OŌYƐBƐ̄CƐ 1
1
É yá ayí kú Ísrɛ̄lu ɔdōbɔ̄bí ajɛ kú Íjīpiti
1 #
Ohút 46.8-27
Ayí kú Ujékɔ̄pu nēe wā Íjīpiti mɛ́mla anú ā bá yɔ̄ á: Ɔnyɔɔnyɛ kú uwā wā mla aíkonó kú ɔlɛ́ nū. 2Urúbɛ̄n, Usímīyɔn, Ulífāyi, mla Ujúda. 3Ísāka, Usébūlɔn mɛ́mla Ubɛ́njamīn. 4Udán, Unáfutáli, Ugádi mɛ́mla Ássa. 5Odúúdú ayí kú Ujékɔ̄pu ā wɛ ofɛtá cigwó. #1.5 Ɔwɛ nēe pīya ɔkpá abɔ̄ eko nɛ̄ncɛ̄ 75 (má Ācot 7.14) Ujófɛ̄fu ā tɛtɛ yɔ̄ Íjīpiti ɛɛ́. 6É bá abɔ́ɔ gbóógbó ā, Ujófɛ̄fu mɛ́mla ayínɛ́ nū ā mɛ́mla odúúdú ayí kú ipɔ́ɔma kú eko ɔ́ɔmā le pɛ́ gekwú. 7#Ācot 7.17Amáŋ, ayááyí kú Ísrɛ̄lu ā le nyīla klla kwú lɛwa nɛ̄hi. É klla kwú lɔfú nɛ̄hi dúú. É le agbénú nɛ̄hi klla le fāajɛ ā nɛ̄hi.
8 #
Ācot 7.18
Iháyí alɛwa le gla, ɔ̄cɛ ɛ̄yīpɛ̄ nɛ̄ ó nōó jé Ujófɛ̄fu ŋ́ mā, le ɔcɛ́ kú ajɛ Íjīpiti lé. 9Anɔ́ɔ ó da ācɛ ɔlɛ́ nū kahíníī, “Aá má ɔ̄, ācɛ kú Ísrɛ̄lu kwú lɛwa nɛ̄hi, é klla i lɔfú ce alɔ abɔ̄ bá. 10#Ācot 7.19Ɔ̄cɛ í jé ŋ́ nɛ̄ eko kú ɛfú nēé lɔfú cɛ̄tɔ̄há mla aólɛlā kú alɔ, o yá ɛ́ɛ́ kéē kpɛ́fú tá alɔ, cɛ́ɛ́ é le pɛ́ kwu ŋmá ajɛ ɔlɛ́ alɔ. Ālɔ̄ tíne ɔwɛ ɔhá nōo í yá kéē híī nyīla glá gɛ ŋ́. 11Anɔ́ɔ ācɛ kú Íjīpiti ā le ācɛ nōo gē leyīkwu aɔ́fiyɛ fu kéē leyīkwu uwá, kéē klla yá uwá ōwē. Ayí kú Ísrɛ̄lu gwó aígelī nɛ̄hi kú Upíto mɛ́mla Urámēses ɛga nɛ̄ Uféro ī kpó iyó kú nū tū ā á. 12Amáŋ, ɛ́gɛ́nɛ̄ ācɛ Íjīpiti yá uwá ōwē nwuné lɛ ā, ɛ́gɔ́ɔmā nēé nyīla bá ɛga dóódu kú ajɛ ā lɛ á. Ācɛ kú Íjīpiti ā bá gē yúufi kú ācɛ kú Ísrɛ̄lu eko dóódu. 13Ohígbū ɔ́ɔmā ā, é yá ācɛ kú Ísrɛ̄lu ā ōwē fíyɛ́. 14É gē pi ācɛ Ísrɛ̄lu abɔ̄fú bɛ̄ɛka aɔ́fiyɛ ā kéē gwó ɛdɔ kú aínu ɛyɛ́ɛyɛ́yí mɛ́mla ɛdɔ kú úklɔ́ olɔfú dóódu nēe bá ɛhɔ̄ kú uwā ā.
15Ɔcɛ́ kú Íjīpiti ā le ɛlā ka lɛ Ussípfra mɛ́mla Upúwa, anyōkɔ́ɔma nēe gē kɔ́ anyā Uhíbru ɔma ā kahíníī, 16“Eko dóódu nɛ̄ aá gáā kɔ́ anyā kú Uhíbru dúúmā ɔma, nɛ̄ aá má ka ɔyí ā wɛ ɔ̄cɛnyīlɔ, aá le ɔ́ ŋmó, ɔ́dāŋ́ ka ó wɛ ɔ̄cɛnyā, aá mā ɔ̄ tá kóō yēeyī.” 17Amáŋ, anyōkɔ́ɔma ā gé yúufi Ɔwɔicō. Anɔ́ɔ uwá í yá ɛ́gɛ́nɛ̄ ɔcɛ́ kú Íjīpiti ā je íne lɛ uwá kéē yá lɛ ā ŋ́. Amáŋ é gē mā ayí ācɛnyīlɔ ā tá kéē yēeyī. 18Anɔ́ɔ ɔcɛ́ kú Íjīpiti ā, le anyōkɔ́ɔma ā kpó hīgwú, anɔ́ɔ ó da uwá ɔ̄kā kahíníī, “Ɔdíyá ɛ́ɛ́ nɛ̄ aá yɔ̄ ī yá ɛ̄nyā ā? Nɛ̄ aá cɛ̄ lɛ ayínɔ̄nyīlɔ ā yēeyī ā?” 19Anyōkɔ́ɔma ā da Uféro kahíníī, “Anyā kú Uhíbru ā í lɛbɛ̄ɛka ācɛnyā kú Íjīpiti ā ŋ́. É lɔfú nɛ̄hi. Ɛ́ɛ́ ká ɔnyōkɔ́ɔma kóō ga ɛgiyí uwā dúú ā, é gē kwú ɔyí ú ma.”
20Abɔ̄ anyōkɔ́ɔma ā gē yúufi Ɔwɔicō ā, ó le ɔdā olɔhi yá lɛ uwá. Anɔ́ɔ ācɛ Uhíbru ā bá ī nyīla klla ī lɔfú nɛ̄hi. 21Abɔ̄ nɛ̄ anyōkɔ̄ɔma ā gē yúufi Ɔwɔicō ā, ó le ayí abɔ̄yī uwā kpó lɛ uwá.
22 #
Ācot 7.19
Ámōōmɛ ā Uféro le íne tá lɛ odúúdú ācɛ ɔlɛ́ nū kahíníī, “Ayínɔ̄nyīlɔ dóódu nɛ̄ ācɛ kú Uhíbru ā ma ā, aá lɛ uwá kpó tū ipú ísu kú Unáyīlu, amáŋ odóódu nōo wɛ ɔ̄cɛnyā aá mɔ̄ɔ̄ tá kóō yēeyī.”
Currently Selected:
OŌYƐBƐ̄CƐ 1: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
