UMÁTIYU 1
1
Ɛma kú aádáádā kú Ujísɔ̄si
1Ɛ̄nyā wɛ ɔkpá kú iyē kú aádáádā kú Ujísɔ̄si Ohɔ́nyɛtá, nōo wɛ ɔyɔ́ɔ́yí nɔ̄nyīlɔ kú Udéfīdi, nōo kē wɛ ɔyɔ́ɔ́yí nɔ̄nyīlɔ kú Ébrahām ā. 2Ébrahām ma Áyísīki, Áyísīki ma Ujékɔ̄pu, Ujékɔ̄pu ma Ujúda mɛ́mla ayínɛ́ nū ɔhá āa. 3Ujúda ma Upéresi mɛ́mla Usára ŋmá iyē ɛ́nɛ́ uwā nōo lé ka Utáma ā. Upéresi ma Uhɛ́srɔn. Uhɛ́srɔn ma Áram. 4Áram ma Ammínādābu, Ammínādābu ma Unáhssɔn, Unáshɔn ma Usálmɔ̄n. 5Ubówās ma Óbɛ́d ŋmá iyē Urútu. 6#2 Aɔ́cɛ́ 24.14,15; 2 Úklɔ́ 36.10; Ujer 27.20Ujése ma Udéfīdi, nōo wɛ ɔcɛ́ āa.
Udéfīdi ma Usólōmɔn ŋmá iyē kú ɔnyā nōo tɛtɛ wɛ ɔnyā kú Uríya ā. 7Usólōmɔn ma Uréhobōwam. Uréhobōwam ma Ábīja, Ábīja kē ma Ása. 8Ása ma Ujehósāfati, Ujehósāfati ma Ujóram, Ujóram kē ma Osíya. 9Osíya ma Ujɔ́tam, Ujɔ́tam ma Áhāsi, Áhāsi kē ma Uhesekíya. 10Uhesekíya ma Umanásɛ, Umanásɛ ma Émɔ̄si, Émɔ̄si kē ma Ujosíya. 11Ujosíya ma Ujekoníya mɛ́mla ayínɛ́ nū nɔ̄nyīlɔ eko nēé kpó uwā aɔ́fiyɛ ŋmá ɔlɛ́ ga ajɛ kú Ubábīlɔn ā.
12Igbīhi nēé kpó ācɛ kú Ísrɛ̄lu ga Ubábīlɔn āa, 13Usɛrúbābɛlu ma Abíyudi, Abíyudi ma Ɛlíyākim, Ɛlíyākim ma Áso. 14Áso ma Usádɔ̄ku, Usádɔ̄ku ma Acím, Acím ma Ɛlíyūdi. 15Ɛlíyūdi ma Ɛlísa, Ɛlísa ma Umátan, Umátan ma Ujékɔ̄pu, 16Ujékɔ̄pu ma Ujósɛ̄fu ɔbá kú Umerí, ɛ́nɛ́ Ujísɔ̄si. Ujísɔ̄si ɔ́ɔmā nēé hī ka Ohɔ́nyɛtá á.
17Abɔ̄ ó lɛ ā, odúúdú ipɔ́ɔma ŋmá ɛgiyí Ébrahām jāā ga Udéfīdi ā wɛ ayááyí igbo igwɛ́nɛ. Ŋmá eko kú Udéfīdi ga eko nēé kpó ācɛ Ísrɛ̄lu ŋmá ɔlɛ́ ga Ubábīlɔn ā wɛ ayááyí igbo igwɛ́nɛ. Anɔ́ɔ o ŋmá eko nēé kpó ācɛ Ísrɛ̄lu ŋmá ɔlɛ́ ga Ubábīlɔn ga eko nēé ma Ohɔ́nyɛtá ā wɛ ayááyí igbo igwɛ́ɛnɛ á.
18 #
Ulúk 1.27
É ma Ujísɔ̄si ɔwɛ ɛ́gɛ́nyā. Ujósɛ̄fu lɛ Umerí, ɛ́nɛ́ Ujísɔ̄si, kwelūbi. Amáŋ gbɔbū ɛ́ kéē lɛ īyī uwā ā, Umerí kwú ipú í yɔ̄ ŋmá lɛ ɔfú kú Alelékwū Ihɔ. 19Abɔ̄ ɔbá nū, Ujósɛ̄fu, wɛ ɔ̄cɛ o lɛ íne tū ā nááná ā, ó tíne ō juwēyi lɛ Umerí ŋ́. Anɔ́ɔ ó tíne ō tá ɔ̄ wɛɛlɛ á. 20Abɔ̄ ó yɔ̄ ī gbɛlá nū ā, alelékwū-ōtɛ̄hɔ̄ kú Óndú gā ɛgiyí nū ipú ɔ̄na gaá da ɔ́ kahíníī, “Ujósɛ̄fu, ɔyɔ́ɔ́yí Udéfīdi, ā híīī yúúfi ō le Umerí lɛ kóō wɛ ɔnyā awɔ ŋ́. Ohígbū o ŋmá lɛ ɔfú kú Alelékwū Ihɔ nōó yīīpú nyā á. 21#Ulúk 1.31Ó géē ma ɔyínɔ̄nyīlɔ, a kē í hī iyē nū ka UJÍSƆ̄SI. Ohígbū ka anú géē nya ācɛ ɔlɛ́ nū tá ŋmá íne nēé bīya á. 22Ɔdā nēe bá ā yá ká ɔdā nɛ̄ Óndú ā ka bū okónu kú ɔ̄comɛ́ɛbɛ ā kóō le yá jīla. Ɔ̄comɛ́ɛbɛ ā kahíníī,
23 #
Ayis 7.14
“Mɔ́ɔ̄, ɔ́ncɛ́nyā éyi nōó jé ɔ̄cɛnyīlɔ ŋ́ géē yɔ̄ ipú í ma ɔyínɔ̄nyīlɔ. É géē hī iyē nū ka Imánūwɛ̄lu, (Ɛyí iyē ā wɛ ka Ɔwɔicō yɔ̄ pī alɔ).
24Eko nɛ̄ Ujósɛ̄fu le héyī á, ó le yá ɛ́gɛ́nɛ̄ alelékwū-ōtɛ̄hɔ̄ kú Óndú ā da ɔ́ lɛ ā. Anɔ́ɔ ó le Umerí lɛ ɔnyā á. 25#Ulúk 2.21Amáŋ ó kē gbo mla anú ŋ́ jāā gbéeko nōó lɛ ɔyí aflɛ́yí kú nū ā ma. Anɔ́ɔ ó kwú iyē ú ce ɔ́ ka UJÍSƆ̄SI á.
Currently Selected:
UMÁTIYU 1: IFBCL
Highlight
Share
Copy
Want to have your highlights saved across all your devices? Sign up or sign in