ĀCƐ URÓM 8
8
O yēeyī oŋmá lɛ ɛ́gɛ́nɛ̄ Alelékwū kú Ɔwɔicō tíne ā
1É gáā ŋmá ācɛ nēe pīyatɔ̄há mla Ohɔ́nyɛtá Ujísɔ̄si abālɔbányā ɛpɔ̄bí dúúmā gɛ ŋ́. 2Ohígbū ka Alelékwū ā le um hɛ́tá, o ŋmá lɛ opīyatɔ̄há mla Ohɔ́nyɛtá Ujísɔ̄si ā, ŋmá íkwu kú ínoōbīya mɛ́mla ikwū ɛɛ́. 3Ɔwɔicō lɛ ɔdā nēe íne ā í yá glá ŋ́ ohígbū ka ɔkpíyē i gbagbafú ā yá. Ó lɛ ɛpɔ̄bí ŋmó ínoōbīya nōo ī yúklɔ́ ipú ɔtū kú ɔlɛɛcɛ ā, o ŋmá le o tū ɔyí abɔ̄yīnū, nōo wɛ ɛ́gbla kú ɔlɛɛcɛ nōo ī bīyíne ā wā ipú ɛcɛ, cɛ́ɛ́ kóō lɛ íne nɛ̄ alɛɛcɛ bīya ā kpó nyɔ̄. 4Ɔwɔicō yá ɛ̄nyā cɛ́ɛ́ kéē lɛ ɔdā nōo i kpaakpa, nɛ̄ íne ā dɔɔ̄kā ā, yá jīla ipú alɔ nēe ī yá ɔdā nɛ̄ Alelékwū ā ī dɔɔ̄kā ā, amáŋ alɔ í yɛce ɔkpíyē kú ɔlɛɛcɛ ōbīyíne ā gɛ ŋ́. 5Ācɛ nēe ī yɛce ɔdā nɛ̄ ɔkpíyē kú uwā da uwá ā, gē yá ɔdā nɛ̄ ɔkpíyē kú uwā dɔɔ̄kā ā, amáŋ ācɛ nēe ī yɛce ɔdā nɛ̄ Alelékwū Ihɔ da uwá ā, gē lɛ ɔtū kú uwā kwu ɔdā nɛ̄ Alelékwū dɔɔ̄kā ā. 6Ɔ́dāŋ́ ka ɔ̄cɛ ī gbɛlá ɔdā nɛ̄ ɔkpíyē kú nū ī dɔɔ̄kā ōfōōfūnū, ó géē kwú, amáŋ ɔ́dāŋ ka ɔ̄cɛ ī gbɛlá ɔdā nɛ̄ Alelékwū kú Ɔwɔicō ī dɔɔ̄kā ā, ó géē yēeyī klla í lɛ ɛbɔ́. 7Ācɛ nēe ī yá ɔdā nɛ̄ ɔkpíyē kú uwā dɔɔ̄kā ā kwú pīya aólɛlā kú Ɔwɔicō, ohígbū kéē lɛyítáajɛ lɛ íne kú Ɔwɔicō glá ŋ́, ɔkwɔ̄ɔ̄kwɛ̄yi é lɛyítáajɛ lɛ ɔ́ glá ŋ́. 8Ācɛ nēe gē yá ɔdā nɛ̄ ɔkpíyē kú uwā dɔɔ̄kā ā í gáā yá ɔdā dúú nōo he Ɔwɔicō ɔtū glá ŋ́.
9Ɔ́dāŋ́ ka Alelékwū kú Ɔwɔicō lā ipú aá ɔkwɔ̄ɔ̄kwɛ̄yi, aá gáā yá ɔdā nɛ̄ ɔkpíyē kú ɔlɛɛcɛ ī dɔɔ̄kā ā ŋ́. Amáŋ aá híī yɔ̄ gē yá ɔdā nɛ̄ ɔkpíyē kú aá dɔɔ̄kā ā ŋ́, ikɔkɔ ɔ́ɔmā aá yá ɔdā nɛ̄ Alelékwū kú Ɔwɔicō da aá ā. Ɔ̄cɛ dúúmā nōo lɛ Alelékwū kú Ohɔ́nyɛtá ŋ́, í wɛ ákú nū ŋ́. 10Amáŋ ɔ́dāŋ́ ka Ohɔ́nyɛtá yɔ̄ ipú aá, nááná nɛ̄ ɔkpíyē ká aá géē kwú ohígbū ínoōbīya ā, alelékwū ká aá yēeyī ohígbū kéē le aá kagwó mla Ɔwɔicō. 11#1 Ukɔ́r 3.16Ɔ́dāŋ́ ka Alelékwū kú Ɔwɔicō nōo je Ujísɔ̄si héyī ŋmá ɔlékwū ā lā ipú aá, anú nōo je Ohɔ́nyɛtá Ujísɔ̄si héyī ŋmá ɔlékwū ā, géē je oyēeyī lɛ ɔkpíyē kú aá nēe ī kwú ā dúú, ŋmá lɛ Alelékwū kú nū nōo lā ipú aá ā.
12Ó lɛ ā mɛ́ɛ̄ ā, aóklóbīya um, alɔ í lā ɛ́gɛ́nɛ̄ Alelékwū kú Ɔwɔicō da alɔ lɛ piíí ā, ó wɛ o lā kú ālɔ̄ yá ɔdā nɛ̄ ɔkpíyē kú alɔ dɔɔ̄kā ā ŋ́. 13Ohígbū ka ɔ́dāŋ ka aá yēeyī yɔ̄ ī yá ɔdā nɛ̄ ɔkpíyē kú aá dɔɔ̄kā ā, aá géē kwú, amáŋ ɔ́dāŋ́ ka o ŋmá lɛ ɔfú kú Alelékwū nɛ̄ aá mā ucē kú ínoōbīya tá, aá géē yēeyī.
Ayí kú Ɔwɔicō
14Ācɛ nēe yɛce Alelékwū kú Ɔwɔicō ā wɛ ayí Ɔwɔicō á. 15#Ugal 4.5-7#Umák 14.36; Ugal 4.6Ohígbū ka, Alelékwū nɛ̄ Ɔwɔicō je lɛ aá í lɛ aá yá ɔfiyɛ ká aá klla kwúcē ga ufi ō yá kpɔ́ gɛ ŋ́, ikɔkɔ ɔ́ɔmā, Alelékwū ā kwú aá ú pīya ayí Ɔwɔicō, anɔ́ɔ Alelékwū ā ī yá kú ālɔ̄ da Ɔwɔicō kahíníī, “Ádā! Ádā alɔ!” 16Alelékwū kú Ɔwɔicō ā abɔ̄yī nū mla alelékwū kú alɔ cɛ̄ ijáalí ka ālɔ̄ ā wɛ ayí Ɔwɔicō. 17Abɔ̄ alɔ wɛ ayí nū ā, ayíbɛ ó géē hɔ́hā nōó le tū gbēyī ācɛ ɔlɛ́ nū ā ce alɔ, alɔ mɛ́mla Ohɔ́nyɛtá géē mīyɛ ɔdā nɛ̄ Ɔwɔicō le tū gbēyī nū ā. Ɔ́dāŋ́ ka alɔ móōwē mla anú alɔ kē í lɛ ɛgahi mla ojīlīmā nɛ̄hi mla anú dúú.
Ofú kú ɛ̄cɔ̄bū
18N jé cāā ka ōwē nɛ̄ alɔ ī má abālɔbányā í wɛ ɔdā dúú ŋ́ ɔ́dāŋ ka alɔ lɛ ɔ́ gbla ɛgahi mɛ́mla ojīlīmā nɛ̄hi nēé gáā je lɛ alɔ ā. 19Ɛjɛ̄ɛ̄jī ɔdā nɛ̄ Ɔwɔicō yá ā leyī kwɛcɛ gɛɛ gē gbēyī Ɔwɔicō ka o lɛ ayí nū mafú. 20#Ohút 3.17-19Ohígbū ka é kwú ɔdā nēé yá ā ú pīya ɔdā ɛflɛ́ɛfu, ɛ̄nyā í wɛ ɔdā nɛ̄ ó dɔɔ̄kā ŋ́, amáŋ Ɔwɔicō lɛ ɔ́ miya kóō le lɛ ā. Nááná ā Ɔwɔicō leyī ce, 21ká ɛ̄cī éyi Ɔwɔicō géē lɛ ɔdā nōó yá ā abɔ̄yī nū wútá ŋmá agbá, cɛ́ɛ́ kóō híī wa gɛ ŋ́, kéē lɛ uwá hɛ́tá ɔwɛ ohéyī fuú nɛ̄hi kú ayí Ɔwɔicō ā. 22Alɔ jé ka odúúdú ɔdā nēé yá ā yɔ̄ gē tíifu ī jɔ́ɔnɔ, bɛ̄ɛka ɔnɔ kú ɔyí ō ma ā. 23#2 Ukɔ́r 5.2-4 Amáŋ ó wɛ ɔdā nēé yá ā ī tīifu ī jɔ́ɔnɔ ōfōōfūnū ā ŋ́, amáŋ alɔ nēe mīyɛ Alelékwū bɛ̄ɛka ɛhi kú aflɛ́yí nɛ̄ Ɔwɔicō je lɛ alɔ ā dúú, alɔ gē tíifu ipíípú, abɔ̄ alɔ gē gbēyī kóō kwú alɔ ú pīya ayí nū mɛ́mla ɛjɛ̄ɛ̄jī okpíyē kú alɔ dúú ā. 24Ohígbū ka o ŋmá lɛ eyīyōce kú alɔ nēé nya alɔ tá á. Amáŋ ɔ́dāŋ ka alɔ lɛ ɔdā nɛ̄ alɔ leyī ce ɔ́ ā má, ɔ́ɔmā lé ka ɔdā ō leyī ce ɔ́ í yɔ̄ gɛ ŋ́. Ohígbū ka ɔ̄nyɛ gē leyī ce ɔdā nōó ī má ɛɛ́ mā? 25Amáŋ ɔ́dāŋ ka alɔ ī leyī ce ɔdā nɛ̄ alɔ í má ɛ́ɛ́ ŋ́, alɔ gē lɔtū lé ī gbēyī nū.
26Ɔwɛ ékpónú ɔ́ɔmā Alelékwū wā í tá alɔ nēe le gbagbafú ā abɔ̄. Ohígbū ka alɔ í jé ɛ́gɛ́nɛ̄ alɔ cíkā ō gbɔ̄ɔkɔ ā gɛ ŋ́, amáŋ Alelékwū abɔ̄yī nū ā í má okónu kɛlā ŋ́ gē tíifiifu gē gbɔ̄ɔkɔ ohígbū alɔ. 27Anɔ́ɔ Ɔwɔicō, nōo ī má ipú ɔtū kú ācɛ ā, jé ɛlā nɛ̄ Alelékwū ā yɔ̄ ī ka ā, ohígbū ka Alelékwū ā gē gbɔ̄ɔkɔ lɛ Ɔwɔicō lɔfú lɔfú ohígbū ācɔ̄lóhɔ́nyɛtá ɔwɛ nōo he Ɔwɔicō ɔtū ā.
28Alɔ jé ka ipú ɔdā dóódu Alelékwū kú Ɔwɔicō gē yúklɔ́ ohígbū olɔhi kú ācɛ nōó he uwá ɔtū ā, ācɛ nōó hīgwú o yá ɛ́ɛ́ kóō lɛ ɔdā nōo bī ɔtū ā yá ā. 29Ācɛ nɛ̄ Ɔwɔicō tɛtɛ le fu táajɛ ā, ó lɛ uwá fukɔ̄ cɛ́ɛ́ kéē kwú pīya bɛ̄ɛka ɔyí nū ā. O yá ɛ́ɛ́ kú ɔyínɔ̄nyīlɔ kú nū nyā kóō kwú pīya ɔ́kplá kú ayínɛ́ nɔ̄nyā mɛ́mla ayínɛ́ nū nɔ̄nyīlɔ alɛwa. 30Anɔ́ɔ ācɛ nōó tɛtɛ fu táajɛ mīya ɔdā tū lɛ uwá ā, nōó kē hīgwú dúú ā. Ācɛ nōo kē hīgwú ā, ó kē le uwá kagwó mla iyī nū, anɔ́ɔ ó kwú ɛgahi mɛ́mla ojīlīmā nɛ̄hi kú nū ú lɛ uwá á.
Ihɔtū kú Ɔwɔicō
31Ɔdí nɛ̄ alɔ í ka lɛyíkwu aɔ́dā nēe bá ā mɛ́ɛ̄ ā? Ɔ́dāŋ́ ka Ɔwɔicō yɔ̄ lɛ alɔ, ɔ̄nyɛ yɔ̄ géē bɛ́yí kwu alɔ glá ā? 32Ɔ̄cɛ nōó cē ɔyí nū nɔ̄nyīlɔ tá ŋ́, amáŋ nōo kwú ɔ̄ ú gwɛ́ɛya ohígbū odúúdú alɔ ā, ó lɛ ā Ɔwɔicō nōo je ɔyí nū lɛ alɔ ā, í gáā kpó ɔdā dóódu lɛ alɔ alahá dúú ŋ́ nɛɛ? 33Ɔ̄nyɛ géē cīije dúúmā bá ācɛ nɛ̄ Ɔwɔicō le fu ā? Ɔwɔicō Abɔ̄yī nu lɛ ɛpɔ̄hi hɛ́ lɛ uwá. 34Ɔ̄nyɛ géē ŋmó alɔ ɛpɔ̄bí glá ā? Ohɔ́nyɛtá Ujísɔ̄si, nōo kwú ohígbū alɔ, nēé je héyī ŋmá ɔlékwū, nōo yɔ̄ abɔ̄lɔ́ná kú Ɔwɔicō, yɔ̄ ī gbɔ̄ɔkɔ ohígbū alɔ ā, í kē gáā ŋmó alɔ ɛpɔ̄bí ŋ́. 35Ɔdí géē hɛ́ alɔ ŋmá ihɔtū kú Ohɔ́nyɛtá glá ā? Ɛ́kɛma kɛ̄ɛ ka íwɔ́tū, kɛ̄ɛ ka oyáŋmó, kɛ̄ɛ ka ɔkpɛtā, kɛ̄ɛ ka ohɛ́ɛwa, kɛ̄ɛ ka ɔdā ō kwu ikwū ajaajɛ ámāŋ ka ikwū kɛ̄ɛ? 36#Aíjē 44.22Ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō lɛ ā,
“Ohígbū uwɔ é gē ŋmó alɔ ɛ̄cī dóódu,
é je alɔ bɛ̄ɛka aálá
nēé gáā hɛ́ ɔkɔ ā.”
37Ehée, ipú ɔdā dóódu nēe yá alɔ nēe bá ā kpɛ́mm ā, ɔ̄cɛ nōo yíihɔtū tá alɔ ā le yá kú ālɔ̄ le yálé. 38Ohígbū ka n jé cāā ka ɔdā dúú í gáā hɛ́ alɔ ŋmá ihɔtū kú nū glá ŋ́. Alɔ kōō gekwú ámāŋ ka alɔ yēeyī, ámāŋ alelékwū-ōtɛ̄hɔ̄, ámāŋ aígbómína, ámāŋ aɔ́dā nēe lɛ ɔfú kú ɔkpáncō í hɛ́ alɔ ŋmá ihɔtū kú nū glá ŋ́. Ɔdā nēe bá ī yá abālɔbányā mɛ́mla ɔdā nōo í yá ɛ̄cɔ̄bū ā í gáā hɛ́ alɔ ŋ́má ihɔtū kú nū glá ŋ́. 39Ó kōō wɛ ɛcɛ nōo yɔ̄ icō kú alɔ ámāŋ ɛcɛ nōo nɛ̄ yɔ̄ ɛháajɛ kú alɔ ā, ámāŋ ɔdā dúú nōo yɔ̄ ipú ɛjɛ̄ɛ̄jī ɔdā nēé yá ā, í lɔfú hɛ́ alɔ ŋmá ihɔtū kú Ɔwɔicō nōó mafú lɛ alɔ ŋmá ɛgiyí Ohɔ́nyɛtá Ujísɔ̄si, Óndú alɔ ā glá ŋ́.
Currently Selected:
ĀCƐ URÓM 8: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
