Fịrịmẹnjịapụ 23
23
1Pọlụ nwẹnị da-da Ḅẹrẹkọn-Siri mẹ ḍiki tẹ ḅẹẹ, “Ị̀ ama ḅẹ Izirẹlịapụ! Ị̀ tẹmẹ ḅioḅẹngbọ fịafịa lama wararị, à paka kụra-ḅio à kẹ ì ḍumo kọn-arị ḅara Tamụnọ tọrọkọ ḅụ, ḅo mịmgba la.” 2Sịḅịda-Agbamịẹḅọ Ananayasị, nwẹnị Pọlụ na kpeki tẹ sịẹsime apụ ma ḅẹẹ ini ori amgba ḅọrọọ. 3#Mat 23.27,28Pọlụ nwẹnị ọ̀ ḅẹẹ, “Mịẹ ḅara, mịẹ ḅara Tamụnọ ị́ ḅọrọ ḅa, ḅịkị ḅẹ-yearị tẹ tomi pịna-pịna agba kẹ ọmbị wararị warị-anga kịkarị ḅọ! Ị́ anịanga lẹgị tẹ kẹ ị̀ kọn ḅarị Oloko mẹ ị́ kọkọ kan tẹ, ị́ tọn tẹ ini ị̀ amgba ḅọrọ ḅẹ ye mẹ ḅụ!”
4Pọlụ na kpeki atomi ma nwẹnị ọ̀ ḅẹẹ, “Tamụnọ Sịḅịda-Agbamịẹḅọ mie ị́ nwẹn kẹ wọlọarị!”
5 #
Pks 22.28
Pọlụ nwẹnị pakịrị, “Ị̀ amịnapụ, Izirẹlị awọmẹ, ori Sịḅịda-Agbamịẹḅọ ḅara à nimi-a. Fịafịa Ḍiri mẹ ḅẹẹm, ‘Si ḅịḅị kẹ ị́ ama ḅụ ḅẹrẹtọn-arị ḅọ ḅẹẹ ma.’ ”
6 #
Fịr 26.5; Flp 3.5 Pọlụ ḍiki kụma Ḅẹrẹ-siri mẹ ḅụ Sadusiiapụ na Farịsiiapụ na emi ḅẹ sakị, ọ̀ nwẹnị oloku pakama, “Ị̀ amịnapụ, Izirẹlị awọmẹ! Yẹrị Farịsiiḅọ-e, pịkị Farịsiiḅọ iyiḅọ tụḅọ. À tọrụ kẹ fịtẹ-apụ saakị tẹ ḍumo ḅarị mẹ ḍikiarị mẹ kịngẹ mie in gotẹ ị̀ kẹ ḅẹrẹkọn ḅo ye!”
7Miemẹ ọ̀ ḅịḅị paka gbọrụ sakị, Farịsiiapụ ma na Sadusiiapụ ma na saakị kamụ-sọ tẹ, tẹ kobiri mẹ nwẹnị maa anga puu. 8#Mat 22.23; Mak 12.18; Luk 20.27(Sadusiiapụ ma ọkịm mịnẹ fịtẹ-apụ ḅarị saakị ḅịa, enjẹlịapụ na tẹmẹ ḅụ sime apụ na sọ ofori, kụma Farịsiiapụ ma tẹrẹị mamgba mininim.) 9Oloku ḅịḅị mẹ kụrọ ḅaka tẹso, Farịsiiapụ ma pakịrị ḅẹ Oloko toluma apụ nwẹnị kụrọma anị na tụḅụrụ ḅụ ẹkwẹn, “Ḅị tomḅọ ḅe mịẹ siye wa ẹrị-a. Ẹbịsịya tẹmẹ, anịanịa enjẹlị ẹkwẹn ọ̀ pịrị wararị!”
10Nụnụa mẹ kụrọ mu la ḅara mịẹtẹ ọmụapụ sịḅịdaḅọ ḅe ḅalafaam, ịn Pọlụ kanị-kọsịma ḅarị ḅoto. Mie ḅụ ọ̀ nwẹnị ọmụapụ fịrịma in mu tomi ma ḅara Pọlụ pụkọ-pakamaḅo tẹ ọ̀ kẹ ọmụapụ sime anga mẹ muu.
11Anị ḍin ḅụ KỊNỊNYANAḄỌ ḅe Pọlụ akaka sịẹ tẹ ḅẹẹm, “Ḅalafa ma, mị Jeruselemu mẹ ḅụ í ì ḍuko tomi pịrị tẹẹ, ị́ pịkị Romu ḅụ sọ anị gbọrụ ḅara mẹ mịẹ ḅa.”
Ịn Pọlụ Ḅaa Ḅẹ Ḅẹrẹ Ḅiyam
12Ene-ḅaa ḅẹ dede-ḅio ḅụ Juu-ḅẹ-apụ ma ḅụ kịnị nwẹnị kobiri tẹ ḅiya tẹ ye karị mịnẹ ịn Pọlụ ḅaa-a sime-ogbo in ye fị ḅịa, pịkị gberie-sọ ḅuu ḅịa. 13Kịnị amesi nẹngị apụ mị ḅẹrẹ mẹ ḅiyam. 14Anịtẹso ịn nwẹnị mu agbamịẹapụ ma na omongiapụ ma na la tẹ ḅẹẹ, “Wa ye karị wamịna aḅụụ pịrị tẹ mịnẹ wa Pọlụ ḅaa-a sime-ogbo wa ye fị ḅịa. 15Ọkọẹrẹsị, ọmịnị na Ḅẹrẹ-siri mẹ na oku kẹ Romu ḅẹ ọmụapụ sịḅịdaḅọ ḅe fịrịma mịnẹ ọ̀ Pọlụ kẹ ḅoo, gbala ọmịnị iḅiọkụ ọ̀ ḅẹrẹ mẹ ḍiki ḅẹ ḅiiarị ḅara. Kụma wa tẹlẹma sime tẹ amụ ò ḅo mịanga la-a ogbo wa ọ̀ ḅaa sin ḅa.”
16Kụma ịn ḅiya ye mẹ Pọlụ ịyịmbara owiḅọtụḅọ naa tẹ mu ọmụapụ ma sime anga mẹ ḅụ ye mẹ ḍuko Pọlụ pịrịm. 17Pọlụ nwẹnị ọmụ-alapụ ma ḅẹ gbọrụḅọ sịn tẹ ọ̀ ḅẹẹ, “Sisi, ḅị tụḅọ ḅe kẹ sịḅịdaḅọ ḅe dama-muu, ò ye ḍuko ọ̀ pịrị ḅẹ-ḅiiarị.” 18Ọmụ-alaḅọ ḅe nwẹnị tụḅọ ḅe kẹ sịḅịdaḅọ ḅe dama-mu tẹ ḅẹẹ, “Kun ḅara-ḅio simearị Pọlụ ḅe ị̀ ḅẹẹm à ḅị asatụḅọ ḅe kẹ ị́ dama-ḅoo, ò ḍukoye nyana ị́ pịrị wararị.”
19Tẹ sịḅịdaḅọ ḅe nwẹnị tụḅọ ḅe ọlọ tẹ ori na sikima tẹ ò gbela, “Í tiye nyana tẹ ḍuko ị̀ pịrị ḅẹ?”
20Ori mẹẹ, “Juu-ḅẹ sịḅịdapụ ma ḅiya tẹ mịnẹ ḅaa ini ị́ ḅẹẹ tẹ ị́ Pọlụ kẹ Ḅẹrẹkọn-siri mẹ mu ḅa, mịẹtẹ ini iḅiọkụ ḅẹrẹ mẹ sime-ḅara nimi ḅarị ḅara. 21Kụma ḍụkụ ma. Ịna ḅụ kịnị amesi nẹngị apụ ọ̀ ḅaa ḅẹ tẹ ḅọị tẹ koruarị. Ịn ye karị ịna ḅụụ pịrị wararị mịnẹ ini ọ̀ ḅaa-a sime-ogbo, ịn fịye fị ḅịa pịkị ḅuu-ḅuu ye sọ ḅuu ḅịa. Mịọkụ ị́ ḅịḅị mie in koruarị ye.”
22Sịḅịdaḅọ ḅe nwẹnị tụḅọ ḅe ḅẹẹ, “Í ḍuko ị̀ pịrị tẹ ḅara, mịẹ tẹ kịnị nimi ma-o.” Tẹ ọ̀ nwẹnị tụḅọ ḅe ḅẹẹ tẹ ò so.
Ịn Pọlụ Kẹ Fẹlịkisi, Ḅẹrẹtọnḅọ Ḅe Fịrịmam
23Anịtẹso ọmụapụ sịḅịdaḅọ ḅe nwẹnị maa ọmụ-alapụ sịn tẹ ịn ḅẹẹ, “Ó mu Sizariya mu ḅarị ọmụapụ, oyia asi, tẹlẹma-a; asụ-dọkụ-ọmụapụ kịnị atesi oyi finji na, ḅẹkẹrẹ dogiapụ kịnị oyia asi na sọ ini na sọ tẹ muu, mị ḍin eseni aso ḅụ. 24Ọ̀ pịkị Pọlụ dọkụ ḅarị asụ tẹlẹma-a, tẹ dein ḅara kẹ ọ̀ kẹ mu Fẹlịkisi, Ḅẹrẹtọnḅọ ḅe pịrịị.” 25Anịtẹso ọmụapụ sịḅịdaḅọ ḅe nwẹnị mị ḅara kẹ ḍiri kẹẹ tẹ ḅẹẹ:
26“Yẹrị, Kịladịyọsị Lisiyasị, mị ḍiri mẹ kẹẹ tẹ kẹ, Ori opu ḅụ, Ḅẹrẹtọnḅọ Fẹlịkisi fịrịmarị. À ḅii-ḅịḅị kẹ ị́ fịrịmam. 27Juu-ḅẹ-apụ ma kụrọ-ḅara kẹ ḅị tomḅọ ḅe ọlọ tẹ ọ̀ ḅaa ḅẹ-yearị ogbo, à ḅo nimim mịnẹ ori Romu furo-tụḅọ ḅẹ sakị, à nwẹnị ị̀ ọmụapụ ma na mu ịna aḅara ọ̀ pụkọ-pakamaḅo. 28Arị ịn kẹ ọ̀ sịḅị sẹịn-arị ḅẹrẹ mẹ nimi ḅẹ ḅii ye gotẹ à nwẹnị ori na ịna Ḅẹrẹ-siri mu. 29Arị ẹrị ḅara ḅụ gotẹ ọ̀ ḅaa, anịanịa ọ̀ kẹ ikoli suu na-iḅi ye ofori. Kụma ịna oloko gboloma aḅẹrẹ mie ịn kẹ ọ̀ sịḅị sẹịn ye. 30Ọḅụkọ à ḅo naam mịnẹ ini ḅẹ ja apụ ọ̀ ḅaa ḅẹ ḅẹrẹ-ḅiya tẹ ye ḅụ, àrị ọkịm àrị ọ̀ kẹ ị́ fịrịma. À ḅẹrẹ kẹ ọ̀ sịḅị sẹịn ḅẹ apụ ma ḅẹẹ tẹ ini ị́ tọrọkọ ḅo ọ̀ mịẹ ye ḍukoo.”
31Ọmụapụ ma nwẹnị ò ḍuko ḅara mịẹ, tẹ anị gbọrụ ḍin mẹ kẹ Pọlụ na mu Anịtipatirisi la. 32Ene-ḅaa ḅụ ḅụọ kẹ mẹnjị ọmụapụ ma pịkịma-so ịna sime anga mẹ mu tẹ asụ-dọkụ-ọmụapụ ngẹrị nwẹnị ori na mu. 33Ịn nwẹnị ori na mu Sizariya la, tẹ ḍiri mẹ na Pọlụ na saḅama Ḅẹrẹtọnḅọ ḅe pịrị 34Ḅẹrẹtọnḅọ ḅe ḍiri mẹ go tẹso, ọ̀ nwẹnị Pọlụ ama ḅẹ ibe kẹ ò gbela; tẹ ò nimi tẹ mịnẹ Silisiya ibe ḅụ ò ḅom ḅẹẹ tẹso, 35ọ̀ nwẹnị ḅẹẹ, “Ḅẹrẹ kẹ ị́ sịḅị sẹịn-arị apụ ma ḅo sakị, arị ị́ ḅịḅị naa ḅa.” Anịtẹso ọ̀ nwẹnị tọn mịnẹ ịn Pọlụ kẹ mu Ḅẹrẹtọnḅọ ḅe daarị ibe mẹ ḅẹ sịḅịda anga mẹ ḅụ koroma tẹ tọrụ kẹ ọ̀ ḅụụ wẹrịị.
Currently Selected:
Fịrịmẹnjịapụ 23: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
