọkọ Jeruselemu ḅụ anga tẹ so apụ mamgba nẹngịm, tẹ nimi kẹ yẹrị ḅe mịẹ ye goyegoye mịẹm. 10À tọrụngbọ kẹ ẹrị tẹ ḅii-ye ḅii-ye à nyanam. Ì ḅioḅẹngbọ ḅụ tọrụ-ḅẹlẹ tẹ à kẹ ị̀ ḅụụ kụma ye ofori; kẹ gotẹ ọkọ ḅẹẹarị, ị̀ akọrịnama mamgba ḅụ, ì ḅioḅẹngbọ ḅioḅẹlẹ ḍọkị-ẹrịm; anịsakị miemẹ anie ị̀ akọrịnama mamgba ḅụ ị̀ gbẹẹ-ye. 11Anịtẹso à nwẹnị à kọrị tẹ aị mamgba na, à lịlị tẹ anị kọrị ḅụ fama ye kẹ ḅiokoroma sakị, ḍikii! — arịmgba ḅintẹ ḅara kẹ arị fieye nimi-a aị; mḅọ gbala fẹrụ ḍukarị ọkụ, anịsakị tomikiri mẹ ḅụ nyana tẹ kẹ sọye mịẹ-mịẹ ye ofori.
12Anịtẹso à nwẹnị vuunma pịkị tẹ nimi na, nọmụ na, nimi-a na kẹ ḅiokoroma; anịḅọ ḅe tẹ amadaḅọ ḅe ḅọrọ tẹ ḅo ḅarị ḅọ ḅe ori inetẹ tiye mịẹ ḅẹ, amadaḅọ ḅe kọrị tẹ ye ḅụ saakị sikima tẹ? 13Anịtẹso à nwẹnị ẹrị mịnẹ bele kanakana nẹngị ḅara, mie nimi, nimi-a nẹngị ḅara. 14Ye-nimiḅọ ḅe ọ̀ mịẹ ḅẹ ye nimi wararị, tẹ kpaịnma anị mịẹarị; kụma ye-nimia-ḅọ ḅe mịẹ ḅẹ ye nimi-a; kụma anịsọ gbọrụ mịẹye mie sime inimgba pịrị ye. 15Anịtẹso à nwẹnị ị̀ ḅụụ ḅẹẹ, “Ye-nimia-ḅọ ḅe la ye la ye, mie yẹrị sọ la ḅarịye ḅẹẹ-sakị, à tiegotẹ mị-ḅara kẹ ḅẹlẹma ye nimi?” Anieḅụ à nwẹnị ị̀ ḅụụ ḅẹẹ mịnẹ miemẹ sọ ḅintẹ ḅara kẹ anị fieye nimi-a ye. 16Gbọrụḅọ-sọ ye-nimiḅọ ḅe kẹ ḅiokoroma alama-a ḅara mie gbọrụḅọ-sọ pịkị ye-nimia-ḅọ ḅe sọ kẹ ḅiokoroma alama-a ḅara. Ọmịnị ẹrị ḅa, ḅaa-fa-berembe, ini inimgba kẹ ḅioḅọrọma ḅa, inimgba fịị ḅa nwẹn ḅẹẹ sakị. Ye-nimiḅọ ḅe fịị ḅarị ḅara mẹ pembema ḅara mie ye-nimia-ḅọ ḅe sọ fịị ḅarị ḅara. 17Miemẹ ḅụ à nwẹnị ḍumo ḍiki-ḅioḅu, kẹ gotẹ ọkọ ḅẹẹarị, tomikiri mẹ ḅụ à mịẹye-mịẹye ḅụụ-fụka dogi-ḅo ị̀ pịrịm, gbala arịmgba ḅintẹ ḅara kẹ arị fieye nimi-a aị ẹrẹsị, tẹ fẹrụ ḍukarị ye ọkụ.
18À nwẹnị tomikiri mẹ ḅụ à lịlị ye mẹmgba ḅụ tiye-ì-gbo ḅẹẹ, àrị ẹrịm, àrị arịmgba koroma so ì kiri ọkị ḅẹ ḅọ pịrị ḅẹm ẹrẹsị, 19anịsakị tụḅọ nimi, anị ḅọ mẹ ye-nimiḅọ, anịanịa ye-nimia-ḅọ sọ ḅarị ḅoto? Anịsọ, ori mie à tomikiri mẹ ḅụ tọrụsiẹrị, lịlị, tẹ ì ye-nimi ḅụ nyana ḅo ye mẹmgba ḅụ ḅẹrẹtọn ḅarị ye. Miemẹ sọ ḅintẹ ḅara kẹ anị fieye nimi-a ye. 20Anieḅụ à nwẹnị tiye-ì-gbo ḅẹ ì ḅioḅẹngbọ ḅụ, tẹ ḅio-lọkọ ḅụ ọḅụ pịkị tomikiri mẹ ḅụ à lịlị ye mẹmgba gbin, 21kẹ gotẹ ọkọ ḅẹẹarị, ja asakị, tomḅọ amịna nimi na, ḍawọ ḍịn ye na, ḅara kẹ mịẹ ḍin ye na, kẹ lịlị fama ḅọ arị ḅụ paka-ḅo aị mamgba koroma so kẹ arị gotẹ ḅụụ ḅaa-a ḅọ pịrị ḅa. Miemẹ sọ ḅintẹ ḅara kẹ anị fieye nimi-a ye, tẹ pịkị gburo-gburotẹ opu siye. 22Tomḅọ nwẹnị tomikiri mẹ ḅụ mḅọ lịlị tẹ nụnụ ye mẹmgba ḅụ tiye nyana? 23#Job 5.7; 14.1Gbala ò ḍumo-ene mamgba ḅụ, ḅụụ-gbene-a ọ̀ ḅụụ ḅin wararị, tẹ ọ̀ kọrịnama mẹ nwẹnị ḅo ịganị sọ; ḍin ḅụ sọ ò ḅioḅẹngbọ ịnyọsara-a. Miemẹ sọ ḅintẹ ḅara kẹ anị fieye nimi-a ye.
24 #
Nim 3.13; 5.18; 9.7; Ayị 56.12; Luk 12.19; 1 Kọr 15.32 Tomi fị-na-ḅuu-na tẹ pịkị ịn lịlị ye ḅụ tọrụ-ḅẹlẹ nyana mẹ, anị nẹngị ye ofori. Miemẹ sọ arị ẹrịm, Tamụnọ ḅara ḅom; 25kẹ gotẹ ọkọ ḅẹẹarị, ori ofori ọkụma tụḅọ inetẹ fị ḅẹ, anịanịa tụḅọ inetẹ tọrụ-ḅẹlẹ nyana ḅẹ? 26#Job 32.8; Egb 2.6Gbala ọ̀ ḅụụ-ḅẹlẹ ye mịẹarị ḅọ mie Tamụnọ nimi na, ye ḍawọ ḍin na, ḅioḅẹlẹ na kẹ pịrịarị ḅọ ẹrẹsị; kụma kobiri tunduruma kpoli kọrịnama mie ọ̀ kẹ si-mịẹḅọ ḅe pịrị ye, kẹ oriḅe tẹ Tamụnọ ḅụụ-ḅẹlẹ ye mịẹarị gbọrụḅọ pịrị ḅẹm ngẹrị gotẹ. Miemẹ sọ ḅintẹ ḅara kẹ anị fieye nimi-a ye, tẹ fẹrụ ḍukarị ye ọkụ.
Currently Selected:
Nimi Tolumaḅọ 2: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria