ULĪFAYI 2
2
Ɛ̄gbā kú īkpɔ̄dā
1Eko dúú nɛ̄ ɔ̄cɛ dúúmā í bī ɔdā ɛ̄gbā kú īkpɔ̄dɛ̄hɔ̄ gé lɛ Óndú ā, ó géē lɛ ɔ́ gbā umuumu piíí. Ó í lɛ anɔ̄ kú īkpō ɔcí nēé hī ólīifu ā mɛ́mla ɔtulalī tū ɔ̄ piíí. 2Cɛ́ɛ́ kóō kwú ɔ̄ ú bī gé lɛ ayínɔ̄nyīlɔ kú Árɔ̄ni, ācogwɛ́ɛya ā. Ó géē lɛ abɔ̄ fú umu ā mɛ́mla anɔ̄, mɛ́mla otulalī ā. Cɛ́ɛ́ ó lɛ uwá yɔlá ɛyí ede ā, kéē wɛ ɔdā nēé je gwɛ́ɛya lɛ Óndú ā. Ocu kú nū ī he Óndú ā ɔtū. 3Ɔdā nōo hile kú ɛya kú īkpɔ̄dɛ̄hɔ̄ géē wɛ ákú Árɔ̄ni mɛ́mla ayínɔ̄nyīlɔ kú nū. Ó tīihɔ ābɔ̄ é je ɔ́ ŋmá ɔdōlé nēé le gwɛ́ɛya lɛ Óndú ā gbɔbū ā.
4Ɔ́dāŋ ka ɔdā kú ɛ̄gbā ā wɛ igbō nēé yá ipú ɔdōyígbō nɛ̄, ó í wɛ igbō nēé lɛ ɔdōnīgbō tū ŋ́. Ó lɔfú wɛ igbō ō cɔkpɛ́nú nēé ŋmá umu nēé lɛ anɔ́ kú ólīifu tū ɔ̄, ó kē lɔfú wɛ égblú nēé lɛ anɔ́ nya ɔ́ iyē. 5Ɔ́dāŋ́ ka ɛ̄gbā ā wɛ igbō nēé gbā ɛgɔ̄ nɛɛ, ó géē wɛ ákú umu mlɛ́mlɛ́ nēé lɛ anɔ̄ tū ɔ̄, amáŋ é híī lɛ ɔdōnīgbō tū ɔ̄ ŋ́. 6Lɛ igbō ā ca nyɛŋɛnyɛŋɛ ká ā lɛ anɔ̄ tū ɔ̄, ohígbū koó wɛ ɔdā kú ɛ̄gbā kú īkpɔ̄dɛ̄hɔ̄ ā. 7Ɔ́dāŋ́ koó wɛ igbō nēé gē yá ipú ákánjɔ, é géē bī umu mɛ́mla anɔ̄ le yá ɔ̄. 8Aá géē bī ɛ̄gbā kú īkpɔ̄dā nyā gé lɛ Óndú ā bɛ̄ɛka ɛya ā, cɛ́ɛ́ aá kwú ɔ̄ ú lɛ ɔ̄cogwɛ́ɛya ā nōo í bī ɔ̄ ga ɛyí ede ā. 9Ɔ̄cogwɛ́ɛya ā géē fú ōhī kú nū ŋmá anú, kóō wɛ ɛya nēé je lɛ Óndú ā. Cɛ́ɛ́ ó le ɔ́ tɔlá ɛyí ede ā. Ocu kú ɛya kú ɔdōlé nyā gē he Óndú ā ɔtū. 10Ɔdā nōo í hile ŋmá nú ā wɛ ákú Árɔ̄ni mɛ́mla ayínɔ̄nyīlɔ kú nū. Ɛ̄nyā wɛ āyā kú ɛya kú īkpɔ̄dā oyɔlá nōo tīihɔ fíyɛ́ dúú á, abɔ̄ nēé je ɔ́ ŋmá ipú ɔdōlé nēé je lɛ Óndú ā.
11Aá gáā lɛ ɔdōnīgbō tū igbō kú īkpɔ̄dā dóódu nɛ̄ aá gē bī gé lɛ Óndú ā ŋ́. Aá í gáā lɛ ɔdōnīgbō ámāŋ ka ɛnwú tū ipú ɔdā dúúmā nɛ̄ aá í je lɛ Óndú ā ŋ́. 12Aá géē bī ɛ̄gbā kú īkpɔ́dɛ̄hɔ̄ aflɛ́yí nɛ̄ aá í cē ā wā gé lɛ Óndú á, amáŋ é gáā je ɔ́ yɔlá ɛyí ede kú ocu kú nū kóō he Óndú ā ɔtū ŋ́. 13Aá lɛ ɔmā tū ɔdā dóódu kú ɛya kú īkpɔ̄dɛ̄hɔ̄ dóódu nɛ̄ aá géē bī wā gé lɛ Óndú ā. Ohígbū ka ɔmā kwɛyí ɛka nɛ̄ Óndú ā gbo mla aá á. Ɔmā géē yɔ̄ ipú odúúdú ɔdā ɛ̄gbā kú ɛya dóódu. 14Ɔ́dāŋ ka aá bī ɛhi kú īkpɔ̄dɛ̄hɔ̄ kú aflɛ́yí ā wā gé lɛ Óndú ā. Aá lɛ ɔ́ pá, lɛ ɔ́ gbā ɛ́ɛ́ ká aá bī wā. 15Lɛ anɔ̄ kú ɔcí nēé hī ólīifu ā mɛ́mla ɔtulalī umuumu tū ɔ̄. 16Ɔ̄cogwɛ́ɛya ā géē je ɔ́ yɔlá mɛ́mla anɔ̄ mɛ́mla ɔtulalī umuumu kú nū, cɛ́ɛ́ kóō wɛ oblatū kú ɛ̄gbā ō yɔlá lɛ Óndú ā.
Currently Selected:
ULĪFAYI 2: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma