Danẹlị 2
2
Nebukadineza Ḍawọm
1Nebukadineza ama-da tẹ maaịn karama kụra mẹ ḅụ ọ̀ ḍawọm. Anị kẹ ò ḅioḅẹngbọ pikirima la ḅara gotẹ, ọ̀ ḅarị inetẹ mono-a, 2mie ḅụ ọ̀ fịrịma mu ḅịrị-ẹrịapụ na, majịkị-mịẹapụ na, si-atẹmẹ na mịẹ gbolomarị apụ na arịapụ na sịnm, in ḅo ḍawọ mẹ puu-finji ọ̀ pịrị. In ḅo tẹ amadaḅọ ḅe tọrọkọ sịẹ sakị 3ori ịn ḅẹẹm, “À kọn wararị ḍawọ gotẹ ì ḅioḅẹngbọ pikiriarị. Àrị anị fiearị ye nimi ḅẹ-ḅiiarị.”
4Ịn nwẹnị Aramayịkị ẹkwẹn-ḅịḅị ḅụ amadaḅọ ḅe pakịrị, “yei Gburo-gburo Opuḅọ, ḍumo mu ḅẹẹ-sakị ḅẹẹ-sakị laa! Ị́ ḍawọ mẹ ḍuko wa pịrị, tẹ wa anị puu-finji ị́ pịrị ḅa.”
5Amadaḅọ ḅe nwẹnị ịn ḅẹẹ, “Àrị ì ḅioḅẹngbọ ḅụ tọn-pẹlẹ tẹ mịnẹ ọ́ ḍawọ mẹ ḍuko ị̀ pịrị nyanam, anị tẹso, nwẹnị anị puu-finji ị̀ pịrị. Ọmịnị ine-a ḅẹḅẹ, à mịẹ tẹ ini ọ́ nụnụ-kanị ḅa eleke-eleke ḅụ, tẹ ọmịna awarị ḅo opu sara sọ ḅa. 6Kụma ọmịnị inetẹ ḍawọ mẹ ḍuko tẹ pịkị anị puu-finji ị̀ pịrị ḅẹḅẹ, à ḍiepịrị-aị na opu kụn ḅẹ gbẹẹ-aị kẹ ọ́ pịrị ḅa. Mịọkụ ọkọ ẹrẹsị ọmịnị à kọn ḍawọ mẹ ḍuko tẹ anị puu-finji ị̀ pịrịị.”
7In siin amadaḅọ ḅe pakịrịm, “Gburo-gburo Opuḅọ, paa ḍawọ mẹ ḍuko wa pịrị, wa anị puu-finji ḅa.”
8Anie ḅụ, amadaḅọ ḅe oloku pakamam, “Mie à paa kuroma gbọrụ ḅara mẹ! Ọ́ sakị nyana ḅẹ ḅara ḍọkịarị, ọmịnị ẹrị tẹ mịnẹ ì ḅioḅẹngbọ ḅụ à tọn-pẹlẹ tẹ 9gbọrụ fomu-ḅara mẹ kẹ ọmịnị-mgba pịrị, ọmịnị inetẹ ḍawọ mẹ ḍuko-a ḅẹḅẹ. Ọmịna ogboku ḅụ ọ́ ḅịḅị-kẹ-ogbosọ tẹ iruo-aị iruo-aị ḍuko ị̀ pịrị ḅẹ-ḅiiarị, ó nimi wararị sakị ye ḍima ḅẹ ẹrẹsị. Ọ́ ḍawọ mẹ ḍuko ị̀ pịrịị, anịtẹso à nimi ḅa mịnẹ ọ̀ pịkị inetẹ anị puu ḅa.”
10Ḅẹrẹ ḍuko ò tolumapụ ma nwẹnị pakịrị, “Gburo-gburo Opuḅọ, mị bebe tomikiri mẹ ḅụ gbọrụḅọ-sọ ofori inetẹ í ḅiiarị ye mẹ nimi tẹ ḍuko ị́ pịrị ḅẹ ḅọ. Jene gbọrụ amadaḅọ sọ ofori, anị ḅọrọ opu sọ tẹịn tẹ pịkị kụrọ nyana tẹịn ḅọ sọ, nwẹn sime ye ḅii mḅọ ḅịrị-ẹrịapụ, majịkị-mịẹapụ, na arịapụ na aḅara ḅụ. 11Gburo-gburo Opuḅọ, í ḅiiarị ye mẹ ḅụụ-fụkama la ḅara ḅụ gbọrụḅọ-sọ inetẹ anị mịẹ ị́ pịrị ḅịa, oru-atamụnọ ma sikima, tẹ ini ịn pịkị tomina ogboku anga-a.”
12Anị sakị mẹ ḅụ, amadaḅọ ḅe gbọrsịḅị ịganị fama tẹẹ, tẹ nwẹnị tọn mịnẹ in mu Babịlọnị ḅụ simearị Ye-nimiapụ mamgba ḅaa. 13Mie ḅụ oloko mẹ paka-mum mịnẹ ini inimgba ḅaa, Danẹlị na ori ikiapụ ma na sọ kẹ sụa ḅaa.
Tamụnọ Ḍawọ Mẹ Fieye Kẹ Danẹlị Ḍiem
14Anịtẹso Danẹlị mu Ariyọkụ, amadaḅọ ḅe ḍikiḍikiarị ọmụapụ ma sịḅịdaḅọ ḅe, tẹ ịn kụrọ kẹ pịrịm tomi ma ḅaa nwẹn ḅẹẹ ḅọ ḅe lam. Kpọma ẹbị tẹ kọọn na-iḅi ẹkwẹn kọn ḅụ, 15ori Ariyọkụ gbelam amadaḅọ ḅe tiegotẹ ọkọ sime kụrọtẹ oloko sụa ḅoto. Mie ḅụ Ariyọkụ paka ye mẹ ḍuko Danẹlị pịrịm.
16Anị-gbọrụ-kirikiri Danẹlị mu tẹ amadaḅọ ḅe ḅara kụrọ ḅiim ọ̀ mịẹ tẹ sakị mẹ sụma tarị ḅara mẹ nẹngịị, mịẹ tẹ ori inetẹ ḍawọ mẹ puu amadaḅọ ḅe pịrị ḅe ḅara.
Tamụnọ Nebukadineza Ḍawọ Mẹ Puu-finjim
17Anịtẹso Danẹlị so warị mu tẹ ḍuko ori ikiapụ Hananaya, Misẹlị, na Azaraya na pịrịm paka ye mẹ. 18Ò ḍuko ịn pịrịm in So-ḅio ḅẹ Tamụnọ ḅe tẹkẹ tẹ ò ḍiki-ḅụụjịrị kẹ ịn pịrị tẹ ḅọịye mẹ mịẹ finji ịn pịrị, tẹ ịn ḅarị ịn kẹ osi Babịlọnị ḅụ ḅẹrẹ-ḍuko amadaḅọ ḅe tolumarị apụ ma ḅụ sụa ḅaa ḅịa ḅara. 19Anịtẹso anị gbọrụ ḍin mẹ ḅụ Tamụnọ ḅọịye mẹ mịẹfinji Danẹlị pịrịm ịkịan ẹrị ḅụ, tẹ ò So-ḅio ḅẹ Tamụnọ ḅe tokinim: 20Tamụnọ anie ye-nimiḅọ pịkị kụrọḅọ!
Ò tokini mu ḅẹẹ-sakị ḅẹẹ-sakị la.
21Ori anie ḅẹrẹtọn sakị-sakị ma pịrịarị;
ori mie kịnị kẹ ama-damarị pịkị amadapụ sin-arị
ori mie nimi na yefieye naa na kẹ kịnị pịrịarị.
22Ò pokolotẹ ḅọị wararị aị mịẹfinjiarị;
Ọ̀ kanakana ḅio kikima wararị ye nimi wararị;
tẹ ò ḅioju bele ọ̀ kana-koro wararị.
23Ì elemu aḍapụ ma Tamụnọ, àrị í tokiniarị pịkị ị́ kụn-arị.
Í nimi na ịnyọ na kẹ ị̀ pịrị tẹ;
ị́ ị̀ tẹkẹ pakịrị tẹẹ
pịkị wa ḍuko amadaḅọ ḅe pịrị ḅẹ ye kẹ wa ḍie tẹẹ.
Danẹlị Ḍawọ Mẹ Ḍuko Amadaḅọ Ḅe Pịrị Tẹ Anị Puu-finjim
24Mie ḅụ Danẹlị nwẹnị Ariyọkụ, amadaḅọ ḅe tọn tẹ ḅẹrẹ ḍuko amadaḅọ ḅe tolumarị apụ ma ḅaa ḅẹ ḅọ ḅe dama-mu. Ori ọ̀ ḅẹẹm, “Wa ḅaa ma. Wa ọkị amadaḅọ ḅe dama-mu, tẹ àrị ọ̀ ḍawọ mẹ puu ọ̀ pịrị.”
25Anị-gbọrụ-kirikiri Ariyọkụ nwẹnị Danẹlị ọkị Ama-da Nebukadineza tọrọkọ mu tẹ ḍuko amadaḅọ ḅe pịrị, “Juu-ḅẹ kun-ḅo apụ ma ḅụ à gbọrụḅọ ḍọkị-ẹrị tẹẹ inetẹ, Gburo-gburo Opuḅọ, ị́ ḍawọ mẹ puu ị́ pịrị ḅẹ ḅọ.”
26Amadaḅọ ḅe Danẹlị ḅẹm (anie ịn kẹ Bẹlịtisaza sọ sịn ḅọ ḅe), “Í inetẹ à ḍawọ ye ḍuko ị̀ pịrị tẹ anị puu ḅẹ aro?”
27Danẹlị pakịrịm, “Gburo-gburo Opuḅọ, gbọrụ arịḅọ, anịanịa majịkị-mịẹḅọ, anịanịa ḅịrị-ẹrịḅọ, anịanịa lolia-ḍikiḅọ sọ ofori inetẹ anie ḍuko ị́ pịrị ḅẹ ḅọ. 28Kụma gbọrụ Tamụnọ So-ḅio emi, tẹ ḅọịye mịẹfinjiarị ḅọ. Ọ̀ mịẹ tẹ í nimi tẹẹ, Í Opu Ḅụ, tọrọkọ-jụ paka ḅẹ ye. Mịọkụ à ḍawọ mẹ ḍuko ị́ pịrị ḅa, í monoarị ogbo ị́ ẹrị ịkịan mẹ.”
29“Í monoarị ogbo, Gburo-gburo Opuḅọ, ị́ tọrọkọ-jụ mẹ gboloma ye kẹ ḍawọm; tẹ Tamụnọ, ḅọịye mịẹfinjiarị ḅọ ḅe, paka ḅẹ-yearị ye kẹ ị́ ḍiem. 30Mịọkụ mị ḅọịye mẹ ọ̀ mịẹfinji ị̀ pịrị tẹẹ. Yẹrị ye-nimi ḅẹḅọ-ḅẹḅọ nẹngịm ḅẹ ye-a, kụma mịẹ tẹ, Gburo-gburo Opuḅọ, ị́ ị́ ḍawọ mẹ fiearị ye ḍawọ ḅo ḅẹ ḅara, pịkị í ḅioḅẹngbọ sọ akuroma ma fiearị ye naa.”
31“Gburo-gburo Opuḅọ, ị́ ẹrị ịkịan anie sịẹ gele ḅụra tẹ mḅudu ị́ tọrọkọ sịẹ simem, yori-yorima ḅịya pakarị, tẹ anị ḍiki kụma ḅalafama lamarị. 32Iḅi tẹịn golu mie ịn kẹ sịḅị mẹ mịẹ yee; ekpe mẹ na ḅara-akọngọ ma na nwẹnị seleḅa; konju mẹ na ḅụọ-ẹtẹnẹ ma na ini ojo kẹ mịẹm; 33ḅụọ-kụkụ ḅụ ideri-mu ḅụọ-ịkarị la nwẹnị ikulele, tẹ ḅụọ-suku ma ikulele na ọgbọịn-lịka na gwam. 34Ị́ anị ḍikiarị ogbo opu ḍụḅarị kpoo ịkụ ọgọnọ-jụ kịnị ḅara kẹ lama-a ḅara ḅụ paịn ideri-ḅo mḅudu mẹ ḅẹ ikulele na ọgbọịn-lịka na aḅụọ ma la tẹ arị kọsịma saram. 35Anị-gbọrụ-kirikiri ikulele mẹ na, ọgbọịn-lịka mẹ na, ojo mẹ na, seleḅa mẹ na, golu mẹ na nwẹnị kọsị-sara tẹ ịrụa kụra mbịaka gugu anga ḅẹ fọọn kịka. Fẹrụ nwẹnị anịmgba dogi so, kirikọn kalịye sọ ofori ḅara. Kụma ḍụḅarị mẹ ḍụḅa ḅo bebe tomikiri mẹ gbaịn koro tụndụ sọm.”
36Mie ḍawọ mẹ. Mịọkụ, Gburo-gburo Opuḅọ, àrị anị puu ị́ pịrị ḅa. 37Ị́yẹrị Amada-opu-nyanaḅọ, ị́yẹrị anie amadapụ mamgba ḅụ tẹịn ḅọ. So-ḅio ḅẹ Tamụnọ ḅe ị́ kẹ bebe tomikiri mẹ daarịḅọ sọma tẹẹ, pịkị kụrọ na, opu kụrọ na, kụn na kẹ ị́ pịrị tẹẹ. 38Ori ị́ kẹ tomikiri angarị apụ mamgba ḅẹrẹtọnḅọ mịẹ tẹẹ, pịkị nama na feni na amẹẹ mamgba ḅẹrẹtọnḅọ naa. Ị́yẹrị anie golu sịḅị mẹẹ. 39Ị́yẹrị ḅọrọ tẹso, jen bebe tomikiri mẹ da ḅẹ ḅọ, í opu sọ la ḅara la ḅịa ḅọ, tẹ anie ḅọrọ tẹso, tẹrẹị karamaye, ojo tomikiri da kụrọ, anie nwẹnị ḅẹrẹtọn bebe tomikiri mẹ pịrị ḅa. 40Anị tẹso, ini karama tomikiri da kụrọ paka ḅa, ikulele kụrọ-ḅara kụrọ ye, tẹ ye goyegoye kan-arị ye, anị tarị paka tomikiri da akụrọ mamgba kan kọsịma ḅa. 41Ị́ pịkị ẹrịm mịnẹ ḅụọ ọgọnọ ma na ḅụọ-atụngbalị ma na pakịrị ọgbọịn-lịka, pakịrị ikulele. Miemẹ fiearị mịnẹ anị puuatẹ pakịrị-pakịrị amakiri sọ ḅa. Anị kẹlẹ ikulele kụrọ nyana ḅa, ikulele na ọgbọịn-lịka na gwaa wararị ẹrẹsị. 42Ḅụọ-atụngbalị ma — pakịrị ikulele tẹ pakịrị ọgbọịn-lịka mẹ fiearị mịnẹ tomikiri mẹ gbọrụ pakịrị kụrọ ḅa tẹ gbọrụ pakịrị ịnyọ nyana ḅịa. 43Ị́ pịkị ẹrịm mịnẹ ini ikulele kẹ ọgbọịn-lịka na gwam. Mie fiearị mịnẹ anị tomikiri mẹ daarị apụ ma ḅụụkụrọma tẹ ịna furo ma gboloma ḅẹ ḍọkị ḅa sime-sime ḅụ, kụma ini inetẹ ọkọ mịẹ ḅịa, ikulele inetẹ ọgbọịn-lịka na gboloma tẹ inetẹ gberie mịẹ ḅịa ḅara mẹ. 44Arị amadapụ ma sakị ḅụ So-ḅio ḅẹ Tamụnọ ḅe kunoma ḅịa ama-da yọ pakama ḅa. Gbala-gbala kịnị anị nẹngịma ḅịa, kụma anị ye-kọnma-a ḅara kẹ tomikiri ḅẹ ama-da mamgba guluguluma ḅa, anị tẹso, anị sime gbamaso ḅa. 45Ị́ ẹrịm sịẹ-gele sime ịkụ ḅụ ḍụḅarị-kpo paịn paka-ḅom, gbọrụḅọ-sọ ḅara kẹ anị lama-a ḅara ḅụ, na anị wẹrị tẹ kẹ ini ikulele na, ojo na, ọgbọịn-lịka na, seleḅa na, golu na kẹ mịẹ mḅudu mẹ bịan kọsịma ḅara mẹ na. Opu Tamụnọ ḅe ḍuko ị́ pịrịarị, Gburo-gburo Opuḅọ, tọrọkọ-jụ paka ḅẹ ye. Ị́ ḍawọ mẹ kọn gbọrụ ḅara mẹ à nwẹn ḍuko ị́ pịrị tẹẹ, pịkị anị ḅẹ karakara kẹ puu ị́ pịrị tẹẹ.
Amadaḅọ Ḅe Gbẹẹ Ye Kẹ Danẹlị Pịrịm
46Anịtẹso Ama-da Nebukadineza kiri ḅio iḅo tẹ tọnm ini agba mịẹ-mịẹ Danẹlị pịrị, pịkị ḍiepịrị-aị kẹ ọ̀ pịrị. 47Amadaḅọ ḅe mẹẹ, “Ị́ Tamụnọ anie tamụnọ mamgba ḅụ ḍụḅatẹịn ḅọ, amadapụ mamgba Nyanaḅọ ḅe, tẹ ḅọịye mịẹ finjiarị ḅọ. À gotẹ mie nimi ye í inetẹ mị ḅọịye mẹ ḍuko finji tẹẹ.” 48Anịtẹso ori opu kiri kẹ Danẹlị pịrịm, tọnwa iḅi ḍiepịrị-aị kẹ ọ̀ pịrị, ọ̀ kẹ Babịlọnị ibe mẹ da ḅọ sọma tẹ pịkị ọ̀ kẹ ḅẹrẹ-ḍuko amadaḅọ ḅe tolumarị apụ mamgba sịḅịdaḅọ mịẹm. 49Danẹlị ḅii ḅara ḅụ amadaḅọ ḅe Sẹdarakị na, Mẹsakị na, Abẹdinigo na kẹ opu fịrị kirikiri ḅụ koromam Babịlọnị ḅụ; anị sime-ḅara sime-ḅara sọ, Danẹlị amada-warị mẹ ḅẹ ḅẹrẹ-siri mẹ ḅụ simem.
Currently Selected:
Danẹlị 2: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria