ỊMATIYU 2
2
Angị Jẹ́ Ẹla Gbịgba Ha IJisọsị
1IMeri ma iJisọsị ị-ịBẹtịlẹhẹm ọ-ọpyị nya iJudiya. Ụka ọọwa, iHerọdụ a ri Adịrahụ nya alụwa lẹ. Ụka kị ma iJisọsị kpá bwaa, angị jẹ ẹla ịhyẹ kele ka iJerusalẹm bwu ọmwẹnụ-ụtụrụ. Angị jẹ́ ẹla ịịwa ri angị jẹ́ ang chajị nya ịdịchụ lụmẹ. Ị yẹ ịdịchụ yẹyẹ ẹ-ẹhị lẹ, ị kaa yẹ ọmwụ nya ang ọlẹ kọ ka họ ijuju myị́. 2Angị jẹ́ ẹla ịịwa, ị tọ ịtọ i-iJerusalẹm yẹkẹẹ, “Ale, ị tị́ ma ọnyị ọlẹ kọ ka ri Adịrahụ nya ala iJuu wuu nọ? Ahị yẹ ọdọchụ nya ọnyị ọọwa kọ hu ọ-ọmwẹnụ-ụtụrụ. Ịnyị a du kahị ba ọdọchụ ọọwa warị, kahị ka gbịgba ha ọnyị ọọwa lẹ.”
3Ụka ká adịrahụ iHerọdụ wo ẹla ọọwa, ọ hu akama ha olegu nya iHerọdụ ayịdang lụmẹ bala ala iJerusalẹm ịlẹ wuu kị wo ẹla ọọwa tọọ ịnyịnyị. 4Ahyaahị, iHerọdụ wụrụ alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ wuu kaka jịra ahyaahị. Ọ taa wo yẹkẹẹ, “Ale, ị tị́ ya kị ka ma ịKịrayịsị ọọwa?” 5Angịwẹ wẹ byọọ yẹkẹẹ, “E-epweji nya ịBẹtịlẹhẹm o-la iJudiya ịnyị. Chajị ị-ịBẹtịlẹhẹm, ọlọmwụ nya Ohe Oluhye a ya, nyị ka mọọ lẹ.”
6“Jaabwọ kị dọọ a lẹẹ lẹ:
‘Ahụ epweji nya ịBẹtịlẹhẹm, wo mẹ.
Á ka ri epweji ọhịnyẹnyẹ ẹ-ẹga nya ịdịrịhụ oriri ọlimwawụ nya ijuda kpong-kpong ka.
Chajị e-epweji nyang ahụ ịBẹtịlẹhẹm ọwẹ,
adịrahụ ọtụka ọlẹ kọ ka kpẹhị rịrị ala Isirẹlụ wuu,
a ka bwu kpehe lẹ.’”
7Ụka ọọwa, iHerọdụ wụrụ angga angị jẹ́ ẹla ịịwa kele kaka taa ịtọ ị-ịbaa-ịbaa kwẹẹ yẹkẹẹ, anụ nyị ya je ọwa ụka ọlẹ ká ọdọchụ nya ọnyị ọọwa nyị hu kpangga mẹ. 8Ọọwa lẹ, iHerọdụ a byaa yẹkẹẹ, “Anụ rụ kele ka ịBẹtịlẹhẹm kaka kpahị nya ọnyị ọọwa gbee kanụ ka yọọ mẹ. Ụka kanụ yọọ lẹ, anụ́-ụ nya bwu ẹgẹlẹ kaka ya jem, chajị kam ka kele kaka gbịgba họọ ịnyịnyị mẹ!”
9Ụka kị wo ẹla oyaya nya adịrahụ iHerọdụ kpá, ị hu ang ẹdịyẹ nya ịBẹtịlẹhẹm. Ụka kị jẹ pwụ ụgbẹyị, ị chẹhị kaka yẹ ọdọchụ nya ọnyị ọọwa kọ myịmyị hu lala olene-ene. Ọdọchụ ọọwa kpaa ụgbẹyị gbee kọ kaka godayị rịrị pwoku ẹ-ẹga ọlẹ ká ọnyị ọọwa ji kpangga. 10Alẹng ịwẹ chị ọkẹkẹnị ọtụka-ọtụka lụmẹ ụka kị myịmyị yẹ ọdọchụ ọwẹ. 11Ụka kị pwụ ụwa, ị jụ kele ka ẹpwang ọlẹ ká ọnyị ọọwa ji bala iMeri ịnamwụ. Ọọwa lẹ, ịwa wuu a ya arụụ nyaa kụ eji juwa gbịgba ha ọnyị ọọwa lẹlẹ. Ụka kị wụrụ ịbang nyaa lẹ, ị hu okpoko ịgọm ga ha ọnyị ọọwa bala ụma nya ida ichoru kwọkwọ ịhyẹ ịlẹ kị wụrụ “ịfụrangkinsẹnsị,” bala “ịmaa” lẹlẹ.
12Ụka ká alẹng ịwẹ juwa nune, Ohe Oluhye ya ẹla taa ụ-ụlaa yẹkẹẹ, anụ nyị́ ka rụ, anụ nyị myịmyị bwu ẹga nya iHerọdụ kokoo. Ịnyị, ị bwu ụgbẹyị ọkịla rụ ka ẹpwa lẹlẹ.
Ị Kpa IJisọsị Kaka Kpịbaa Ijipiti
13Ụka ká angị jẹ́ ẹla ịịwa rụ kpá, Ohe Oluhye du olegu-ẹrụ nyamwụ ọhẹ ẹrụ ta iJosẹfụ ụ-ụlaa la odu kaka byọọ yẹkẹẹ, “IJosẹfụ, wuleji ká kpa ọnyị nyang bala ịnamwụ rụnyẹ rụ kaka kpịbaa ọ-ọpyị nya Ijipiti ahyaahị mẹ. Chajị iHerọdụ juwa tịtọ kọ ka nwụ ọnyị ọlẹ hing lẹ! A kpọọ nya bwu Ijipiti ka gbee pwụ ụka ọlẹ kam ka ya jeng myịmyị ene.” 14Ịnyị lẹ, iJosẹfụ a hu ang ẹdịyẹ la ọnyị nyamwụ ọwẹ bala iMeri ahụ nyamwụ rụ la odu-odu ọọwa kele ka Ijipiti lẹlẹ. 15IJosẹfụ kpaa hụ ụ-ụwa gbee pwụ ụka ká iHerọdụ gbu ene kị nya bwu ụwa. Ẹlẹwẹ ri ọ-họ jịra nya ẹla ọlẹ ká Ọngọlahị Ohe Oluhye ya bwu ọnụ nya ọlọmwụ nyamwụ ọhẹ yẹkẹẹ, “Am Ohe Oluhye be ẹkọ wụrụ Ọnyẹwẹ nyam bwu Ijipiti.”
Anyị Anjwo Ọnwụnwụ Ị-ịBẹtịlẹhẹm
16Ụka ká iHerọdụ jẹ́ yẹkẹẹ, angga i-bwu ọmwẹnụ-ụtụrụ ịwẹ, nyị da ọwa la ụgbaa lẹ, ọ juwa wụ ẹjẹ ọtụka-ọtụka nya ịlẹhị-ịlẹhị lẹlẹ. Ịnyị lẹ, iHerọdụ a da angịnyị nyamwụ ehile yẹkẹẹ, anụ nyị kele kaka nwụ anyị alẹng ịlẹ kịị nyị gu ẹka imiiye weji wuu ị-ịBẹtịlẹhẹm bala epweji ịlẹ wuu kịị nyị dagaga jwọọ mẹ. IHerọdụ da ehile ọọwa yahị me ụka ọlẹ ká angị jẹ́ ẹla ịwẹ joo oja yẹkẹẹ, ịwa nyị yẹ ọdọchụ nya ọnyị ọlẹ kịị nyị ka ri adịrahụ ọọwa.
17Ẹlẹwẹ ri ọ-họ jịra nya ọmwụ ọyẹyẹ nya iJeremaya ọlọmwụ nya Ohe Oluhye ọlẹ kọ ya ene-ene yẹkẹẹ,
18“Omyi nya ida ojeje gboo bala ida ọbaba ọtụka-ọtụka kpeji e-epweji nya iRama. IRechẹlụ lalẹẹ jida. Ọ juwa jida myịmyị, juwa ma je ọtụka-ọtụka gbee ká ọngọngọhẹ á kọọ ida myị́ kpong-kpong kaka, chajị anyị nyamwụ wuu gbu hyọọ lẹ.”
IJosẹfụ Kpa IJisọsị nyà Bwu Ijipiti
19Ụka ká iHerọdụ gbu kpá, olegu-ẹrụ nya Ohe Oluhye ọhẹ myịmyị kele ka ẹga nya iJosẹfụ ụ-ụlaa ụ-ụwa Ijipiti kaka byọọ yẹkẹẹ, 20“IJosẹfụ, wuleji ká hu ọnyị nyang bala ịnamwụ ka kpaa rụ tịrẹkpẹ kele ka ọpyị nya Isirẹlụ myịmyị mẹ. Chajị angịlẹ kị juwa tịtọ kị ka nwụ ọnyị nyang, ị gbu wuu lẹ.” 21Ịnyị lẹ, iJosẹfụ a hu ọnyị nyamwụ ọwẹ bala iMeri ịnọnyị lẹ, ị nyà bwu ụwa wẹ ọpyị nya Isirẹlụ ịnyịlẹhị lẹlẹ.
22Ụka ká iJosẹfụ wo yẹkẹẹ, Aakiliyọsị ọnyị nya iHerọdụ nyaa ri adịrahụ ku ọmwakpa nya adamwụ i-iJudiya lẹ, iJosẹfụ a juwa juhi nyọka kele kaka kụ ụwa i-iJudiya lẹlẹ. Ịnyị lẹ, ụka ká Ohe Oluhye myịmyị du ẹrụ kele kaka chabwọ ya je iJosẹfụ ụ-ụlaa jaabwọ kọ ka bwu họ lẹ, iJosẹfụ a rụ kele kaka kụ ọpyị nya ịGalili lẹlẹ. 23Ẹnyị nya epweji ọlẹ ká iJosẹfụ kụ ri ịNasareti jaabwọ ká alọmwụ nya Ohe Oluhye ịhyẹ yẹ ọmwụ ene-ene yẹkẹẹ, “Ị ka wụrụ ịKịrayịsị ọọwa, ọla ịNasareti.”
Currently Selected:
ỊMATIYU 2: IBNO
Highlight
Copy
Compare
Share
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.