OŌYƐBƐ̄CƐ 25

Ɛ̄gbā nēé je ohígbū Áklɔ̄kpīihɔ ā

(Oyɛb 35.4-9)

1Óndú ā da Umósīsi ka, 2“Le ka lɛ ācɛ kú Ísrɛ̄lu kéē lɛ ɛya gwó gā um. Mīyɛ ɔdā kú ɛ̄gbā dóódu ŋmá ɛgiyí ɔ̄cɛ dóódu nɛ̄ ɔtū kú nū miya lɛ ɔ́ kóō je ā. 3Ɔdā kú ɛ̄gbā nāa í mīyɛ ŋmá ɛgiyí uwá yɔ̄ á, ugóolu (oje ɔdɔ), oje nɛ̄hɛ́ mɛ́mla oje udɔ. 4Īlī mlɛ́mlɛ́, lɔɔlɔhi, īlī odufā, īlī ɔgalúlā, mɛ́mla īlī nɔwā, mɛ́mla īlī nɛ̄ uwá yá ŋmá ɔnwū kú ɛwū. 5Ɔkpá kú omlede o tɛ̄ɛ̄tū nɔwā nōo le ŋmó, ɔkpá ɛwū, ɔcí kú akésiya, 6anɔ̄ ō le tū agege, mɛ́mla anɔ̄ ɔtulalī ō le tū ɔ̄cɛ ɛyí mɛ́mla ɔtulalī ō kpóocu, 7ɛcɔ̄ ō gbɔɔ́lá nēé hī ucanɛ́liyan ā mɛ́mla aɛ́cɔ̄ ō gbɔɔ́lá ɔhá nēé gē lɛ wu ipú ɛ́fɔ̄du ō playi ɔtū kú ɔ̄cogwɛ́ɛya ā, mɛ́mla ipú ɛkpa ō bɔ́ɔtū kú nū a. 8Ācɛ ā géē gwó Áklɔ̄kpīihɔ gā um, nɛ̄ n géē lā mla uwá. 9A géē gwó Áklɔ̄kpīihɔ ā klla í yá aíyó kú nū ɔwɛ nɛ̄ n géē mafú gā uwɔ ā.

Ikpati kú ɛka kú Óndú

10Aá lɛ ikpati gbā ŋmá ɔcí kú akésiya ā. Olīkpō kú nū kóō wɛ, ɔwá kú nū kóō wɛ ikpó ɛpa ce āyā, olicō kú nū kóō wɛ ikpó ɛpa ce āyā. 11Lɛ ugóolu (oje ɔdɔ) ma plá iyēpú mɛ́mla iyɛ̄cɛ kú nū, cɛ́ɛ́ a lɛ oje ɔdɔ tíína tū ɔ̄ biílí. 12Lɛ eliká kú ugóolu (oje ɔdɔ) nēé géē bī le je ɔ́ ŋmá ajɛ kē bī ɔ̄ ī yɛ ā yá kwu ikpó ɛnɛnɛ́ɛnɛ ā, cɛ́ɛ́ kú eliká ɛpɛɛpa kóō bá abɔ̄ éyééye. 13Lɛ ogbló nēé gē lɛ bī ikpati ā yá ŋmá ɔcí kú akésiya, cɛ́ɛ́ a lɛ ugóolu (oje ɔdɔ) ma plá anú iyē. 14Kéē kwú ogbló ā í wu ipú eliká nēe playi áklō ɛplɛ́ɛpa kú ikpati ā. 15É géē hābɔ̄ aógbló ā tá wu ipú aéliká. É gáā pi ɔ́ ŋmá anú ŋ́. 16Cɛ́ɛ́ a kwú usiléti ɛpa kú ɛcɔ̄ nēé tá aíne tū ɔ̄, nɛ̄ n géē kpó gā uwɔ̄ ā í kpó tū ipú nū.

17 # Uhíb 9.5 A géē bī ugóolu (oje ɔdɔ) le yá ɛgocīce kú eyīnyinyi tū ikpati ā. Olikpō kú nū kóō wɛ ekābɔ̄ ofɛhɔ̄ cigwó, olɔwá kú nū kóō wɛ ekābɔ̄ ofɛtá ce ɛhīlī. 18A géē bī ugóolu (oje ɔdɔ) nēé bī omútāgā cabɔ́há ā le yá ojibó kú Ucérūbim, tū áklɔ̄ ɛplɛ́ɛpa, cɛ́ɛ́ kéē háyi áklɔ̄ ɛplɛ́ɛpa kú ikpati ā. 19Ucérūbim éyééye géē háyi áklɔ̄ éyééye kú ɔ̄wū kú ikpati ā. A géē yá odúúdú uwā cɛ́ɛ́ kéē wɛ ékpónú tɔ̄há kwɔhá mla ɔ̄wū nū. 20Ucérūbim ɛpa ā géē lɛ acá kú uwá nāńda klá ɔ̄wū kú ikpati ā kúē géē pīyeyī tá iyī uwā. Cɛ́ɛ́ acá kú uwá nōo nāŋdaa ā géē klá ɛyí ɔ̄wū ā. 21Kwú isiléti kú ɛcɔ̄ ā ú kpó tū ipú ikpati ā, cɛ́ɛ́ a kwú ɔ̄wū ú klá ɛyí nū. 22N géē jīla mla uwɔ, n kē í je odúúdú aíne kú um lɛ ācɛ kú Ísrɛ̄lu ŋmá icō kú ɔ̄wū, ɛplá kú Ucérūbim ɛpa nēe háyi ābɔ̄ ɛplɛ́ɛpa kú ikpati ā.

Utébulu kú igbō nēé je lɛ Óndú

23Ɔwɔicō klla da Umósīsi kahíníī, “Lɛ utébulu gbā ŋmá ɔcí kú akésiya. Olīkpō kú nū kóō wɛ ekābɔ̄ ofɛnɛ ce ahātá, olɔwá kú nū kóō wɛ ekābɔ̄ ofɛpa ce ɛnɛ. Olicō kú nū kóō kē wɛ ofɛtá ce ɛhīlī. 24Lɛ ɔ́ plla mla ugóolu (oje ɔdɔ). A klla í bī ugóólū (oje ɔdɔ) ā le hijā tū ókónu nū biílí. 25Lɛ ɔcí gbā ce okónu nū biílí nɛ̄ olɔwá kú nū géē wɛ ayíkābɔ̄ éyi. A klla géē ma ugóólu (oje ɔdɔ) klá anú biílí dúú. 26Lɛ eliká ɛnɛ kú ugóólu (oje ɔdɔ) nēé géē bī le je ɔ́ yá kwu ákló ɛnɛ kú ikpó ɛnɛnɛ́ɛnɛ kú nū. 27Ɛliká nɛ̄é géē lɛ ogbló nōo géē bī utébulu ā wu ɔ́ ā kóō kwu ɛgiyí akā nōo ce okónu nū ā ajaajɛ. 28Lɛ ogbló kú ɔcí kú akésiya gbā, ká ā lɛ ugóólu (oje ɔdɔ) ma plla anú. 29Lɛ ocíbú, íkókwū, ɔjá, mɛ́mla ógo nēé gē bī eko nēé gē gwɛ́ɛya kú ejé ā tútū. A géē bī ugóólu (oje ɔdɔ) ya odúúdú uwā. 30#Ulīf 24.5-8A géē je utébulu ā háyi iyɔ̄bū kú ikpati kú Okónu ō ce ā. Igbō otīihɔ kú um ā kóō cɛyí utébulu ā eko dóódu.”

Ɔdā ō lɛ agege ce ɔ́

31Ó klla da ɔ́ kpɔ́ kahíníī, “Lɛ ɔdā ō lɛ agege ce ɔ́ kú ugóólu (oje ɔdɔ) yá. A géē bī ugóólu (oje ɔdɔ) lɛ īkpɛ̄yí mɛ́mla ɔkwu nū ā yá plákátáa. Lɛ ɔ́ yíifa lɔɔlɔhi mla ɛdɔ ododó ɛyɛ́ɛyɛ́yí, odúúdú nū kóō kwu ɔhá mla ɔcí ā. 32Abɔ̄ kú nū géē wɛ ɛhīlī, ɛtá ŋmá abɔ̄ éyi, ɛtá ŋmá abɔ̄ ɔhá. 33É géē yá íkókwū ifa bɛ̄ɛka ohépu kú ododó kú ɔcí nēé hī álumɔ̄ndu mɛ́mla oōnwūla kú ododó kú nū ā. 34É géē yá oje kú ɔtāhɛ̄ kú nū ifa mla íkókwū nēé yá gbla ohépu kú ɔcí nēé hī álmɔ̄ndu mɛ́mla ododó oōnwūla kú nū. 35Ododó éyééye kóō kwu ɔtāhɛ̄ kú abɔ̄ ɛtá ā. 36Ohépu kú uwā mɛ́mla abɔ̄ kú uwā, géē wɛ ugóólu (oje ɔdɔ) ékpónú, nēé bī omútāgā na tɔ̄há. 37Aá géē yá agege ahāapa cɛ ɔ́. A géē lɛ agege nēé yá mla ugóólu (oje ɔdɔ) ā tū gicō, cɛ́ɛ́ kóō fíyajɛ ga iyɔ̄bū. 38A géē bī ugóólu (oje ɔdɔ) le yá odúúdú nū. 39A géē bī ugóólu (oje ɔdɔ) nɛ̄ ogbɛnū kú nū wɛ ukílōgram ofu cigwáahātá ā lɛ yá ɔdā o lɛ agege ce ɔ́ mɛ́mla odúúdú iyo nēe bá ā. 40#Ācot 7.44; Uhíb 8.5Lɛ ɛlá kwu ɔ́ kú ā lɛ aɔ́dā nēe bá ā yá ɔwɛ nɛ̄ n cābɔ̄ gā uwɔ ɛyí ɛfu ā.”

Currently Selected:

OŌYƐBƐ̄CƐ 25: IFBCL

Highlight

Copy

Compare