OŌYƐBƐ̄CƐ 6

1Anɔ́ɔ Óndú ā da Umósīsi kahíníī, “Abālɔbányā a géē má ɔdā nɛ̄ n gáā yá Uféro ā. N géē pi ɔ́ abɔ̄fú kóō cɛ̄ lɛ ācɛ ɔlɛ́ um nyɔ̄. Abɔ̄fú nɛ̄ n géē bī ɔ̄ le nū ācɛ ɔlɛ́ um bɛ̄cɛ ŋmá ajɛ nyā á.”

Ɔwɔicō hī Umósīsi igwú

2 # Ohút 17.1; 28.3; 35.11; Oyɛb 3.13-15 Ɔwɔicō da Umósīsi kahíníī, “Ami wɛ Óndú á. 3N hɛ́wɛ̄cɛ ɛgiyí Ébrahām, Áyísīki mɛ́mla Ujékɔ̄pu ka n we Ɔwɔicō nōo lɔfú fíyɛ́ dúú ā. Amáŋ ń bī iyē ō tīīhɔ kú um nōo le ka Óndú ā le ma iyī um fú lɛ uwá ŋ́. 4N kē le okónu ce lɛ uwá ka n géē je ajɛ kú ācɛ Ukénan ā lɛ uwá, ajɛ nɛ̄ é géē lā ipú nū bɛ̄ɛka ugbɔga ā. 5Ofíyɛ́ dúú ā, n le ifu nɛ̄ ācɛ kú Ísrɛ̄lu yɔ̄ ī tá ohígbū uklɔ́ kú ɔfiyɛ nēé bá yɔ̄ ī yá lɛ ācɛ kú Íjīpiti ā má pó ɛɛ́. N le blakwu okónu nɛ̄ n ce ā ɛɛ́. 6Ohígbū ɔ́ɔmā nyɔ̄ gaá da ācɛ kú Ísrɛ̄lu kahíníī, “Ami nōo wɛ Óndú ā, N géē hɛ́ aá tá ŋmá úklɔ́ kú ɔfiyɛ nɛ̄ aá bá gē yá lɛ ācɛ kú íjīpiti nyā. N géē je abɔ̄ ōlɔfú kú um ā gicō lɛ yá uwā italā nɛ̄hi, cɛ́ɛ́ n lɛ aá hɛ́tá. 7N géē je aá pīya ācɛ ɔlɛ́ um. N géē wɛ Ɔwɔicō kú aá. Aá géē jé ka ami, Óndú ā, wɛ Ɔwɔicō kú aá eko nɛ̄ n lɛ aá kpó bɛ̄cɛ ŋmá ipú ɔfiyɛ nɛ̄ aá yɔ̄ ī cɛ lɛ ācɛ kú Íjīpiti ā. 8N géē bī aá gā ajɛ nɛ̄ n cokónu ka n géē je lɛ Ébrahām mɛ́mla Áyísīki mɛ́mla Ujékɔ̄pu ā. N géē je ajɛ ā lɛ aá kú ō wɛ ákú abɔ̄yí aá. Ami wɛ Óndú ā.” 9Umósīsi le ɛlā nyā kpó ka lɛ ācɛ kú Ísrɛ̄lu, amáŋ é jahɔ̄ lɛ ɔ́ ŋ́. Ohígbū ka eyī le cúúwā ohígbū ōwē kú úklɔ́ ɔfiyɛ nēé bá ī má ā.

10Anɔ́ɔ Óndú ā da Umósīsi ka, 11“Nyɔ̄ ɛgiyí Uféro ká ā da ɔ́ kōó mā ācɛ kú Ísrɛ̄lu tá kéē le bɛ̄cɛ ŋmá ajɛ nyā.” 12Amáŋ Umósīsi tá Óndú ā ohi kahíníī, “Ācɛ kú Ísrɛ̄lu í kōō jāhɔ̄ gā um ŋ́. Ó lɛ ā abɔ̄ ó í lɛ ɛ́ɛ́ nɛ̄ Uféro géē jāhɔ̄ lɛ ami nōo gē hɔ́ɔ́gwū nyā ā.” 13Óndú ā le ɔ́da je lɛ Umósīsi mɛ́mla Árɔ̄ni kahíníī, “Aá da ācɛ kú Ísrɛ̄lu mɛ́mla Uféro, ɔcɛ́ kú Íjīpiti ā kahíníī, “N lɛ ɔ́da je lɛ aá kú aá lɛ ayí kú Ísrɛ̄lu ā kpó bɛ̄cɛ ŋmá Íjīpiti ɛɛ́.”

Ipɔ́ɔma kú Umósīsi mɛ́mla Árɔ̄ni

14Urúbɛ̄n, ɔyí aflɛ́yí kú Ujékɔ̄pu ā ma ayí ɛnɛ: Uhánɔ̄ku, Upalú, Uhɛ́srɔn mɛ́mla Ukámi. Uwá wɛ aádáádā kú aípɔ́ɔnū nēé lé iyī kwu uwá á. 15Usímīyɔn ma ayí ɛhīlī: Ujɛ́múwɛlu, Ujamín, Ohádi, Ujakín, Usóha mɛ́mla Ussɔ́lu, ɔyí nɛ̄ ɔnyā kú ācɛ Ukénan ā mā lɛ ɔ́ ā. Uwá wɛ aádáádā kú aípɔ́ɔnū nēé lé iyē kwu uwá á. 16#Áluk 3.17-20; 26.57,58; 1 Úklɔ́ 6.16-19Ulífāyi ma ayí ɛtá: Ugɛ́ssɔn, Ukɔ́hāti mɛ́mla Umerári. Uwá wɛ aádáádā kú aípɔ́ɔnū nēé lé iyē kwu uwá á. Ulífāyi wɛ iháyí ofɛhīlī ce igwáahāapa (137) ɛ́ɛ́ nɛ̄ ó kwú á. 17Ugɛ́ssɔn nōo wɛ ɔyí aflɛ́yí kú Ulífāyi ā, ma ayí ɛpa: Ulíbini mɛ́mla Ussímēyi, é kē ma ayí alɛwa dúú. 18Ukɔ́hāti, ɔyí ɔ́mpa kú Ulífāyi ā ma ayí ɛnɛ: Ámram, Ishar, Uhɛ́brɔn mɛ́mla Ussíyɛ̄lu. Ukɔ́hāti wɛ iháyí ofɛhīlī ce igwɛ́ɛtá (133) ɛ́ɛ́ nɛ̄ ó kwú á. 19Umerári ɔyí ɔmɛɛtá kú Ulífāyi ā ma ayí ɛpa: Umáhli mɛ́mla Umússi, aɛ́nyā wɛ ipɔ́ɔma kú Ulífāyi mɛ́mla ayááyí uwā á.

20Ámram lɛ Ujókēbɛ̄di, ɔyínɛ́ kú ádā nū Ukɔ́hāti ā lɛ. Ó ma ayí ɛpa lɛ ɔ́. É wɛ Árɔ̄ni mɛ́mla Umósīsi. Ámram wɛ iháyí ofɛhīlī ce igwáahāapa (137) ɛ́ɛ́ nɛ̄ ó kwú á. 21Ishár ma ayí ɛtá: Ukóra, Unefɛ́gi mɛ́mla Usíkri. 22Ussíyɛ̄lu ma ayí ɛtá dúú: Umíssɛ̄lu, Ɛlsáfan mɛ́mla Usíkiri.

23Árɔ̄ni lɛ Ɛlíssēba, ɔyínɔ̄nyā kú Ammínādabu ɔyínɛ́ nɔ̄nyā kú Unáhsɔn lɛ. Ó ma ayí ɛnɛ lɛ Árɔ̄ni: Unádābu, Abíhu, Ɛlísaa, mɛ́mla Ítāma. 24Ukóra ma ayí ɛtá: Ássɛ, Ɛlkána mɛ́mla Abíyāsafu. Uwá wɛ aádáádā kú ipɔ́ɔnū nēé lé iyē kwu Ukóra á. 25Ɛlísaa, ɔyí kú Árɔ̄ni ā lɛ ɔyínɔ̄nyā kú Upútíyɛ̄lu lɛ. Ó ma Ufínɛ̄hasi lɛ ɔ́. Aɛ́nyā wɛ aádáádā mɛ́mla aótrɛ̄yí kú ipɔ́ɔnū kú Ulífāyi á.

26Árɔ̄ni mɛ́mla Umósīsi wɛ ācɛ nɛ̄ Óndú ā da uwá kahíníī, “Áa lɛ ācɛ kú Ísrɛ̄lu kpó bɛ̄cɛ ŋmá ipú ajɛ kú Íjīpiti á.” 27É wɛ ācɛ nēe da Uféro, ɔcɛ́ kú Íjīpiti ā ká ɔ̄ mā ācɛ kú Ísrɛ̄lu tá kéē bɛ̄cɛ ŋmá ajɛ kú Íjīpiti á.

Óndú ā kɛla lɛ Umósīsi mɛ́mla Árɔ̄ni kpɔ́

28Ɛ̄cī nɛ̄ Óndú ā kɛlā lɛ Umósīsi ajɛ kú Íjīpiti ā, 29ó kahíníī, “Ami wɛ Óndú á, le odúúdú ɔdā nɛ̄ n da uwɔ kpɛ́mm ā kpó ka lɛ Uféro, ɔcɛ́ kú Íjīpiti.” 30Amáŋ Umósīsi da Óndú ā kahíníī, “Má ɔ̄, ń jé ō kɛlā lɔhi ŋ́, abɔ̄ ó yá lɛ ɛ́ɛ́ nɛ̄ Uféro géē jāhɔ̄ gā um glá ā?”

Currently Selected:

OŌYƐBƐ̄CƐ 6: IFBCL

Highlight

Copy

Compare