Fịrịmẹnjịapụ 13
13
Ịn Banabasị Na Sọlụ Na Sẹlẹ Tẹ Ịn Fịrịma Pakamam
1Anịtọkụ ḅẹ sọsị mẹ ḅio ịkịankoroapụ na ye-tolumapụ na simem: Banabasị na Simiyọnị (ịn kẹ Kurukuruḅọ sịn ḅọ ḅe) na, Lusiyọsị (Sayịrini ḅẹ ḅọ ḅe) na, Maneni (anie Ẹrọdị, Galili da ḅọ ḅe na gbọrụ sakị in ḍikiḍiki pakama-ḅo ḅọ ḅe) na Sọlụ na. 2In sunsin KỊNỊNYANAḄỌ ḅe pịrị tẹ pịkị ḅuru-ịmọarị ogbo Fịafịa Tẹmẹ ḅe ịn ḅẹẹm, “Ọ́ Banabasị na Sọlụ na saakị sikima ị̀ pịrịị, tẹ ịn mu à gotẹ ịn sịn kọrịnama mẹ kọrị.”
3Ịn ḅuru-ịmọ tẹ tẹkẹ, tẹ ḅara kẹ ịna ọgọnọ gbana tẹso ini ịn fịrịma pakamam.
In Mu Sayịpụrọsị Lam
4Fịafịa Tẹmẹ ḅe ịn fịrịma pakama ye mẹ ḅụ Banabasị na Sọlụ na mu Sẹlusịya la tẹ anịanga arụ ḅụkụlọ tẹ so Sayịpụrọsị sọọ mẹ mum. 5In mu Salamisi ama la tẹso, ịn nwẹnị Juu-ḅẹ-apụ ama-awarị ḅio ḅụ Tamụnọ ẹkwẹn mẹ kọn. Anị sakị Jọnị Makị ịna ḅụụ sọ tẹ mum, ịna kọrịnama mẹ ḅụ ḅarasụa ịn pịrị ḅẹ ḅara.
6In bebe sọọ mẹ mẹnjị saḅa-ḅọrọ mu Pafọsị ama mẹ lam, tẹ anịanga majịkị mịẹ-mịẹ gbọrụ Juu-ḅẹ ḅọ, tẹ ịn kẹ Ba-Jizọsị sịn ḅọ, na bịamam. Ori mẹẹ ori ịkịankoroḅọ. 7Ori na Sajịyọsị Pọlọsị, sọọ mẹ ḅẹ ḅẹrẹtọnḅọ ḅe na ikiapụ, ọ̀ pịkị sịḅịḅio nyanam. Ḅẹrẹtọnḅọ ḅe Tamụnọ ẹkwẹn mẹ naa ḅẹ ḅiim gotẹ Banabasị na Sọlụ na sịn ḅom. 8Kụma Ẹlịmasị (anie Giriki ḅịḅị ḅụ ori ẹrẹ), majịkị-mịẹḅọ ḅe, nwẹnị ini na tụḅụrụ, mịẹtẹ ḅẹrẹtọnḅọ ḅe minini mẹ nyana ḅịa ḅara. 9Anịtẹso Sọlụ, Pọlụ sọ ori ẹrẹ, Fịafịa Tẹmẹ ḅe ọ̀ ḅụụ sọ ḅin ḅara ḅụ, nwẹnị da-da majịkị-mịẹḅọ ḅe ḍiki 10tẹ ḅẹẹ, “Ị́yẹrị Ekwesu ḅe tụḅọ! Í iḅiye goyegoye na fịya-a. Si epele goyegoye ị́ ḅụụ ḅio kara wararị, tẹ sakị mamgba í ḅiiarị ị́ KỊNỊNYANAḄỌ ḅe karakara ẹkwẹn ma pịkị tẹ kẹ iruo aị sọma! 11Mịọkụ KỊNỊNYANAḄỌ ḅe ḅara kẹ ị́ lama ḅa, tẹ ị́ tọrụngbọ-pụụntẹ ị́ ḅarị bele ẹrị ḅịa mu gbọrụ sakị la ḅa.”
Anị gbọrụ kiri kpiti tẹ oḅuto nwẹnị Ẹlịmasị atọrụngbọ gbaịn, tẹ ọ̀ nwẹnị ikelekele tẹ ḅara kẹ ori ọlọ mẹnjị ḅẹ ḅọ ḍọkị. 12Ḅẹrẹtọnḅọ ḅe pakaye mẹ ẹrị tẹso, ọ̀ nwẹnị minini; gbala KỊNỊNYANAḄỌ ḅe ḅụụ in tolumaye mẹ kpọma ọ̀ ḅụụ-buamam ẹrẹsị.
In Pisidiya Ḅẹ Anịtọkụ Lam
13Tẹ Pọlụ na ori na mẹnjị apụ ma na nwẹnị Pafọsị ḅụ arụ ḅụkụlọ tẹ mu Pamụfiliya ḅụ Paga nwẹn-sịn opu ama la. Anịanga ḅụ Jọnị Makị in koroma pịkị-so Jeruselemu mum. 14In Paga ḅụ ḅọrọ mu Pisidiya ḅẹ Anịtọkụ lam, tẹ Ịnyọsara-Ene mẹ ḅo la tẹso, ịn nwẹnị mu ama-warị mẹ ḅio lẹgị-sime. 15Tẹ ama-warị mẹ ḅio kọrịnama kọrịarị apụ ma Mozizi Oloko mẹ ḅio paka-ḅo ye na ịkịankoroapụ ma kẹẹ aị ma ḅẹ aị na go fama tẹso, ịn nwẹnị fịrịma tẹ ḍuko ịn pịrị, “Mịnapụ, ọ́ kẹ tomi ma ḅiokpọma ḅẹ ẹkwẹn emi-emii, wa ḅii ḅa ọmịnị ẹkwẹn ịn pịrị.” 16Tẹ Pọlụ saakị sịẹ tẹ ḅara kẹ in dedema tẹso, ọ̀ saakị ẹkwẹnm: “Ị̀ ama ḅẹ Izirẹlịapụ, na Ja asịẹ ḅẹ apụ na, tẹ sunsin Tamụnọ pịrịarị apụ: ọmịnị ì pokii! 17#Pks 1.7; Pks 12.51Izirẹlịapụ ma Tamụnọ ḅe wamịna atẹngịapụ ma sẹlẹ-ọkị tẹ ịn kẹ opu sịẹ sọma tẹ Ijiputi ḅụ ini igoniapụ ḅara kẹ anga sime ogbo, Tamụnọ opu kụrọ kẹ ịn pakama-ḅom Ijiputi ḅụ, 18#Kịẹ 14.34; Dit 1.31tẹ kụra amesi ọ̀ nwẹn kẹ ịna amịẹaị ma inemam ịkpa mẹ ḅio. 19#Dit 7.1; Jọs 14.1Ọ̀ mịẹtẹ Kenanị ḅẹ sọnọma asịẹ fa tẹ ịna kiri kẹ ori atomi ma nye sọmam. 20#Ḅẹr 2.16; 1 Sam 3.20Kụra ẹndẹ mesi finji na oyia kụra na pembe sakị mie mẹ nwẹn ọkịm.”
“Miemẹ ḅọrọ tẹso, ọ̀ nwẹnị ḅẹrẹkọn-apụ kẹ ịn pịrị tẹ ini in ḍikiḍiki nwenii ḅo ịkịankoro Samụwẹlị ḅụọ lam. 21#1 Sam 8.5; 1 Sam 10.21Ọḅụkọ in ḅo amadaḅọ ịgbanị sakị Tamụnọ nwẹnị Benijamịnị furo ḅụ Kisi tụḅọ Sọlụ kẹ ịn pịrị, tẹ ọ̀ kụra amesi kẹ ama-da ịn pịrịm. 22#1 Sam 13.14; 1 Sam 16.12; Dev 89.20Ori ò sin tẹso, Tamụnọ nwẹnị Devidi kẹ ịna amadaḅọ mịẹ. Mie Tamụnọ ọ̀ ḅụụ ḍuko ye, ‘Arị ẹrị tẹ mịnẹ Devidi, Jese tụḅọ ḅe, anie ị̀ ḅụụ-ḅẹlẹarị tomḅọ, à ḅiim ọ̀ mịẹ ḅẹẹye-ḅẹẹye mịẹ ḅarị tomḅọ.’ 23Jizọsị, Devidi furo paka ḅọ ḅe, anie Tamụnọ wẹrịtẹ minini ḅara ḅụ ọ̀ kẹ Izirẹlịapụ ma Ḅọrọmaḅọ sọma ḅọọ. 24#Mak 1.4; Luk 3.3Jizọsị amụ ọ̀ kọrịnama saakị-a ogbo, Jọnị tarị ẹkwẹn Izirẹlịapụ ma pịrịm mịnẹ ini ịna asi ḅụ pịkị tẹ minji sara-a. 25#Jọn 1.20; Mat 3.11; Mak 1.7; Luk 3.16; Jọn 1.27Tẹ Jọnị ḅo ọ̀ kọrịnama kọrị fama ḅẹ-yearị ogbo, ọ̀ nwẹnị tomi ma ḅẹẹ, ‘Ọ́ sịn-arị yẹrị tụḅọ? Ó koruarị ḅọ ḅe yẹrị ori-a. Kụma, ó pokii! Ori ị̀ ọḅụ ḍuka ma-ḅoarị, anịsakị àrị iḅi ọ̀ ḅụọ ḅẹ okuro sin sọ na gbasị-a!’ ”
26Ì pembema Izirẹlịapụ, Ebira-amụ furo paka apụ, na ọmịnị mịanga simearị Ja asịẹ ḅẹ apụ mamgba tẹ sunsin Tamụnọ pịrịarị apụ na: mị ḅọrọma oku mẹ wamịnị-mgba mie Tamụnọ anị kẹ fịrịma ye. 27Kẹ gotẹ ọkọ ḍukoarị, ori ḅe anie Ḅọrọmaḅọ ḅe ḅara Jeruselemu ḅụ anga apụ na ịna sịḅịdapụ ma na anị nimi-a; ịkịankoroapụ ma ẹkwẹn ma Ịnyọsara-Ene goyegoye ḅụ goarị aị ma fie ye sọ ịn naa-a. Anịsọ ịn ḅaa-ḅẹrẹ pẹlẹ Jizọsị pịrị ye ḅụ ịn mịẹtẹ ịkịankoroapụ ma ḍuko ye paka tẹ. 28#Mat 27.22,23; Mak 15.13,14; Luk 23.21-23; Jọn 19.15Ịn gotẹ ḅaa-ḅẹrẹ pẹlẹ ọ̀ pịrị ḅẹ ye ofori sọ, ịn Payịleti ḅẹẹm ori ọ̀ ḅaa. 29#Mat 27.57-61; Mak 15.42-47; Luk 23.50-56; Jọn 19.38-42Tẹ ịn Fịafịa Ḍiri mẹ ọ̀ ḅụụ ḍuko ye goyegoye mịẹ fama tẹso, ịn nwẹnị ẹngbẹsẹ-sịn mẹ ọgọnọ ò koroma-ḅo tẹ ọ̀ kẹ ḍuḅu ḅio koroma. 30Kụma Tamụnọ fịị ḅụ ọ̀ saakịmam, 31#Fịr 1.3tẹ ọ̀ tọnwa aḍin kẹ ḅụụ kẹ Galili ḅụ ò ḍuka-mu Jeruselemu la apụ ma ḍiem, ini ma mie mịọkụ ye mẹnjị ḅara na ye paka ḅara na tẹ ịn tọrụngbọ kẹ ẹrị ḅara ḍuko Izirẹlịapụ ma pịrịarị. 32#Dev 2.7Wa Iḅi-Oku mẹ ḍuko ọ́ pịrịarị: Tamụnọ minini wamịna atẹngịapụ ma pịrị ye mẹ, 33ori anị mịẹ wamịnị ịna awọmẹ ma pịrị tẹ, fịị ḅụụ Jizọsị saakịma ḅụ. Anie anị wẹrịtẹ kẹẹ ḅara Devidi Nume Ḍiri mẹ ḅio maaịn karama ye mẹ ḅụ:
“Ị́yẹrị ị̀ tụḅọọ;
mịmgba à ḅo ị́ Ḍa sọ tẹ.”
34 #
Ayị 55.3
Tẹ mie Tamụnọ ḍuko ye ọ̀ fị-ḅụ-saakị ye mẹ gbolomaye ḅụ, gbala-gbala ò ḍuḅu ḅio sime tẹ ḅụrụ fa ḅịa ẹrẹsị:
“À minini Devidi pịrị fịafịa tẹ gbarị-gbarị-a aboma ma,
à kẹ ị́ pịrị ḅa.”
35 #
Dev 16.10
Anie karakara-ḅara-ḅụ ọ̀ pịkị jen anga ḅụ ḅẹẹ ḅara,
“Ị́ ḍụkụ tẹ ị́ iḅi fịrịmẹnjịḅọ ḍuḅu ḅio sime tẹ ḅụrụ ḅịa.”
36Devidi ḍumo wararị sakị ọ̀ Tamụnọ ḅii ḅara, ḅii ḅara mịẹm, tẹso, ọ̀ fịị tẹ ini ọ̀ kẹ ori atẹngịapụ ma ḍiḅi anga ḍiḅim, tẹ ò meni-oju mẹ sọ ḍuḅu ḅio sime tẹ ḅụrụ fa tẹẹ. 37Kụma Tamụnọ fịị ḅụ saakịma ḅọ ḅe ḅụ mie mẹ paka-a. 38Ọkọẹrẹsị, ị̀ amịnapụ, à ḅiiarị ó nimi mịnẹ Jizọsị ḅụ mie wa ḅọrọ tẹ si-wẹrịso mẹ ḍuko pakama ọ́ pịrịarị. 39Ọ̀ ḅụụ mie minini ḅọ, minini ḅọ, tẹ ḅẹẹye-ḅẹẹye ḅụ Mozizi Oloko mẹ inetẹ mịẹ mḅọ pịrị ḅịa ḅara ḅụ, ḅo ḅẹrẹ-ḅarasii-a kiri ḅụ sịẹ ḅarịye. 40Ọkọẹrẹsị, ọmịnị ẹbị mịnẹ ịkịankoroapụ ma ḍuko ye mẹ ọmịna ḅụụ paka-a.
41 #
Hab 1.5
Ó ḍikii, ọmịnị ye kẹ ye-sịn-a apụ!
Ọ́ ḅụụ-buaa, tẹ fịị!
Kẹ gotẹ ọkọ ḅẹẹarị, mịmgba ḅụ à mịẹarị ye mẹ, anie ó minini ḅịa ye,
kịnị anị ḍuko finji ọ́ pịrịarị sakị sọ!
42Pọlụ na Banabasị na ama-warị mẹ ḅio sime tẹ soarị sakị, tomi ma ịn ḅẹẹm mịnẹ jen Ịnyọsara-Ene sọ ịn ḅo tẹ sin ma ẹkwẹn ma kọn ịn pịrịị. 43Tomi ma kobiri mẹ ḅụ paka-so tẹso, Juu-ḅẹ-apụ na Ja asịẹ ḅẹ apụ na ḅẹ tọnwa-apụ Pọlụ na Banabasị na ḍukamẹnjị-mẹnjị tẹ ini ịna ḅiokpọma ḅẹ ẹkwẹn kọn ịn pịrịm, mịnẹ ịn Tamụnọ ḍiki-ḅụụjịrị mẹ ḍiki anga ma muu.
44Jen Ịnyọsara-Ene ḅụ kẹlẹ kọnm bebe ama mẹ ḅio sime apụ mamgba KỊNỊNYANAḄỌ ḅe ẹkwẹn mẹ poki ḅẹ ḅo tẹ. 45Tẹ Juu-ḅẹ-apụ ma tomina-ogbo-ogbo ma ẹrị tẹso, anị nwẹnị ịna ḅioḅuma, tẹ ịn nwẹnị Pọlụ ḍuko ye mẹ na tụḅụrụ tẹ ọ̀ gọlị. 46Kụma Pọlụ na Banabasị na nwẹnị paa ḅalafa-a ḅara kẹ ẹkwẹn pakama: “Anị mịẹ na-iḅi ḅara ḅụ, ọmịnị ma mie kịnị tarị Tamụnọ ẹkwẹn mẹ kọn pịrị gbẹẹ apụ, kụma ọmịnị anị sịkị tẹ, ọmịnị ọmịna ḅụụ kẹ sime gbamaso ḍumo gbẹẹ apụ sịn-a ḅẹẹ sakị, wa ọ́ wẹrịso tẹ tọrụ kẹ Ja asịẹ ḅẹ apụ ma da ḅa. 47#Ayị 42.6; 49.6Kẹ gotẹ ọkọ ḍukoarị, miemẹ anie KỊNỊNYANAḄỌ ḅe sọ tọn wa pịrị ḅara:
“Arị ọ̀ kẹ bele sọma Ja asịẹ ḅẹ apụ ma pịrị tẹ,
mịẹtẹ tomikiri ḅẹ atomi mamgba ọmịna ḅụụ ḅọrọ tẹ ḅọrọma ḅẹ ḅara.”
48Ja asịẹ ḅẹ apụ ma miemẹ naa sakị ịna ḅioḅẹlẹ, tẹ ịn KỊNỊNYANAḄỌ ḅe oku mẹ tokinim; tẹ ịna ḅụụ sime gbamaso ḍumo nyana ḅẹ tẹ Tamụnọ sẹlẹ-ọkị tẹ apụ ma nwẹnị minini apụ sọ.
49KỊNỊNYANAḄỌ ḅe ẹkwẹn mẹ nwẹnị wasama anị bebe iri mẹ kana koro. 50Kụma Juu-ḅẹ-apụ ma nwẹnị anị opu ama mẹ ḅẹ sịḅịda apụ ma toluma, pịkị mu Ja asịẹ ḅẹ opu ereme tẹ Tamụnọ nimi apụ ma sọ la. Tẹ tomi ma nwẹnị Pọlụ na Banabasị na ḅaa ḅẹ ḅọkọ ḍọkị lama tẹ ịna ibe mẹ ḅụ in dee pakama. 51#Mat 10.14; Mak 6.11; Luk 9.5; 10.11Tẹ fịrịmẹnjịapụ ma nwẹnị ịna aḅụọ oḅolo onwin mẹ gugu sara, anị ini in dee ye ḅẹ elekima sọ ḅẹ ḅara, tẹ ịn nwẹnị ḅọrọ so Ikonịyọmụ mu. 52Ḅioḅẹlẹ na Fịafịa Tẹmẹ ḅe na Anịtọkụ ḅụ Jizọsị minini apụ ma ḅụụ ḅio sọ ḅinm.
Currently Selected:
Fịrịmẹnjịapụ 13: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
