UMÁTIYU 12
12
Ācɛ Ufárisīi kpɛ́lā ce Ujísɔ̄si koó gē bīya íne kú Usábāti
(Umák 2.23-28; Ulúk 6.1-5)
1 #
Obla 23.25
Ɛ̄cī eyī Ujísɔ̄si yɔ̄ ī bū ipú ɛhɔ̄ īkpɔ̄dā éyi ɛ̄cī Usábāti. Ɛmiyɛ yɔ̄ ī ŋmó ayíkpó kú nū, anɔ́ɔ é gbɔɔ́ ō cē īkpɔ̄dā ā lé á. 2Eko nɛ̄ ācɛ Ufárisīi lɛ ɔ́ má ā, é da ɔ́ kahíníī, “Mɔ́ɔ̄, ayíkpó kú uwɔ gē yá ɔdā nōo gē bīya íne kú ɛ̄cī Usábāti.” 3#1 Usám 21.1-6Amáŋ ó da uwá kahíníī, “Aá jé ɔdā nɛ̄ Udéfīdi yá eko nɛ̄ ɛmiyɛ gē ŋmó anú mɛ́mla ācɛ nēe bá pī ɔ̄ ā ŋmá ɔkpá ɛlɔ̄ɔwɔicō ɛ́ɛ́ ŋ́ nɛ?” 4#Ulīf 24.9Ó le yɛ tá ipú inu kú Ɔwɔicō, anɔ́ɔ anú mɛ́mla ācɛ ɔlɛ́ nū gaá le igbō nēé ī le ce iyɔ̄bū Ɔwɔicō ā kpó lé. Ó kē wɛ íne ō bīya kú ɔ̄cɛ ɔhá dúú kóō lé, ń táafú ŋ́ ayíka ācogwɛ́ɛya ōfōōfū ūwa cíkā ō lé á. 5#Áluk 28.9,10N jé kpɔ́cī ka aá jé ŋmá ipú íne kú Umósīsi ka ācogwɛ́ɛya ā ɛ́ɛ ī bīya íne ipú Agblīihɔ-nɛ̄hi ā ɛ̄cī Usábāti dóódu, amáŋ é kē lɛ́pɔ̄bí ŋ́? 6Amáŋ n̄ da aá ka ɔdā nōo nwuné fíyɛ́ Agblīihɔ-nɛ̄hi ā yɔ̄ amānyā 7#Umát 9.13; Uhos 6.6Ɛlɔ̄ɔwɔicō kahíníī, ‘Ɔdā nɛ̄ n tíne ā wɛ ka aá ményinyi ācɛ ɔhá, amáŋ ó wɛ ɛbɛ́ ō je gwɛ́ɛya gā um ŋ́,’ Ɔ́dāŋ́ ka aá jɛ́yí ɔdā nōo ka nyā ā, aá géē yɛ í ŋmó ācɛ nēe lɛpɔ̄ɔhi ā ɛpɔ̄bí ŋ́. 8Ohígbū ka Ɔyínɔ̄nyīlɔ kú Ɔ̄cɛ ā wɛ Óndú kú Usábāti aā.
Ujísɔ̄si lɛ ɔ̄cɛ nɛ̄ abɔ̄ éyi kú nū ŋmó tíiyē hɛ́tá
(Umák 3.1-6; Ulúk 6.6-11)
9Anɔ́ɔ ó nyɛ̄ɛ̄ ŋmá abɔ́ɔ le yɛ tá Agblīihɔ nɛ̄ŋ́cɛ́ kú uwā á. 10Ɔ̄cɛ éyi yɔ̄ abɔ́ɔ, nɛ̄ abɔ̄ kú nū éyi le ŋmó. Ācɛ ōhī bá abɔ́ɔ nēe dɔɔ̄kā ō kpɛ́lā ce Ujísɔ̄si koó yɔ ī yá ɔdōōbɔ̄bí. Anɔ́ɔ é da ɔ́ ɔ̄kā kahíníī, “Íne kú Umósīsi cɛ̄ kú ɔ̄cɛ kóō hɛ́ ɔ̄cɛ ɔhá tá ŋmá ōcē ɛ̄cī Usábāti?” 11#Ulúk 14.5Amáŋ ó da uwá kahíníī, “Ɔ̄nyɛ yɔ̄ ipú aá, nɛ̄ ɔ́dāŋ koó lɛ álá éyi, nɛ̄ álá kú nū ā le tá ipú ɔ̄gɔ̄ ɛ̄cī Usábāti, nōó gáā lɛ abɔ̄ bī ɔ̄ klla kwú ɔ̄ ú wɛ̄ɛcɛ ŋ́ mā āa? 12Ācɛ tīile nwuné fíyɛ́ álá á! Abɔ̄ ó lɛ ā, íne ā cɛ̄ ka ācɛ kɛ́ɛ yá ɔdōolɔhi ɛ̄cī Usábāti.” 13Anɔ́ɔ ó da ɔ̄cɛ ɔ́ɔmā kahíníī, “Lɛ abɔ̄ kú uwɔ nāńdaa.” Ɔ̄cɛ ā lɛ abɔ̄ ā nāŋ́daa, anɔ́ɔ ó kwú yá lɔhi bɛ̄ɛka ɔhá ā á. 14Anɔ́ɔ ācɛ Ufárisīi ā le tá ɛcɛ gaá lɛ ujɔ̄ tū ɛ́gɛ́nɛ̄ é géē ŋmó Ujísɔ̄si ā á.
Ɔ̄cotɛ̄hɔ̄ nɛ̄ Ɔwɔicō fu ā
15Amáŋ eko nɛ̄ Ujísɔ̄si le ujɔ̄ nēé tū ā jé ā, ó nyɛ̄ɛ̄ ŋmá abɔ́ɔ. Anɔ́ɔ ācɛ alɛwa yɛce ɔ́, ó klla le odúúdú ācɛ nēe gē doōcē kpɛ́ɛ́m ā hɛ́tá. 16Ó tū uwā ukɔ́ kéē híīī yá ká ācɛ ɔhá kéē jé kwu anúɔ ŋ́. 17Ɛ̄nyā wɛ ō yá jīla kú ɔdā nɛ̄ Ayisáya, ɔ̄comɛ́ɛbɛ ā ka lɛyíkwu ɔ́ ā. Ó kahíníī,
18 #
Ayis 42.1-4
“Má ɔ̄cotɛ̄hɔ̄ kú um, nɛ̄ um fu ā,
nōo he um ɔtū ā, nɛ̄ ɛlā nū gē he um ɔtū ā.
N géē je Alelékwū kú um lɛ ɔ́.
Ó kē í ka tɛ́ɛcɛ lɛ aéwo ka n géē nya uwá tá.
19Ó gáā túkanā ámāŋ o dɛ̄gba tɛ́ɛcɛ ŋ́.
É gáā pó ɔkɔ kú nū úláyí ŋ́.
20Ɛ́gɛ́nɛ̄ ó gáā cē ɔcí nēé lɛ ɔ́ cē ŋ́ mā, ɛ́gɔ́ɔmā nōó gáā yá ɔfɔ́ɔ́fú mɛ́mla ācɛ nēé gbɛnyigbɛnyi mɛ́mla ācɛ nēé lɔfú iyē ŋ́ mā dúú á.
Ó géē yá lɛ ā jāā gbéeko nōó le yá ká ɛpɔ̄ ɔkwɛ̄yi kóō mīyajɛ tābɔ̄.
21Anú gáā cɛ̄ lɛ ācɛ aéwɔhá ā lɛ eyīyōce á.”
Ujísɔ̄si mɛ́mla Ubéélsēbul
(Umák 3.20-30; Ulúk 11.14-23; 12.10)
22Anɔ́ɔ é lɛ ɔ̄cɛ éyi nōo wɛ opeyi, nōó klla kɛlā glá ŋ́ ohígbū kóō lɛ alelékwū obɔ̄bí, bī gé lɛ Ujísɔ̄si kóō lɛ ɔ́ hɛ́tá á. Ó lɛ ɔ́ hɛ́tá anɔ́ɔ odokónu ā gbɔɔ́ ō kɛlā klla gbɔɔ́ ō mɛ́ɛbɛ á. 23Ācɛ dóódu le hídáagó klla bá ī ka kahíníī, “Ɛ̄nyā wɛ Ɔyínɔ̄nyīlɔ kú Udéfīdi á nɛɛ?” 24#Umát 9.34; 10.25Amáŋ eko nɛ̄ ācɛ Ufárisīi le pó ā, é kahíníī, “Ɔ̄cɛ ā lɔfú gē nū aálelékwū obɔ̄bí ā tɛ́ɛcɛ ohígbū ka Ubéélsēbul, otrɛ̄yí kú aálelékwū obɔ̄bí ā ī je ɔfú lɛ ɔ́ á. 25Amáŋ abɔ̄ Ujísɔ̄si lɛ ɛlá nēé gbo ā jé ā, ó da uwá kahíníī, “Ajɔ̄ɔ̄cɛ́ dúúmā nōo le iyī nū kɔ̄ ígwíígwu bá gē nuunu tá īyī uwā í je catāajɛ. Igelī ámāŋ ɔlɛ́ dúúmā nōo lɛ īyī nū kɔ̄ ígwíígwu bá gē nuunu tá īyī uwā géē je fíyákátā. 26Ɔ́dāŋ́ ka ebílíi kē ī nū ebilíi tɛ́ɛcɛ, ó lɛ ā ayíka ó yɔ̄ ī nuunu tá īyī nū ɛɛ́. Ohígbū ɔ́ɔmā, ajɔ̄ɔ̄cɛ́ kú nū í gáā háyi glá ŋ́. 27Ɔ́dāŋ́ ka n bī Ubéélsēbul gē nū alelékwū obɔ̄bi tɛ́ɛcɛ, ɔdí nɛ̄ ācɛ o yɛce aá gē bī le nū aálelékwū obɔ̄bí tɛ́ɛcɛ ā gɛ? Ohígbū ɔ́ɔmā uwá géē kɛpɔ̄ tū aá kú ɔdā nɛ̄ aá ka ā. 28Amáŋ ɔfú kú Alelékwū kú Ɔwɔicō nɛ̄ n gē le nū aálelékwū obɔ̄bí tɛ́ɛcɛ á. Ó lɛ ā, ɔ́ɔmā kē cābɔ̄ ka Ɔwɔicō gaá cɔ́cɛ́ ipú aá ɛɛ́. 29Ámāŋ ɛ́gɛ́nyá nɛ̄ ɔ̄cɛ dúúmā géē lɔfú ga inu kú ɔ̄cɛ olɔfú gaá je odée kú nū abɔ̄fú glá ā? Ń táafú ŋ́ ayíka ó lɛ ɔ̄cɛ olɔfú ɔ́ɔmā gbō gbɔbū ń nɛɛ? Eko ɔ́ɔmā nōó géē kpó iyó kú nū glá á. 30#Umák 9.40Ɔ̄cɛ nōó yɔ̄ mɛ́mla um ŋ́, wɛ ɔ̄cɛ obɛ́yíkwu um. Ɔ̄cɛ nōó kē tú ɔ̄ bá mɛ́mla um ŋ́, gē fíyɛ́ ɔ̄ ákátā 31Ohígbū ɔ́ɔmā, n̄ da aá keé géē je íne nɛ̄ ācɛ bīya mɛ́mla ɛlā ɛbí#12.31 ɛbí nēé ka ā; ámāŋ ɛbí dúú nēé ka tú Ɔwɔicō ā. dóódu nēé ka ā yá uwá ɛhi. Amáŋ Ɔwɔicō í gáā je ɛlā obɔ̄bí nēé ka lɛyíkwu Alelékwū Ihɔ ā yá uwā ɛhi ŋ́. 32#Ulúk 12.10Ɔ̄cɛ dúúmā nōo lɛ obɔ̄bí ka lɛyíkwu Ɔyínɔ̄nyīlɔ kú Ɔ̄cɛ, é géē je yá ɔ̄ ɛhi. Amáŋ ɔ̄cɛ nōo lɛ obɔ̄bí ka lɛyíkwu Alelékwū Ihɔ, é gáā je yá ɔ̄ ɛhi ipú ɛcɛ nyā ámāŋ ipú ɛcɛ ɔhá nōo gē wā ā glá ŋ́.
33 #
Umát 7.20; Ulúk 6.44 Ó yá ɛ́ɛ́ ká ā lɛ īkpɔ̄cí olɔhi āa, a géē lɛ ɔcí olɔhi. A géē lɛ īkpɔ̄cí obɔ̄bí ɔ́dāŋ ka lɛ ɔcí obɔ̄bí. É gē jé ɛ́nɛ́ ɔcí ŋmá ɛdɔ īkpō nōó gē gwá ā. 34#Umát 3.7; 23.33; Ulúk 3.7; Umát 15.18; Ulúk 6.45Aá nēe wɛ ugbɛ kú ogwiji ā, ɛ́gɛ́nyā nɛ̄ aá géē kɛlā olɔhi glá āa, nɛ̄ aá wɛ ācɛ obɔ̄bí āa? Ohígbū ka ɔdā nōo yɔ̄ ipú ɔtū kú ɔ̄cɛ ā nɛ̄ okónu gē ka wɛ̄ɛcɛ á. 35Ɔ̄cɛ olɔhi gē je ɔdā olɔhi ŋmá agbénú olɔhi kú nū. Ɔ̄cɛ obɔ̄bí gē je ɔdōōbɔ̄bí ŋmá agbénú obɔ̄bí kú nū. 36“Amáŋ n̄ da aá ka, ɛlā icííci dóódu nɛ̄ ācɛ ka, é géē ka ɛyí nū ɛ̄cī ɛpɔ̄ ā piíí. 37Ohígbū ka ŋmá ɛlā nɛ̄ a ka ā nēé géē bī le hɛ́ ɛpɔ̄hi ga uwɔ á. O ŋmá ɛlā nɛ̄ a ka ā nēé kē géē ŋmó uwɔ ɛpɔ̄bí á.”
Ujísɔ̄si tá ka anúɔ í yá ɔdōcābɔ̄ ŋ́
(Umák 8.11-12; Ulúk 11.29-32)
38 #
Umát 16.1; Umák 8.11; Ulúk 11.16 Anɔ́ɔ aítíca kú íne kú Umósīsi mɛ́mla ācɛ Ufárisīi ōhī da ɔ́ kahíníī, “Itíca, alɔ tíne ō má ɔdōcābɔ̄ eyī ŋmá ɛgiyí uwɔ.” 39#Umát 16.4; Umák 8.12Anɔ́ɔ Ujísɔ̄si tá uwā ohi kahíníī, “Ācɛ obɔ̄bí mɛ́mla ɛ̄nɛ̄ ó jé Ɔwɔicō ŋ́ bɛ̄ɛka aá nēe wɛ ācɛ kú eko nyā ā, gē dɔɔ̄kā ɔdōcābɔ̄ á. É gáā je ɔdōcābɔ̄ dúúmā lɛ aá ŋ́, ń táafú ŋ́ ayíka ɛdɔ ɔdōcābɔ̄ nɛ̄ Ɔwɔicō mafú lɛ Ujóna, ɔ̄comɛ́ɛbɛ ā. 40#Ujón 1.17Ohígbū ka ɛ́gɛ́nɛ̄ Ujóna yɔ̄ ipú ɛbéenyi nɛ̄hi ɛ̄cī ɛtá, kwu otú kwu ɛnɔ ā, ɛ́gɔ́ɔmā nɛ̄ Ɔyínɔ̄nyīlɔ kú Ɔ̄cɛ géē yɔ̄ ipú ajɛ ɛ̄cī ɛtá mɛ́mla otú ɛtá á. 41#Ujón 3.5Ācɛ igelī nēé hī ka Unínēye ā géē cāŋjɛ ɛ̄cī ɛpɔ̄ í cījáalí tū ācɛ kú eko nyā. É kē géē ŋmó aá ɛpɔ̄bí, ohígbū ka uwá le pīyabɔ̄ ŋmá lɛ ɛlā kú Ujóna nēé pó āa. Amáŋ n da aá ka ɔdā nōo fíyɛ́ Ujóna kē yɔ̄ amānyā abālɔbányā 42#1 Aɔ́cɛ́ 10.1-10; 2 Úklɔ́ 9.1-12Ɔcányā kú éwo nōo yɔ̄ ɛháajɛ ā géē cāŋjɛ ɛ̄cī ɛpɔ̄ géē cījáalí tū ācɛ kú eko nyā. Ó kē géē ŋmó ɔ̄ ɛpɔ̄bí. Ohígbū koó ŋmá ɛga oligbó nɛ̄hi kóō gaá pó ɛlā kú íjééyī kú Usólōmɔn. Amáŋ n da aá ka ɔdā nōo fíyɛ́ Usólōmɔn kē yɔ̄ amānyā abālɔbányā.”
Ɛ́gɛ́nɛ̄ alelékwū obɔ̄bí gē kwúcē ga ipú kú ācɛ lɛ ā
(Ulúk 11.24-26)
43“Eko nɛ̄ alelékwū oblínyī le bɛ̄cɛ ŋmá ipú iyē kú ɔ̄cɛ éyi wɛ̄ɛcɛ, ó ī yɛ ɛga nɛ̄ éŋkpɔ̄ í yɔ̄ ŋ́ gē tíne ɛga omlɛ́nyɔ́. Eko nōó kē má odúúmā ŋ́. 44Cɛ́ɛ́ ó kahíníī, ‘N géē kwúcē ga ɔlɛ́ um ɛga nɛ̄ um ŋmá wɛ̄ɛcɛ ā.’ Eko nōó kwúcē nyɔ̄ ā, ó má bā ó táncā, é kē lɛ ɔ́ gwu klla le ɔ́ tútū. 45Anɔ́ɔ ó nyɔ̄ gaá lɛ aálelékwū ahāapa ɔhá nēe bɔ̄bí fíyɛ́ ɔ̄ kpó wā á. Cɛ́ɛ́ uwá le bēhé ga ipú ɔ̄cɛ ā gaá lā tɔ̄há abɔ́ɔ á. Āhɔ̄ kú ɔ̄cɛ ɔ́ɔmā le bɔ̄bí fíyɛ́ ɛ́gɛ́nɛ̄ ó tɛtɛ lɛ āa. Ɛ́gɔ́ɔmā nōó géē lɛ lɛ ācɛ obɔ̄bí kú eko nyā dúú á.”
Ɛ́nɛ́ mɛ́mla Ayínɛ́ ɔkwɔ̄ɔ̄kwɛ̄yi kú Ujísɔ̄si
(Umák 3.31-35; Ulúk 8.19-21)
46Abɔ̄ ó yɔ̄ gē kɛlā lɛ ācɛ ā, ɛ́nɛ́ nū mɛ́mla ayínɛ́ nū nɔ̄nyīlɔ bá ɛcɛ gē dɔɔ̄kā kéē kɛlā lɛ ɔ́. 47Ɔ̄cɛ éyi da Ujísɔ̄si kahíníī, “Mɔ́ɔ̄, ɛ́nɛ́ uwɔ mla ayínɛ́ uwɔ nɔ̄nyīlɔ bá ɛcɛ gē dɔɔ̄kā kéē kɛlā gā uwɔ.”#12.47 Aɔ́kpá ōhī í lɛ ɔgba ofucahāapa ŋ́. 48Amáŋ ó tá ɔ̄cɛ nōo da ɔ́ ā ohi kahíníī, “Ɔ̄nyɛ wɛ ɛ́nɛ́ um ā? Ānyɛ kē wɛ ayínɛ́ um nɔ̄nyīlɔ ā?” 49Anɔ́ɔ ó lɛ abɔ̄ kú nū miya lɛyíkwu ayíkpó kú nū kahíníī, “Aá má uwā, aɛ́nyā wɛ ɛ́nɛ́ um mɛ́mla ayínɛ́ um nɔ̄nyīlɔ á. 50Ohígbū ka ɔ̄cɛ dúúmā nōo ī yá ɔdā nēe he Ádā um nōo yɔ̄ ɔkpáncō ā ɔtu ā, anú wɛ ɔyínɛ́ um nɔ̄nyīlɔ mɛ́mla ɔyínɛ́ um nɔ̄nyā mɛ́mla ɛ́nɛ́ um á.”
The Bible Society of Nigeria
Learn More About Ubáyíbu kú Idɔma