ULĪFAYI 26
26
Ɔhā kú ɔ̄cɛ nōo lɛyítáajɛ
(Obla 7.12-24; 28.1-14)
1 #
Ulīf 19.4;
Oyɛb 20.4; Obla 5.8; 16.21,22; 27.1 Óndú ā kahíníī, “Aá híī ma aɛ́cí ámāŋ aójibó, ámāŋ aɔ́kpa kú ɛcɔ̄, ámāŋ ɛcɔ̄ ō gbā kwaajɛ kú aá gbā uwā ɛ̄gbā ŋ́. Ami ā wɛ Ɔwɔicō kú aá. 2Aá géē lɛ ɛ̄cī usábāti kú um ā tū, aá klla í lɛ ojīlīmā ce Áklɔ̄kpīihɔ kú um. Ami wɛ Óndú ā, n-oo wɛ Ɔwɔicō kú aá á.
3 #
Obla 11.13-15; 28.1-14 “Ɔ́dāŋ ka aá bá gē lɛ íne kú um tū, cɛ́ɛ́ kú aá yá aɔ́dā nɛ̄ n tū aá ukɔ́ lɛyíkwu ɔ̄ ā, 4n géē tū ɔwɔ wā ajɛ gé lɛ aá eko nōo cíkā ā. Cɛ́ɛ́ ka ajɛɛhɔ̄ kú aá kóō yá ɔdɛ̄hɔ̄, ka īkpɔ̄cí kú aá kéē gwá nɛ̄hi. 5Ɔdɛ̄hɔ̄ kú aá géē yá nwuné nɛ̄ɛ̄nɛ̄hi, nɛ̄ aá géē bá ī cē ɔdɛ̄hīcō nááná nɛ̄ eko nɛ̄ ācɛ ī kpó īkpō ufáyin le yá ā. Aá kē í yɔ̄ ī cē īkpō ufáyin, nááná nɛ̄ eko ō nyi ɔdɛ̄hīcō le yá ā. Aá géē lɛ odúúdú aɔ́dā dóódu nɛ̄ aá dɔɔ̄kā ō lé. Aá kē í lā ɛbɔ́ ɔlɛ́ aá.
6N géē je ɛbɔ́ lɛ aá ipú ajɛ ā, nɛ̄ aá géē gbiyɔ̄lā nɛ̄ aá gáā yúúfi kú ɔ̄cɛ dúúmā otú ŋ́. N géē je aɛ́bɛ́ obɔ̄bí dóódu kú ajɛ ā kpó ŋmō. Aá kē gáā kpɛ́fú ŋ́. 7Aá géē yá aólɛlā kú aá lé. 8Ācɛ ɛhɔ̄ kú aá lɔfú yá aólɛlā ofɛhɔ̄ kú aá lé glá. Anɔ́ɔ ācɛ ofɛhɔ̄ kú aá lɔfú yá ācɛ úlā ofu cɛ̄hɔ̄ lé glá. 9N géē hɔ́ɔ́hā ce aá klla géē je ayí alɛwa lɛ aá. N géē lɛ okónu kú um, nɛ̄ n ce lɛ aá ā tū. 10Ɔdɛ̄hɔ̄ kú aá géē nwuné nɛ̄hi, nōó géē jɛ̄ aá ipú iháyí dóódu. Aá klla géē je ɔdɛ̄hɔ̄ nɛ̄ncɛ̄ kú aá kpó bónū ŋmá ɔbá kú aá, kú ɛga kóō tá lɛ ɔdɛ̄hɔ̄ ɛ̄yīpɛ̄ kú aá. 11N géē yɔ̄ pī aá, ipú Áklɔ̄kpīihɔ kú um ā. Ń gáā pīyeyī kú um ŋmá ɛgiyí aá ŋ́. 12#2 Ukɔ́r 6.16N géē yɔ̄ mla aá. N géē wɛ Ɔwɔicō kú aá, aá kē í wɛ ācɛ ɔlɛ́ um. 13Ami wɛ Óndú ā, nōo wɛ Ɔwɔicō kú aá, nōo kpó aá bɛ̄cɛ ŋmá ajɛ kú Íjīpiti á, kú aá híī wɛ aɔ́fiyɛ ŋ́ má. Ɔfú nōo bī aá klá ajɛ abɔ́ɔ ā, n lɛ ɔ́ catāajɛ, cɛ́ɛ́ kú aá yāwu lɛ ɔkɔ kwicō gɛ̄mm.”
Itala kú á lɛyítáajɛ ŋ́
14 #
Obla 28.15-68
Óndú ā kahíníī, “Ɔ́dāŋ ka aá lɛyítáajɛ lɛ aíne kú um ā ŋ́, é géē yá aá italā. 15Ɔ́dāŋ ka aá tá ō lɛyítáajɛ lɛ aíne kú um, nɛ̄ aá lɛ okónu nɛ̄ n ce mla aá ā bīya, 16n géē yá italā. N géē cɛ̄ lɛ ɔdōbɔ̄bí yá aá. Ōcē nōó lɛ ɛcí ŋ́ mā, mɛ́mla ɛ̄nɛ̄ o géē je aá eyī kpó pu nōo géē yá kú aá mɛ tāajɛ ā géē yá aá. Aá géē nyi ikpɔ̄dɛ̄hɔ̄ kú aá, amáŋ é gáā tīile lɛ aá ŋ́. Ohígbū ka aólɛlā kú aá géē yá aá lé, cɛ́ɛ́ é kwú ɔdā nɛ̄ aá nyi ā ú kpó lé. 17N géē je gbīhi cēkwu aá, cɛ́ɛ́ kú aólɛlā kú aá kóō lɛ aá yálé. Ācɛ nēe gē wɔ́tū aá ā gáā gbō aá bɛ̄ɛka ɔcɛ́ ā á. Aá géē yúúfi nɛ̄ɛ̄nɛ̄hi nɛ̄ aá géē yɔ̄ ī kwinya nááná nɛ̄ ɔ̄cɛ dúú í nū aá inya ŋ́ mā. 18Ɔ́dāŋ ka aɔ́dā nēe bá nyā le yá, anɔ́ɔ aá klla lɛyítáajɛ lɛ aíne kú um ŋ́ kpɔ́, n géē yá aá italā ɔ́klá ahāapa. 19N géē cē ɔbɔ́ɔ́cɛ kú aá nōo ī cɛ̄ lɛ aá yá īkpɛ̄yí olɔfú ā ɔkɔ. Ɔwɔ í gáā yá lɛ aá ŋ́. Ajɛ kú aá géē je ŋmó bɛ̄ɛka oje ā. 20Úklɔ́ ɛhɔ̄ kú aá í kē gáā tū ile ŋ́. Ohígbū ka ajɛ kú aá í gáā yá ɔdɛ̄hɔ̄, ɛ́ɛ́ nɛ̄ ɔcí ō gwíikpō kú aá gē gwíikpō ŋ́.
21Ɔ́dāŋ ka aá bá ī tá ɛlā kú um, nɛ̄ aá í lɛyítáajɛ ga um ŋ́ kpɔ́, n géē yá aá italā ɔ́klá ahāapa. 22N géē tū aɛ́bɛ́ obɔ̄bí ɛhɔ̄ klá aá. É géē kpó ayípɛ̄ ɔlɛ́ aá ŋmó, klla géē kpó aɔ́dāajɛ kú aá yíífi. Aá nēe géē hile ā í gáā nwuné ŋ́, nōo géē yá nɛ̄ ɔ̄cɛ dúú í kōō gáā tá ɔwɛ kú aá ŋ́.
23“Ɔ́dāŋ nɛ̄ aá pīyabɔ̄ igbīhi italā nēe bá nyā ŋ́, nɛ̄ aá bá gē tá ɛlā kú um kpɔ́. 24Ami abɔ̄yī um géē pīyeyī kwu aá klla í yá aá italā nōo í lɔfú fíyɛ́ ákú otɛtɛ ā igbahāapa. 25N géē cɛ̄ lɛ ācɛ kéē wā í kpɛ́fú tá aá, ohígbū okónu nɛ̄ n ce mla aá nɛ̄ aá tá nyílá ā. Ɔ́dāŋ ka aá le túbá ipú igelī kú aá, ka ɔdā dúúmā í gáā yá aá glá gɛ ŋ́, n géē tū ōcē nōó lɛ ɛcí ŋ́ klá aá. Ó géē pi aá abɔ̄fú kú aá cɔ̄nyā lɛ aólɛlā kú aá. 26N géē nyí aá ɔdōlé, cɛ́ɛ́ ācɛnyā igwó géē bá ī yá igbō ikpó acɔ̄lá ékpónú ā. É kē í yá éyééye éyééye. Eko nɛ̄ aá kē kwú odúúdú nū ú lé, nááná ɛmiyɛ géē ŋmó aá kpɔ́.
27“Ɔ́dāŋ nɛ̄ aá pīyabɔ̄ igbīhi italā nēe bá nyā ŋ́, nɛ̄ aá yɔ̄ gē tá ɛlā kú um kpɔ́. 28n géē cɔ̄nū nɛ̄hi lɛyíkwu aá, cɛ́ɛ́ n klla í yá aá italā nōo í bɔ̄bí nɛ̄ɛ̄nɛ̄hi igbahāapa fíyɛ́ ákú otɛtɛ ā. 29Ɔkpɛtā géē yɔ̄ ajɛ ɔlɛ́ aá nɛ̄ɛ̄nɛ̄hi, nōo géē yá kú aá gbɔɔ́ ō kpó ayípɛ̄ kú ɔlɛ́ ŋmó lé. 30N géē je ɛga nɛ̄ aá gē pɛ̄cí ɛyí ɛfu kú aá wúlatāajɛ, géē je ede otulalī umuumu ā catāajɛ. Cɛ́ɛ́ n lɛ okwū kú aá kpó tɛ́cɔ̄ ce aójíbó kú ɛcí kú aa nēe ca bá ajɛ ā. 31N géē je igelī kú aá ā mɛ́mla ikpɛ́cí kú aá yíífi. Ń klla gáā mīyɛ ɛya nɛ̄ aá gē gwó gā mā ɛ́ɛ́ gɛ ŋ́. 32N géē je ajɛ kú aá yíífi dúúdú nōo géē cɛ̄ lɛ aólɛlā nōo gáā lā anú ā géē hídáagó ohígbū ɛdɔ ífi nēé í má ā. 33N géē tū ɛfú klá aá í je aígelī kú aá yíífi. N klla í nū aá bēhé ɔlɛ́, í fíyá aá ākátā tū ipú aéwɔhá ā. Ajɛ ɔlɛ́ aá géē je tá alácɛ.
34Cɛ́ɛ́ ajɛ ā géē lɛ ɛdɔ kú omlɛ́nyɔ́ nɛ̄ aá je lɛ ɔ́ glá ŋ mā. 35Ó géē tá alácɛ̄, cɛ́ɛ́ kóō lɛ mlɛ́nyɔ́ dúúdú abɔ̄ aá géē bá ajɛ ɛga nɛ̄ aólɛlā géē kpó aá nyɔ̄ ā. 36N géē tū aá nēe bá ajɛ kú ɔlɛ́ ācɛ ɔhá ā ufi nɛ̄ɛ̄nɛ̄hi nōo géē cɛ̄ lɛ aá í kwinya eko nɛ̄ aá lɛ ɔkɛ̄lā kú ēpū nɛ̄ owu gē kpó ŋmáajɛ pó. Aá géē kwinya bɛ̄ɛka ɔdā nēé yɔ̄ ī nū aá inyā ŋmá ɔgbɛ́fú ā. Aá kē í gwōnū nááná nɛ̄ olɛlā dóódu í kōō túbla aá ajaajɛ ŋ́ mā. 37Aá géē bá ī gwōnū klla iyī aá eko nɛ̄ ɔ̄cɛ dúú yɔ̄ ī nū aá inya ŋ́. Aá kē gáā lɔfú kpɛ́fú tú aólɛlā kú aá glá ŋ́. 38Ámōōmɛ ā, aá géē je kpó yíífi ipú ajɛ kú éwɔhá. Aá klla í mɛ tū ipú ajɛ kú aólɛlā kú aá. 39Ācɛ ōhī kú aá, nēe í hile lígíí ipú ajɛ kú aólɛlā kú aá ā, géē je kpó yíífi ohígbū íne ō bīya kú aá mɛ́mla ákú aádáádā aá.
40“Amáŋ ɔ́dāŋ ka aá lɛ íne nɛ̄ aá mɛ́mla aádáádā aá bīya ā ka tɛ́ɛ́cɛ, nēe tá ɛlā kú um klla bɛ́yíkwu um ā. 41Anɔ́ɔ é cɛ̄ gā um kwú eyī í hɛ́ kwu uwá, anɔ́ɔ n kwú uwā ú kpó cālɛ́ ŋmá ɔlɛ́ uwā ga ipú ajɛ kú aólɛlā á. Igbīhāajɛ, eko nɛ̄ ayááyí aá le iyī uwā tú wāajɛ, nēé lɛ italā yá uwā kú íne nēé bīya mɛ́mla ɛ́gɛ́nɛ̄ é bɛyíkwu um lɛ ā, 42#Ohút 28.13,14; Ohút 26.3,4; Ohút 17.7,8n géē blatū ɛka nɛ̄ n gbo mla Ujékɔ̄pu, Áyísīki, mɛ́mla Ébrahām ā. N klla géē je okónu nɛ̄ n ce mla uwá ka n géē je ajɛ ā lɛ uwá ā héyī 43Aflɛ́yí ā, é géē kpó ācɛ nēe lā ipú ajɛ ā ŋmá anú gbɔbū, cɛ́ɛ́ ká ajɛ ā kóō le mlɛ́nyɔ́ dúúdú. É géē yá uwā italā ohígbū keé tá íne nɛ̄ n je lɛ uwá ā. 44Amáŋ nááná, eko nēé bá ajɛ kú aólɛlā kú uwā kpɔ́, ń gáā cīgbīhi kwu uwá dúúdú ámāŋ je uwá yíifi dúúdú ŋ́. Ɔ́ɔmā géē je ɛka nɛ̄ n ce lɛ aá ā kpó bīya. Ami kē wɛ Óndú ā, nōo wɛ Ɔwɔicō kú aá á. 45N géē tū ɛka nɛ̄ n gbo mla ádáádā uwā, eko nɛ̄ n ma ɔfú kú um fú lɛ aéwo kú odúúdú ɛcɛ, ŋmá eko ɛ́gɛ́nɛ̄ n kpó ācɛ ɔlɛ́ um bɛ̄cɛ ŋmá ajɛ kú Íjīpiti ā, yá ɛ̄yipɛ̄. Ami wɛ Óndú ā, nōo wɛ Ɔwɔicō kú uwā á.”
46Ɛ̄nyā ā wɛ odúúdú aíne nɛ̄ Óndú ā je lɛ Umósīsi ɛyí ɛfu kú Usáyínāyi kóō je lɛ ācɛ kú Ísrɛ̄lu á.
Currently Selected:
ULĪFAYI 26: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
