Ahẹ Ụgama 119
119
Ọda Ohomorihi
1Aza ẹnẹ ẹ̀ yị mā mẹ akụvị dị ẹ yaa saasa ọda Ẹnẹyịmavara, ẹ̀ nyarị ịrẹsụ ọyịza.
2Mị ka aza ana vavọọ aa saasa ọda Ẹnẹyịmavara,
dị ẹ sị avaba ayị ẹnịnị si eyi pè ọda anị ẹ̀ nyarị ịrẹsụ ọyịza.
3Ẹngụ aza ẹnẹẹ ẹ mā mẹ̀ ebira akụvị, oze Ohomorihi ẹ và tụra nị.
4Ẹnẹyịmavara, wa raà sị zụ̀ ịsị u sì, ẹngụ ịsa ẹnẹẹ a vọrọ ka àa saasa nị.
5Ọ maa navọ kwogwo ma nyẹngụụ sị ayị ọnya saasa ọda awụ.
6Màa vavọọ aa sị ụvọọ za avaba ọda ọnị ụ mẹ, ụhị ọ yị vaa nyị mị.
7Ịjị maà kọsẹ ụ mẹmẹẹ sị ịzẹyịzaa mẹ̀ ọkarẹyị, dị maa sị ayị ọnyaa kụ́ wụ avọ.
8Ọda awụ mị vaa saasa nị, aarịhịnị asị u hi ayị amị.
Ọza ana jẹẹ pè ọda Ohomorihi vaa jẹ
9Wáá yẹ ịsị ọpa ezweyi zụ mẹ dị asị ẹ rẹ mẹ̀ ebira akụvị ịnị ẹhẹ ẹnịnị?
 nyị ka ẹnịnị ẹ̀ẹ saasa ịrẹyị ẹwụ Ẹnẹyịmavara.
10Avaba ayị amị mị sị jẹẹ pe wu nị, aarịhịnị asị ụ zẹẹ ka me nyee eyi hụụnị ọda awụ.
11Ma raà dọ ịrẹyị ọnị ụ kà tụ́ ịnị ayị amị agụvị asị mị na mẹ̀ ebira odivi vẹ ịda awụ
12Ẹnẹyịmavara mà kụ́ wụ.
Navọ wa sị ọda awụ kọ mị.
13Avaba ọda ọnị ụ mẹ vị ọnị mị vaa sị irenu amịị kà.
14Ayị amị vi ene ee hine ka maa saasa jịrị ogu avọọ.
15Ọda awụ ọnịrị ịrẹyị ọnị ụ sị zụ̀ aza vị ọnị mịị̄ raa nọ ịnị anị.
16Ọda awụ ô zee mi eyi, me yi vee hí ayị ịrẹyị ọnị ụ ka.
Ọda Ohomorihi vị ana aā sị ịrajẹ yị ọza
17Ẹnẹyịmavara, wá yẹ ka ozi ahụ awụụ mị vị nị
Navọ wa mẹ̀ ịsa ene zoza mị, dị ma yàrà dị maa saasa ịrẹyị awụ.
18Navọ wa há mi eyi, di me zuu re ịrẹyị ẹbanyị-ẹbanyị ene hi ịnị ọda ọnị ụ mẹ.
19Wâ yẹ ka ọzọga mị vị tụ́ ịnị ẹhẹ nị.
Aarịhịnị asị ụ sị ọda awụ tẹ yị mị.
20Vị ọọ̄ rị mị ayị pooro ka à kà ka ma yẹ ịsị ọda awụ kà mị.
21Wâ kà a yị aza ana mẹ eyii zi ka ẹ̀ sị mẹ hẹẹ.
Aza ẹnẹ ẹ yị saasa ọda ọnị u mẹ̀ ẹ sị dà.
22Navọ asị ụ zẹẹ ka ẹnịnị è ve zụ nyị mi unyi dị ẹ̀ jị mị atẹ,
agụvị ka ịrẹyị awụ vị ọnị mị jẹẹ pè.
23Òo zee e eyi aza ẹbanyị nịnị è hi ẹtẹ di èe du mị,
emi ozi ahụ awụ vị ana vị vaa sị ayịị tụ ịnị ọda ọnị ụ mẹ.
24Ọda awụ ê zee mi eyi ẹtẹẹtẹrẹ, oni è pè mii juwe nị.
Ọza ọnị ọda Ohomorihi jị areyi
25Ma sị hyẹdụ, mee muna eteesu, navọ wa sị mị kwẹẹtẹ anka ụ́ mẹ̀ vịdị kà a.
26Mâ kà irenu amịị wụ, di u tụ́ mi òhi nị.
Navọ wa sị ọda awụ kọ mị.
27Navọ ma zụ yẹ ịrẹyị awụ ọnị waa sịị kọ mị,
ịjọnọọ di mee ro ịrẹyị ịsa ẹbanyị-ẹbanyị ọnị waa mẹ.
28Ayị amị o kú du, ộ ta du mi eyi.
Navọ wa sị ụkata mị anka ụ mẹ̀ kà a.
29Navọ asị ụ zẹẹ ka me nyee eyi,
navọ wa hụ agụvị ayamva awụ dị wa sị ọda awụ kọ mị.
30Ịzẹyịza m mee sì ka maa mẹ̀ nị,
ma raà sị ayị amị tụ́ ịnị ọda awụ.
31Ẹnẹyịmavara, mị nyayịnẹ sị ụvọ za ịrẹyị awụ nị,
navọ asị ụ zẹẹ ka ụhị ọ̀ nyị mị.
32Mẹ yị vaa sị ọda awụụ tụ́ aruvore, agụvị ka mâ yẹ ka ụ vaa mẹ ka maa yẹ ịrẹyịị hu avọọ.
Ohomorihi, navọ ma yẹ ọda awụ
33Ẹnẹyịmavara navọ wa mẹ ka ma yẹ ịsụ ọnị ọda awụ kà, dị ma zụụ saasa a pooro.
34Navọ wa sị ịrẹyọyẹ mị, dị ma sị ụvọ za ọda awụ dị maa sị avaba ayị amịị saasa a.
35Navọ kwogwo asị mị sị ahụ jị ọda awụ nyee, agụvị ka ẹẹ̄ mẹ ka ịnẹ amị ò hine ẹtẹẹtẹrẹ.
36Navọ ahịka ịrẹyị m mẹmẹ vaa mẹ dị ma nyị ẹkẹhị kẹnẹ mị sị tụ́ ịnị ayị nị.
37Gụ mị ụvọ dị ma sị eyi hụụnị ịrẹyị kẹnẹ-kẹnẹ.
Navọ dị wa sị ayị amị tụ́ ịnị ịrẹyị awụ.
38Ịsị ụ ka ụ vaa mẹẹ yị ẹmị ozi ahụ awụ avọọ navọ wa mẹ̀ ẹ mị.
Ịsa ọnọọ ụụ̄ mẹẹ yị aza ene hí angwa awụ nị.
39Angwa vi ene ee hí mi ka asị ụhị nyị mị.
Navọ wa dọ mị tụ́ hụụnị ụhị ọnọọ.
Ọda ọnị ụ mẹ vị ana nyayịnẹ zoza.
40Mâ dà sì ịrẹyị ọda awụ kẹnẹ.
Navọ kwogwo wa mi tụ́, asị mi sú agụvị ka ịsa ana vọrọ ụụ̄ mẹ nị.
Ọza ana sị eyi tura ọda Ohomorihi
41Ẹnẹyịmavara, navọ ma zụ yẹ u meme sì ịrẹyị amị.
Dị wa dọ mị tụ́ anka ụ mẹ̀ kà a.
42Ịjọnọọ mị vaa nyị irenu tụ́ aza ana aa mẹ mị isiya ohi, agụvị ka mâ sị ayị tụra ịrẹyị ọnị ụ kà.
43Aarịhịnị navọ ma zụụ kà ịzẹyịza pooro, agụvị ka ọda awụ mị sị eyi tụra nị.
44Ọda ọnị ụ mẹ vị ọnị mị vaa saasa pooro zịna-zịna.
45Ịzị màa yà me yi vee hí angwa, agụvị ka ọda awụ vị ọnị mị sị eyi pè.
46Mị vaa kà ọda ọnị ụ mẹ yi ohinọyị nịnị dị ụhị ọ yị nyị mị.
47Ọda awụ ê zee mi eyi, agụvị ka mê sì ịrẹyị ẹnịnị.
48Mâ sị ụbanyị yị ọda awụ ọnị mị maanị sì ịrẹyị anị, dị mị sị ịrẹyị anị tụ́ ịnị ayị amị nị.
Ọda Ohomorihi sị ọtụtụrụma yị ọza
49Ẹnẹyịmavara, tamayị ịsị ụ ka ụ vaa mẹẹ yị ẹmị ozi ahụ awụ, agụvị ka m mee zi eyi anị nị.
50Ịsa ana aa sị ayị amịị hunẹnẹ ịnị ụya ọnị maa rị ọ vị ka wa raà kà a ka ụ vaa dọ mịị tụ́.
51Aza ana aa mẹ eyii zị vị ana aā kụ́ mị isiya pooro, ama mẹ yị hụ ụvị avọọ jịnẹ ọda awụ.
52Ẹnẹyịmavara, ma tị tamayị ọda ọnị ụ mẹ hụrẹ ụmọrụmọ, vị ẹẹ̄ sị ayị amịị hunẹnẹ nị.
53M mè re ka aza edivi ẹ yị saasa ọda awụ, ayị amị vị ana aa dà ọva.
54Ọda awụ vị ọnị maa sịị tụ́ irenuu jị ahẹ pooro ịzị màa rẹ na yà.
55Ẹnẹyịmavara, mị vaa tamayị awụ ịrahụ, ọda awụ vị ọnị mị vaa si eyii pè.
56Ọnọọ ọ sị vị ebira amị, ka maa saasa ọda awụ.
Ohomorihi ọ vị ogu amị nị
57Ẹnẹyịmavara, ẹwa vi ogu ọnị mị nyị nị.
Ma sị ọ kà ka mị vaa saasa ọda ọnị ụ mẹ nị.
58Avaba ayị amị m maa sịị dá ịpẹ ka wa vayị amị anka ụ mẹ̀ kà a nị.
59Ma raà zama ebira ẹngụ amị re, ma sị ọ kà ka ịrẹyị awụ mị vaa saasa nị.
60Obooboro mị vaa saasa ọda awụ nị, mẹ yị vaa za a tụra ẹtẹ.
61Òo zee e eyi aza edivi ẹ̀ sị obo sụ́ mị, me yi vee hí ayị ọda ọnị ụ mẹ.
62Agẹvịrahụ vị ọnị mị vaa kwẹẹtẹ dị maa kụ́ wụ avọ, agụvị ka ọda ọnị ụ mẹ vị ana vọrọ.
63Avaba aza ene hí angwa awụ dị ẹ yaa saasa ọda awụ vị ọta amị.
64Ẹnẹyịmavara, avaba anẹhẹ ẹ sị yẹ ka vi uū sì ịrẹyị ọza pooro nị.
Ọda Ohomorihi ô huna ẹkẹhị
65Ẹnẹyịmavara, navọ wa mẹ̀ ịsa ozoza yị ẹmị ozi ahụ awụ anka ụ mẹ̀ kà a.
66Navọ wa kọ mị dị ma yẹ ịrẹyị ọnịrị ịsa ana vọrọ.
67Dị a va sị ụya rị mị mị vịdị nyee eyi nị.
Booro aanị vị ọnị mị kụkụ aa saasa ọda awụ.
68Ẹnẹyịmavara, ọza ọyịza ụ vị nị, dị ahịka ịsa ozoza ụ rẹẹ̄ mẹ nị.
69Aza ana aa mẹ eyii zị e reè cheeche irenyi-irenyi kú mị,
ama avaba ayị mị sị sị saasa ọda awụ nị.
70Ayị aza ẹnẹẹ ệ katẹngụ, ẹ mā vayị ọza.
Ama ọda ẹwụ vị ana nyayịnẹ zee mi eyi.
71Ô zoza ka à vavọọ sị ụya rị mị.
Ọ raà mẹ ka ma zụ yẹ ọda awụ.
72Ọda ọnị ụ mẹ ộ ngụ mị eyi huna igooru ọnịrị ẹkẹhị akàaka a ka.
Ọda Ohomorihi ọ yị nyị irikichi
73Ẹnẹyịmavara, ẹwa mẹ mị nị,
navọ wa sị ịrẹyọyẹ yị mị, dị ma zụ yẹ ọda ọnị ụ mẹ.
74Navọ avaba aza ana nyị angwahi awụ ẹ̀ẹ jẹ ịrajẹ èe re mi, agụvị ka mâ sị eyi tụra ịrẹyị ọnị ụ kà.
75Ẹnẹyịmavara, mâ yẹ ka ọda ọnị ụ mẹ ộ vọrọ, mâ yẹ ka ọda ọnị ụ mẹ ộ vọrọ.
Mâ yẹ ka ayị ọnya ụ sị sị ụya rị mị nị.
76Navọ kwogwo ịrẹyị ọza ọnị ụụ̄ maanịị sì pooro ọ mẹ ayị amị nẹtẹ
anka ụ mẹ̀ kà a yị ẹmị ozi ahụ awụ.
77Navọ wa vayị amị dị asị mi sú, agụvị ka ọda awụ ô zee mi eyi ẹtẹẹtẹrẹ.
78Navọ kwogwo ahịka ụhị ọ va nyị aza ana aa mẹ eyii zị nị,
agụvị ka ẹ yị nyị m mẹ̀ kà yị wa: vi e yee cheeche zị kẹnẹ nị.
79Navọ aza ana yẹ ọda awụ dị ẹ rẹ nyị angwahi awụ ẹ̀ vẹ ịda amị.
80Navọ kwogwo ma nyẹngụ sị avaba ayị amị saasa ọda awụ agụvị asị ụhị na nyị mị.
Ohomorihi, navọ wa dọ mị tụ́
81Ẹnẹyịmavara, o si kù ọnị mị hụrẹ ee zi wu eyi ka wa va dọ mị tụ́
mê zi wu pooro, mee vee sú.
82Mâ tụra wụ eyi pooro, o kú du mi eyi.
Mi kuku ee ro o ka ịhị waa naa vẹ dị wa va gụ mị ụvọ
83Màa daka ta du ha anka ịtụmpa ana aā si echee tụ́ mèe bo avọọ, me yi hi hi ayị ọda awụ.
84Ụ wáá ka ẹmị ozi ahụ awụ ọ maanị jị jẹẹ pooro nị?
Ye re ụmẹ ọnị ụ vaa sị sị ụyaa rị aza ana aa chamayịị mị?
85Aza ana aa me eyi ẹ sị ụsị chị ẹnị ẹ sị và ịrẹpa zi mi.
Ệ yẹ ka wâ mẹ ọda ka asị ọza rẹ vavọọ mẹ.
86Avaba ọda ọnị ụ mẹ ọ rụra sị ayị tụra.
Navọ wa gụ mị ụvọ ka aza aa sị ụyaa rị mị ọọhẹ kẹnẹ-kẹnẹ.
87Ọ sị vọ chee ẹ̀ sị mị wụ hụrẹ ẹhẹ, ama me yi hi hi ayị ọda awụ.
88Navọ wa dọ mị tụ́ dị asị mi sú agụvị ka vi uū sì ịrẹyị ọza nị.
Wàa sị mị dọ tụ́, ọda ọnị wàa mẹ vị ọnị mị vaa saasa.
Ọda Ohomorihi vi ana gụ
89Ẹnẹyịmavara, ịrẹyị awụ vị ana jẹẹ pooro zịna-zịna.
Vị ọ nyayịnẹ sị ahụ hi ẹtẹ ini ihinẹba nị.
90Ịzẹyịza ụụ̄ mẹ pooro nị,
wa raà sị ẹhẹ jẹẹ vị ọ kụkụ jị jẹẹ pooro nị.
91Ọda ọnị ụ mẹ vị ana jị jẹẹ ve tù ajịnị.
Avaba ịsa vi ana aa hẹkẹ wụ.
92À yị vị ana ahịka mê sì ịrẹyị ọda awụ, ụya yaanị sị mị wụ
93Me yi vee hi ayị ọda ọnị ụ mẹ.
Ẹnị ẹ mẹ ka asị mi sú nị.
94Aarịhịnị dọ mị tụ́, agụvị ka ẹwa nyị mị nị.
Maa sịị vụrị ka ma jẹẹ pè ọda awụ.
95Aza edivi jẹẹ ee zi ka ẹnị ẹ̀ wụ̀ mị, ama ọda awụ vị ana yị yà ịnị ayị amị.
96Ma sị yẹ ka avaba ịsa ộ nyị ẹhwị, ama ọda ọnị ụ mẹ vị ana gụ,
ẹ yị nyị ịzị ụ yà nyee eyi ịnị anị.
Ọda Ohomorihi vị anaā sịị ọzaa yẹ ịrẹyị.
97Ẹnẹyịmavara, mâ dà sì ịrẹyị ọda awụ kẹnẹ.
Mmiī roo nọ ịnị anị pooro nị.
98Ọda awụ vị ọnị mị sị tụ́ ịnị ayị pooro.
Ẹ raà mẹ ka ma yẹ ịrẹyị huna ọnịvị amị nịnị.
99Ọda awụ vị ọnị miī roo nọ ịnị anị pooro.
Ẹ raà mẹ ka eyi amị ò hweyi tù ịsa huna aza ana hyakụ aa zụ̀ mị ịsa.
100Mâ yẹ ịrẹyị huna azọkụ nịnị agụvị ka maa saasa ọda ọnị ụ mẹ.
101Mẹ yị zẹẹ ka ma zị ụsẹ akụvị ọnyị-ọnyị, agụvị dị ma zụụ̄ saasa ọda ọnị ụ mẹ. 102Ẹwụ ụvọta ọ sị ọda awụ kọ mị nị, mẹ yị zẹẹ ka ma há hụụnị anị.
103Ịrẹyị ọnị ụụ̄ kà ô hine mị ẹtẹẹtẹrẹ, ộ hyakụ hine mi huna ẹhụ.
104Ọda awụ ọ raà mẹ ka ma yẹ ịrẹyị, agụvị avọọ ebira odivi vị ana aa nyị mị ịhyẹrẹ.
Ọda Ohomorihi vi ẹtohweyi
105Ịrẹyị awụ vị ana sị mẹẹ anka ozotupa avọọ oni mee sii re ẹtẹ.
Etohweyi ana aa si oze zụ̀ mị ọ vị nị.
106Ma sị eku hị́ ka ọda awụ ẹnẹẹ ana maanị vọrọ aanị mị vaa saasa nị. 107Ẹnẹyịmavara, ma raà rị ụya chẹngụ, navọ wa dọ mị tụ́ anka ụ́ mẹ̀ kà a, dị asị mi sú.
108Ọnya m maa sịị kụ́ avọ nị, navọ wa dọ.
Navọ wa sị ọda awụ kọ mị.
109Ụmẹ tụra ụmẹ mịị sịị sị ịrẹsụụ tụ isu nị, ama me yi ree hí ayị ọda ọnị ụ mẹ.
110Aza edivi ẹ raà và ịrẹpa zi mi, ama me yi vee nyee eyii hụụnị ọda awụ.
111Ọda awụ ẹ vị ogu amị pooro nị, ẹnị aa sị ayị amii hine nị.
112Ma raà sị tụ́ ịnị ayị ka mi vaa sị ọda awụụ tẹ pooro dị ma sị ẹhẹ tịtẹ.
Ọda Ohomorihi vị anaā sịị ọzaa tẹ
113Onogevegeve vị ana ayị anịị kụ mị,
ama mê sì ịrẹyị ọda ọnị ụ mẹ.
114Ẹnẹyịmavara, ịda awụ mị zwe va tẹ dị à yị nyị ịsị ẹ zụ mẹ mị nị.
Mâ si eyi tụra ịrẹyị ọnị ụ kà.
115Ẹwụ nịnị aza ana aa mẹ̀ ebira edivi è jesi hụrẹ mi eyi
di me re oze saasa ọda oni Ohomorihi amị mẹ.
116Navọ wa dọ mị tụ́ anka ụ mẹ̀ kà a, ịjọnọọ me yi vee sú.
Ẹwụ mi si eyi tụra nị, aarịhịnị asị ụ na và mi hi ọ.
117Navọ wa sị ụvọ za mị dị ma zụ há, ịjọnọọ mị va zụụ saasa ọda ọnị ụ mẹ nị.
118Avaba aza ana mẹ akamawụụ hi ọda ọnị ụ mẹ vị oni u yi tịtẹ,
agụvị ka irikichi ẹnẹ ẹ yaa mẹ vị kẹnẹ-kẹnẹ.
119Avaba aza ana aa mẹ̀ ebira odivi vị ana yà anka ụsẹmụsẹ ini itutu avọọ éyi awụ.
Emee sì ịrẹyị ọda ọnị ụ mẹ.
120Angwa awụ vi ene ee hí mị, dị ẹngụ amị aa dá ẹgahị agụvị ọkarẹyị ọnị ụụ̄ mẹ.
Ọza ana aa saasa ọda Ohomorihi
121Ẹnẹyịmavara, ịsa ana vọrọ ini eyi awụ mị mẹ nị, mẹ yị mẹ̀ ịsa odivi;
ka asị ụ hụrẹ mị ụvọ yị aza ana aa mẹ ehunaa mị.
122Navọ we re ka wâ mẹ̀ ịsa ene zoza yị emi ozi ahụ awụ,
asị ụ zẹẹ ka aza ana aa mẹ eyi zị ẹ̀ẹ mẹ ẹchakaa mị.
123Mâ tụra eyi pooro ka wa va dọ mị tụ́, o kú du mi eyi.
Mee zi ka ịsa ọnị ụ ka ụ vaa mẹ ana vị ịzẹyịza wa va mẹ̀ ẹ.
124Navọ wa mẹ mị anka u mé sii sì ịrẹyị ọza pooro avọọ, dị a sị ọda awụ kọ mị. 125Ozi ahụ awụ mị vị nọ, sị ịrẹyọyẹ mị dị ma zụ yẹ ọda awụ.
126Ẹnẹyịmavara, wéē re aza màa jịnẹ ọda ọnị ụ mẹ.
O si tù ka à nyị ịsị ụ mẹ ọgọnị.
127Wâ yẹ ka mê sì ịrẹyị ọda awụ ẹtẹẹtẹrẹ.
Mê sì ọ huna igooru obooro ana vị akàaka.
128Avaba ebira akụvị vị ana nyị mị ịhyẹrẹ, agụvị ka mâ yẹ ka avaba ọda awụ vị ana vọrọ.
Àa yẹ avaba aza ẹ̀ẹ saasa ọda Ohomorihi
129Ọda ọnị ụ mẹ ê zoza ẹnẹmẹhị, agụvị avọọ mị vaa saasa a.
130Ịjị ịrẹyị awụ ọ̀ọ sị ngụ ịnị ayị ọza, eyi anị vee hweyi.
Vị ọọ̄ mẹ ka obedu ọ̀ hyakụ yẹ ịrẹyị nị. 131Mè sì ọda awụ ẹtẹẹtẹrẹ
mâ mẹ kaakara agụvị anị pooro, ma kụkụ si irenu há ha, maa tụ́ hụụ-hụụ.
132Navọ wa kana eyi dị wa vayị amị anka ụ mẹ̀ẹ vayị aza ene sì ịrẹyị awụ.
133Navọ waa zụ mi oze anka ụ mẹ̀ kà a, asị ụ navọ ka ebira odivi ọ̀ hu mi ẹtẹ.
134Navọ wa dọ mị tịtẹ hụụnị ọza anaā mẹ ehunaa yị ọza,
dị ma zụụ saasa ịrẹyị awụ.
135Navọ wa mẹ ka ò zee yị ẹmị ozi ahụ awụ, dị waa sị ọda awụụ kọ mị.
136M mè re ka aza ẹ yị zẹẹ ka ẹnị ẹ̀ẹ saasa ọda awụ, ẹgọ vị anaaa ká mị eyi.
Ọda Ohomorihi ọ yị nyị irikichi
137Ẹnẹyịmavara, ịsa ana vọrọ ụụ̄ mẹ nị,
ọda ọnị ụ mẹ vị ana rẹ vọrọ.
138Ọda ọnị ụ ka aza ẹ̀ẹ saasa ệ vọrọ,
ẹ yị nyị irikichi ịnị anị vụrụ-vụrụ.
139Ayị amị aa dà ọva, agụvị ka ọnịvị amị ẹ yị yẹ ka â nyị ịsị aā hị́ ịrẹyị awụ.
140A sị ọ zama re ka avaba ịsa ọnị ụ ka ụ vaa mẹ vị ọnị ụụ̄ mẹ ịzẹyịza.
Mê sì ịrẹyị awụ ẹtẹẹtẹrẹ.
141Dị mị daka vị vị ẹmị ịnya, dị aza aa sị eyii wụ̀ mị aanị, me yi hi ayị ọda ọnị ụ mẹ.
142Ịzẹyịza ọnị ụụ̄ mẹ vị ana jẹẹ pooro zịna-zịna, ọda ọnị ụ mẹrẹ vị ịzẹyịza.
143Mâ nyị ẹngụkata ẹtẹẹtẹrẹ, ama ọda ọnị ụ mẹ vị ana nyayịnẹ zee mi eyi.
144Ịrẹyị ọnị ụ ka aza ẹ̀ẹ mẹ vị ịrẹyị ana vọrọ pooro zịna-zịna.
Navọ wa sị ịrẹyọyẹ mị, dị ma zụ yàra.
Ohomorihi, navọ wa dọ mị tụ́
145Ẹnẹyịmavara, ayị ọnya m maa sịị hí wụ nọ, navọ kwogwo we tụ́ mi òhi.
Wèe tụ́ mi ohi, mị vaa saasa ọda ọnị ụ mẹ.
146Mê nowu hị́ wụ, navọ wa dọ mị tụ́, dị maa saasa ọda ọnị ụ mẹ.
147Di eyi va nị, ma sị kwẹẹtẹ, mee nowu ka wa gụ mị ụvọ.
Ịrẹyị awụ mị si eyi tụra nị.
148Mẹ yị sụ pooro ịrahụ agụvị di mee ro ịrẹyị ịsa ọnị ụ ka ụ vaa mẹ.
149Aarịhịnị ba mi owu anka ú mè sii sì ịrẹyị ọza.
Ẹnẹyịmavara, navọ wa vayị amị
150Anayịchama ana aa sị ụyaa rị mị ẹ sị gụrị mị. Ẹnịnị ẹ mā saasa ọda ọnị ụ mẹ vụrụ-vụrụ.
151Ẹnẹyịmavara, ẹwụ vị ana rẹ gụrị ẹmị.
Avaba ọda awụ vị ịzẹyịza.
152O si kù ọnị mị hụrẹ yẹ hụụnị ọda awụ ka vị ụ mẹ̀ ẹ ka ọ̀ jẹẹ pooro zịna-zịna nị.
Ẹnẹyịmavara, navọ wa gụ mị ụvọ
153Ẹnẹyịmavara, navọ we re ụya ọnị maa rị dị wa dọ mị tụ́.
Wâ yẹ ka me yi hi ayị ọda ọnị ụ mẹ. 154Navọ wa ba mi owu, di wa dọ mị tụ́.
Navọ wa dọ mị tụ́ anka ụ mẹ̀ kà a ka ụ vaa mẹ.
155Aza edivi ẹ yị va zụụ há agụvị ka ẹnịnị ẹ mā saasa ọda awụ.
156Ẹnẹyịmavara, ụụ̄ vayị ọza ẹtẹẹtẹrẹ.
Navọ wa vayị amị, dị wa dọ mi tụ́ dị asị mi sú.
157Ọnịvị amị ana a sị ụyaa rị mị ệ rụrụ, ama mẹ yị sị ahụ jịnẹ ọda awụ.
158Aza ẹnẹ ẹ̀ yị mā mẹ ịzẹyịza vị ọnị ịhyẹrẹ anịị nyị mị.
Ẹnịnị ẹ mā saasa ọda ọnị ụ mẹ.
159Ẹnẹyịmavara, wéē re m mè sì ịrẹyị ọda ọnị ụ mẹ.
Navọ wa dọ mị tụ́ anka ú mè sii ịrẹyị ọza, dị asị mi sú.
160Avaba ịrẹyị awụ vị ịzẹyịza.
Avaba ọda awụ vị ana vọrọ, ẹnịnị vị ana jẹẹ pooro.
Ọda Ohomorihi vị ana aā sị ayị ọzaa hine
161Aza ẹbanyị nịnị aa sị ụyaa rị mị ọọhẹ kẹnẹ.
Ama emi ê hí angwa ịrẹyị awụ
162Ịsa ọnị ụ ka ụ vaa mẹ vị ana aa sị ayị amii hine.
Maa jẹ anka ọza ene ne hèé ogu ọbanyị avọọ nị. 163Me yi sì ịrẹyị ireche, di ọọ̄ nyị mị ịhyẹrẹ nị.
Ama mê sì ịrẹyị ọda ọnị ụ mẹ.
164Mị vaa kụ́ wụ avọ pooro nị agụvị ọda ana vọrọ ọnị ụ mẹ.
165Aza ene sì ịrẹyị ọda ọnị ụ mẹ vị ana nyayịnẹ nyị ẹngwọọrọ,
ẹ yị nyị ịsị ẹ zụ gụ wa hyẹdụ. 166Ẹnẹyịmavara, mâ jẹẹ ka wa va dọ mị há.
Ọda awụ maa saasa nị.
167Maa saasa ọda awụ, agụvị ka mee sì ịrẹyị ẹnịnị ẹtẹẹtẹrẹ.
168Avaba ọda ọnị ụ mẹ vị ọnị maa saasa, agụvị ka wâ yẹ avaba ịsị maa mẹ̀.
Ba mi owu Ẹnẹyịmavara
169Ẹnẹyịmavara, navọ wa ba mi owu.
Navọ wa sị ịrẹyọyẹ mị anka ụ mẹ̀ kà a.
170Navọ wa wụ́ ịpẹ ọnị maa dá, dị wa dọ mị tụ́ anka ụ mẹ̀ kà a ka ụ vaa mẹ.
171Navọ ahịka m maa kụ́ wụ avọ pooro nị, agụvị ka ẹwa sị ọda awụ kọ mị nị.
172Navọ maa sị ọda awụụ jị ahẹ, agụvị ka avaba anị vị ana vọrọ.
173Navọ wa sị ụkata awụ gụ mị ụvọ, agụvị ka ọda ọnị ụ mẹ mị saasa nị.
174Ẹnẹyịmavara, aarịhịnị mee sì ka wa va gu mị ụvọ,
Ọda ọnị ụ mẹ vị ana nyayịnẹ zee mi eyi.
175Navọ asị mi sú, agụvị dị ma zụụ kụ́ wụ avọ.
Navọ ọda awụ ọ̀ọ gụ mị ụvọ.
176Me si nyee eyi anka atẹmẹ ene vu avọọ.
Navọ we ve sì ẹmị ozi ahụ awụ, agụvị ka me yi hí ayị ọda ọnị ụ mẹ.
Currently Selected:
Ahẹ Ụgama 119: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
Ahẹ Ụgama 119
119
Ọda Ohomorihi
1Aza ẹnẹ ẹ̀ yị mā mẹ akụvị dị ẹ yaa saasa ọda Ẹnẹyịmavara, ẹ̀ nyarị ịrẹsụ ọyịza.
2Mị ka aza ana vavọọ aa saasa ọda Ẹnẹyịmavara,
dị ẹ sị avaba ayị ẹnịnị si eyi pè ọda anị ẹ̀ nyarị ịrẹsụ ọyịza.
3Ẹngụ aza ẹnẹẹ ẹ mā mẹ̀ ebira akụvị, oze Ohomorihi ẹ và tụra nị.
4Ẹnẹyịmavara, wa raà sị zụ̀ ịsị u sì, ẹngụ ịsa ẹnẹẹ a vọrọ ka àa saasa nị.
5Ọ maa navọ kwogwo ma nyẹngụụ sị ayị ọnya saasa ọda awụ.
6Màa vavọọ aa sị ụvọọ za avaba ọda ọnị ụ mẹ, ụhị ọ yị vaa nyị mị.
7Ịjị maà kọsẹ ụ mẹmẹẹ sị ịzẹyịzaa mẹ̀ ọkarẹyị, dị maa sị ayị ọnyaa kụ́ wụ avọ.
8Ọda awụ mị vaa saasa nị, aarịhịnị asị u hi ayị amị.
Ọza ana jẹẹ pè ọda Ohomorihi vaa jẹ
9Wáá yẹ ịsị ọpa ezweyi zụ mẹ dị asị ẹ rẹ mẹ̀ ebira akụvị ịnị ẹhẹ ẹnịnị?
 nyị ka ẹnịnị ẹ̀ẹ saasa ịrẹyị ẹwụ Ẹnẹyịmavara.
10Avaba ayị amị mị sị jẹẹ pe wu nị, aarịhịnị asị ụ zẹẹ ka me nyee eyi hụụnị ọda awụ.
11Ma raà dọ ịrẹyị ọnị ụ kà tụ́ ịnị ayị amị agụvị asị mị na mẹ̀ ebira odivi vẹ ịda awụ
12Ẹnẹyịmavara mà kụ́ wụ.
Navọ wa sị ọda awụ kọ mị.
13Avaba ọda ọnị ụ mẹ vị ọnị mị vaa sị irenu amịị kà.
14Ayị amị vi ene ee hine ka maa saasa jịrị ogu avọọ.
15Ọda awụ ọnịrị ịrẹyị ọnị ụ sị zụ̀ aza vị ọnị mịị̄ raa nọ ịnị anị.
16Ọda awụ ô zee mi eyi, me yi vee hí ayị ịrẹyị ọnị ụ ka.
Ọda Ohomorihi vị ana aā sị ịrajẹ yị ọza
17Ẹnẹyịmavara, wá yẹ ka ozi ahụ awụụ mị vị nị
Navọ wa mẹ̀ ịsa ene zoza mị, dị ma yàrà dị maa saasa ịrẹyị awụ.
18Navọ wa há mi eyi, di me zuu re ịrẹyị ẹbanyị-ẹbanyị ene hi ịnị ọda ọnị ụ mẹ.
19Wâ yẹ ka ọzọga mị vị tụ́ ịnị ẹhẹ nị.
Aarịhịnị asị ụ sị ọda awụ tẹ yị mị.
20Vị ọọ̄ rị mị ayị pooro ka à kà ka ma yẹ ịsị ọda awụ kà mị.
21Wâ kà a yị aza ana mẹ eyii zi ka ẹ̀ sị mẹ hẹẹ.
Aza ẹnẹ ẹ yị saasa ọda ọnị u mẹ̀ ẹ sị dà.
22Navọ asị ụ zẹẹ ka ẹnịnị è ve zụ nyị mi unyi dị ẹ̀ jị mị atẹ,
agụvị ka ịrẹyị awụ vị ọnị mị jẹẹ pè.
23Òo zee e eyi aza ẹbanyị nịnị è hi ẹtẹ di èe du mị,
emi ozi ahụ awụ vị ana vị vaa sị ayịị tụ ịnị ọda ọnị ụ mẹ.
24Ọda awụ ê zee mi eyi ẹtẹẹtẹrẹ, oni è pè mii juwe nị.
Ọza ọnị ọda Ohomorihi jị areyi
25Ma sị hyẹdụ, mee muna eteesu, navọ wa sị mị kwẹẹtẹ anka ụ́ mẹ̀ vịdị kà a.
26Mâ kà irenu amịị wụ, di u tụ́ mi òhi nị.
Navọ wa sị ọda awụ kọ mị.
27Navọ ma zụ yẹ ịrẹyị awụ ọnị waa sịị kọ mị,
ịjọnọọ di mee ro ịrẹyị ịsa ẹbanyị-ẹbanyị ọnị waa mẹ.
28Ayị amị o kú du, ộ ta du mi eyi.
Navọ wa sị ụkata mị anka ụ mẹ̀ kà a.
29Navọ asị ụ zẹẹ ka me nyee eyi,
navọ wa hụ agụvị ayamva awụ dị wa sị ọda awụ kọ mị.
30Ịzẹyịza m mee sì ka maa mẹ̀ nị,
ma raà sị ayị amị tụ́ ịnị ọda awụ.
31Ẹnẹyịmavara, mị nyayịnẹ sị ụvọ za ịrẹyị awụ nị,
navọ asị ụ zẹẹ ka ụhị ọ̀ nyị mị.
32Mẹ yị vaa sị ọda awụụ tụ́ aruvore, agụvị ka mâ yẹ ka ụ vaa mẹ ka maa yẹ ịrẹyịị hu avọọ.
Ohomorihi, navọ ma yẹ ọda awụ
33Ẹnẹyịmavara navọ wa mẹ ka ma yẹ ịsụ ọnị ọda awụ kà, dị ma zụụ saasa a pooro.
34Navọ wa sị ịrẹyọyẹ mị, dị ma sị ụvọ za ọda awụ dị maa sị avaba ayị amịị saasa a.
35Navọ kwogwo asị mị sị ahụ jị ọda awụ nyee, agụvị ka ẹẹ̄ mẹ ka ịnẹ amị ò hine ẹtẹẹtẹrẹ.
36Navọ ahịka ịrẹyị m mẹmẹ vaa mẹ dị ma nyị ẹkẹhị kẹnẹ mị sị tụ́ ịnị ayị nị.
37Gụ mị ụvọ dị ma sị eyi hụụnị ịrẹyị kẹnẹ-kẹnẹ.
Navọ dị wa sị ayị amị tụ́ ịnị ịrẹyị awụ.
38Ịsị ụ ka ụ vaa mẹẹ yị ẹmị ozi ahụ awụ avọọ navọ wa mẹ̀ ẹ mị.
Ịsa ọnọọ ụụ̄ mẹẹ yị aza ene hí angwa awụ nị.
39Angwa vi ene ee hí mi ka asị ụhị nyị mị.
Navọ wa dọ mị tụ́ hụụnị ụhị ọnọọ.
Ọda ọnị ụ mẹ vị ana nyayịnẹ zoza.
40Mâ dà sì ịrẹyị ọda awụ kẹnẹ.
Navọ kwogwo wa mi tụ́, asị mi sú agụvị ka ịsa ana vọrọ ụụ̄ mẹ nị.
Ọza ana sị eyi tura ọda Ohomorihi
41Ẹnẹyịmavara, navọ ma zụ yẹ u meme sì ịrẹyị amị.
Dị wa dọ mị tụ́ anka ụ mẹ̀ kà a.
42Ịjọnọọ mị vaa nyị irenu tụ́ aza ana aa mẹ mị isiya ohi, agụvị ka mâ sị ayị tụra ịrẹyị ọnị ụ kà.
43Aarịhịnị navọ ma zụụ kà ịzẹyịza pooro, agụvị ka ọda awụ mị sị eyi tụra nị.
44Ọda ọnị ụ mẹ vị ọnị mị vaa saasa pooro zịna-zịna.
45Ịzị màa yà me yi vee hí angwa, agụvị ka ọda awụ vị ọnị mị sị eyi pè.
46Mị vaa kà ọda ọnị ụ mẹ yi ohinọyị nịnị dị ụhị ọ yị nyị mị.
47Ọda awụ ê zee mi eyi, agụvị ka mê sì ịrẹyị ẹnịnị.
48Mâ sị ụbanyị yị ọda awụ ọnị mị maanị sì ịrẹyị anị, dị mị sị ịrẹyị anị tụ́ ịnị ayị amị nị.
Ọda Ohomorihi sị ọtụtụrụma yị ọza
49Ẹnẹyịmavara, tamayị ịsị ụ ka ụ vaa mẹẹ yị ẹmị ozi ahụ awụ, agụvị ka m mee zi eyi anị nị.
50Ịsa ana aa sị ayị amịị hunẹnẹ ịnị ụya ọnị maa rị ọ vị ka wa raà kà a ka ụ vaa dọ mịị tụ́.
51Aza ana aa mẹ eyii zị vị ana aā kụ́ mị isiya pooro, ama mẹ yị hụ ụvị avọọ jịnẹ ọda awụ.
52Ẹnẹyịmavara, ma tị tamayị ọda ọnị ụ mẹ hụrẹ ụmọrụmọ, vị ẹẹ̄ sị ayị amịị hunẹnẹ nị.
53M mè re ka aza edivi ẹ yị saasa ọda awụ, ayị amị vị ana aa dà ọva.
54Ọda awụ vị ọnị maa sịị tụ́ irenuu jị ahẹ pooro ịzị màa rẹ na yà.
55Ẹnẹyịmavara, mị vaa tamayị awụ ịrahụ, ọda awụ vị ọnị mị vaa si eyii pè.
56Ọnọọ ọ sị vị ebira amị, ka maa saasa ọda awụ.
Ohomorihi ọ vị ogu amị nị
57Ẹnẹyịmavara, ẹwa vi ogu ọnị mị nyị nị.
Ma sị ọ kà ka mị vaa saasa ọda ọnị ụ mẹ nị.
58Avaba ayị amị m maa sịị dá ịpẹ ka wa vayị amị anka ụ mẹ̀ kà a nị.
59Ma raà zama ebira ẹngụ amị re, ma sị ọ kà ka ịrẹyị awụ mị vaa saasa nị.
60Obooboro mị vaa saasa ọda awụ nị, mẹ yị vaa za a tụra ẹtẹ.
61Òo zee e eyi aza edivi ẹ̀ sị obo sụ́ mị, me yi vee hí ayị ọda ọnị ụ mẹ.
62Agẹvịrahụ vị ọnị mị vaa kwẹẹtẹ dị maa kụ́ wụ avọ, agụvị ka ọda ọnị ụ mẹ vị ana vọrọ.
63Avaba aza ene hí angwa awụ dị ẹ yaa saasa ọda awụ vị ọta amị.
64Ẹnẹyịmavara, avaba anẹhẹ ẹ sị yẹ ka vi uū sì ịrẹyị ọza pooro nị.
Ọda Ohomorihi ô huna ẹkẹhị
65Ẹnẹyịmavara, navọ wa mẹ̀ ịsa ozoza yị ẹmị ozi ahụ awụ anka ụ mẹ̀ kà a.
66Navọ wa kọ mị dị ma yẹ ịrẹyị ọnịrị ịsa ana vọrọ.
67Dị a va sị ụya rị mị mị vịdị nyee eyi nị.
Booro aanị vị ọnị mị kụkụ aa saasa ọda awụ.
68Ẹnẹyịmavara, ọza ọyịza ụ vị nị, dị ahịka ịsa ozoza ụ rẹẹ̄ mẹ nị.
69Aza ana aa mẹ eyii zị e reè cheeche irenyi-irenyi kú mị,
ama avaba ayị mị sị sị saasa ọda awụ nị.
70Ayị aza ẹnẹẹ ệ katẹngụ, ẹ mā vayị ọza.
Ama ọda ẹwụ vị ana nyayịnẹ zee mi eyi.
71Ô zoza ka à vavọọ sị ụya rị mị.
Ọ raà mẹ ka ma zụ yẹ ọda awụ.
72Ọda ọnị ụ mẹ ộ ngụ mị eyi huna igooru ọnịrị ẹkẹhị akàaka a ka.
Ọda Ohomorihi ọ yị nyị irikichi
73Ẹnẹyịmavara, ẹwa mẹ mị nị,
navọ wa sị ịrẹyọyẹ yị mị, dị ma zụ yẹ ọda ọnị ụ mẹ.
74Navọ avaba aza ana nyị angwahi awụ ẹ̀ẹ jẹ ịrajẹ èe re mi, agụvị ka mâ sị eyi tụra ịrẹyị ọnị ụ kà.
75Ẹnẹyịmavara, mâ yẹ ka ọda ọnị ụ mẹ ộ vọrọ, mâ yẹ ka ọda ọnị ụ mẹ ộ vọrọ.
Mâ yẹ ka ayị ọnya ụ sị sị ụya rị mị nị.
76Navọ kwogwo ịrẹyị ọza ọnị ụụ̄ maanịị sì pooro ọ mẹ ayị amị nẹtẹ
anka ụ mẹ̀ kà a yị ẹmị ozi ahụ awụ.
77Navọ wa vayị amị dị asị mi sú, agụvị ka ọda awụ ô zee mi eyi ẹtẹẹtẹrẹ.
78Navọ kwogwo ahịka ụhị ọ va nyị aza ana aa mẹ eyii zị nị,
agụvị ka ẹ yị nyị m mẹ̀ kà yị wa: vi e yee cheeche zị kẹnẹ nị.
79Navọ aza ana yẹ ọda awụ dị ẹ rẹ nyị angwahi awụ ẹ̀ vẹ ịda amị.
80Navọ kwogwo ma nyẹngụ sị avaba ayị amị saasa ọda awụ agụvị asị ụhị na nyị mị.
Ohomorihi, navọ wa dọ mị tụ́
81Ẹnẹyịmavara, o si kù ọnị mị hụrẹ ee zi wu eyi ka wa va dọ mị tụ́
mê zi wu pooro, mee vee sú.
82Mâ tụra wụ eyi pooro, o kú du mi eyi.
Mi kuku ee ro o ka ịhị waa naa vẹ dị wa va gụ mị ụvọ
83Màa daka ta du ha anka ịtụmpa ana aā si echee tụ́ mèe bo avọọ, me yi hi hi ayị ọda awụ.
84Ụ wáá ka ẹmị ozi ahụ awụ ọ maanị jị jẹẹ pooro nị?
Ye re ụmẹ ọnị ụ vaa sị sị ụyaa rị aza ana aa chamayịị mị?
85Aza ana aa me eyi ẹ sị ụsị chị ẹnị ẹ sị và ịrẹpa zi mi.
Ệ yẹ ka wâ mẹ ọda ka asị ọza rẹ vavọọ mẹ.
86Avaba ọda ọnị ụ mẹ ọ rụra sị ayị tụra.
Navọ wa gụ mị ụvọ ka aza aa sị ụyaa rị mị ọọhẹ kẹnẹ-kẹnẹ.
87Ọ sị vọ chee ẹ̀ sị mị wụ hụrẹ ẹhẹ, ama me yi hi hi ayị ọda awụ.
88Navọ wa dọ mị tụ́ dị asị mi sú agụvị ka vi uū sì ịrẹyị ọza nị.
Wàa sị mị dọ tụ́, ọda ọnị wàa mẹ vị ọnị mị vaa saasa.
Ọda Ohomorihi vi ana gụ
89Ẹnẹyịmavara, ịrẹyị awụ vị ana jẹẹ pooro zịna-zịna.
Vị ọ nyayịnẹ sị ahụ hi ẹtẹ ini ihinẹba nị.
90Ịzẹyịza ụụ̄ mẹ pooro nị,
wa raà sị ẹhẹ jẹẹ vị ọ kụkụ jị jẹẹ pooro nị.
91Ọda ọnị ụ mẹ vị ana jị jẹẹ ve tù ajịnị.
Avaba ịsa vi ana aa hẹkẹ wụ.
92À yị vị ana ahịka mê sì ịrẹyị ọda awụ, ụya yaanị sị mị wụ
93Me yi vee hi ayị ọda ọnị ụ mẹ.
Ẹnị ẹ mẹ ka asị mi sú nị.
94Aarịhịnị dọ mị tụ́, agụvị ka ẹwa nyị mị nị.
Maa sịị vụrị ka ma jẹẹ pè ọda awụ.
95Aza edivi jẹẹ ee zi ka ẹnị ẹ̀ wụ̀ mị, ama ọda awụ vị ana yị yà ịnị ayị amị.
96Ma sị yẹ ka avaba ịsa ộ nyị ẹhwị, ama ọda ọnị ụ mẹ vị ana gụ,
ẹ yị nyị ịzị ụ yà nyee eyi ịnị anị.
Ọda Ohomorihi vị anaā sịị ọzaa yẹ ịrẹyị.
97Ẹnẹyịmavara, mâ dà sì ịrẹyị ọda awụ kẹnẹ.
Mmiī roo nọ ịnị anị pooro nị.
98Ọda awụ vị ọnị mị sị tụ́ ịnị ayị pooro.
Ẹ raà mẹ ka ma yẹ ịrẹyị huna ọnịvị amị nịnị.
99Ọda awụ vị ọnị miī roo nọ ịnị anị pooro.
Ẹ raà mẹ ka eyi amị ò hweyi tù ịsa huna aza ana hyakụ aa zụ̀ mị ịsa.
100Mâ yẹ ịrẹyị huna azọkụ nịnị agụvị ka maa saasa ọda ọnị ụ mẹ.
101Mẹ yị zẹẹ ka ma zị ụsẹ akụvị ọnyị-ọnyị, agụvị dị ma zụụ̄ saasa ọda ọnị ụ mẹ. 102Ẹwụ ụvọta ọ sị ọda awụ kọ mị nị, mẹ yị zẹẹ ka ma há hụụnị anị.
103Ịrẹyị ọnị ụụ̄ kà ô hine mị ẹtẹẹtẹrẹ, ộ hyakụ hine mi huna ẹhụ.
104Ọda awụ ọ raà mẹ ka ma yẹ ịrẹyị, agụvị avọọ ebira odivi vị ana aa nyị mị ịhyẹrẹ.
Ọda Ohomorihi vi ẹtohweyi
105Ịrẹyị awụ vị ana sị mẹẹ anka ozotupa avọọ oni mee sii re ẹtẹ.
Etohweyi ana aa si oze zụ̀ mị ọ vị nị.
106Ma sị eku hị́ ka ọda awụ ẹnẹẹ ana maanị vọrọ aanị mị vaa saasa nị. 107Ẹnẹyịmavara, ma raà rị ụya chẹngụ, navọ wa dọ mị tụ́ anka ụ́ mẹ̀ kà a, dị asị mi sú.
108Ọnya m maa sịị kụ́ avọ nị, navọ wa dọ.
Navọ wa sị ọda awụ kọ mị.
109Ụmẹ tụra ụmẹ mịị sịị sị ịrẹsụụ tụ isu nị, ama me yi ree hí ayị ọda ọnị ụ mẹ.
110Aza edivi ẹ raà và ịrẹpa zi mi, ama me yi vee nyee eyii hụụnị ọda awụ.
111Ọda awụ ẹ vị ogu amị pooro nị, ẹnị aa sị ayị amii hine nị.
112Ma raà sị tụ́ ịnị ayị ka mi vaa sị ọda awụụ tẹ pooro dị ma sị ẹhẹ tịtẹ.
Ọda Ohomorihi vị anaā sịị ọzaa tẹ
113Onogevegeve vị ana ayị anịị kụ mị,
ama mê sì ịrẹyị ọda ọnị ụ mẹ.
114Ẹnẹyịmavara, ịda awụ mị zwe va tẹ dị à yị nyị ịsị ẹ zụ mẹ mị nị.
Mâ si eyi tụra ịrẹyị ọnị ụ kà.
115Ẹwụ nịnị aza ana aa mẹ̀ ebira edivi è jesi hụrẹ mi eyi
di me re oze saasa ọda oni Ohomorihi amị mẹ.
116Navọ wa dọ mị tụ́ anka ụ mẹ̀ kà a, ịjọnọọ me yi vee sú.
Ẹwụ mi si eyi tụra nị, aarịhịnị asị ụ na và mi hi ọ.
117Navọ wa sị ụvọ za mị dị ma zụ há, ịjọnọọ mị va zụụ saasa ọda ọnị ụ mẹ nị.
118Avaba aza ana mẹ akamawụụ hi ọda ọnị ụ mẹ vị oni u yi tịtẹ,
agụvị ka irikichi ẹnẹ ẹ yaa mẹ vị kẹnẹ-kẹnẹ.
119Avaba aza ana aa mẹ̀ ebira odivi vị ana yà anka ụsẹmụsẹ ini itutu avọọ éyi awụ.
Emee sì ịrẹyị ọda ọnị ụ mẹ.
120Angwa awụ vi ene ee hí mị, dị ẹngụ amị aa dá ẹgahị agụvị ọkarẹyị ọnị ụụ̄ mẹ.
Ọza ana aa saasa ọda Ohomorihi
121Ẹnẹyịmavara, ịsa ana vọrọ ini eyi awụ mị mẹ nị, mẹ yị mẹ̀ ịsa odivi;
ka asị ụ hụrẹ mị ụvọ yị aza ana aa mẹ ehunaa mị.
122Navọ we re ka wâ mẹ̀ ịsa ene zoza yị emi ozi ahụ awụ,
asị ụ zẹẹ ka aza ana aa mẹ eyi zị ẹ̀ẹ mẹ ẹchakaa mị.
123Mâ tụra eyi pooro ka wa va dọ mị tụ́, o kú du mi eyi.
Mee zi ka ịsa ọnị ụ ka ụ vaa mẹ ana vị ịzẹyịza wa va mẹ̀ ẹ.
124Navọ wa mẹ mị anka u mé sii sì ịrẹyị ọza pooro avọọ, dị a sị ọda awụ kọ mị. 125Ozi ahụ awụ mị vị nọ, sị ịrẹyọyẹ mị dị ma zụ yẹ ọda awụ.
126Ẹnẹyịmavara, wéē re aza màa jịnẹ ọda ọnị ụ mẹ.
O si tù ka à nyị ịsị ụ mẹ ọgọnị.
127Wâ yẹ ka mê sì ịrẹyị ọda awụ ẹtẹẹtẹrẹ.
Mê sì ọ huna igooru obooro ana vị akàaka.
128Avaba ebira akụvị vị ana nyị mị ịhyẹrẹ, agụvị ka mâ yẹ ka avaba ọda awụ vị ana vọrọ.
Àa yẹ avaba aza ẹ̀ẹ saasa ọda Ohomorihi
129Ọda ọnị ụ mẹ ê zoza ẹnẹmẹhị, agụvị avọọ mị vaa saasa a.
130Ịjị ịrẹyị awụ ọ̀ọ sị ngụ ịnị ayị ọza, eyi anị vee hweyi.
Vị ọọ̄ mẹ ka obedu ọ̀ hyakụ yẹ ịrẹyị nị. 131Mè sì ọda awụ ẹtẹẹtẹrẹ
mâ mẹ kaakara agụvị anị pooro, ma kụkụ si irenu há ha, maa tụ́ hụụ-hụụ.
132Navọ wa kana eyi dị wa vayị amị anka ụ mẹ̀ẹ vayị aza ene sì ịrẹyị awụ.
133Navọ waa zụ mi oze anka ụ mẹ̀ kà a, asị ụ navọ ka ebira odivi ọ̀ hu mi ẹtẹ.
134Navọ wa dọ mị tịtẹ hụụnị ọza anaā mẹ ehunaa yị ọza,
dị ma zụụ saasa ịrẹyị awụ.
135Navọ wa mẹ ka ò zee yị ẹmị ozi ahụ awụ, dị waa sị ọda awụụ kọ mị.
136M mè re ka aza ẹ yị zẹẹ ka ẹnị ẹ̀ẹ saasa ọda awụ, ẹgọ vị anaaa ká mị eyi.
Ọda Ohomorihi ọ yị nyị irikichi
137Ẹnẹyịmavara, ịsa ana vọrọ ụụ̄ mẹ nị,
ọda ọnị ụ mẹ vị ana rẹ vọrọ.
138Ọda ọnị ụ ka aza ẹ̀ẹ saasa ệ vọrọ,
ẹ yị nyị irikichi ịnị anị vụrụ-vụrụ.
139Ayị amị aa dà ọva, agụvị ka ọnịvị amị ẹ yị yẹ ka â nyị ịsị aā hị́ ịrẹyị awụ.
140A sị ọ zama re ka avaba ịsa ọnị ụ ka ụ vaa mẹ vị ọnị ụụ̄ mẹ ịzẹyịza.
Mê sì ịrẹyị awụ ẹtẹẹtẹrẹ.
141Dị mị daka vị vị ẹmị ịnya, dị aza aa sị eyii wụ̀ mị aanị, me yi hi ayị ọda ọnị ụ mẹ.
142Ịzẹyịza ọnị ụụ̄ mẹ vị ana jẹẹ pooro zịna-zịna, ọda ọnị ụ mẹrẹ vị ịzẹyịza.
143Mâ nyị ẹngụkata ẹtẹẹtẹrẹ, ama ọda ọnị ụ mẹ vị ana nyayịnẹ zee mi eyi.
144Ịrẹyị ọnị ụ ka aza ẹ̀ẹ mẹ vị ịrẹyị ana vọrọ pooro zịna-zịna.
Navọ wa sị ịrẹyọyẹ mị, dị ma zụ yàra.
Ohomorihi, navọ wa dọ mị tụ́
145Ẹnẹyịmavara, ayị ọnya m maa sịị hí wụ nọ, navọ kwogwo we tụ́ mi òhi.
Wèe tụ́ mi ohi, mị vaa saasa ọda ọnị ụ mẹ.
146Mê nowu hị́ wụ, navọ wa dọ mị tụ́, dị maa saasa ọda ọnị ụ mẹ.
147Di eyi va nị, ma sị kwẹẹtẹ, mee nowu ka wa gụ mị ụvọ.
Ịrẹyị awụ mị si eyi tụra nị.
148Mẹ yị sụ pooro ịrahụ agụvị di mee ro ịrẹyị ịsa ọnị ụ ka ụ vaa mẹ.
149Aarịhịnị ba mi owu anka ú mè sii sì ịrẹyị ọza.
Ẹnẹyịmavara, navọ wa vayị amị
150Anayịchama ana aa sị ụyaa rị mị ẹ sị gụrị mị. Ẹnịnị ẹ mā saasa ọda ọnị ụ mẹ vụrụ-vụrụ.
151Ẹnẹyịmavara, ẹwụ vị ana rẹ gụrị ẹmị.
Avaba ọda awụ vị ịzẹyịza.
152O si kù ọnị mị hụrẹ yẹ hụụnị ọda awụ ka vị ụ mẹ̀ ẹ ka ọ̀ jẹẹ pooro zịna-zịna nị.
Ẹnẹyịmavara, navọ wa gụ mị ụvọ
153Ẹnẹyịmavara, navọ we re ụya ọnị maa rị dị wa dọ mị tụ́.
Wâ yẹ ka me yi hi ayị ọda ọnị ụ mẹ. 154Navọ wa ba mi owu, di wa dọ mị tụ́.
Navọ wa dọ mị tụ́ anka ụ mẹ̀ kà a ka ụ vaa mẹ.
155Aza edivi ẹ yị va zụụ há agụvị ka ẹnịnị ẹ mā saasa ọda awụ.
156Ẹnẹyịmavara, ụụ̄ vayị ọza ẹtẹẹtẹrẹ.
Navọ wa vayị amị, dị wa dọ mi tụ́ dị asị mi sú.
157Ọnịvị amị ana a sị ụyaa rị mị ệ rụrụ, ama mẹ yị sị ahụ jịnẹ ọda awụ.
158Aza ẹnẹ ẹ̀ yị mā mẹ ịzẹyịza vị ọnị ịhyẹrẹ anịị nyị mị.
Ẹnịnị ẹ mā saasa ọda ọnị ụ mẹ.
159Ẹnẹyịmavara, wéē re m mè sì ịrẹyị ọda ọnị ụ mẹ.
Navọ wa dọ mị tụ́ anka ú mè sii ịrẹyị ọza, dị asị mi sú.
160Avaba ịrẹyị awụ vị ịzẹyịza.
Avaba ọda awụ vị ana vọrọ, ẹnịnị vị ana jẹẹ pooro.
Ọda Ohomorihi vị ana aā sị ayị ọzaa hine
161Aza ẹbanyị nịnị aa sị ụyaa rị mị ọọhẹ kẹnẹ.
Ama emi ê hí angwa ịrẹyị awụ
162Ịsa ọnị ụ ka ụ vaa mẹ vị ana aa sị ayị amii hine.
Maa jẹ anka ọza ene ne hèé ogu ọbanyị avọọ nị. 163Me yi sì ịrẹyị ireche, di ọọ̄ nyị mị ịhyẹrẹ nị.
Ama mê sì ịrẹyị ọda ọnị ụ mẹ.
164Mị vaa kụ́ wụ avọ pooro nị agụvị ọda ana vọrọ ọnị ụ mẹ.
165Aza ene sì ịrẹyị ọda ọnị ụ mẹ vị ana nyayịnẹ nyị ẹngwọọrọ,
ẹ yị nyị ịsị ẹ zụ gụ wa hyẹdụ. 166Ẹnẹyịmavara, mâ jẹẹ ka wa va dọ mị há.
Ọda awụ maa saasa nị.
167Maa saasa ọda awụ, agụvị ka mee sì ịrẹyị ẹnịnị ẹtẹẹtẹrẹ.
168Avaba ọda ọnị ụ mẹ vị ọnị maa saasa, agụvị ka wâ yẹ avaba ịsị maa mẹ̀.
Ba mi owu Ẹnẹyịmavara
169Ẹnẹyịmavara, navọ wa ba mi owu.
Navọ wa sị ịrẹyọyẹ mị anka ụ mẹ̀ kà a.
170Navọ wa wụ́ ịpẹ ọnị maa dá, dị wa dọ mị tụ́ anka ụ mẹ̀ kà a ka ụ vaa mẹ.
171Navọ ahịka m maa kụ́ wụ avọ pooro nị, agụvị ka ẹwa sị ọda awụ kọ mị nị.
172Navọ maa sị ọda awụụ jị ahẹ, agụvị ka avaba anị vị ana vọrọ.
173Navọ wa sị ụkata awụ gụ mị ụvọ, agụvị ka ọda ọnị ụ mẹ mị saasa nị.
174Ẹnẹyịmavara, aarịhịnị mee sì ka wa va gu mị ụvọ,
Ọda ọnị ụ mẹ vị ana nyayịnẹ zee mi eyi.
175Navọ asị mi sú, agụvị dị ma zụụ kụ́ wụ avọ.
Navọ ọda awụ ọ̀ọ gụ mị ụvọ.
176Me si nyee eyi anka atẹmẹ ene vu avọọ.
Navọ we ve sì ẹmị ozi ahụ awụ, agụvị ka me yi hí ayị ọda ọnị ụ mẹ.
Ebira First Bible © Bible Society of Nigeria, 2014.