ÁLUKA 17
17
Okwutɛ kú Árɔ̄ni
1Óndú ā da Umósīsi kahíníī, 2“Lɛ ka lɛ ācɛ kú Ísrɛ̄lu kéē lɛ okwutɛ igwɛ́ɛpa kpó gā uwɔ. Éyi kóō ŋmá ɛgiyí otrɛ̄yí kú ipɔ́ɔma dóódu. Lɛ iyē kú ɔnyɔɔnyɛ tá tū okwutɛ ā. 3Lɛ iyē kú Árɔ̄ni tá tū okwutɛ kú ipɔ́ɔma kú Ulífāyi. Ohígbū ka okwutɛ éyi géē ŋmá ipɔ́ɔma dóódu. 4Kwú uwā ú kpó ga ipú Áklɔ̄kpīihɔ ā gaá bá iyɔ̄bū kú ikpati ɛka, ɛga nɛ̄ n géē jīla mla awɔ ā. 5Okwutɛ kú ɔ̄cɛ nɛ̄ n je ā, géē lū blɔblɔ. Ɔwɛ nyā, n géē bī iŋini nɛ̄ ācɛ kú Ísrɛ̄lu hímáyi ka tú uwɔ ā wā oŋmɛ́yí. 6Anɔ́ɔ Umósīsi le ɛlā ka lɛ ācɛ kú Ísrɛ̄lu, anɔ́ɔ ɔnyɔɔnyɛ kú uwā le okwutɛ bī gé lɛ ɔ́, kwɛyí ipɔ́ɔma kú ɔlɛ́ uwā. Okwutɛ ā wɛ igwɛ́ɛpa. Okwutɛ kú Árɔ̄ni yɔ̄ ipú uwā dúú. 7Anɔ́ɔ Árɔ̄ni kwú okwutɛ ā ú kpó bá ipú Áklɔ̄kpīihɔ ā iyɔ̄bu kú Ikpati kú okónu ō ce ā.”
8 #
Uhíb 9.4
Oŋmó ɔ̄cī nū, eko nɛ̄ Umósīsi le tá ipú Áklɔ̄kpīihɔ ā, ó má ka okwutɛ kú Árɔ̄ni, nōo kwɛyí kú ipɔ́ɔma kú Ulífāyi ā le lū, le ēpū lɛ, le híkpɔ́ɔcí, le ododó lɛ. Ó klla le īkpō kú ɔcí nēé hī ka álimɔ̄ndu gwá le pīya 9Umósīsi kwú odúúdu okwutɛ ā ú kpó mafú lɛ ācɛ kú Ísrɛ̄lu ā, é le ɔdā nōo yá ā má, anɔ́ɔ ɔnyɔɔnyɛ kwu okwutɛ kú nū ú ga ɔlɛ́ nū á. 10Óndú ā da Umósīsi kahíníī, “Kwú okwutɛ kú Árɔ̄ni ú cīgbīhi ga iyɔ̄bu kú Ikpati kú Ɛka kú Óndú ā. Ó géē yɔ̄ abɔ́ɔ kóō wɛ ahɔ̄ ō pi lɛ ācɛ kú Ísrɛ̄lu. Ācɛ o yíikpɛ̄yí olɔfú ā géē kwú ɔ́dāŋ ka é mā iŋini ō ka ā tá ŋ́.” 11Umósīsi le yá ɛ́gɛ́nɛ̄ Óndú ā ka lɛ ā.
12Anɔ́ɔ ācɛ kú Ísrɛ̄lu ā da Umósīsi kahíníī, “Ayíka oŋmɛ́yí kú odúúdu alɔ yɔ̄ mɛ́ɛ̄ á. 13Ɔcɛ dúúmā kú alɔ nōo le túblla Áklɔ̄kpīihɔ ā géē kwú. Ayíka odúúdú alɔ géē je kpó yíífi mɛ́ɛ̄ á ŋ́?”
Currently Selected:
ÁLUKA 17: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma