2 Tẹsalonịka 3
3
Ọ́ Tẹkẹ Wa Pịrịị
1Anị ḅẹ kunoma ye, wamịna amịnapụ, ọ́ tẹkẹ wa pịrịị, mịẹtẹ KỊNỊNYANAḄỌ ḅe oku mẹ paa sarasarama wasama ma mu, tẹ tomi kụn ḅara kẹ anị daa-ọkị, ọmịna ogboku ḅụ anị mịẹ gbọrụ ḅara mẹ. 2Ọ́ pịkị tẹkẹ mịnẹ Tamụnọ si-sịḅịḅio-sụa si-mịẹapụ aḅara-ḅio wa pụkọ-pakamaḅo: kẹ gotẹ ọkọ ḍukoarị ḅẹḅọ-ḅẹḅọ oku mẹ minini-a.
3Kụma KỊNỊNYANAḄỌ ḅe anie ḅioḅẹngbọ kẹ ḅụụ ḅụ gbana na-iḅi ḅọ, ori ịnyọ kẹ ọ́ pịrị tẹ, pịkị ó koko kpaịnma ḅa, Ekwesu ḅe ḅarịye kẹ ọ́ lama ḅịa ḅara. 4Tẹ KỊNỊNYANAḄỌ ḅe mịẹtẹ wa ọmịna ḅụ ḅiokpọ nyana wararị, anịsakị wa nimi lama wararị mịnẹ wa ḍuko ọ́ pịrị ye mẹ mie ọ́ mịẹarị, tẹ pịkị mịẹ ma tọrọkọ mu ḅarịye.
5Yee KỊNỊNYANAḄỌ ḅe ọmịna kẹ tọrọkọ-sụn mu tarị ọ́ Tamụnọ ḅẹlẹma mẹ nimi ḅara nẹngị ḅara lama, tẹ ọ́ pịkị Kịrayịsị kẹ kịnị pịrị, pịrị ye-inema mẹ nyana.
Ḅẹ Ḅọ, Ḅẹ Ḅọ Kọrịnama Kọrị Saa Fị Wararị
6Wamịna amịnapụ, wa Nyanaḅọ Jizọsị Kịrayịsị ḅe ẹrẹ ḅụ, wa oloko sụa ọ́ pịrịarị, mịnẹ ọ́ kọrịnama kọrị ḅụ ḅụụ-lọkọma ḍumo kọn-arị amịnapụ, tẹ wa ịn mịẹ ḅẹ tẹ ḍuko ịn pịrị tẹ aị ma mịẹ ḍụkụ-a apụ ma ḅụ ḅụụ ḅelemaa. 7Ọmịnị ḅioju sọ nimi lama wararị ḅara ḅụ, wa mịẹ ḅara mie ọmịnị sọ mịẹ ḅẹ ḅara. Wa ọmịnị na emi sakị wa kọrịnama kọrị ḅụ ḅụụ-lọkọma-a. 8Wa gbọrụ ḅarasụa ye sọ daa-ọkịa, ye gbẹẹ-a ḅara ḅụ. Anie nakara wa ịnyọ kpọma tẹ kọrịnama kọrịm; wa ọmịna ḅụ ḅẹ gbọrụḅọ-sọ fama ḅẹ ḅii-a ẹrẹsị, wa eneḅaka na ḍin na kẹ kọrịnama kọrịm. 9Wa miemẹ mịẹm, wa ọmịna ḅara ḅarasụa ḅii na-iḅi-a ẹrẹsị-a; wa gotẹ ọkọ mịẹ ye, ọ́ wa ḍikima tẹ mịẹ ḅẹ ḅara kẹ ó ḍie ḅẹ ḅara. 10Wa ọmịnị na sime, sime sakị wa ḅẹẹ ḅẹẹm, “Kọrịnama kọrị ḍụkụ-a ḅọ, ḍụkụ-a ḅọ, ịn ḍụkụ tẹ mḅọ pịkị ye fị ḅịa.”
11Wa gotẹ miemẹ ḍukoarị, wa naarị mịnẹ ọmịna ogboku Ja atomi emi tẹ ḅụụ-lọkọma kọrịnama pịrị aḍumo kọn-arị, tẹ gberie-sọ mịẹ ḍụkụ-a tẹ ja apụ amịẹaị tẹ in gboloma-a aị ḅụ ḅụụ kẹ suu ma ḅọrọarị. 12KỊNỊNYANAḄỌ Jizọsị Kịrayịsị ḅe ẹrẹ ḅụ, wa oloko sụa mịna atomi ma pịrị tẹ pịkị ịna ḅeri nụnụarị mịnẹ ini ọrụtọn ḅara sime wararị aḍumo kọn, tẹ pịkị kọrịnama kọrị tẹ ịn fị ḅẹ ye ḍọkị-ḅoo.
13Kụma, ọmịnị, mịnapụ, ọ́ ḍụkụ tẹ iḅi mịẹ ḅụ ịnyọ ọ́ ta ma. 14Ẹbịsịya ọmịna ogboku wa kẹ ọ́ fịrịmarị oku mẹ ọkị tẹ wa ḅẹẹ ḅara mịẹ ḅịa ḅọ paka ḅa. Ọkọ sime ḅọ paka-paka, ọmịnị mḅọ kẹ elekima sụa, tẹ ḅarị mḅọ na gbọrụ mịẹye sọ nyana ma, mịẹtẹ mḅọ ḅụụ-jịrị ḅarị ḅara. 15Kụma ọmịnị mḅọ kẹ ọmịnị na fịya-a ḅọ ḅara mịẹ ma; anie nakara, mịnaḅọ ḅara ḅụ, ọmịnị mḅọ ḅeri nụnụụ.
Kunoma Ẹkwẹn
16Yee KỊNỊNYANAḄỌ ḅe ḅioju, tẹ ọ̀ ḅụụ ḅụ wamịna dein paka-ḅoarị ḅọ ḅe, sakị mamgba ḅọkọ-ḅọkọ ḅụ dein kẹ ọ́ pịrị. KỊNỊNYANAḄỌ ḅe ọmịnị-mgba na simee.
17Miemẹ yẹrị ḅarana kẹẹarị: Pọlụ ó ḅiim. Mie à ḅara kẹ à kẹẹ ḍiri goyegoye ḅio sụarị ḅara; mie à ye kẹẹ-kẹẹ ḅara.
18Yee wa Nyanaḅọ Jizọsị Kịrayịsị ḍiki-ḅụụjịrị mẹ ọmịnị-mgba na sime.
Currently Selected:
2 Tẹsalonịka 3: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria