Fịrịmẹnjịapụ 6
6
Sọsị-ogbo Mẹ Ḅarasụa Ḅẹ Sọnọma Apụ Sẹlẹm
1Sakị kẹlẹ ḅọrọtẹ Jizọsị ḍukamẹnjịapụ ma kịẹn-ḅịḅị ḅo ḍụḅa tẹso, ịgbanịya pakam, Giriki fiearị Juu-ḅẹ-apụ ma na ama-kuḅu iyi apụ ma na ogboku. Giriki fiearị Juu-ḅẹ-apụ ma ịgbanịm mịnẹ ene, ene ḅụ fịrịmẹnjịapụ ma ḍie ḍie igbigi mẹ ịn ḅarị ịna diapụ-fịtẹ-ereme ma kiri kẹ ịn pịrị-a. 2Mie ḅụ oyi maa fịrịmẹnjịapụ finji ma nwẹnị Jizọsị minini apụ mamgba sịn kobiri tẹ ḅẹẹ: “Anị kura-a mịnẹ wa Tamụnọ ẹkwẹn mẹ wẹrịso tẹ igbigi na fị-fịaị na gboloma amịẹaị kẹ wamịna aḅara palịma. 3Ọkọẹrẹsị, mịnapụ, ọ́ Fịafịa Tẹmẹ ḅe ḅụụ ḅio ḅintẹ, ye nimi wararị sọnọma apụ sẹlẹ pakama-ḅoo ọmịna ogboku, tẹ wa mị fịrị mẹ kẹ ịna ḅara sụa. 4Tẹ wamịnị nwẹnị sakị nyana tẹ tẹkẹ na Tamụnọ ẹkwẹn mẹ kọn na kọrịnama mẹ kọrị.”
5Fịrịmẹnjịapụ ma ḍuko ye mẹ bebe ogbo mẹ ḅioḅẹlẹmam; mie ḅụ ịn nwẹnị Sitivini, minini na Fịafịa Tẹmẹ ḅe na ḅụụ ḅio ḅintẹ tomḅọ ḅe na, Filipu na, Porokorọsị na, Nikanọ na, Tayịmọnị na Pamịnasị na, Nikolasị na sẹlẹ pakama-ḅo ori Nikolasị ḅe Juu-ḅẹ ḅọ-a, tẹ Anịtọkụ nwẹn sịn ama ḅụ ḅo ḅọ, tẹ Juu-ḅẹ-apụ Tamụnọ minini ḅara ḅụ sime, sime ḅọ. 6Kobiri ogbo mẹ ịn kẹ fịrịmẹnjịapụ ma pịrị tẹ ịn tẹkẹ tẹ ḅara kẹ ịna ọgọnọ gbanam.
7Anịtẹso Tamụnọ ẹkwẹn mẹ nwẹnị wasama ma-mu, tẹ Jeruselemu ḅụ Jizọsị ḍukamẹnjịapụ ma kịẹn-ḅịḅị ḍụḅa tọrọkọ-tọrọkọ mum, tẹ agbamịẹapụ ma ḅẹ tọnwa-apụ sọ Jizọsị mininiye mẹ ọkịm.
In Sitivini Kunm
8Sitivini ḅe, Tamụnọ kpọma ọ̀ boma tẹ kụrọ kẹ ọ̀ pịrị la ḅara ḅụ opu ḅụụ-buama-aị na ḅụụ-gbiripuma aị na ọ̀ nwẹn kọrịm tomi ma ogboku. 9Kụma ịn kẹ Ḅarana sịḅị nyana tẹ apụ, sịn ama-warị ḅụ ḅo ja apụ ori na tụḅụrụm. Anị ogbo mẹ ḅụ Sayịrini na Alẹkịzanịdịrịya na ḅụ ḅo Juu-ḅẹ-apụ sọ simem. Ini na Silisiya na Esiya na ibe ma ḅụ ḅo Juu-ḅẹ-apụ na, nwẹnị saakị Sitivini na ye-nụnụa. 10Kụma Tẹmẹ ḅe kẹ Sitivini pịrị nimi la ḅara ḅụ ori ẹkwẹn kụma ini inetẹ ò kuḅu sịẹ-a. 11Mie ḅụ ịn nwẹnị ọḅụ kẹ kịnị pịrị fị mịnẹ ịn mu ḍukoo, “Wa ọ̀ ḅịḅị naam ò Mozizi na Tamụnọ na ḍuko simearị.” 12Mị ḅọkọ ḅụ mie ịn ḅọrọ tẹ tomi ma na ama ḅẹ omongiapụ ma na, Oloko toluma apụ ma na jikema tẹ in Sitivini kun tẹ ọ̀ kẹ Sịẹ-Kobiri mẹ tọrọkọ mu ye. 13Anịtẹso ịn nwẹnị kịnị kẹ sọ-ḅo, ini iruo kọn ori ọgọnọ gbana ḅẹ ḅara. Ini mẹẹ, “Ḅieḅe sakị mamgba wamịna fịafịa Tamụnọ-warị mẹ na Mozizi Oloko mẹ na ḍuko simearị. 14Wa ọ̀ ḅịḅị naam mịnẹ ḅie, Nazarẹtị ḅẹ Jizọsị ḅe Tamụnọ-warị mẹ kan sara tẹ pịkị Mozizi ḅụọ kụra-ḅio wamịna ama anga-anga aḅara mamgba ḍima fama ḅa.” 15Sịẹ-Kobiri mẹ ḅio sime apụ mamgba tọrụ kolokolo Sitivini ọgọnọ gbana tẹ ẹrịm mịnẹ ọ̀ tọrụkuḅu ḍima tẹ enjẹlị tọrụkuḅu kịka tẹ.
Currently Selected:
Fịrịmẹnjịapụ 6: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
