ĀCƐ URÓM 6
6
Alɔ yēeyī ohígbū Ohɔ́nyɛtá
1Ɔdí nɛ̄ alɔ ī ka mɛ́ɛ̄ ā? Ālɔ̄ yɔ̄ ī bīyíne cɛ́ɛ́ ká Ɔwɔicō kóō yɔ̄ ī ményinyi alɔ tōōtɔ̄ɔ̄ nɛɛ? 2Ó lɛ ɔwɛ ŋ́! Alɔ lɛbɛ̄ɛka okwū ā ɛgiyí íneōbīya mɛ́ɛ́nɛ, ɔwɛ nyá nɛ̄ alɔ gē yēeyī yɔ̄ gē bīyíne kpɔ́ ā? 3Aá jé ka odúúdú alɔ nēé yá alɔ ubatísim wā ipú opīyatɔ̄há mla Ohɔ́nyɛtá Ujísɔ̄si ā, eko nēé yá alɔ ubatísim ɔ́ɔmā ā, alɔ gekwú ɔwɛ ékpó bɛ̄ɛka ɛ̄nɛ̄ Ujísɔ̄si kwú ā. 4#Ukól 2.12 Ubatísim nēé yá alɔ ā, wɛ ɔdōcābɔ̄ ka alɔ gekwú mla anú, anɔ́ɔ é lɛ alɔ nyi tɔ̄há mla anú, cɛ́ɛ́ ka ɛ́gɛ́nɛ̄ ɔfú nɛ̄hi kú Ádā ā je Ohɔ́nyɛtá héyī ŋmá ɔlékwū ā, ɛ́gɔ́ɔmā nɛ̄ alɔ lɔfú lā oyēeyī ɛ̄yīpɛ̄ dúú á.
5Ohígbū ka, ɔ́dāŋ kéē lɛ alɔ pīya tɔ̄há mla anú ipú ikwū nōo lɛbɛ̄ɛka ákú nū ā, é géē pīya alɔ tɔ̄hā mla anú ipú ohéyī ŋmá ɔlékwū nōo lɛbɛ̄ɛka ákú nū piíí ā. 6Alɔ jé kéē lɛ oyēeyī otɛtɛ kú alɔ ā nyɔ́kpá mla Ohɔ́nyɛtá, cɛ́ɛ́ kéē lɛ ɔfú nōo gē cɛ̄ lɛ alɔ ī bīyíne ā yíífi, o yá ɛ́ɛ́ ká ālɔ̄ híī wɛ ɔfiyɛ kú ínoōbīya gɛ ŋ́. 7Ohígbū ka ɔ̄cɛ nōo gekwú ɛɛ́ mā le ŋmúla ŋmá ɔfú kú ínoōbīya. 8Abɔ̄ alɔ gekwú mla Ohɔ́nyɛtá ā, alɔ cɛ̄ ka alɔ géē yēeyī mla anú dúú. 9Ohígbū ka alɔ jé kéē kwú Ohɔ́nyɛtá ú héyī ŋmá ɔlékwū ɛɛ́, ó gáā kwú gbóógbóō gɛ ŋ́. Ikwū í klla lɔfú dúúmā ɛgiyí nū gɛ ŋ́. 10Anɔ́ɔ abɔ̄ ó gekwú kóō kwú igbɔhá gɛ ŋ́ mā, ɔfú kú ínoōbīya dúú í lɛ ɔ́da ɛgiyí nū gɛ ŋ́. Anɔ́ɔ abālɔbányā ó yēeyī yɔ̄ ī lé tɔ̄há mla Ɔwɔicō. 11Ɔwɛ ékpónú ɔ́ɔmā, ɛjī kwɛjī lɛ ɔfú kú ínoōbīya nɛɛ aá géē je iyī aá ka aá gekwú ɛ́ɛ́, amáŋ aá yɔ̄ ī yēeyī ī lé tɔ̄há mla Ɔwɔicō ipú opīya tɔ̄há mɛ́mla Ohɔ́nyɛtá Ujísɔ̄si.
12Aá cɛ̄ lɛ ínoōbīya kóō lɔ́ɔcɛ́ odo ká aá ŋ́. Alɔ kē jé ka alɔ í kwú piíí, ohígbū ɔ́ɔmā, alɔ híī bī Unwɔ̄dā ō yá kú iyē kú alɔ le yúklɔ́ ŋ́. 13Aá híī je ābɔ̄ okpíyē kú aá dúúmā táajɛ kéē bī ɔ̄ le bīyíne ámāŋ́ ko bī ɔ̄ le bɔ̄bíipú ŋ́. Ikɔkɔ ɔ́ɔmā aá kwú iyī aá ú lɛ Ɔwɔicō bɛ̄ɛka ācɛ nēé je héyī ŋmá ɔlékwū ā, cɛ́ɛ́ aá kwú iyī aá ú lɛ Ɔwɔicō dúúdú, cɛ́ɛ́ kóō bī aá lɛ yúklɔ́ kú ɔdā nōo lɔhi. 14Aá gáā jɛga lɛ ínoōbīya kóō gbō aá ɛ́gɛ́nɛ̄ ɔcɛ́ gē gbō ācɛ ā ɛ́ɛ́ gɛ ŋ́. Ohígbū ka eyīnyinyi kú Ɔwɔicō gē gbō aá mɛ́ɛ̄ á, ó wɛ íne gɛ ŋ́.
Alɔ wɛ ɔfiyɛ kú olɔhi ō yá
15Ɔdí wɛ ɛyí kú aɔ́dā nēe bá nyā ā? Ālɔ̄ klla gbɔɔ́ ō bīyíne kpɔ́ mɛ́ɛnɛ, ohígbū ka Ɔwɔicō gē bī eyīnyinyi nɛ̄hi kú nū gē lɛ gbō alɔ mɛ́ɛ̄ á nɛɛ? Ó lɛ ɔwɛ ŋ́. 16Aá jé ka ɔ́dāŋ ka aá kwú iyī aá ú lɛ ɔ̄cɛ dúúmā ká aá cɛ̄ ɔ̄ ɛhɔ̄, ɛlā ɔkwɔ̄ɔ̄kwɛ̄yi, aá kwú pīya ɔfiyɛ kú ɔ̄cɛ nɛ̄ aá ī lɛyítáajɛ lɛ ɔ́ ā. Ó kōō wɛ ákú íne ō bīya nōo ŋmɛ́yí tá ikwū, ámāŋ ákú ɛyí ō táajɛ nōo ŋmɛ́yí tá o kagwó mla Ɔwɔicō ā. 17Amáŋ alɔ í tá Ɔwɔicō ahínyá piíí! Ohígbū ka otɛtɛ ā aá lɛbɛ̄ɛka ɔfiyɛ kú ínoōbīya, amáŋ abālɔbányā aá bī ɔtū kú aá kwú ɛyí ú táajɛ lɛ ɔdā nēé nwū aá ɛɛ́. 18É kē lɛ aá hɛ́tá ŋmá ɔfiyɛ kú íne ō bīya, anɔ́ɔ aá kwú pīya ɔfiyɛ kú Ɔwɔicō o yá ɛ́ɛ́ kú yá ɔdā olɔhi. 19N gē bī ɔdā nɛ̄ aá jé glá ā le yá ɔdōcabɔ̄ lɛ aá ohígbū ka aá ī jɛ́yí odée fíya ŋ́. Eko éyi aá kwú iyī aá ú bɛ̄ɛka ɔfiyɛ kú ɔdīcííci mɛ́mla aɔ́dā dóódu nēe bɔ̄bí ā. Ɔwɛ ékpó ɔ́ɔmā aá kwú iyī aá í pīya ɔfiyɛ abālɔbányā, cɛ́ɛ́ ká aá yá ɔdā nēe tīile. 20Eko nɛ̄ aá wɛ ɔfiyɛ kú ínoōbīya ā, aá le nwūla ŋmá o yá ɔdā olɔhi nɛ̄ Ɔwɔicō dɔɔ̄kā ā. 21Ɔdí kē wɛ ile nɛ̄ aá lɛ ŋmá ɔdā nɛ̄ aá yɔ̄ ī yá nɛ̄ abālɔbányā nōó ī tū aá uwēyī ā? O ŋmɛ́yí kú aɔ́dā nēe bá abɔ́ɔ ā wɛ ikwū. 22Amáŋ abālɔbányā Ɔwɔicō lɛ aá hɛ́tá ŋmá ínoōbīya, anɔ́ɔ aá kwú pīya aɔ́fiyɛ kú Ɔwɔicō. Ile kú aá wɛ o je oyēeyī kú aá táajɛ lɛ ɔ́ dúúdú, nɛ̄ o ŋmɛ́yí kú nū kē wɛ oyēeyī nōó ī mɛ ŋ́. 23Ohígbū ka ɔ́dāŋ ka ɔ̄cɛ le íne bīya ɔdā nōo tá ɔ̄ ɔkwu ā wɛ ikwū, amáŋ ɛhi nɛ̄ Ɔwɔicō ī je alahá ā wɛ oyēeyī nōó ī mɛ ŋ́ ipú o pīyatɔ̄há mla Ohɔ́nyɛtá Ujísɔ̄si Óndú alɔ.
Currently Selected:
ĀCƐ URÓM 6: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
