UMÁTIYU 22
22
Ācīije kú ucɛ kú ɔnyā ō lɛ ā
1Ujísɔ̄si klla tá ācīije alɛwa ɔhá lɛ uwá igbɔhá. Ó kahíníī, 2“Ajɔ̄ɔ̄cɛ́ kú ɔkpáncō lɛbɛ̄ɛka ɔcɛ́ éyi, nōo yá ucɛ kú ɔnyā ō lɛ lɛ ɔyí nū. 3Ó lɛ ācocɛ̄hɔ̄ kú nū tɛ̄hɔ̄ kéē gaá lɛ ācɛ nēé tɛtɛ da uwá táajɛ ā hīgwú wā ɔnū ucɛ kú ɔnyā ō lɛ ā. Amáŋ uwá í dɔɔ̄kā ō wā ŋ́. 4Igbɔhá, ó le ācocɛ̄hɔ̄ ɔhá tɛ̄hɔ̄ kahíníī, ‘Aá da ācɛ nēé tɛtɛ da uwá táajɛ ā ka ucɛ kú um ā le tútū ɛɛ́. É lɛ aɔ́bá ɛna mɛ́mla ayí ɛna ojɔ̄kwū kú um ā ŋmó ɛɛ́. Ɔdā dóódu le tútū ɛɛ́. Aá wā ɔnū ucɛ kú ɔnyā ō lɛ ā.’ 5Amáŋ ācɛ nēé hīgwú ā í lɛlá wu ɔ́ ŋ́. Ɔnyɔɔnyɛ kú uwā le pɛ́ ga ɔnū odée kú abɔ̄yī ūwā. Aóhī le tá ɛhɔ̄ kú uwā, aóhī kē le pɛ́ tá ōlihī. 6Aɔ́há lɛ ācocɛ̄hɔ̄ kú nū kwú, le uwēyī je lɛ uwá, klla le uwá kpó ŋmó. 7Anɔ́ɔ ɔcɛ́ ā le cɔ̄nū, klla lɛ aícɔ́ɔja kú nū tɛ̄hɔ̄ kéē gaá lɛ ācoŋmácɛ ā kpó ŋmó, kéē klla lɛ igelī kú ɔlɛ́ uwā tɔ̄lá. 8Anɔ́ɔ ó da ācotɛ̄hɔ̄ kú nū ā kahíníī, ‘Ucɛ kú ɔnyā ō lɛ ā le tútū ɛɛ́, amáŋ ācɛ nēé hīgwú ā í cíkā ŋ́. 9Ohígbū ɔ́ɔmā aá nyɔ̄ ɔwɛ dóódu kú aá hī ācɛ dóódu nɛ̄ aá má ā igwú kéē wā ɛgiyí ucɛ kú ɔnyā ō lɛ ā.’ 10Anɔ́ɔ ācotɛ̄hɔ̄ ā le yɛ tá ɔwɛ dóódu, lɛ ācɛ dóódu nēé má ā, kwu ācɛ o yá ɔdōōbɔ̄bí mɛ́mla ācɛ o yá ɔdā olɔhi hīgwú á. Inu ucɛ kú ɔnyā ō lɛ ɔ́ɔmā le mu mɛ́mla aúgbɔga ā.
11“Amáŋ eko nɛ̄ ɔcɛ́ ā wā inu ā kóō má aúgbɔga nēe bá ā, ó má ɔ̄cɛ éyi, nōó le úwé kú ɔnyā ō lɛ ā wiiyē ŋ́. 12Anɔ́ɔ ó da ɔ̄cɛ ɔ́ɔmā ɔ̄kā kahíníī, ‘Oklóbīya um, abɔ̄ ó yá ɛ́ɛ́ nɛ̄ a wā amānyā nɛ̄ a kē lɛ úwé kú ɔnyā ō lɛ ā wiyē ŋ́ mā? Ɔ̄cɛ ɔ́ɔmā í ka ɔdā dúúmā ŋ́. 13#Umát 8.12; 25.30; Ulúk 13.28Anɔ́ɔ ɔcɛ́ da ācocɛ̄hɔ̄ kú nū kahíníī, ‘Aá lɛ ɔ́ ikpó mɛ́mla abɔ̄ kpó gbō kú aá kwú ɔ̄ ú tá tɛ́ɛcɛ ipú obū. Abɔ́ɔ nɛ̄ ācɛ ā géē jikwū í hīla ayīnu á.’ 14Ohígbū keé hī ācɛ alɛwa igwú amáŋ ācɛ lígíí nēé fu á.”
Ujísɔ̄si cíla ɔ̄kā lɛyíkwu ije ɔlɛ́ ō da
(Umák 12.13-17; Ulúk 20.20-26)
15Anɔ́ɔ ācɛ Ufárisīi nyɛ̄ɛ̄ gaá lɛ ujɔ̄ tū kú ɛ́gɛ́nɛ̄ é géē kwú ɔ̄ ipú ɛlā nōó í ka āa. 16Anɔ́ɔ é lɛ ayíkpó kú uwā mɛ́mla ācɛ kú Uhérɔ̄du tɛ̄hɔ̄ fu ɔ́ kahíníī, “Utíca, alɔ jé ka a wɛ ɔ̄cɛ ɔkwɛ̄yi. A kē ī nwɛ̄lā kú ɔwɛ kú Ɔwɔicō ɔkwɛ̄yi. Á kē lɛ ɛlá wu ɔdā nɛ̄ ɔ̄cɛ dúúmā ī gbɛlá ā ŋ́, ohígbū ka á kē ī méyīgo kú ācɛ ŋ́. 17Da alɔ ɔdā nɛ̄ a gbɛlá ā mɛ́ɛ́nɛ. Ó wɛ íne kú alɔ ō bīya kú ālɔ̄ da ije ɔlɛ́ lɛ Usísa, kɛ̄ɛ ka ó cíkā ŋ́?” 18Amáŋ Ujísɔ̄si le ɛlá obɔ̄bí nēé gbo ā jé, anɔ́ɔ ó kahíníī, “Aá ācɛ oleyīɛpa, ɔdíyá nɛ̄ aá gē já um má ā mɛ́ɛ̄? 19Aá le īkpīje nēé gē bī le da ije ɔlɛ́ ā mafú gā um!” Anɔ́ɔ é kwú ikpīje éyi ú gé lɛ ɔ́ á. 20Anɔ́ɔ ó da uwá ɔ̄kā kahíníī, “Ofu mɛ́mla iyē kú ɔ̄nyɛ bá īkpīje nyā ā?” 21Anɔ́ɔ é kahíníī, “Ákú Usísa nɛ.” Anɔ́ɔ ó da uwá kahíníī, “Aá je ɔdā nēe wɛ ákú Usísa ā lɛ Usísa. Aá kē je aɛ́nɛ̄ e wɛ ákú Ɔwɔicō lɛ Ɔwɔciō.” 22Eko nēé lɛ ɛ̄nyā pó ā, ó le hɛ́ uwā idáagó. Anɔ́ɔ é habɔ̄ ɔ̄ tá, anɔ́ɔ é le pɛ́ nyɛ̄ɛ̄ á.
É dɔɔ̄kā lɛyíkwu ohéyī ŋmá ɔlékwū ā
(Umák 12.18-27; Ulúk 20.27-40)
23 #
Ācot 23.8
Ɛ̄cī ɔ́ɔmā ācɛ Usádusīis, nēé ī cɛ̄ ka ohéyī ŋmá ɔlékwū ɔ́ɔ yɔ̄ ŋ́ mā ā, wā ɛgiyí nū 24#Obla 25.5Anɔ́ɔ é kahíníī, “Itíca, Umósīsi ka ɔ́dāŋ ka ɔ̄cɛ gekwú, nōó lɛ ayí dúú bá ɛcɛ ŋ́, ó lɛ ā ayíka ɔyínɛ́ nū nɔ̄nyīlɔ géē lɛ ɔnyā nū lɛ, cɛ́ɛ́ kóō géē lɛ ayí ma lɛ ɔyínɛ̄ nū ā. 25Ayínɛ́ ahāapa bá ipú alɔ. Ákú aflɛ́yí ā lɛ ɔnyā lɛ, ó gekwú. Anɔ́ɔ abɔ̄ ó ma ɔyí dúúmā ŋ́ mā ā, ó habɔ̄ ɔnyā nū tá lɛ ɔyínɛ̄ nū. 26Ɔdā ékpónú ɔ́ɔmā yá ɔ́mpa á, mɛ́mla ɔ́mɛtá jāā kwu ɔ́mahāapa á. 27Igbīhāajɛ ā, odúúdú uwā, kwu ɔnyā ā dúú le pɛ́ gekwú. 28Ohígbū ɔ́ɔmā, eko nɛ̄ ācɛ géē héyī ŋmá ɔlékwū ā, ɔnyā ɔ̄nyɛ kú ipú ācɛ ahāapa nēe bá ā nōó géē wɛ ā, ohígbū ka odúúdú uwā lɛ ɔ́ lɛ ɔnyā?”
29Anɔ́ɔ Ujísɔ̄si tá uwā ohi kahíníī, “Aá le nyíleyī ohígbū ka aá jé ɔkpá ɛlɔ̄ɔwɔicō ɛ́ɛ́ nɛ̄ aá ī jé ɔfú kú Ɔwɔicō ŋ́. 30Ohígbū ka eko nɛ̄ ācɛ í héyī ŋmá ɔlékwū ā, é gáā lɛ ɔnyā, ɛ́ɛ́ nēé gē je ɔnyā lɛ ɔbá gɛ ŋ́. Amáŋ é géē lɛbɛ̄ɛka aálelékwū-ōtɛ̄hɔ̄ ipú ɔkpáncō ā. 31Aá jé ɔdā nɛ̄ Ɔwɔicō da aá ohígbū ācɛ o héyī ŋmá ɔlékwū ā ŋ́ nɛɛ? Ó kahíníī, 32#Oyɛb 3.6‘Ami wɛ Ɔwɔicō kú Ébrahām, mɛ́mla Ɔwɔicō kú Áyísīki, mɛ́mla Ɔwɔicō kú Ujékɔ̄pu á?’ Ó wɛ Ɔwɔicō kú ācɛ okwú ŋ́, amáŋ ákú ācɛ oyēeyī nɛ.” 33Eko nɛ̄ ɛwa ā le pó ā, ɔdā nōó nwū ā le hɛ́ uwā idáagó.
Íne nōo cɛgbá fíyɛ́ dúú ā
(Umák 12.28-34; Ulúk 10.25-28)
34Eko nɛ̄ ācɛ Ufárisīi le pó koó lɛ ācɛ Usádusīis okónu gwū ā, é le jīla tɔ̄há. 35Anɔ́ɔ éyi kú ipú uwā nōo wɛ ulɔ́ya já Ujísɔ̄si má kahíníī, 36“Itíca, íne nyá cɛ́gbá fíyɛ́ odúúdú aíne āa?” 37#Obla 6.5Anɔ́ɔ ó da ɔ́ kahíníī, “A géē yíhɔtū tū Óndú ā nōo wɛ Ɔwɔicō kú uwɔ ā, mɛ́mla ɛjɛ̄ɛ̄jī īkpɔ̄tū kú uwɔ, mɛ́mla ɛjɛ̄ɛ̄jī odo kú uwɔ, mɛ́mla ɛjɛ̄ɛ̄jī ɛlá nɛ̄ a ī gbo. 38Ɛ̄nyā wɛ íne nōo cɛgbá fíyɛ́ dúú mɛ́mla ákú aflɛ́yí á. 39#Ulīf 19.18Ɔ́mpa ā lɛbɛ̄ɛka anú ā. Ó ka, ‘Yíhɔtū tū ɔ́mpa uwɔ ɛ́gɛ́nɛ̄ a he iyī uwɔ ɔtū ā. 40#Ulúk 10.25-28Odúúdú íne kú Umósīsi mɛ́mla ɛlā nɛ̄ ācomɛ́ɛbɛ nwū ā ŋmá íne ɛpa nyā.”
Ujísɔ̄si da ācɛ Ufárisīi ɔ̄kā ɔ̄nyɛ nɛ̄ Ohɔ́nyɛtá wɛ ā
(Umák 12.35-37; Ulúk 20.41-44)
41Eko nɛ̄ ācɛ Ufárisīi le jīla tɔ̄há ā, Ujísɔ̄si da uwá ɔ̄kā kahíníī, 42“Ɔdí nɛ̄ aá gbɛlá ka Ohɔ́nyɛtá ɔ́ɔ wɛ āa? Ɔyínɔ̄nyīlɔ kú ɔ̄nyɛ nōó wɛ a?”
É da ɔ́ kahíníī, “Ɔyínɔ̄nyīlɔ kú Udéfīdi.” 43Anɔ́ɔ ó da uwá kahíníī, “Abɔ̄ ó yá lɛ nɛ̄ Alelékwū Ihɔ je Udéfīdi ka ɔ́ɔ hī ɔ̄ ka ‘Óndú’ āa? Ó kahíníī,
44 #
Aíjē 110.1
‘Óndú ā da Óndú um ka,
Cīce abɔ̄lɔ́ná kú um
jāā gbéeko nɛ̄ n lɛ aólɛlā kú uwɔ
kpóbá ɛháajɛ ikpó kú uwɔ.’ 45Ɔ́dāŋ́ ka Udéfīdi hī ɔ̄ ka ‘Óndú’, abɔ̄ ó yá lɛ nōó wɛ ɔyínɔ̄nyīlɔ kú nū gɛ?” 46Anɔ́ɔ ɔ̄cɛ dúúmā í tóohi dúú glá gɛ ŋ́ má. Ɔ̄cɛ dúú í kē lɔtū da ɔ́ ɔ̄kā dúúmā ŋmá eko ɔ́ɔmā gɔbū gɛ ŋ́.
Currently Selected:
UMÁTIYU 22: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma