ÁLUKA 31
31
Ɛfú otīīhɔ nɛ̄ Ísrɛ̄lu kpó tū ācɛ kú Umídiyan ā
1Óndú ā da Umósīsi kahíníī, 2“Lɛ ɔ́ci gwō ācɛ kú Umídiya ohígbū ɔdā nēé yá ācɛ kú Ísrɛ̄lu ā. Eko nāa lɛ ɛ̄nyā yá ā, cɛ́ɛ́ a gekwú. 3Anɔ́ɔ Umósīsi da ācɛ kú Ísrɛ̄lu kéē le tútū kú ɛfú ō kpó, cɛ́ɛ́ kéē nyɔ̄ í lɛ ɔ́ci gwō ācɛ kú Umídīyan ohígbū ɔdā nēé yá Óndú ā. 4Ó klla da uwá kéē lɛ ācɛ úlā ɛpa ce ofigwó (1,000) fu ŋmá ipɔ́ɔma kú Ísrɛ̄lu dóódu.”
5Eko nēé lɛ ācɛ ā fu ŋmá ipɔ́ɔma dóódu ā, ɛwa kú uwā wɛ úlā ofu ce igwo (12,000). 6Umósīsi le uwá tū ga ɔgbɛ́fú, mɛ́mla Ufínɛ̄has, ɔyí kú Ɛlísa, ɔ̄cogwɛ́ɛya ā, nōo gē leyīkwu aɔ́da otīīhɔ mɛ́mla opo ō tá kú eko ɛfú ō kpó ā. 7É le ɛfú kpó tá ācɛ Umídīyan ɛ́gɛ́nɛ̄ Óndú ā ka āa. É le odúúdu ācɛnyīlɔ kú uwā kpó ŋmó. 8Kwu aɔ́cɛ́ ɛhɔ̄ kú Umídīyan ā: Ɛ́fi, Urɛ́kɛm, Usɔ́ru, Uhɔ́ru mɛ́mla Urɛ́ba. É le Ubálam ɔyí kú Ubéyɔ ŋmó dúú. 9Ācɛ kú Ísrɛ̄lu ā, lɛ anyā mɛ́mla ayí kú ācɛ kú Umídīyan ā kpó kwú, lɛ ɛna mɛ́mla aɛ́bɛ́ ɔlɛ́ mɛ́mla odúúdu agbénú kú uwā kpó. 10É klla lɛ odúúdu ɔlɛ́ uwā kpó tɔ̄lá. 11Ācɛ kú Ísrɛ̄lu kwú odúúdú agbénú kú ācɛ ā nēé wu ā, mɛ́mla anyā uwā mɛ́mla ayí uwā nēé kwú ā, mɛ́mla aɛ́bɛ́ ā í kpó gé 12lɛ Umósīsi mɛ́mla Ɛlísa, mɛ́mla odúúdu ójila kú Ísrɛ̄lu nēe bá ɔpɛ́ kú Umówābu, okónu ísu kú Ujɔ́dan kú Ujérīko ā.
Aícɔ́ɔja ā pīyɛyí wā ɔlɛ́ ŋmá ɔgbɛ́fú
13Umósīsi, Ɛlísa mɛ́mla odúúdu aótrɛ̄yí kú Ísrɛ̄lu ā le pɛ́ wɛ̄ɛcɛ gaá jīla uwá ɔwɛ. 14Amáŋ, Umósīsi le cɔ̄nū mla aótrɛ̄yí kú aícɔ́ɔja ā. 15Anɔ́ɔ ó da uwá ɔ̄kā kahíníī, “Aá habɔ̄ odúúdu anyā ɔlɛ́ uwā tá kéē yēeyī nɛɛ? 16#Áluk 25.1-9Aá bla ka anyā ɔlɛ́ uwā ā jāhɔ̄ tá ɛlā kú Ubálam ajɛ kú Upéyɔ, anɔ́ɔ é gbɔɔ́ ō cɛ̄ lɛ ācɛ kú Ísrɛ̄lu gbɔɔ́ ō gbā aɔ́wɔ ɔhá ɛ̄gbā á. Ɔdā ɔ́ɔmā bī ōcē obɔ̄bí wā í ŋmó ācɛ ɔlɛ́ alɔ á. 17Ó lɛ ā, aá lɛ ayípōklóbīya mɛ́mla ayípɔ̄nɔ̄nyā kú uwā dúúmā nōo lɛ ɔ̄cɛnyīlɔ jé ɛɛ́ kpó ŋmó. 18Amáŋ, aá lɛ ayípɔ̄nɔ̄nyā nɛ̄ ó jé ācɛnyīlɔ jéjé ɛ́ɛ́ ŋ́ mā mɛ́mla ayípāncɛ̄nyā ā kpó wā ɔlɛ́ lɛ iyī aá. 19Odúúdú aá nēe ŋmó ācɛ klla lɛ abɔ̄ kwu okwū ipú ɛfú nyā a, géē yɔ̄ eyɛ̄ɛcɛ kú ɔlɛ́ ā ɛ̄cī ahāapa. Ɛ̄cī ɔ́mɛɛtá mɛ́mla ɔ́mahāapa, aá lɛ iyī aá mɛ́mla anyā nɛ̄ aá kwú ŋmá ɔgbɛ́fú ā iyē gwu. 20Aá géē gwu odúúdu īlī kú aá, mɛ́mla aɔ́dā nēé bī ɔkpɛ́bɛ́ yá, ámāŋ ka ɔnwū kú ɛwū, ámāŋ ka ɔcí cɛ́ɛ́ é kwú yá yēŋēē.”
21Ɛlísaa, ɔ̄cogwɛ́ɛya ā da ācɛ nēe ŋmá ɔgbɛ́fú ā kahíníī, “Ɛ̄nyā wɛ íne nɛ̄ Óndú je lɛ Umósīsi á, 22Ɔdā dóódu nɛ̄ ó gáā yɔlá glá ŋ́, bɛ̄ɛka ugóolu (oje ɔdɔ), oje nɛ̄hɛ́, mɛ́mla oje udɔ, aá géē lɛ ɔ́ gla ɔlá, cɛ́ɛ́ é kwú yá yēŋēē. 23Aɔ́dā o hile ɔhá ā, aá géē mī éŋkpɔ̄ kú iyē ō gwu ā klá uwá. 24Ɛ̄cī ɔmahāapa ā, aá géē na īlī kú aá, cɛ́ɛ́, aá kwú yá yēŋēē, cɛ́ɛ́ é lɛ aá nwúla ō wā ɔlɛ́.”
É le agbénú kú ɛfú ā kpó kɔ̄
25Óndú ā da Umósīsi kahíníī, 26“Awɔ mɛ́mla Ɛlísa, mɛ́mla aótrɛ̄yí kú ācɛ kú Ísrɛ̄lu ā, géē kɔ̄ ɔdā dóódu nēé kpó ŋmá ɔgbɛ́fú ā. Aá géē kɔ̄ ācɛ mɛ́mla aɛ́bɛ́. 27Aá lɛ odúúdú uwā kpó kɔ̄ ɛpa jōōnjīlɛ̄. Ɛga éyi wɛ ákú aícɔ́ɔja ā, ɛga ɔhá ā wɛ ákú ācɛ o hile kú Ísrɛ̄lu ā. 28Oŋmá ipú ukpɛ̄ nōo wɛ ákú aícɔ́ɔja ā, aá géē je éyi ŋmá ipú úlā ce ofɛhɔ̄ dóódu kú ācɛ, ɛna, ijakī, álá, mɛ́mla ɛwū lɛ Óndú ā. 29Aá kwú uwā ú kpó lɛ Ɛlísa, ɔ̄cogwɛ́ɛya ā, kú ɔ́ɔmā kéē wɛ ákú Óndú ā. 30Ipú ukpɛ̄ nōo wɛ ákú ācɛ o hile kú Ísrɛ̄lu ā, géē je éyi ŋmá ipú ofɛpa ce igwó dóódu kú ācɛ, ɛna, ijakī, álá mɛ́mla ɛwū ā lɛ Óndú ā, aá kwú ɔ́ɔmā ú kpó lɛ ācɛ kú Ulífāyi, nēe gē leyīkwu Áklɔ̄kpīihɔ ā.” 31Umósīsi mɛ́mla Ɛlísa le odúúdu ɔdā nɛ̄ Ɔwɔicō ka ā yá.
32Odúúdú áluka kú agbénú kú ɛfú nɛ̄ ācɛ kú Ísrɛ̄lu kpó wā ɔlɛ́ ā wɛ, úlá bá ɛga úlā ɛnɛ ce úlá ofu ahātá ce ahāapa, ce ofu igwɛ́ɛhɔ̄ (625,000). 33Ɛna ā wɛ úlā ofu ahāanɛ (72,000). 34Aɔ́nya ā wɛ úlā ofu ahāapa ce úlā igwɛ́ɛpa ce ofu igwó (61,000). 35Ayípācɛnyā nēé jé ācɛnyīlɔ ŋ́ mā wɛ úlā ofu ɛnɛ (32,000). 36Ukpɛ̄ kú ācɛ nēe ga ɔgbɛ́fú ŋmá ipú odúúdu uwa ā wɛ, aálá úlā bá ɛga úlā ɛpa ce úlā ofɛpa ce igwó ce ofɛhɔ̄ (337,500). 37Ukpɛ̄ kú Óndú ā ŋmá ipú álá ā wɛ úlā ce ofu igwɛ́ɛtá ce igwɛ́ɛhɔ̄ (675). 38Aɛ́na ā wɛ, úlā ofɛɛnɛ ce úlā igwó (36,000) Ukpɛ kú Óndú kē wɛ ofɛtá ce igwɛ́ɛpa. 39Aíjakī ā wɛ, úlā ofɛtá ce igwó ɛhīlī ce ofɛhɔ̄ (30,500). Ákú Óndú ā kē í wɛ ofɛtá ce éyi ŋmá anú. 40Ukpɛ̄ kú Óndú ŋmá ipú ayípɔ̄nɔ̄nyā nēé jé ɔ̄cɛnyīlɔ ŋ́ mā wɛ ofu ce igwó ɛpa ŋmá úlā ofɛpa (16,000). 41Umósīsi kwú ukpɛ̄ nōo wɛ ákú Óndú ā ú lɛ Ɛlísa, ɔ̄cogwɛ́ɛya ā.
42Ukpɛ̄ nōo wɛ ákú ācɛ o hile kú ācɛ Ísrɛ̄lu nēé ga ɔgbɛ́fú ŋ́ mā, 43wɛ, úlá bá ɛga úlā ɛpa ce úlā ofɛpa ce igwó ce ofɛhɔ̄ (337,500). 44Ɛna ā wɛ úlā ofɛnɛ ce úlā igwó (36,000). 45Aíjakī wɛ úlā ofɛtá ce igwɛ́ɛhīlī ce ofɛhɔ̄ (30,500). 46Ayípɔ̄nɔ̄nyā nēé jé ācɛnyīlɔ ɛ́ɛ́ ŋ́ mā, wɛ úlā ofɛpa (16,000). 47Oŋmá ipú áluka kú ukpɛ̄ kú ācɛ ā, Umósīsi kwú éyi ú ŋmá ipú ofɛpa ce igwó kú ayípɔ̄nɔ̄nyā mɛ́mla, aɛ́bɛ́ ú lɛ ācɛ kú Ulífāyi nēe gē leyīkwu Áklɔ̄kpīihɔ kú Óndú ā, ɛ́gɛ́nɛ̄ Óndú ā da ɔ́ lɛ ā.
Ɛ̄gbā kú aótrɛ̄yí kú ɔlɛ́ mɛ́mla aícɔ́ɔja ā
48Aótrɛ̄yí nēe gē leyīkwu aícɔ́ɔja ā gā ɛgiyí Umósīsi. 49Anɔ́ɔ é kahíníī, “Ɔkpani, alɔ lɛ aícɔ́ɔja nēe bá ɛháajɛ kú alɔ ā gbaáluka ɛɛ́, ɔ̄cɛ dúúmā kú uwā í bí ŋmá ipú alɔ ŋ́. 50Ohígbū ɔ́ɔmā, alɔ géē bī agbénú kú ugóólu (oje ɔdɔ), agbá kú Ugóolu (oje ɔdɔ), eliká kú ugóolu (oje ɔdɔ), ɔdōplahɔ̄ kú ugóolu (oje ɔdɔ), agbá ō tɔ̄ɔkɔ kú ugóolu (oje ɔdɔ), nɛ̄ ɔnyɔɔnyɛ kú alɔ je ā. Alɔ kwú aɛ́nē e bá ɔ́ɔmā ú gbā Óndú ā, kóō wɛ ulé nɛ̄ alɔ cílá kwɛyí oyēeyī kú alɔ. Cɛ́ɛ́ kóō géē gbō oyēeyī kú alɔ.” 51Umósīsi mɛ́mla Ɛlísa mīyɛ odúúdu agbénú kú ugóolu (oje ɔdɔ) nēé kpó wā ā. 52Ogbɛnú kú odúúdu ɔdā nɛ̄ aótrɛ̄yí kú aícɔ́ɔja kpó wā ā, wɛ usɛ́kɛlu ofigwó. 53Ācɛ nēé wɛ aótrɛ̄yí kú aícɔ́ɔja ā ŋ́ mā, bī ɔdā nēé wu ŋmá ɔgbɛ́fú ā. 54Umósīsi mɛ́mla Ɛlísa kwú agbénú kú ugóolu (oje ɔdɔ) nyā ú kpó ga ipú Áklɔ̄kpīihɔ ā, cɛ́ɛ́ kú Óndú ā kóō gbō ācɛ kú Ísrɛ̄lu ɛyí.
Currently Selected:
ÁLUKA 31: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma