2 Samụẹlị 7
7
Netanị Oku-ḅịḅị Kẹ Ḅọ Devidi Pịrịm
(1 Pkị 17.1-15)
1Mịọkụ amadaḅọ ḅe ọ̀ warị ḅio anga tẹ, tẹ KỊNỊNYANAḄỌ ḅe ikelema-koro ḅụ ori na fịya-a apụ mamgba ḅụ ịnyọsara kẹ ọ̀ pịrị tẹso, 2Amadaḅọ ḅe nwẹnị Netanị, ịkịankoroḅọ ḅe ḅẹẹ, “Mịọkụ ḍikii, yẹrị ịn kẹ sida sịn-arị sịn warị ḅio angarị, kụma Tamụnọ ọḅọkụ Igbe mẹ akpụrụ-warị ḅio angarị.”
3Netanị nwẹnị amadaḅọ ḅe ḅẹẹ, “Muu, ì ḅioḅẹngbọ sime ye mẹmgba mịẹ, kẹ gotẹ ọkọ ḅẹẹarị, KỊNỊNYANAḄỌ ḅe ị̀ na emi.” 4Kụma anị gbọrụ ḍin mẹ ḅụ KỊNỊNYANAḄỌ ḅe nwẹnị ẹkwẹn Netanị pịrị, 5“Mu ḍuko ị̀ fịrịmẹnjịḅọ Devidi pịrịị, mie KỊNỊNYANAḄỌ ḅe ḍuko yee, ‘ị́yẹrị warị nama ị̀ pịrị tẹ àrị anị ḅio anga ḅẹ? 6Àrị Ijiputi ḅụ Izirẹlị ḅẹ atomi ma ọkị iwoma ḅo ene mẹ kụra-ḅio ọkị-ḅo mịmgba la amụ à gbọrụ warị ḅio ḅụ sọ sime-a, kụma akpụrụ-warị ḅio anie ị̀ sime angaa, tẹ à mẹnjị ikelema-ikelema ma-ḅọrọarị 7Àrị Izirẹlị ḅẹ atomi mamgba na mẹnjị tẹ anga mamgba ḅụ, ḅẹrẹkọn-apụ ma tẹ à tọnm anana-ogbo ḍikiḍikiapụ sọ ị̀ atomi Izirẹlị pịrị ḅẹẹ apụ ma ḅụ àrị ẹkwẹn gbọrụmgbọ kọn pịrị tẹ ḅọ ofori tẹ in tiegotẹ ịn kẹ sida sịn-arị sịn kẹ warị nama ị̀ pịrị-a gbela.’ ”
8Anịẹrẹsị mịọkụ mị-ḅara mie ị́ kẹ ị̀ fịrịmẹnjịḅọ Devidi ḅẹẹ ḅarị ḅara, “Mie Kụrọmamgba Nyana KỊNỊNYANAḄỌ ḅe ḍuko yee, ‘ị́ anana ma ḍukama mẹnjịarị osuka kiri mẹ ḅụ mie àrị ị́ ọkị yee, mịnẹ ị́ amadaḅọ sọ ị̀ atomi Izirẹlị pịrị ḅa; 9anịsakị í mu anga mu anga ḅụ àrị ị́ na simem, tẹ ị́ tọrọkọ ị́ na fịya-a apụ mamgba pẹlẹ-pẹlẹ-siin tẹẹ; anịsakị à tomikiri mẹ ḅẹ opu apụ ma ẹrẹ mẹ pembe opu ẹrẹ mịẹ ị́ pịrị ḅa; 10anịsakị à gbọrụ anga tọn ị̀ atomi Izirẹlị pịrị ḅa, tẹ arị ịn ḍiḅi ḅa, mịẹ tẹ ini ịna soku-ḅẹ ye-yọ ḅụ anga, tẹ ḅarị jen-maaịn kẹ ḅụụ-fụka nyana ḅịa ḅara; anịsakị ye kẹ kịnị lama apụ ḅarị jen-maaịn kẹ tarị-tarị ini in aḅụụ fụkama, fụkama ḅara kẹ ḅarị ịn aḅụụ fụkama ḅịa. 11Sakị mẹ tẹ à ḅẹrẹkọn-apụ tọn ị̀ atomi Izirẹlị pịrị sakị mẹ ḅụ, saakị mu arị ọmịnị na fịya-a apụ mamgba ḅụ ịnyọsara kẹ ọ́ pịrị ḅa. Anie sikima à warị pakama í pịrị ḅa. 12#Dev 89.3,4; 132.11; Jọn 7.42; Fịr 2.30Í aḍin ma kara tẹ ị́ ị́ aḍapụ ma na mono sime sakị, àrị ị́ ḅụụ paka-ḅo ḅọ saakị pakama-ḅo ḅa, oriḅe tẹ í oju ḅio paka-ḅo ḅọ; anịsakị àrị ori ama-da mẹ sịẹma kụrọma ḅa. 13Ọ̀ gbọrụ warị nama ị̀ ẹrẹ pịrị ḅa, anịsakị arị ori emine mẹ sịẹma kụrọma gbamaso ḅa. 14#Dev 89.26,27; 2 Kọr 6.18; Hib 1.5À ḍaḅọ sọ ọ̀ pịrị ḅa, tẹ ori ì owiḅọtụḅọ sọ ḅa. Ọ̀ mịẹ-irima sakị à tomi kẹ kịnị fomu-fomu mkpara kẹ ò fomu ḅa, tomina owiapụ-awọmẹ fomu-fomu fomuye à nwẹn kẹ ò fomu ḅa. 15Kụma ọ̀ ḅụụ ḅụ arị ì jike-a ḅẹlẹma ọkị ḅịa, à wẹrịtẹ Sọlụ ḅụ anị ọkị ḅara, oriḅe tẹ arị ị̀ tọrọkọ ḅụ saakị siin ḅọ ḅe. 16#Dev 89.36,37Anịsakị ị̀ tọrọkọ ị́ warị na, ị́ ama-da kụrọ na ịn nwẹn mịẹ sịẹma gbamaso ḅa piki-pikiye-ofori ḅara ḅụ.’ ”
17Mịna ẹkwẹn-aḅịḅị mamgba na, mị ịkịan mẹ na wẹrịtẹ koro ḅara mẹmgba Netanị ḍuko Devidi pịrị famam.
Devidi Ịmịẹtẹ-Ḅẹẹ Tẹkẹ Kọnm
(1 Pkị 17.16-27)
18Anịtẹso Amadaḅọ Devidi nwẹnị mẹnjị KỊNỊNYANAḄỌ ḅe tọrọkọ mu, tẹ lẹgị-sime tẹ ḅẹẹ, “yẹrị tụḅọ, yei KỊNỊNYANA-TAMỤNỌ, anịsakị ị̀ warị nwẹnị tọ warị, tẹ ị́ nwẹn sime ala-jụ ḅụ ì ọkị-ḅo koroma? 19Anịsakị yei KỊNỊNYANA-TAMỤNỌ, miemẹ sọ paa ị́ atọrụngbọ ḅụ ye kala ye. Ị́ pịkị ḅo ḅarị sakị ḅụ ị́ fịrịmẹnjịḅọ warị mẹ mịẹ gburo-gburoma ḅẹ ḅara ḍuko tẹẹ, yei KỊNỊNYANA-TAMỤNỌ! 20Anịsakị Devidi pịkị inetẹ tọ gbana ye ḍuko ị́ pịrị ḅẹ? Kẹ gotẹ ọkọ ḅẹẹarị, yei KỊNỊNYANA-TAMỤNỌ, ị́yẹrị ị́ fịrịmẹnjịḅọ ḅẹ nimi wararị! 21Í minini ye mẹ na, í ḅioḅẹngbọ wẹrịtẹ sime-ḅara na ị́ fịrịmẹnjịḅọ anị nimi gotẹ ị́ mịna gburo-gburotẹ aị mamgba kọrịm. 22Ọkọẹrẹsị ị́ ḍụḅam, yei KỊNỊNYANA-TAMỤNỌ; kẹ gotẹ ọkọ ḅẹẹarị, ị́ pembema ḅọ ofori, anịsakị í sikima jen Tamụnọ ofori, wa wẹrịtẹ wamịna aḅeri kẹ naa tẹ aị mamgba ḅụ. 23#Dit 4.34Tomikiri mẹ ḅụ tọ jen opu sịẹ ị́ atomi Izirẹlị tẹ Tamụnọ mu ori atomi pakịrị ọkị, tẹ ẹrẹ mịẹ amịna ḅụụ pịrị, tẹ opu aị na, tẹmẹ-naịn-naịnma aị na mịẹ ịn pịrị ḅụ amịna atomi tọrọkọ gbọrụ opu sịẹ na, ịna oru-atamụnọ na dee pakama tẹ ḅọ na kịka opu sịẹ emi? 24Tẹ ị́ ị́ atomi Izirẹlị sịẹma kụrọma ị́ ḅụụ pịrịm ini ị́ atomi sọ gbamaso ḅẹ ḅara anịsakị Yei KỊNỊNYANAḄỌ, ị́yẹrị ḅo ịna Tamụnọ sọm.”
25“Anịsakị yei KỊNỊNYANA-TAMỤNỌ, mịọkụ ẹkwẹn-ḅịḅị mẹ tẹ ị́ fịrịmẹnjịḅọ na, ọ̀ warị na, gbolomaye ḅụ ị́ kọn tẹ ẹkwẹn mẹ mịẹ kụrọma gbamasoo, tẹ ị́ wẹrịtẹ ḍuko ḅara mịẹ. 26Anịsakị ini ị́ ẹrẹ mịẹ ḍụḅama gbamaso tẹ ḅẹẹ ḅa, ‘Kụrọmamgba Nyana KỊNỊNYANAḄỌ ḅe anie Izirẹlị ḅẹ Tamụnọ ḅẹẹ’, tẹ ị́ fịrịmẹnjịḅọ Devidi warị mẹ ị́ tọrọkọ ḅụ sịẹ-kụrọ ḅa 27Kẹ gotẹ ọkọ ḅẹẹarị, ị́yẹrị Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe mị puu-finjiye mẹ puu-finji ị́ fịrịmẹnjịḅọ pịrịm, tẹ ḅẹẹm, ‘À gbọrụ warị pakama ị́ pịrị ḅa; anịẹrẹsị ị́ fịrịmẹnjịḅọ kẹ mị tẹkẹ mẹ kọn ị́ pịrị ḅẹ ḅiokpọ ḍọkị-ẹrị tẹẹ.’ ”
28“Anịsakị yei KỊNỊNYANA-TAMỤNỌ, ị́yẹrị anie mịọkụ Tamụnọ, anịsakị ị́ ẹkwẹn-aḅịḅị ma anie karakara aị, tẹ ị́ mị iḅiye mẹ kẹ ị́ fịrịmẹnjịḅọ karịma tẹ; 29anịẹrẹsị yee mịọkụ ị́ fịrịmẹnjịḅọ warị mẹ boma mẹ anị ị́ ḅụụ-ḅẹlẹ ye sọ, mịẹ tẹ anị ị́ tọrọkọ ḅụ ọkọ sime tọrọkọ-tọrọkọ mu gbamaso ḅẹ ḅara; gbala ị́yẹrị yei KỊNỊNYANA-TAMỤNỌ anị ḍuko tẹ ẹrẹsị, anịsakị í boma mẹ ị́ fịrịmẹnjịḅọ ḅe warị mẹ boma gbamaso ḅa.”
Currently Selected:
2 Samụẹlị 7: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria