2 Samụẹlị 22
22
Devidi Owu-ḅara-iḅi Nume
1Devidi mị nume mẹ ḅẹ ẹkwẹn-aḅịḅị ma kọn KỊNỊNYANAḄỌ ḅe pịrịm ene mẹ tẹ KỊNỊNYANAḄỌ ḅe ori na fịya-a apụ mamgba ḅara ḅụ na, Sọlụ ḅara na ḅụ ọ̀ ḍụa-ḅọrọma sakị.
2Ori mẹẹ:
KỊNỊNYANAḄỌ ḅe anie ị̀ ịkụ,
ị̀ owu-kụrọnịḅọ, pịkị ị̀ ḍụa-ḅọrọmaḅọ.
3Ị̀ Tamụnọ, ị̀ ịkụ, ḅụụ ḅụ à ḅụụ ḅọịarị ḅọ,
ị̀ ekpeke, ị̀ ḅọrọma ịfalị ḅe,
ị̀ kụrọtẹ ḅọị anga pịkị ị̀ ḅụụ ḅọị yọ,
ị̀ ḅọrọmaḅọ; ị́yẹrị ye kẹ kịnị lama ye
ḅụ ị̀ ḅọrọmam.
4À KỊNỊNYANAḄỌ ḅe tẹ tokini gbẹ ḅọ ḅe tẹkẹm,
anịsakị ori ị̀ ḅọrọmam, ị̀nịna fịya-a apụ ma aḅara ḅio.
5Gbala fị ọnụngọ ma kuro ì ikelemam,
gbọrsịḅị ḅioḅẹlẹ fama owi-minji ị̀ gbaịnm;
6Fị dogi-ḅoarị ọhọm ị̀ gbori-ikelemam,
tẹ ḍuḅu mẹ ḍịẹịn tuu sara ị̀ pịrịm. 7Ị̀ ḅụụ-ḅalaḅala ḅụ à KỊNỊNYANAḄỌ ḅe sịnm.
Ị̀ Tamụnọ ḅe mie à sịn ḅọọ.
Ọ̀ tẹkẹ warị ḅụ ori ị̀ pọkọ naam,
tẹ ì owu ḅo ori aḅeri lam.
8Anịtẹso kiri mẹ kpoo tẹ kụrọm;
So ma sukutarị-aḍụḅarị ma jikem,
tẹ puum, gbala ori ịganịm ẹrẹsị.
9Ọ̀ nini ḅụ onwi turee-tureema paka iwom,
tẹ ye gulugulumarị fịnị ọ̀ ḅịḅị paka-ḅom;
kamarị anyịmgbọ ọ̀ ḅụụ kọrị pakam.
10Ò so ma tumam, tẹ ideri-ḅom;
furu-kịtịpụtẹ kanakana ori aḅụọ suku-ḅio simem.
11Ọ̀ gbọrụ sẹrobu ọgọnọ ḅụ dọkụm, tẹ fiinm;
kụrọ fẹrụ mẹ apamba ọgọnọ ḅụ ini ori ẹrịm.
12Ọ̀ kanakana pakama ọ̀ ḅụụ ikelemam,
ọ̀ sịḅị kikima ye anie kobiri tẹ minji kpiti So-tọrụ.
13Ọ̀ tọrọkọ ḅịyarị bele mẹ ḅụ,
kamarị anyịmgbọ kọrị pakam.
14KỊNỊNYANAḄỌ ḅe So-ḅio so-alagba tẹịnm,
tẹ Geletẹịn Ḅọ ḅe ọ̀ pọkọ kẹ ẹkwẹnm.
15Tẹ ori okoro-ḍiein ma fịrịma pakamam,
tẹ ịn gala-galamam;
so ḅalapụm, tẹ ịn mangịm.
16KỊNỊNYANAḄỌ ḅe ḍiki ịganị mẹ ḅụ,
ò nini ḅẹ ọwụ mẹ ḅẹ fie-paka ḅụ
tomikiri mẹ ḅẹ sukutarị-aḍụḅarị ma ḅara kikima-a,
anịtẹso tomi opu tọrụ mẹ ḅẹ akuḅu ma ẹrịm.
17Gele yọ ḅụ ò sime tẹ ḅo lam, ori ị̀ ọkịm,
ori owolo mẹ ḅio ị̀ nụnụ pakama-ḅom.
18Ị̀ na fịya-a kụrọ ḅọ ḅe ḅụ, ori ị̀ ḍụa-ḅọrọmam,
inima tẹ ì ḍiki-ḅioḅẹlẹ-a apụ ma;
gbala ị̀ ḅụụ ḅụ in kụrọ ḅakam ẹrẹsị.
19Ị̀ ḅụụ-fụka ene mẹ ḅụ ịn ḅo ị̀ jụụm;
kụma KỊNỊNYANAḄỌ ḅe anie ì ḍụa ye.
20Ori ị̀ kẹ finjimatẹ anga ḅom,
ori ị̀ ḍụa-ḅọrọmam, gbala ori ị̀ ḅụụ ḅioḅẹlẹ nyanam ẹrẹsị.
21KỊNỊNYANAḄỌ ḅe ị̀ karakara sime-ḅara ḍiki ị̀ gbẹẹm;
ori ị̀ aḅara ma ḅẹ fịafịa la ḅara ḍiki ị̀ gbẹẹm.
22Kẹ gotẹ ọkọ ḅẹẹarị, à KỊNỊNYANAḄỌ etela ma kokom
tẹ si-sịḅịḅio-sụa ḅara ḅụ ị̀ Tamụnọ ḅụ ḅele-a.
23Kẹ gotẹ ọkọ ḅẹẹarị, ori ọ̀ kụrọ ḅụ tọn aị mamgba ị̀ tọrọkọ emi,
tẹ ori oloko kẹẹ wararị aị ma ḅụ amụ à pịkị akaka da-a.
24Ọ̀ tọrọkọ, kẹ ye kẹ ị̀ ọlọ-ọlọ ye ofori,
tẹ ḅẹrẹ-ḅarasii ḅụ ị̀ ḅụụ ọlọ-sịẹmam.
25Anịẹrẹsị KỊNỊNYANAḄỌ ḅe ị̀ karakara sime-ḅara ḍiki ị̀ gbẹẹ tẹ,
ò ḍiki-tọrụ ḅụ ị̀ fịafịa wẹrịtẹ sime-ḅara.
26Sịḅị-tuu apụ ma, ị́ sịḅị-tuu ḅara kẹ ḅụụ kẹ ịn ḍiem,
ye kẹ ọlọ-ọlọ ọkụ ofori ḅọ ḅe, ye kẹ ọlọ-ọlọ ọkụ ofori ḅara
kẹ ị́ ḅụụ kẹ ò ḍiem.
27Pikiri-a ḅọ ḅe, ị́ pikiri-a ḅara kẹ ḅụụ kẹ ò ḍiem,
fangala wararị ḅọ ḅe, í penge ḅara kẹ ḅụụ kẹ ò ḍiem.
28Ị́ ḅụụ iderima atomi ḍụa-ḅọrọmam,
kụma ị́ atọrụngbọ ḅụụ-gelema ḅọ ḅe iderim ḅẹ tẹ ori ọgọnọ gbanam.
29Yei KỊNỊNYANAḄỌ karakara-ḅara-ḅụ ị́yẹrị anie ị̀ tọnjọọ
anịsakị ị̀ Tamụnọ, ori ị̀ kanakana mịẹ belemam.
30Karakara-ḅara-ḅụ, ị́ ḅụụ mie arị inetẹ ọmụ-ogbo kọsịma ḅarịye
tẹ ị̀ Tamụnọ ḅụụ, inetẹ onu fiin saḅa ḅarịye.
31Ḅị Tamụnọ ḅe — ori etela karakara gbasịm;
KỊNỊNYANAḄỌ ḅe karịma ye mẹ anie karakaraye;
ori anie ekpeke sọ inima tẹ ọ̀ ḅụụ ḅio ḅụụ ḅọị
apụ mamgba pịrị ḅọ.
32KỊNỊNYANAḄỌ ḅe sikima kụma, tụḅọ Tamụnọ?
Anịsakị wamịna Tamụnọ ḅe sikima kụma ịkụ anie tụḅọ?
33Ḅị Tamụnọ ḅe anie ị̀ kụrọtẹ ḅụụ ḅọị anga,
tẹ mịẹ tẹ gberie-sọ ì etela la-a. 34#Hab 3.19Ori ị̀ aḅụọ kẹ tụḅụra aḅụọ pembe aḅụọ sọmam,
tẹ gele ayọ ma ọgọnọ ḍụkụ tẹ ye ị̀ la-a.
35Ò ye kẹ ị̀ aḅara toluma ọmụ pịrịm,
mịẹ tẹ ị̀ aḅara kọngọ inetẹ ojo iboli anda ḅẹ ḅara.
36Ị́yẹrị ị́ ḅọrọma ekpeke mẹ kẹ ị̀ pịrị tẹ
anịsakị ị́ ḅarasụa ị̀ mịẹ gburo-gburomam,
37Ì suku-ḅio í ḅele anga kẹ ị̀ mẹnjị aḅụọ ma pịrịm
tẹ ị̀ aḅụọ sịnịnị-a.
38Arị ị̀ na fịya-a apụ ḍukam, tẹ ịn ḅaam,
tẹ pịkị ọḅụ daa nwenii ịn fịị fama.
39Arị ịn ḅaa famam; arị in temi toluma tẹ mịẹ tẹ ịn saakị-a;
ini ị̀ aḅụọ-suku ḅịkị korom.
40Gbala ị́yẹrị ịnyọ kẹ ì ḅiri pono owu mẹ pịrịm ẹrẹsị;
ị́yẹrị mie mịẹ tẹ ị̀ na fịya-a tẹ owu kẹ ị̀ paka apụ
ì suku-ḅio ḅile yee.
41Ị́yẹrị ị̀ na fịya-a apụ ma mịẹ tẹ ini ọḅụ pịkị ì gbin tẹ mangịm
inima tẹ ì ḍiki-ḅioḅẹlẹ-a apụ ma, tẹ arị ịn ḅaa famam.
42Ịn ḍikim, kụma ịn ḅọrọma ḅẹ gbọrụḅọ-sọ ofori,
ịn KỊNỊNYANAḄỌ ḅe tẹkẹm, kụma ori ịna tẹkẹ pakịrị-a
43Àrị ịn pẹlẹ kọsịma tẹ ịn kiri mẹ ḅẹ fọọn kịkam,
àrị ịn gbẹẹ kọsịmam, tẹ etela ma ḅẹ lịka nanga
ḅara kẹ ịn nangam.
44Tomi ma na, ịna ịgbanịya ḅụ ị́ ị̀ ḍụa-ḅọrọmam;
sịẹ-sịẹ ma kẹ sịḅịdaḅọ ḅara kẹ ị́ ị̀ wẹrịm;
tomi tẹ à nimi-a apụ fịrịmẹnjị ị̀ pịrịm.
45Igoniapụ ḅo-ḅo sịḅị-tuu ị̀ pịrịm;
ini ị̀ naa gbọrụ sakị, ini ị̀ ḅịḅị pokim.
46Igoniapụ tẹmẹ fuku-faam,
tẹ ịna fọnya ḅụ, ịn ḅụụ-sẹkị na ḅom.
47KỊNỊNYANAḄỌ ḅe ḍumo-sime wararị,
anịsakị boma sime ị̀ ịkụ ḅe pịrị,
gele sime ị̀ Tamụnọ ḅe pịrị,
ị̀ ḅọrọma ịkụ ḅe,
48Tamụnọ ḅe tẹ gbẹẹfị ḅii ị̀ pịrị ḅọ ḅe,
tẹ tomi iderima ị̀ ḅụọ suku-ḅio wẹrị ḅọ ḅe,
49oriḅe tẹ ị̀ na fịya-a apụ ḅara ḅụ ị̀ pakama-ḅo ḅọ ḅe
ị́yẹrị ị̀ saakị-gelema ì ḍiki-ḅioḅẹlẹ-a apụ ma nẹngịmarị
ị́yẹrị ị̀ ḍụa-ḅọrọmam ye kẹ kịnị lama apụ ma aḅara ḅụ
50 #
Rom 15.9
Yei KỊNỊNYANAḄỌ, miemẹ gotẹ arị í tokini gelema
ḅa sịẹ, sịẹ ma ogbo-ḅio
tẹ tokini anume su-su ị́ ẹrẹ pịrị ḅa.
51Gburo-gburotẹ owu-ḅara-iḅi ò nwẹn kẹ ori amadaḅọ pịrịm,
tẹ jike-a ḅẹlẹma nyana ori pulo kẹ sịḅị ḅụ
sara tẹ ḅọ ḅe pịrịm,
anie Devidi na, ọ̀ ḅụụ paka-ḅo apụ na mu
ḅẹẹ-sakị ḅẹẹ-sakị la.
Currently Selected:
2 Samụẹlị 22: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria