ÁLUKA 13
13
Ācɛ o bɔkwu ɔdā tayínū ā
1Óndú ā da Umósīsi ka, 2“Lɛ otrɛ̄yí éyééye fu ŋmá ipɔ́ɔma éyééye igwɛ́ɛpa ā, cɛ́ɛ́ káā lɛ uwá tɛ̄hɔ̄ kéē gaá lɛ ajɛ kú Ukénan jila tayínū. Ajɛ nɛ̄ n gáā je lɛ ācɛ kú Ísrɛ̄lu ā.” 3Anɔ́ɔ Umósīsi lɛ ācɛ ā fu ŋmá ipɔ́ɔma éyééye ā, le uwá tɛ̄hɔ̄ ŋmá ígbíli kú Upáran ga ajɛ kú Ukénan. 4Iyē kú ācɛ nɛ̄ Umósīsi fu klla tɛ̄hɔ̄ nyɔ̄ ā bá yɔ̄ á: Ussámmuwa, ɔyí kú Usákɔ̄ ŋmá ipɔ́ɔma kú Urúbɛ̄n. 5Ussáfāti, ɔyí kú Uhóri ŋmá ipɔ́ɔma kú Usímīyɔn. 6Ukálɛ̄bu, ɔyí kú Ujɛ́fūnɛ ŋmá ipɔ́ɔma kú Ujúda. 7Ígal, ɔyí kú Ujósɛ̄fu ŋmá ipɔ́ɔma kú Íssāka. 8Uhosíya, ɔyí kú Unún ŋmá ipɔ́ɔma kú Ɛ́frēm. 9Upáliti, ɔyí kú Uráfu ŋmá ipɔ́ɔma kú Ubɛ́njamīn. 10Ugadíyɛ, ɔyí kú Usɔ́di ŋmá ipɔ́ɔma kú Usɛ́būlɔn. 11Ugadíyɛ ɔyí kú Usúsi ŋmá ipɔ́ɔma kú Umanásɛ. 12Ámiyɛ̄lu, ɔyí kú Ugɛmáli ŋmá ipɔ́ɔma kú Udán. 13Usɛ́tɔ, ɔyí kú Umíkɛlu ŋmá ipɔ́ɔma kú Ássa. 14Unábi, ɔyí kú Ufɔ́fisi ŋmá ipɔ́ɔma kú Unáfutāli. 15Ugéyulu, ɔyí kú Umɛ́ki ŋmá ipɔ́ɔma kú Ugádi. 16Ɛ̄nyā wɛ ācɛ nɛ̄ Umósīsi tɛ̄hɔ̄ ga ajɛ kú Ukénan kéē lɛ ɔ́ jila tayínū á. Ó lɛ iyē kú Uhosíya ɔyí kú Unún pīyabɔ̄ ga Ujóssuwa.
17Eko nɛ̄ Umósīsi tū uwā ɛhɔ̄ ā ó kahíníī, “Aá nyɔ̄ lɛyíkwu ɛháajɛ ga Unégēbu, klla yɛ gɔbū gicō ɛfu kú ajɛ ā, 18káā má ɛdɔ ajɛ nɛ̄ó wɛ ā, mɛ́mla ācɛ nēe lā ipú ajɛ ā, ɔ́dāŋ keé wɛ ācɛ okwáahi amáŋ keé wɛ ācɛ olɔfú, ɔ́dāŋ keé lɛwa ámāŋ keé le ligíí. 19Ɔ́dāŋ ka ajɛ nēé lā ā lɔhi ámāŋ koó bɔ̄bí, ɔ́dāŋ keé lā áklɔ̄kpɛ ámāŋ ipú igelī nɛ̄hi nēé lɛ igá hɛ́ tū ɔ̄. 20Ɔ́dāŋ ka ajɛ ā lɔhi, ámāŋ ka ó lɔhi ŋ́, ɔ́dāŋ ka ɔcí yɔ̄ abɔ́ɔ ámāŋ ka ó yɔ̄ ŋ́. Aá lɛ ɔtū lɛ, kú aá lɛ ikpɔ̄ɔ̄cí ōhī kú ajɛ ā bī wā.” Eko nēé nyɔ̄ ā, wɛ eko nɛ̄ “īkpɔ̄cí ufáyin” yɔ̄ ī pīya. 21Anɔ́ɔ ācɛ ā le yɛ gaá lɛ ajɛ ā jila bū ígbíli kú Usín jāā ga Uréhɔ̄bu ga okónu ɔwɛ kú Uhámāti. 22É le bū ɛháajɛ ā ga Uhɛ́brɔn. Ahíman, Usséssayi mɛ́mla Utálimāyi nēe wɛ aípɔ́ɔma kú aágwu nēé hī ka Ánāki ā, lā abɔ́ɔ. É le Uhɛ́burɔn gwó iháyí ahāapa gbɔbū lɛ Usówan kú Íjīpiti ā. 23É yɛ ga ɔpɛ́ kú Ɛ́ssikɔlu ā, anɔ́ɔ é lɛ abɔ̄ kú oōgwā kú īkpɔ̄cí ufáyin éyi hɛ́ ŋmá abɔ́ɔ á. Anɔ́ɔ uwá kwú ɔ̄ ú playi ɔcí éyi nɛ̄ ācɛ ɛpa kú uwā je ce ɔkɔ ohígbū ōgwá nwuné kú nū. É kōō bī upomégrenēeti wā dúú. 24É hī iyē kú abɔ́ɔ ka Ɛ́ssikɔ̄lu ohígbū ka abɔ́ɔ nɛ̄ ācɛ kú Ísrɛ̄lu hɛ́ abɔ́ɔ kú oōgwá kú ikpɔ̄cí kú ajɛ ā ŋmá á.
25Eko nēé le ajɛ ā jila ɛ̄cī ofɛpa ā, é pīyɛyí wā ɔlɛ́ uwā. 26Anɔ́ɔ é gā ɛgiyí Umósīsi mɛ́mla Árɔ̄ni mɛ́mla odúúdu ójila kú Ísrɛ̄lu ā, ipú ígbíli kú Upáran ipú Ukádɛssi. É le ohi kú iyāwu kú uwā kpó lɛ uwá mɛ́mla odúúdu ójila kú Ísrɛ̄lu. É klla le ikpɔ̄cí kú ajɛ ā mafú lɛ uwá. 27Anɔ́ɔ é kahíníī, “Alɔ i yɛ ga ajɛ nɛ̄ aá tū alɔ ɛhɔ̄ nyɔ̄ ā. Ajɛ ā lɔhi nɛ̄hi, ɔdōlé kpɔ anú nɛ̄hi dúú. Īkpɔ̄cí kú ajɛ ā bá yɔ̄ á. 28Ācɛ nēe lā ajɛ ā lɔfú. É lā ipú aígelī nɛ̄hi nēé lɛ igá hɛ́ tū uwā. Alɔ klla má aípɔ́ɔma kú ayí kú Ánāki, nēe wɛ aɔ́báagwu ā. 29Ācɛ kú Ámālēki lā Unégēbu, ācɛ Uhɛ́ti, Ujébūsi, mɛ́mla ācɛ Ámɔn lā ɛyí ɛfu ā. Ācɛ kú Ukénan lā pīya ísu kú Umeditarénīya mɛ́mla okónu ísu kú Ujɔ́dan ā á.”
30Amáŋ, Ukálɛ̄bu da ācɛ ā nēe gbɔɔ́ ō ka iŋini tú Umósīsi ā kéē lɛ okónu klá cíí, anɔ́ɔ ó da uwá ka, “Ālɔ̄ nyɔ̄ gaá mīyɛ ajɛ ā bōōbū, ohígbū ka alɔ lɔfú nɛ̄ alɔ mīyɛ ajɛ ā glá.” 31Anɔ́ɔ ācɛ nēe nyɔ̄ mla anú ā kahíníī, “Alɔ í lɔfú nɛ̄ alɔ ī mīyɛ ajɛ ā glá ŋ́, ohígbū ka ācɛ kú ajɛ ā lɔfú fíyɛ́ alɔ á.” 32É lɛ ohi obɔ̄bí mɛ́mla ohi ɛ̄kɛ̄mgbɛ̄ bī gé lɛ ācɛ kú Ísrɛ̄lu kahíníī, “Ajɛ ā í gáā yá ɔdɛ̄hɔ̄ nōo géē jɛ̄ ācɛ nēe lā anú ā glá ŋ́, odúúdu ācɛ nēe lā ajɛ ā wɛ aɔ́báagwu klla jɛ̄ nɛ̄hi. 33#Ohút 6.4Alɔ má ācɛ kú Unefilím nēe wɛ ayí kú Ánāki nēe wɛ aɔ́báagwu nɛ̄hi ā abɔ́ɔ. Alɔ nyɛ́ lígíí bɛ̄ɛka aíkpaŋgā ā ɛgiyí uwā. Ɛ́gɔ́ɔmā nēé kōō má alɔ lɛ á”
Currently Selected:
ÁLUKA 13: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma