ĀCƐ URÓM 16
16
Upɔ́lu hokónu tū ācɛ ɛyɛ́ɛyɛ́yí Uróm
1N tíne ō da aá ka ɔyínɛ́ alɔ nɔ̄nyā Ufííbe wɛ ɔ̄cɛ ɔkwɛyi, ɔ̄cocɛ̄hɔ̄ nɔ̄nyā kú icɔ́ɔci nōo yɔ̄ Ukenkírīya. 2Aá mīyɛ ɔ́ bɛ̄ɛka ɔ̄cɛ nōo wɛ ákú Óndú ā ɛ́gɛ́nɛ̄ ācɛ kú Ɔwɔicō cíkā ō yá ā. Ká aá kē tá ɔ̄ abɔ̄ ipú ɔdā dóódu nōó dɔɔ̄kā ŋmá ɛgiyí aá, ohígbū kóō wɛ ɔ̄cɛ o-tá-acɛ alɛwa abɔ̄, kwu ami abɔ̄yī um dúú.
3 #
Ācot 18.2
Aá hokónu tū Uprísila mɛ́mla Akwíla, ācɛ o yúklɔ́ ɛhɔ̄ ō cɛ̄ Ohɔ́nyɛtá Ujísɔ̄si mla um. 4Ācɛ nēe hile lígíí kéē kwú ikpɛ̄yí kú uwā ú tónū ohígbū um ā, ó wɛ ami ōfōōfū um ŋ́, amáŋ odúúdú ācɛ kú icɔ́ɔci kú aílɔ́wá ā gē tá uwā ahínyá nwuné nwuné. 5Aá hokónu tū aɔ́wá kú icɔ́ɔci nōo gē jīla ɔlɛ́ uwā ā. Aá hokónu tū Epayɛ́nɛ̄tɔ̄si, ɔ̄cɛ o he um ɔtū, nōo wɛ ɔ̄cɛ aflɛ́yí nōo ŋmá ajɛ kú Ésīya nōo cɛ̄ɛ̄lā kú Ohɔ́nyɛtá ā. 6Aá hokónu tū Umerí, ɔ̄cɛnyā nōo yúklɔ́ lɛ aá nɛ̄hi ā. 7Aá hokónu tū Ándrɔníkɔ̄si mɛ́mla Ujúnīyasi, ɔ̄cɛ Ujíyu ɔ́mpa um nōo yɔ̄ agbá mla um. Uwá wɛ ācɛ nɛ̄ eyī jé lɔɔlɔhi ɔtāhɛ̄ acotɛ̄hɔ̄ ā, uwá kē je pīya ācɔ̄lóhɔ́nyɛtá gbɔbū gā um á. 8Aá hokónu tū Ampliyátɔ̄si ɔ̄cɛ nōo wɛ ɛ́nɛ́ɛ́nɛ̄ oklóbīya um nōo pīya tɔ̄há mla um ipú opīyatɔ̄há mla Óndú alɔ ā. 9Aá hokónu tū Ɔbánɔ̄si ɔ́mpa alɔ o yúklɔ́ kú ɛhɔ̄ ō cɛ̄ Ohɔ́nyɛtá, mɛ́mla Usitákīsi ɔ̄cɛ ohum ɔtū. 10Aá hokónu tū Apɛ́lɛsi nɛ̄ Ohɔ́nyɛtá cɛ̄ ɛlā nū ohígbū ɛyí nōó le táajɛ lɛ ɔ́ ā. Aá hokónu tū ācɛ ɔlɛ́ Aristɔbɔ́lɔ̄si. 11Aá hokónu tū Uherodíyɔn ɔ̄cɛ Ujíyu ɔmáapú um. Aá hokónu tū ācɔ̄lóhɔ́nyɛtá nēe bá ipɔ́ɔnū kú ɔlɛ́ Unakísɔ̄si. 12Aá hokónu tū Utrafɛ́na mɛ́mla Utrafósa, ācɛ nēe ī yúklɔ́ lɛ Óndú ā. Aá hokónu tū Upɛ́sīsi ɔ̄cɛ o he um ɔtū, nōo yúklɔ́ nɛ̄ɛ̄nɛ̄hi lɛ Óndú ā. 13#Umák 15.21Aá hokónu tū Urúfɔ̄si, ɔ̄cɛ nōo yúklɔ́ nɛ̄ɛ̄nɛ̄hi lɛ Óndú ā, kú aá kē hokónu tū ɛ́nɛ́ nū nōo kē ī yá mla um bɛ̄ɛka ɔdā nōó wɛ ɛ́nɛ́ um ā. 14Aá hokónu tū Asinkirítɔ̄si, Ufilégɔ̄si, Uhámesi, Upátirōbasi, Uhámāsi mɛ́mla ācɔ̄lóhɔ́nyɛtá nēe bá pī uwā ā. 15Aá hokónu tū Ufilólōgɔsi mɛ́mla Ujulíya, mɛ́mla Unɛréwusi mɛ́mla ɔyínɛ́ nū nɔ̄nya, mɛ́mla Olímpāsi mɛ́mla odúúdú ācɛ o cɛ̄ɛ̄lā Ɔwɔicō nēe bá pī uwā ā. 16Kú aá bī ɔtū ɔ̄mɔ́tū kú ihɔtū le hokónu tū iyī aá. Odúúdú icɔ́ɔci kú Ohɔ́nyɛtá ī hokónu tū aá.
Upɔ́lu da ācɔ̄lóhɔ́nyɛtá ɔdā nēé cíkā ō yá piíí ā
17N gē gbɔ̄ɔkɔ lɛ aá, ayínɛ́ um, kú aá leyī kwɛcɛ ohígbū ācɛ nēe ī yá ká aá le kɔ̄ ígwíígwu mɛ́mla ācɛ nēe ī yá kú ācɛ kéē le nyíleyī ŋmá ɔwɛ okpaakpa ā. Ācɛ nēe gē nwū ɔdā ɔhá gwū ɔdā nɛ̄ áa jé ā tá. Aá híī tíyē kwu uwá ŋ́. 18Ohígbū ka ācɛ ɛ́gɔ́ɔmā ī gē yúklɔ́ lɛ Óndú alɔ Ujísɔ̄si Ohɔ́nyɛtá ā ŋ́, amáŋ é ī yúklɔ́ ohígbū ɔdā nēé í lé. É gē bī ɔkɔ-olɔnyɛ mɛ́mla ɛlā ō yá ɔ̄cɛ ɛbɛ́ gē wɔ́tū kú ācɛ nēe wɛ ogwuda kú ɛdɔ kú ɔ́bíipú nōo yɔ̄ eko nyā ā. 19Amáŋ ɛjɛ̄ɛ̄jī ācɛ jé ɛ́gɛ́nɛ̄ aá lɛ abɔ̄ bī ɔkōōlɔhi ā lɔfú lɛ ā, ohígbū ɔ́ɔmā n gē gwéeyē ohígbū aá. Amáŋ n tínē ká aá jé ɔdā nōo lɔhi, amáŋ aá kwú pīya ogwuda ɛgiyí ɔdōbɔ̄bí ō yá. 20Ɔwɔicō kú ɛbɔ́ géē je ɔfú kú Usɛ́tan yíífi, cɛ́ɛ́ ó lɛ ɔ́ yá kóō lɛyítáajɛ lɛ aá. Ɛbɔ́ kú Óndú alɔ Ujísɔ̄si Ohɔ́nyɛtá kóō yɔ̄ kwu aá.
21 #
Ācot 16.1
Utímōti ɔ̄coyúklɔ ɔ́mpa um mā gē hókónu tū aá, kwu Ulusíyɔ̄si mɛ́mla Ujásin mɛ́mla Usosipáta, aɔ́mpa um ī hókónu tū aá dúú.
22Ami, Utátīyɔsi, ɔ̄cɛ nōo tá ɔkpá nyā lɛ Upɔlu ā gē hokónu tū aá.
23 #
Ācot 19.29; 1 Ukɔ́r 1.14;
2 Utím 4.20
Ugáyōsi nɛ̄ n gbɔga ɔlɛ́ nū ā, ɛ̄nɛ̄ odúúdú ācɛ icɔ́ɔci ā gē jīla ɔlɛ́ nū ā, gē hokónu tū aá. Erástɔ̄si ɔ̄cɛ-o-bīije kú igelī ā, mɛ́mla Ukwátɔ̄si ɔyínɛ́ alɔ gē hokónu tū aá. 24Ɛhi kú Óndú alɔ Ujísɔ̄si Ohɔ́nyɛtá kóō yɔ̄ kwu odúúdú aá. Aamí.
Upɔ́lu wóófu Ɔwɔicō
25Ālɔ̄ cɛ̄tra Ɔwɔicō! Ó lɔfú yá kú aá yɔ̄ ī cɛ̄ɛ̄lā nū lɔfú-lɔfú, ɛ̄nyā wɛ ɔdā nɛ̄ n ka eko nɛ̄ n tɔ́ɔna kú ɔkōōlɔhi lɛyíkwu Ujísɔ̄si Ohɔ́nyɛtá lɛ aá ā, ɛ̄nyā wɛ ɔdā nēé mafú ŋmá ɛlā ɔkwɛ̄yi nōo tayínū ŋmá eko ígblé ígblé ā. 26Amáŋ abālɔbányā ɔdā nɛ̄ ācomɛ́ɛbɛ ā tá tāajɛ ā le yá kú ācɛ alɛwa kéē lɛ ɛlā ɔkwɛ̄yi ā jé. Anɔ́ɔ Ɔwɔicō oyēeyī piyóó ā le ka ka odúúdú ācɛ kú ɛcɛ kéē lɛ ɛlā ɔkwɛ̄yi ɔ́ɔmā jé dúú, cɛ́ɛ́ kú odúúdú uwā kéē cɛ̄ klla lɛyítáajɛ. 27Ālɔ̄ cɛ̄tra Ɔwɔicō nɛ̄ anú ōfōōfūnū jɛ́yí ɔdā dóódu, ohígbū ɔdā nɛ̄ Ujísɔ̄si Ohɔ́nyɛtá yá ā. Aamí.
Currently Selected:
ĀCƐ URÓM 16: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
