2 Ohinọyị 19
19
Ihezekaya ô ne si ajuwe ịnị ụvọ Ayịsaya
(Ayị 37.1-7)
1Ịjị Ihezekaya maanị wụ́ ịrẹyị ọnọnị kẹnẹ, ộ zị ọ ẹngụ, dị ọ́ na awuru anị hi ẹngụ nị. Ộ và ịta ana aā sịị zị ẹngụ, ku ẹngụ, dị ọ nọ ịnị irehi Ẹnẹyịmavara nị. 2Ộ tụ́ Eriyakimi ana si eyi pe irehi ohinọyị, Ịsẹbina ana vị ọchẹrịsa ikootu ọnịrị ẹnị ọzọkụ-ọzọkụ ohirẹsụ irehi Ohomorihi nịnị ne tu Ayịsaya ọnịsẹ ozi Amozi nị. Ẹnị vị ana rẹ kụ ẹnya ana a sịị̄ zị ẹngụ hi ẹngụ. 3Ihezekaya ộ tụ wa ka ẹ̀ na kà a yị Ayịsaya ka, “Ajịnị vị ẹkụhị ụyọrị, aa sị ụyaa rị ẹnị, dị a mẹ̀ ụhị nyị ẹnị nị. Vị́ ẹnị sị mẹ ọnẹẹ anaa barẹẹ, dị ẹnị ẹ̀ yị nyị ụkata ọ̀ yị ma ozi ọnọọ avọọ nị. 4Aanị ohinọyị Ásiriya mẹ̀ tụ ọdọvịdị anụkọrọ anị nịnị ka ẹ̀ va kụ́ Ohomorihi ana yara ụhụ nị. Ẹnẹyịmavara, Ohomorihi ọ̀ wụ ụhụ ẹnẹnị, dị ọ̀ sị ụya rị aza ana vavọọ kụ ọ ụhụ. Agụvị avọọ mẹ̀ aduwa hi Ohomorihi yị ẹnị chee ana vọ aanị. 5Ịjị Ayịsaya wụ ụtụ oni ohinọyị Ihezekaya tụ́ vẹ, 6dị ọ tụ varẹma ka, à na kà a yị Ihezekaya ka: Ẹnẹyịmavara kà, asị o hí angwa agụvị avaba ụhụ ọnị ezi ahụ ohinọyị Asuri va kụ ọnị, ọnị ụ wụ. 7Ẹnẹyịmavara vaa mẹ ka ohinọyị Ásiriya ọ̀ wụ ihuhu, ana vaa mẹ ka ọ̀ varẹma ọọ nọ ẹkụra anị. Ẹnẹyịmavara vaa mẹ ka à wụ ọ ịzọọ.”
Anasiriya nịnị ê re wo hi Anijerusarẹmị nịnị
(Ayị 37.8-20)
8Ọdọvịdị Anasiriya ộ wụ ka ohinọyị ẹnịnị ọ raà hụrị Irakisi. Ộ wụ ka ọnịrị anẹkụra ana gụrị wa ana aā hị́ Iribina aa kụ̀ ịrẹkụ, dị ọ nọ ịzọọ ne pe e ka ịrẹyị nị. 9Anasiriya nịnị ệ wụ ọ ka Itirihaka, ohinọyị Etiyopiya ana raa hị́ Ikusi, ọ́ raà kụ isoja Anijipiti ee vee pe ẹnịị kụ̀ ịrẹkụ. Ịjị ohinọyị Asiriya maanị wụ, ộ sị iwe tụ hi Ihezekaya, ohinọyị Ijuda. 10Ộ kà a yọ ka: Ori ọnị ọ́ sị ayị tụra ọ́ raà kà a yọ ka ụvọ anị ẹ yị vaa kara a. Ama à sị ọ zẹẹ ka ịrẹyị ọnọọ ò vene ọnị o. 11Ọ kà Ihezekaya ộ wụ ịsa oni ohinọyị Asiriyaā mẹ ẹkụra ọnị ộ raà kà a ka oni ee vu ẹtẹ. Vi Ihezekaya wéé roo ka ọnị vaa ha nị? 12Ọ kà ohiku anị nịnị ê vu ẹkụra ana aā hị́ Igozanị, Ịharanị, ọnịrị Ịrẹzẹhwị ẹtẹ. Ẹnịnị ệ wụ Anedẹnị nini ana ra hi ịzị aā hị́ Iterasa, ẹ yị nyị ori ẹnịnị ana va zụ dọ wụ tụ. 13Ọ kà ịzị ohinọyị ẹkụra ana aā hị́ Ihamati, Aripadi, Isehwaveyimi, Ihena, ọnịrị ohinọyị Iva nini hi? 14Ihezekaya ộ dọ iwe ọnọọ hụụnị ụvọ ọnụtụ ẹnẹẹ, dị ọ kà a nị. Ọ sị ọ ka, dị ọ nọ ini Irehi Ẹnẹyịmavara, dị ọ sị tụ ọvịdị Ẹnẹyịmavara nị. 15#Kụra 25.22Ộ mẹ̀ aduwa, dị ọ ka: Ẹwụ Ẹnẹyịmavara, Ohomorihi Anisirẹrị nịnị, ohinọyị ana ya ẹbẹẹba anggẹẹrị nịnị, ẹwụ ịnyara ọ vị̀ Ohomorihi nị. Ẹ wa vị ohinọyị avaba ẹhẹ nị. Ẹwụ tụ ẹtẹ ọnịrị ihinẹba nị. 16Ẹnẹyịmavara, re ịsị aa mẹẹ tu yị booro aanị, wụ̀ avaba ụhụ ọnị Isenakeribi aa kụ̀ ẹwụ Ohomorihi ana yara aanị. 17Ihezekaya ka: Ẹnẹyịmavara, Ịzẹyịza ohinọyị Asiriya nịnị vu anẹkụra ọrụrụ-ọrụrụ ẹtẹ, dị ọ tụ ẹtẹ ẹnịnị osusu nị. 18Ộ rị avaba ori ẹnịnị ịra va ha. Ẹ yị nyị ịsị ori anẹkụra ẹnẹẹ vị. Uyi ana aza sị ọchị ọnịrị ịrẹta mẹ̀ ẹ vị nị. 19Ọ kà, Ẹnẹyịmavara, Ohomorihi ẹnịnị ọ̀ dọ ẹnị ha booro aanị hụụnị ụvọ Anasiriya nịnị; agụvị dị avaba ana ẹkụra ene hi ẹhẹ ẹ̀ yẹ ẹwụ ịnyara, Ẹnẹyịmavara ọ vị Ohomorihi nị.
Ụtụ ọnị Ayịsaya tụ́ ne tu ohinọyị
(Ayị 37.21-38)
20Ayịsaya ộ tụ́ ụtụ ne tu ohinọyị Ihezekaya ka, agụvị aduwa ọnị ọ mẹ, 21Ẹnẹyịmavara kà, Anijerusarẹmị vee nyí wu unyi, ẹwụ Isenakeribi, dị ẹẹ sị wụ mẹ ịyẹyẹ. 22Eni u ro ka ụ maanị aa kụ̀ ụhụ, dị waa sị ọ me enyinyị? Wẹ́ yị sị ụbanyị yị ẹmị Ohomorihi Anisirẹrị ẹnẹ ẹ̀ yị nyị ẹngụ anị. 23Wâ tụ́ ọnụtụ awụ nịnị ka è vee wo otoo hi mi ka wâ kụ aza awụ anaā sịị ịkẹkẹ kụ̀ ịrẹkụ, dị ụ kụ ịrẹkụ na rị ataba Ịrẹbanọnị ana nẹba hu nị. Wâ nyị irenu ka ọchị isida ana gọdọ hu keekere, ọnịrị ọchị Ịsayịpụrẹsị ene zoza hu keekere vị ọnị ụ má va hi ẹtẹ. Ụ ka aha ene noze hu ini iruku vị ọnị ụ ngụ. 24Ẹnẹyịmavara kà ẹwụ Isenakeribi ộ nyị irenu ka, wâ chị́ ịkangga tụ ẹkụra aza ẹnẹsa, di u hú enyi anị nị, ụ ka isoja awụ ệ kụ́ ahụ hi Irehu Ịnayịrị para hu, dị ọ wụ nị. 25Ọ kà, aanị ka wẹ́ yị wụ ọ ka, o si ku ọnị ọnị hụrẹ mẹ eto avaba ọsọnị tịtẹ? Ọnị ọ va sị ọ mẹ booro aanị. Ọnị ộ sị ụkata yị wụ ka wa jị ẹkụra ana jị ọvọ kara eburu. 26Aza ana ra hi ẹkụra ẹnẹẹ ẹ yị nyị ụkata vụrụ-vụrụ. Angwa ộ hí wa, dị ẹnịnị vazi nị. Ẹnịnị vị ana sị mẹẹ avị ana chị́ hi ịnị aarẹ, à vị avị ana chị́ tụ ịrẹsụ irehi avọọ, dị ahị ịrịịra tụ́ hụrẹ eyi ọnị ọyịị̄ zịị vẹ, dị ọ va kụ wa kwooze nị. 27Ẹnẹyịmavara kà, ama oni ộ yẹ avaba ịrẹyị awụ. Ọnị ộ yẹ ịsị ụụ̄ mẹ, ọnịrị ịzị ụụ̄ nọ, ọnị ộ yẹ ụ mẹmẹ aa kụ́ ayịị hi ọnị. 28Ọnị ọ raà wụ enube ọyịkụ awụ ọnịrị ụ mẹmẹ aa sị ẹngụụ tụ ẹba. Booro aanị, ọnị vaa jị arịị chire wu aahị, dị ọnị ka enyusẹ ngụ wụ irenu, ọnị vaa sị wụụ zi oze ọnị ụ zị vẹ gẹdẹ-gẹdẹ avọọ varẹma. 29Dị Ayịsaya va kà a yị ohinọyị Ihezekaya ka: Apọtẹrẹwa ịsị ẹ vaa mẹ yị: Ayịrọnị ọnịrị ụpọsa, apaapa ana chị́ hi ịnị avị kẹnẹ ụ vaa rị nịnị nị. Ama ịrayị anaa vaa tụra a vẹ u ve zuu chire apaapa awụ, dị ụ ha a. Ụ vee chire ụbazị ịvayịnị, dị ụ ha ẹtụtụ anị. 30Aza ana vọ hi Ijuda vị oni o vee zee yi, dị ẹẹ sị mẹẹ anka ọchị ẹnẹ ẹpa anị ngụ ẹtẹ ẹtẹẹtẹrẹ, dị aa tụ́ ẹtụtụ. 31Aza vavọọ hi Ijerusarẹmị ọnịrị ataba Ịzayọnị, agụvị ka Ẹnẹyịmavara ọ sị ẹngụ tenyi ka ọnị vaa maanịị mẹ̀ ẹ. 32Aanị Ẹnẹyịmavara mẹ̀ kà ịnị ịpa ohinọyị Ásiriya nị: Ọ kà, ẹ́ yị vaa ngụ Ijerusarẹmị E yi vee ne ọpa ikonyaa hi ọ. Ẹ yị nyị isoja ana kụ ogonto rị ụvọ ana vaa kà a gụrị ẹkụra ọnọnị. Ọza ẹ yị vaa kụ́ ezii hịrẹ ọvọ anị. 33Ọnị Ẹnẹyịmavara ọ sị ọ ka, ka; oze ọnị ọ́ zị vẹ, ọ́ va zịị varẹma nị. Ẹ yị vaa jị ahụụ ngụ ẹtẹ Ijerusarẹmị. 34Ọnị vee sere ẹkụra ọnọnị, dị ọnị ẹ ị zẹẹ ka à nyị ịsị ẹ mẹ̀ ẹ. Ọnị vavọọ vaa mẹ̀ ẹ agụvị ụbanyị ọnị ọnị sị yị ịrẹha anị, ọnịrị agụvị oto oni ọnị wo yị Idevidi ozi ahụ anị. 35Ịrahụ ịhị ọnọọ anggẹẹrị Ẹnẹyịmavara ọnya, ộ nọ udi Anasiriya nịnị, dị ọ wụ̀ isoja akawụ-akawụ oze ẹnarẹwụ tụra ẹẹva beri akahị (185,000) nị. Etumeyọnị eyinẹhẹ anị, dị avaba ẹnịnị vavọọ su vẹẹrẹ hi ẹtẹ nị. 36Di Isenakeribi ohinọyị Ásiriya và hụụ ịzọọ varẹma nọ Ininivẹ nị. 37Ẹkụhị ọnya, ộ yà ini irehi ori anị ana aā hị́ Inisirochi aa mẹ ahẹkẹ. Â nyị ẹẹva ini ezi anị ana aā hị́ Adiramẹrẹkị, ọnịrị Ịsarẹzẹrị. Ẹnịnị ệ tụ̀ ụhwọ, dị ẹ wụ̀ ọ nị. Ẹ sị ọ wụ, di e zwe ne hi ẹtẹ Ararati nị. Dị ozi anị ọsa ana aā hị́ Esahadoni rị ohinọyị dọ ọ ịrẹsụ nị.
Currently Selected:
2 Ohinọyị 19: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
2 Ohinọyị 19
19
Ihezekaya ô ne si ajuwe ịnị ụvọ Ayịsaya
(Ayị 37.1-7)
1Ịjị Ihezekaya maanị wụ́ ịrẹyị ọnọnị kẹnẹ, ộ zị ọ ẹngụ, dị ọ́ na awuru anị hi ẹngụ nị. Ộ và ịta ana aā sịị zị ẹngụ, ku ẹngụ, dị ọ nọ ịnị irehi Ẹnẹyịmavara nị. 2Ộ tụ́ Eriyakimi ana si eyi pe irehi ohinọyị, Ịsẹbina ana vị ọchẹrịsa ikootu ọnịrị ẹnị ọzọkụ-ọzọkụ ohirẹsụ irehi Ohomorihi nịnị ne tu Ayịsaya ọnịsẹ ozi Amozi nị. Ẹnị vị ana rẹ kụ ẹnya ana a sịị̄ zị ẹngụ hi ẹngụ. 3Ihezekaya ộ tụ wa ka ẹ̀ na kà a yị Ayịsaya ka, “Ajịnị vị ẹkụhị ụyọrị, aa sị ụyaa rị ẹnị, dị a mẹ̀ ụhị nyị ẹnị nị. Vị́ ẹnị sị mẹ ọnẹẹ anaa barẹẹ, dị ẹnị ẹ̀ yị nyị ụkata ọ̀ yị ma ozi ọnọọ avọọ nị. 4Aanị ohinọyị Ásiriya mẹ̀ tụ ọdọvịdị anụkọrọ anị nịnị ka ẹ̀ va kụ́ Ohomorihi ana yara ụhụ nị. Ẹnẹyịmavara, Ohomorihi ọ̀ wụ ụhụ ẹnẹnị, dị ọ̀ sị ụya rị aza ana vavọọ kụ ọ ụhụ. Agụvị avọọ mẹ̀ aduwa hi Ohomorihi yị ẹnị chee ana vọ aanị. 5Ịjị Ayịsaya wụ ụtụ oni ohinọyị Ihezekaya tụ́ vẹ, 6dị ọ tụ varẹma ka, à na kà a yị Ihezekaya ka: Ẹnẹyịmavara kà, asị o hí angwa agụvị avaba ụhụ ọnị ezi ahụ ohinọyị Asuri va kụ ọnị, ọnị ụ wụ. 7Ẹnẹyịmavara vaa mẹ ka ohinọyị Ásiriya ọ̀ wụ ihuhu, ana vaa mẹ ka ọ̀ varẹma ọọ nọ ẹkụra anị. Ẹnẹyịmavara vaa mẹ ka à wụ ọ ịzọọ.”
Anasiriya nịnị ê re wo hi Anijerusarẹmị nịnị
(Ayị 37.8-20)
8Ọdọvịdị Anasiriya ộ wụ ka ohinọyị ẹnịnị ọ raà hụrị Irakisi. Ộ wụ ka ọnịrị anẹkụra ana gụrị wa ana aā hị́ Iribina aa kụ̀ ịrẹkụ, dị ọ nọ ịzọọ ne pe e ka ịrẹyị nị. 9Anasiriya nịnị ệ wụ ọ ka Itirihaka, ohinọyị Etiyopiya ana raa hị́ Ikusi, ọ́ raà kụ isoja Anijipiti ee vee pe ẹnịị kụ̀ ịrẹkụ. Ịjị ohinọyị Asiriya maanị wụ, ộ sị iwe tụ hi Ihezekaya, ohinọyị Ijuda. 10Ộ kà a yọ ka: Ori ọnị ọ́ sị ayị tụra ọ́ raà kà a yọ ka ụvọ anị ẹ yị vaa kara a. Ama à sị ọ zẹẹ ka ịrẹyị ọnọọ ò vene ọnị o. 11Ọ kà Ihezekaya ộ wụ ịsa oni ohinọyị Asiriyaā mẹ ẹkụra ọnị ộ raà kà a ka oni ee vu ẹtẹ. Vi Ihezekaya wéé roo ka ọnị vaa ha nị? 12Ọ kà ohiku anị nịnị ê vu ẹkụra ana aā hị́ Igozanị, Ịharanị, ọnịrị Ịrẹzẹhwị ẹtẹ. Ẹnịnị ệ wụ Anedẹnị nini ana ra hi ịzị aā hị́ Iterasa, ẹ yị nyị ori ẹnịnị ana va zụ dọ wụ tụ. 13Ọ kà ịzị ohinọyị ẹkụra ana aā hị́ Ihamati, Aripadi, Isehwaveyimi, Ihena, ọnịrị ohinọyị Iva nini hi? 14Ihezekaya ộ dọ iwe ọnọọ hụụnị ụvọ ọnụtụ ẹnẹẹ, dị ọ kà a nị. Ọ sị ọ ka, dị ọ nọ ini Irehi Ẹnẹyịmavara, dị ọ sị tụ ọvịdị Ẹnẹyịmavara nị. 15#Kụra 25.22Ộ mẹ̀ aduwa, dị ọ ka: Ẹwụ Ẹnẹyịmavara, Ohomorihi Anisirẹrị nịnị, ohinọyị ana ya ẹbẹẹba anggẹẹrị nịnị, ẹwụ ịnyara ọ vị̀ Ohomorihi nị. Ẹ wa vị ohinọyị avaba ẹhẹ nị. Ẹwụ tụ ẹtẹ ọnịrị ihinẹba nị. 16Ẹnẹyịmavara, re ịsị aa mẹẹ tu yị booro aanị, wụ̀ avaba ụhụ ọnị Isenakeribi aa kụ̀ ẹwụ Ohomorihi ana yara aanị. 17Ihezekaya ka: Ẹnẹyịmavara, Ịzẹyịza ohinọyị Asiriya nịnị vu anẹkụra ọrụrụ-ọrụrụ ẹtẹ, dị ọ tụ ẹtẹ ẹnịnị osusu nị. 18Ộ rị avaba ori ẹnịnị ịra va ha. Ẹ yị nyị ịsị ori anẹkụra ẹnẹẹ vị. Uyi ana aza sị ọchị ọnịrị ịrẹta mẹ̀ ẹ vị nị. 19Ọ kà, Ẹnẹyịmavara, Ohomorihi ẹnịnị ọ̀ dọ ẹnị ha booro aanị hụụnị ụvọ Anasiriya nịnị; agụvị dị avaba ana ẹkụra ene hi ẹhẹ ẹ̀ yẹ ẹwụ ịnyara, Ẹnẹyịmavara ọ vị Ohomorihi nị.
Ụtụ ọnị Ayịsaya tụ́ ne tu ohinọyị
(Ayị 37.21-38)
20Ayịsaya ộ tụ́ ụtụ ne tu ohinọyị Ihezekaya ka, agụvị aduwa ọnị ọ mẹ, 21Ẹnẹyịmavara kà, Anijerusarẹmị vee nyí wu unyi, ẹwụ Isenakeribi, dị ẹẹ sị wụ mẹ ịyẹyẹ. 22Eni u ro ka ụ maanị aa kụ̀ ụhụ, dị waa sị ọ me enyinyị? Wẹ́ yị sị ụbanyị yị ẹmị Ohomorihi Anisirẹrị ẹnẹ ẹ̀ yị nyị ẹngụ anị. 23Wâ tụ́ ọnụtụ awụ nịnị ka è vee wo otoo hi mi ka wâ kụ aza awụ anaā sịị ịkẹkẹ kụ̀ ịrẹkụ, dị ụ kụ ịrẹkụ na rị ataba Ịrẹbanọnị ana nẹba hu nị. Wâ nyị irenu ka ọchị isida ana gọdọ hu keekere, ọnịrị ọchị Ịsayịpụrẹsị ene zoza hu keekere vị ọnị ụ má va hi ẹtẹ. Ụ ka aha ene noze hu ini iruku vị ọnị ụ ngụ. 24Ẹnẹyịmavara kà ẹwụ Isenakeribi ộ nyị irenu ka, wâ chị́ ịkangga tụ ẹkụra aza ẹnẹsa, di u hú enyi anị nị, ụ ka isoja awụ ệ kụ́ ahụ hi Irehu Ịnayịrị para hu, dị ọ wụ nị. 25Ọ kà, aanị ka wẹ́ yị wụ ọ ka, o si ku ọnị ọnị hụrẹ mẹ eto avaba ọsọnị tịtẹ? Ọnị ọ va sị ọ mẹ booro aanị. Ọnị ộ sị ụkata yị wụ ka wa jị ẹkụra ana jị ọvọ kara eburu. 26Aza ana ra hi ẹkụra ẹnẹẹ ẹ yị nyị ụkata vụrụ-vụrụ. Angwa ộ hí wa, dị ẹnịnị vazi nị. Ẹnịnị vị ana sị mẹẹ avị ana chị́ hi ịnị aarẹ, à vị avị ana chị́ tụ ịrẹsụ irehi avọọ, dị ahị ịrịịra tụ́ hụrẹ eyi ọnị ọyịị̄ zịị vẹ, dị ọ va kụ wa kwooze nị. 27Ẹnẹyịmavara kà, ama oni ộ yẹ avaba ịrẹyị awụ. Ọnị ộ yẹ ịsị ụụ̄ mẹ, ọnịrị ịzị ụụ̄ nọ, ọnị ộ yẹ ụ mẹmẹ aa kụ́ ayịị hi ọnị. 28Ọnị ọ raà wụ enube ọyịkụ awụ ọnịrị ụ mẹmẹ aa sị ẹngụụ tụ ẹba. Booro aanị, ọnị vaa jị arịị chire wu aahị, dị ọnị ka enyusẹ ngụ wụ irenu, ọnị vaa sị wụụ zi oze ọnị ụ zị vẹ gẹdẹ-gẹdẹ avọọ varẹma. 29Dị Ayịsaya va kà a yị ohinọyị Ihezekaya ka: Apọtẹrẹwa ịsị ẹ vaa mẹ yị: Ayịrọnị ọnịrị ụpọsa, apaapa ana chị́ hi ịnị avị kẹnẹ ụ vaa rị nịnị nị. Ama ịrayị anaa vaa tụra a vẹ u ve zuu chire apaapa awụ, dị ụ ha a. Ụ vee chire ụbazị ịvayịnị, dị ụ ha ẹtụtụ anị. 30Aza ana vọ hi Ijuda vị oni o vee zee yi, dị ẹẹ sị mẹẹ anka ọchị ẹnẹ ẹpa anị ngụ ẹtẹ ẹtẹẹtẹrẹ, dị aa tụ́ ẹtụtụ. 31Aza vavọọ hi Ijerusarẹmị ọnịrị ataba Ịzayọnị, agụvị ka Ẹnẹyịmavara ọ sị ẹngụ tenyi ka ọnị vaa maanịị mẹ̀ ẹ. 32Aanị Ẹnẹyịmavara mẹ̀ kà ịnị ịpa ohinọyị Ásiriya nị: Ọ kà, ẹ́ yị vaa ngụ Ijerusarẹmị E yi vee ne ọpa ikonyaa hi ọ. Ẹ yị nyị isoja ana kụ ogonto rị ụvọ ana vaa kà a gụrị ẹkụra ọnọnị. Ọza ẹ yị vaa kụ́ ezii hịrẹ ọvọ anị. 33Ọnị Ẹnẹyịmavara ọ sị ọ ka, ka; oze ọnị ọ́ zị vẹ, ọ́ va zịị varẹma nị. Ẹ yị vaa jị ahụụ ngụ ẹtẹ Ijerusarẹmị. 34Ọnị vee sere ẹkụra ọnọnị, dị ọnị ẹ ị zẹẹ ka à nyị ịsị ẹ mẹ̀ ẹ. Ọnị vavọọ vaa mẹ̀ ẹ agụvị ụbanyị ọnị ọnị sị yị ịrẹha anị, ọnịrị agụvị oto oni ọnị wo yị Idevidi ozi ahụ anị. 35Ịrahụ ịhị ọnọọ anggẹẹrị Ẹnẹyịmavara ọnya, ộ nọ udi Anasiriya nịnị, dị ọ wụ̀ isoja akawụ-akawụ oze ẹnarẹwụ tụra ẹẹva beri akahị (185,000) nị. Etumeyọnị eyinẹhẹ anị, dị avaba ẹnịnị vavọọ su vẹẹrẹ hi ẹtẹ nị. 36Di Isenakeribi ohinọyị Ásiriya và hụụ ịzọọ varẹma nọ Ininivẹ nị. 37Ẹkụhị ọnya, ộ yà ini irehi ori anị ana aā hị́ Inisirochi aa mẹ ahẹkẹ. Â nyị ẹẹva ini ezi anị ana aā hị́ Adiramẹrẹkị, ọnịrị Ịsarẹzẹrị. Ẹnịnị ệ tụ̀ ụhwọ, dị ẹ wụ̀ ọ nị. Ẹ sị ọ wụ, di e zwe ne hi ẹtẹ Ararati nị. Dị ozi anị ọsa ana aā hị́ Esahadoni rị ohinọyị dọ ọ ịrẹsụ nị.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.