2 Samụẹlị 2
2
In Devidi Kẹ Juda Ḅẹ Amadaḅọ Mịẹ Tẹ
1Miemẹ ḅọrọ tẹso, Devidi nwẹnị KỊNỊNYANAḄỌ ḅe ḅịḅị gbela, “Àrị iwo Juda ḅẹ opu ama ma ḅẹ gbọrụ ama mu mọ?”
KỊNỊNYANAḄỌ ḅe nwẹnị ọ̀ pakịrị, “Iwo muu.”
Devidi nwẹnị gbela, “Àrị iwo tọ ama mu ḅarị mọ?”
KỊNỊNYANAḄỌ ḅe nwẹnị ọ̀ ḅẹẹ, “Hẹbụrọnị muu.” 2#1 Sam 25.42,43Anieḅụ Devidi so anịjụ mum, tẹ ori maa ereme Jẹzirili ḅẹ Ayinohamụ na, Abigẹlị, Kamẹlị ḅẹ fịtẹ Nabalị ta ma na sọ mum. 3Devidi ori atomi tẹ ori na sime apụ ma, ọrụḅọ-ọrụḅọ na mḅọ warị-kpo na ọkị iwo ḅom. 4#1 Sam 31.11-13Juda ḅẹ owiapụ ma paka-ḅom, tẹ anịjụ ḅụ tẹ pulo kẹ Devidi sịḅị saram, amadaḅọ sọ Juda warị mẹ pịrịị.
“Jabẹsị-giliyadị ḅẹ owiapụ mie Sọlụ ḍiḅi ye,” ịn nwẹn ḍuko Devidi pịrị tẹso, 5Devidi nwẹnị oku-mẹnjịapụ kẹ Jabẹsị-giliyadị ḅẹ owiapụ ma fịrịma, tẹ ịn ḅẹẹ, “Yee KỊNỊNYANAḄỌ ḅe ó boma, ọ́ mị sịḅị-tuu mẹ nyana Sọlụ ọ́ nyanaḅọ ḅe pịrị, tẹ ò ḍiḅi ye mẹ ẹrẹsị! 6Yee mịọkụ KỊNỊNYANAḄỌ ḅe jike-a ḅẹlẹma na, minini na, nyana ọ́ pịrị! Anịsakị ó miemẹ mịẹ ye mẹ ẹrẹsị àrị iḅi kẹ ọ́ mịẹ ḅa. 7Anịẹrẹsị yee mịọkụ ọmịna aḅara kụrọ, tẹ ó ḅiokpọma owu sọ, kẹ gotẹ ọkọ ḅẹẹarị, Sọlụ ọ́ nyanaḅọ ḅe ọ̀ fịị tẹ, anịsakị Juda warị mẹ pulo kẹ ị̀ sịḅị sara tẹ, arị amadaḅọ sọ ịn pịrịị.”
In Isi-bosẹtị Kẹ Izirẹlị Ḅẹ Amadaḅọ Mịẹ Tẹ
8Mịọkụ Abụna, Naha owiḅọtụḅọ Sọlụ ọmụ-ogbo mẹ ḅẹ ḅẹrẹtọnḅọ ḅe, Isi-bosẹtị, Sọlụ owiḅọtụḅọ ḅe ọkị tẹ ọ̀ saḅama Mahanahịmu ḅo tẹ; 9tẹ ọ̀ nwẹnị ọ̀ kẹ amadaḅọ mịẹ Gilẹdị na, Asa furo-ḅẹ-apụ ma na, Jẹzirili na, Iferemu na, Benijamịnị na, Izirẹlị mẹmgba na pịrị. 10Isi-bosẹtị, Sọlụ owiḅọtụḅọ saakị ama-da Izirẹlị pịrị sakị ọ̀ sịḅị kụra amesi ḅọrọ tẹẹ, tẹ ọ̀ maa akụra kẹ ama-dam. Kụma Juda warị mẹ Devidi ḍukamẹnjịm. 11Anịsakị tẹ Devidi kẹ Hẹbụrọnị ḅụ Juda warị mẹ ḅụ ama-da sakị anie sọnọma akụra na, sonio akalụ na.
Izirẹlị Na, Juda Na Gbin Ọmụ
12Abụna, Naha owiḅọtụḅọ ḅe na, Isi-bosẹtị, Sọlụ owiḅọtụḅọ ḅe afịrịmẹnjịapụ na, Mahanahịmu ḅụ paka Gibiyọnị mum. 13Johabụ, Zeruya owiḅọtụḅọ ḅe na, Devidi afịrịmẹnjịapụ na nwẹnị mẹnjị paka tẹ ḅo Gibiyọnị ḅẹ ḍaḅa mẹ ḅụ ini na donia; tẹ ịn nwẹnị lẹgị-sime; gbọrụ apụ ḍaḅa mẹ ḅẹ gbọrụ akaka ḅụ lẹgịm, gbọrụ apụ pịkị ḍaḅa mẹ ḅẹ osi akaka ḅụ lẹgịm. 14Abụna nwẹnị Johabụ ḅẹẹ, “Yee asawọ ma saakị, tẹ wamịna tọrọkọ ḅụ jụmọ jụmọ na donia.”
Tẹ Johabụ nwẹnị pakịrị, “Yee ịn saakị.”
15Anịtẹso ịn nwẹnị saakị tẹ kịẹn-ḅịḅị ḅụ saḅa-ḅọrọ, oyi maa apụ finji sime Benijamịnị na, Isi-bosẹtị, Sọlụ owiḅọtụḅọ ḅe na pịrịm, na Devidi afịrịmẹnjịapụ ma ḅẹ oyi maa apụ finjima. 16Ini maa fịya-a apụ ma ọgọ kẹ jụmọ-jụmọ sụam, tẹ okologie kẹ ori na fịya-a ḅọ ḅe agaga temi sunm; anie ḅụ ịn ḅịkị kiri-ḅio koro gbolomam, tẹ fịịm. Anịẹrẹsị anịjụ mẹ tẹ Gibiyọnị ḅụ simearị anga mẹ ịn anị sịnm Hẹlịkatị-hazurimu#2.16 Hẹlịkatị-hazurimu fiearị ye, Okologie Atọrụ Ma Ḅẹ Piri. 17Owu mẹ anị ene mẹ ḅụ kụrọ lamam anịsakị Devidi afịrịmẹnjịapụ ma ịna tọrọkọ Abụna na, Izirẹlịapụ ma na nẹngịmam.
18Zeruya tẹra owiapụ-awọmẹ ma anie Johabụ na, Abisahị na, Asahẹlị na. Mịọkụ Asahẹlị ḅụọ-ọfịrịma piri-ḅio tuu mangị ḅara mangịarị; 19tẹ Asahẹlị nwẹnị Abụna ḍuka, ò mu ḅara ḅụ ọ̀ tọrụ pịkị ama-ḅara, anịanịa ere-ḅara da-a, Abụna mie ọ̀ da-da ḍukarị ye. 20Anịtẹso Abụna nwẹnị tọrụ-pịkị ori ọḅụjụ ḍiki, tẹ ḅẹẹ, “Mie ị́yẹrị, Asahẹlị?”
Ọ̀ nwẹnị pakịrị, “Yẹrịị.”
21Abụna nwẹnị ọ̀ ḅẹẹ, “Tọrụ pịkị ị́ ama-ḅara, anịanịa í ere-ḅara daa, tẹ asawọ ma ḅẹ gbọrụḅọ ḅara ḅụ mḅọ aị fọịn ọkịị.” Kụma Asahẹlị ò ḍuka ḅụ tọrụ-pịkị akaka da-a. 22Abụna nwẹnị siin Asahẹlị ḅẹẹ, “Ḅarị ị̀ ḍuka ma, tọrụ-pịkị akaka daa; à tiegotẹ í temi kiri-ḅio koroma na-iḅi? À tọ-ḅara kẹ anịtẹrẹmẹ í iyimbere Johabụ tọrọkọ inetẹ ị̀ tọrụ saakị ḅẹ?” 23Kụma Asahẹlị tọrụ-pịkị akaka da ḍụkụ-a; anịẹrẹsị Abụna nwẹnị sụḅa pịkọ mẹ sịḅị kẹ ò furo ḅụ temi ori oḅukulo toluma, tẹ ọ̀ nwẹnị anịjụ ḅụ ḅịkị, tẹ ò sime anga mẹ ḅụ fịị. Tẹ inweni-mgba tẹ ḅo Asahẹlị ḅịkị tẹ fịị anga mẹ la apụ mamgba tụkụ sịẹsimem.
24Kụma Johabụ na, Abisahị na Abụna ḍukam; tẹ ịrụa mẹ tuuideriarị ogbo ịn ḅo Ama ḅẹ tụndụ mẹ tẹ tẹrẹmẹ ḅo Gati la mẹnjị Gibiyọnị ḅẹ Ịkpa mẹ muarị etela mẹ ḅụ simearị ye mẹ lam. 25Benijamịnị furo-ḅẹ-apụ ma nwẹnị ịna aḅụụ kobiri ḅo gboloma Abụna oḅukulo tẹ ḅo gbọrụ ọmụ-ogbo mịẹ, tẹ tụndụ mẹ ọgọnọ kẹ ịn sịẹsime ḅarị anga mịẹ. 26Anịtẹso Abụna nwẹnị Johabụ sịn, “Okologie mẹ anị guluguluma gbamaso ḅẹ? Mịnẹ kunoma mẹ akụ ḅẹ ḅara ị́ nimi-a? Anị mu tọ sakị la tẹrẹmẹ ị́ ị́ atomi sịn ḅẹ ịna amịnapụ ḍuka mẹ ḅụ ịn pịkịị?”
27Johabụ nwẹnị pakịrị, “Tamụnọ ḍumo-sime wararị ogbo, ị́ ẹkwẹn-a namịna, tụkụma ḅara ḅụ, mimgbe ị̀ atomi ịna amịnapụ ma ḍuka mu dede-ḅio la ḅa.” 28Anieḅụ Johabụ ọdụ mẹ ofurom, tẹ tomi mamgba daasịẹm, tẹ ḅarị jen-maaịn kẹ Izirẹlị ḍuka, anịanịa owu-sọ-a.
29Abụna na, ori atomi na nwẹnị anị bebe ḍin mẹmgba kẹ Ịkpa ḅio ḅẹ ele mẹ mẹnjị-tolu; ịn Jodanị mẹ saḅam, ịn nwẹnị dede mẹmgba kẹ mẹnjị tẹ ḅo Mahanahịmu la.
30Johabụ, Abụna ḍuka mẹ ḅụ pịkịma-som; tẹ ịn tomi mamgba kobiri ḅo gboloma sakị, Devidi afịrịmẹnjịapụ ḅụ, Asahẹlị sikima, gbọrụḅọ fa si ofori. 31Kụma Devidi afịrịmẹnjịapụ, Benijamịnị furo-ḅẹ-apụ Abụna atomi ḅụ kịnị amesi ofori kịnị ẹndẹ ḅaa tẹ. 32Ịn nwẹnị Asahẹlị saakị ọkị, tẹ ori aḍapụ ma ḍuḅu mẹ tẹ Bẹtịlịhẹmụ ḅụ sime ye mẹ ḅio ò ḍiḅim. Tẹ Johabụ na, ori atomi na bebe ḍin mẹmgba kẹ mẹnjịm, tẹ ene mẹ ịna sịḅị ḅaam Hẹbụrọnị ḅụ.
Currently Selected:
2 Samụẹlị 2: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria