Fịrịmẹnjịapụ 11
11
Pita Pakaye Mẹ Ḍuko Jeruselemu Ḅẹ Sọsị Mẹ Pịrịm
1Bebe Judiya ḅụ sime afịrịmẹnjịapụ ma na osi Jizọsị minini apụ mamgba na naam mịnẹ Ja asịẹ ḅẹ apụ sọ Tamụnọ ẹkwẹn mẹ daa-ọkị tẹ. 2Pita mu Jeruselemu la tẹso, Ja asịẹ ḅẹ apụ tarị-ḅụụ sin ịgbanị apụ ma nwẹnị ori na ye-nụnụa tẹ ḅẹẹ, 3“Ị́yẹrị mu tarị-ḅụụ sin-a Ja asịẹ ḅẹ apụ warị bịan tẹ ini na ḅara gboloma ye fịm!” 4Mie ḅụ Pita nwẹnị sukuyọ-saakị ye paka ḅara, paka ḅara ḍuko ịn pịrị:
5“À Jọpa jụ sime tẹ tẹkẹarị ogbo à mono-a ḅara kẹ ḍawọm, ini inia ịkọlị nyana opu finjimatẹ ye kẹ So-ḅio iderima-ḅo nwenii tẹ anị ḅo ị̀ la tẹ daasịẹm. 6À nwẹnị kweinma anị ḅio ḍiki sakị à tomi na anga anama na, piri-ḅio-ḅẹ anama na, ikiriarị aị na So-tọrụ ḅẹ afeni na ẹrịm. 7Anịtẹso à pọkọ naam, ị̀ ḅẹẹarị, ‘Pita, saakị sịẹ; ḅaa tẹ pẹị.’ 8Kụma yẹrị mẹẹ, ‘KỊNỊNYANAḄỌ, gbala-gbala, ọkọ-a! Jene-jene pilematẹ, anịanịa fịafịa-a fịye amụ ị̀ ḅịḅị la-a.’ 9Pọkọ mẹ nwẹnị So-ḅio ḅụ pịkị sin ẹkwẹn tẹ ḅẹẹ, ‘Tamụnọ mịẹ fịafịama tẹ ye kẹ fịafịa-a ye sịn ma.’ 10Tẹra asakị miemẹ nwẹn mịẹm, tẹ kunoma ḅụ ịn nwẹnị bebe ye mẹ ọkị iwo So-ḅio mu. 11Nwẹn ḅẹẹarị sakị Sizariya ḅụ ịn kẹ ị̀ fịrịma tẹra apụ ḅo à sime warị mẹ la tẹ. 12Tẹmẹ ḅe nwẹnị ị̀ ḅẹẹ à ḅio maaịn maaịn tọnma tẹ ini na muu. Jọpa ḅụ mịna sonio apụ ma, tẹ wamịnị na sọ tẹ Jizọsị minini apụ ma, nwẹnị ị̀ ḅụụ sọ mu Sizariya la, tẹ wa nwẹnị mẹnjị mu Kọnilọsị warị mẹ sọ. 13Ọ̀ nwẹnị ḍuko wa pịrị mịnẹ gbọrụ enjẹlịḅọ ḅo ọ̀ warị ḅio sịẹ tẹ ọ̀ ḅẹẹm, ‘Fịrịma mu Jọpa ḅụ Sayịmọnị Pita nwẹn-sịn ḅọ sịn. 14Ọ̀ kọn ị́ pịrị ḅarị ẹkwẹn na ị́ warị na ḅọrọma ḅa.’ 15Anịtẹso àrị ẹkwẹn ịn pịrịarị ogbo Fịafịa Tẹmẹ ḅe tarị ọ̀ wamịna ọgọnọ gbana ḅara kẹ ḅọ ini sọ ọgọnọ gbanam. 16#Fịr 1.5Anịtẹso à nwẹnị KỊNỊNYANAḄỌ ḅe ḍuko ye kẹ ḅiokoroma, ‘Minji kịngẹ mie Jọnị kẹ kịnị sara ye, kụma ọmịnị ịn Fịafịa Tẹmẹ kẹ minji kẹ ọ́ sara ḅa.’ 17Ọmịnị ẹrị tẹ mịnẹ wa KỊNỊNYANAḄỌ Jizọsị Kịrayịsị ḅe minini tẹ Tamụnọ kẹ wa pịrị ḍiepịrịye mẹ anie ọ̀ pịkị kẹ Ja asịẹ ḅẹ apụ ma sọ pịrị ye ḅẹ sakị, yẹrị tụḅọ tẹ Tamụnọ kiki ḅẹ!”
18In miemẹ naa tẹso, ịn ḅarị nụnụa-a, tẹ nwẹnị Tamụnọ boma mịnẹ ò kiri kẹ Ja asịẹ ḅẹ apụ sọ pịrị tẹ mịnẹ in si ḅụ pịkị tẹ ḍumoo.
Anịtọkụ Ḅẹ Sọsị Mẹ
19 #
Fịr 8.1-4
In Sitivini ḅaa tẹ pịkị ḅaa-ḅọkọ kẹ Jizọsị minini apụ ma ḍọkị ye mẹ mịẹtẹ ịna ḅụ ḅẹ ja apụ gala-gala tẹ mu Fonisiya na, Sayịpụrọsị na Anịtọkụ na sọ lam, tẹ oku mẹ ḍuko Juu-ḅẹ-apụ ngẹrị pịrịm. 20Kụma Sayịpụrọsị na Sayịrini na ḅụ sime tẹ ḅo ja Jizọsị minini apụ mu Anịtọkụ la tẹ oku mẹ ḍuko wasama Ja asịẹ ḅẹ apụ sọ pịrịm, KỊNỊNYANAḄỌ Jizọsị ḅe gboloma Iḅi Oku mẹ ḍuko ịn pịrị ḅụ. 21Tẹ KỊNỊNYANAḄỌ ḅe kụrọ ini na simem, tẹ tọnwa-apụ minini tẹ pịkị KỊNỊNYANAḄỌ ḅe dam.
22Tẹ miemẹ gbolomaye mu Jeruselemu ḅẹ sọsị mẹ ḅeri la tẹso ịn Banabasị kẹ Anịtọkụ fịrịmam. 23Ò mu la tẹ Tamụnọ kẹ tomi ma boma la ḅara ẹrị sakị, ò ḅioḅẹlẹ tẹ ịn ḅẹẹm mịnẹ in minini kụrọma tẹ iḅiọkụ ịna ḅioḅẹngbọ mamgba kẹ KỊNỊNYANAḄỌ ḅe fịnamaa. 24Ḅị Banabasị ḅe anie iḅi tomḅọ, Fịafịa Tẹmẹ ḅe na minini na pịkị ọ̀ ḅụụ ḅio ḅinm, tẹ ọ̀ tọnwa atomi kẹ ḅo KỊNỊNYANAḄỌ ḅe pịrịm.
25Anịtẹso Banabasị nwẹnị Tasọsị ḅụ Sọlụ ḍọkị ḅẹ mu. 26Ọ̀ Sọlụ ḅe ẹrị tẹso, ọ̀ nwẹnị ọ̀ kẹ Anịtọkụ ḅo. Bebe gbọrụ kụra ini maa apụ ma nwẹn kẹ Sọsị mẹ ḅẹ atomi ma na kobiri, kobiri tẹ in ye kẹ gbọrụ opu tomina-ogbo tolumam. Mị Anịtọkụ mẹ ḅụ mie ịn tarị Kịrayịsị ḍukamẹnjịapụ kẹ KỊNỊNYANAḄỌ ḅe ḍukamẹnjịapụ ma sịn ye.
27Anị sakị mẹ ḅụ ja ịkịankoroapụ Jeruselemu ḅụ sime tẹ Anịtọkụ mẹ ḅom. 28#Fịr 21.10Ịna ḅụ ḅẹ gbọrụḅọ, Agabọsị nwẹn sịn ḅọ, nwẹnị saakị sịẹ tẹ Tẹmẹ ḅe kụrọ ḅụ ịkịankoro ḅara kẹ ḍuko pakama mịnẹ opu ḅuru-ḅa ḅo bebe tomikiri mẹ gbaịn ḅa. (Anị ḅom Kịladịyọsị tomikiri mẹ daarị sakị.) 29Jizọsị ḍukamẹnjịapụ ma tọn-pẹlẹm mịnẹ ịna ḅụ ọrụḅọ-ọrụḅọ mḅọ inetẹ ḅara kẹ ye kẹ sẹma tẹ ịn kẹ ḅarasụa Judiya ḅụ sime Jizọsị minini apụ ma pịrị ḅa. 30Ọkọẹrẹsị, ịn miemẹ mịẹ tẹ: Banabasị na Sọlụ na ḅara igbigi mẹ kẹ sọsị omongiapụ ma fịrịmam.
Currently Selected:
Fịrịmẹnjịapụ 11: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
