ÚKLƆ́ KÚ ĀCOTƐ̄HƆ̄ 8
8
Usɔ́lu ya icɔ́ɔci kú Ohɔ́nyɛtá ā ŋmó
1Ɔyípōklóbīya éyi lé ka Usɔ́lu, ó kē cɛ̄ tɔ̄há mɛ́mla ācɛ nēe ŋmó Usitífin ā.
Anɔ́ɔ oŋmá ɛ̄cī ɔ́ɔmā oyáŋmó nɛ̄hi le hútu lɛyíkwu icɔ́ɔci nōo yɔ̄ ipú Ujerúsālɛm ā, anɔ́ɔ ɛjɛ̄ɛ̄jī ācocɛ̄lɔ̄wɔicō ā kwú pahīla bá ɛbɛɛbɛ kwu ajɛ kú Ujudíya mɛ́mla Usamérīya. Ācotɛ̄hɔ̄ ā ōfōōfū uwā bá ɛga ékpó mɛ́ɛ̄ á. 2Ācɛ éyi nēe lɛ ojīlīmā ce Ɔwɔicō lɛ Usitífin nyi, é kē jikwū nū gbōmgbōm nɛ̄hi. 3#Ācot 22.4,5; 26.9-11Amáŋ Usɔ́lu cēyītīkwū kéē lɛ icɔ́ɔci ā yíífi, ó kē ī ŋmá inu éyi ga inu ɔhá gē kwú ācɛnyīlɔ mɛ́mla ācɛnyā kéē kpó uwā tū agbá.
Ufílīpu tɔ́ɔna kú ɛhɔ̄ olɔhi Usamérīya
4Amáŋ nááná ā, ācocɛ̄lɔ̄wɔicō ā le pahīla bá gē yɛ ɛbɛɛbɛ gē tɔ́ɔna kú ɔkōolɔhi. 5Eko nɛ̄ Ufílīpu le tá ajɛ igelī nɛ̄hi kú Usamérīya ā, ó le ɔna kú Ɔkōolɔhi kú Ohɔ́nyɛtá tá lɛ uwá. 6Ɛwa ā bī ɔtū ékpó le jāhɔ̄ lɛ ɛlā nɛ̄ Ufílīpu ka ā ohígbū ɔdōcābɔ̄ nōo yá ā. 7Aálelékwū oblínyī ā gē dɛ̄ gbōmgbōm cɛ́ɛ́ é le bɛ̄cɛ ŋmá ipú ācɛ alɛwa nēé bá ipú uwā ā. Anɔ́ɔ é lɛ ācɛ alɛwa nɛ̄ iyē kú uwā le ŋmó mɛ́mla aócīkpó ā hɛ́tá. 8Ācɛ kú Usamérīya gwéeyē nɛ̄hi.
Usáyímɔ̄n ɔ̄cɛ oyímabɔ̄
9Amáŋ ɔ̄cɛ éyi yɔ̄, nēé hī ɔ̄ ka Usáyímɔ̄n, nōo tɛtɛ gē yá imabɔ̄ igelī nɛ̄hi ā, ó kē ī yá ɔdā nōo hɛ́ ācɛ kú Usamérīya idáagó, ó ī gwō ka anúɔ abɔ̄ anúɔ ɔ́ɔ wɛ ɔ̄cɛ nɛ̄hi éyi nɛ̄. 10Ɛjɛ̄ɛ̄jī ācɛ kú igelī nɛ̄hi ā, o ŋmá ɔ̄cɛ nɛ̄ŋcɛ́ gaá kwu ɔ̄cɛ nɛ̄hi, le ahɔ̄ jē lɛ ɔ́ lɔɔlɔhi. É ka, anú wɛ ɔfú kú Ɔwɔicō nɛ̄ ācɛ hī ka ‘Ɔfú nɛ̄hi á.” 11É jahɔ̄ lɛ ɔ́ ohígbū ka eko ɛyɛ́ɛyɛ́yí nēe gla ā, ó bī imabɔ̄ kú nū gē le yúklɔ́ idáagó. 12Amáŋ eko nēé cɛ̄ɛ̄lā kú Ufílīpu lɛyíkwu ɔkōolɔhi kú ajɔ̄ɔ̄cɛ́ kú Ɔwɔicō mɛ́mla Ujísɔ̄si Ohɔ́nyɛtá ā, é le uwá yúbatísim kwu ācɛnyīlɔ mɛ́mla ācɛnyā. 13Usáyímɔ̄ni abɔ̄yī nū kōō cɛ̄ dúú, anɔ́ɔ eko nēé lɛ ɔ́ yúbatísim ā, ó yɔ̄ mla Ufílīpu. Úklɔ́ ō hídáagó mɛ́mla ɔdōcābɔ̄ nɛ̄hi nɛ̄ Ufílīpu yá ā le hɛ́ ɔ̄ idáagó.
Upíta mɛ́mla Ujɔ́ni bá Usamérīya
14Abālɔbányā eko nɛ̄ ācotɛ̄hɔ̄ nēe bá Ujerúsālɛm ā le pó ka Usamérīya mīyɛ ɛlā kú Ɔwɔicō ā, é le Upíta mɛ́mla Ujɔ́ni tɛ̄hɔ̄ fu uwá. 15Eko nēé hīlatá wāajɛ ā, é le ɔkɔ gbā lɛ Ɔwɔicō ohígbū uwā kéē mīyɛ Alelékwū Ihɔ. 16Ohígbū ka Alelékwū Ihɔ ā í wā í ce odúúmā kú uwā ɛ́ɛ́ ŋ́, amáŋ é yá uwā Ubatísim ŋmá lɛ iyē kú Óndú, Ujísɔ̄si ōfōōfūnū ɛ́ɛ́ nɛ. 17Upíta mɛ́mla Ujɔni lɛ abɔ̄ ce uwá ɛyí, anɔ́ɔ é mīyɛ Alelékwū Ihɔ á. 18Abɔ̄ Usáyímɔ̄n le má kéē gē je Alelékwū Ihɔ ā ŋmá lɛ abɔ̄ ō le ce ācɛ ɛyí kú ācotɛ̄hɔ̄ ā, ó kwú ije ú kwu uwá eyī anɔ́ɔ ó ka, 19“Aá je ɔfú nyā gā um dúú, cɛ́ɛ́ ɔ̄cɛ dúúmā nɛ̄ n lɛ abɔ̄ ce ɔ́ kóō mīyɛ Alelékwū Ihɔ ā.” 20Anɔ́ɔ Upíta da ɔ́ kahíníī, “Ije kú uwɔ kóō le yíífi mla awɔ, ohígbū ka a gbɛlá ka a géē bī ije le lá ɛhi kú Ɔwɔicō. 21Á lɛ ɔdā dúú ipú ɛlā nyā ŋ́, ohígbū ka ɔtū kú uwɔ í le kpaakpa iyɔ̄bū Ɔwɔicō ŋ́. 22Le pīyabɔ̄ ŋmá ipú ojuju ɔbɔ̄bí kú uwɔ̄ nyā, ká ā gbɔ̄ɔkɔ lɛ Óndú ā, cɛ́ɛ́ kóō kwú ɛlá obɔ̄bí nāa gbo nyā í yá uwɔ ɛhi. 23Ohígbū ka n má ka a lɔnɔ ɔtū íbí, ínoōbīya kē lɛ uwɔ gbō.” 24Anɔ́ɔ Usáyímɔ̄n tóohi kahíníī, “Aá gbɔ̄ɔkɔ lɛ Óndú ā ohígbū um, ká ɔdā nɛ̄ aá ká ā kóō wā ɛgiyí um ŋ́.”
25Eko nēé lɛ ijáalí cɛ̄ klla lɛ ɛlā kú Óndú ā ka ā, é kwúcē nyɔ̄ Ujerúsālɛm, bá ī tɔ́ɔna kú Ɔ̄kōolɔhi ā ga ipɔ́lɛ́ alɛwa kú ajɛ Usamérīya.
Ufílīpu mla udá kú Itiyópīya
26Alelékwū otɛ̄hɔ̄ kú Óndú ā da Ufílīpu kahíníī, “Cāŋjɛ ká ā nyɔ̄ lɛyíkwu ɛháajɛ ga ɔwɛ nōo ŋmá Ujerúsālɛm ga Ugása ā.” (ācɛ í gē yɛ ɔwɛ nyā íbí gɛ ŋ́) 27Anɔ́ɔ ó cāŋjɛ gbɔɔ́ ō nyɔ̄ á. Anɔ́ɔ ó má ɔ̄cɛ Itiyópīya éyi nōo i búdá, igabɔ̄ kú Ukándesi, ɔ̄cɛ ojīlīmā o bī ije lɛ ɔcányā kú Itiyópīya. Ó wā Ujerúsālɛm gaá gbā Ɔwɔicō ɛ̄gbā. 28Ó yɔ̄ ī pīyɛyí. Ó cīce ipú úgbɔ́nya kú nū, yɔ̄ ī jɔ́kpá kú ɔ̄comɛ́ɛbɛ Ayisáya. 29Anɔ́ɔ Alelékwū Ihɔ ā da Ufílīpu kahíníī, “Nyɔ̄ ká ā lɛ ugbɔ́nya nyā kwú cɛ́ɛ́ ká ā tīkpó mla anú.” 30Anɔ́ɔ Ufílīpu lɛ inya kwu gā ɛgiyí nū, ó kē pó abɔ̄ ó yɔ̄ í jɔ́kpá kú Ayisáya ɔ̄comɛ́ɛbɛ ā. Anɔ́ɔ ó da ɔ̄kā kahíníī, “A jɛ́yí ɔdā nāa í jé ā déē?” 31Anɔ́ɔ ó tóohi kahíníī, “N lɔfú jɛ́ɛyi nū glá ŋ́, ayíka ɔ̄cɛ éyi lɛ ɔwɔ nū cɛ̄ gā um?” Anɔ́ɔ ó da Ufílīpu kóō wā icō gaá cīce pī anúɔ. 32#Ayis 53.7,8 Ɔgba kú ɛlɔ̄ɔwɔicō nōó yɔ̄ ī jé ā wɛ ɛ̄nyā ā,
“Lɛbɛ̄ɛka álá nēé bī yɔ̄ ī nyɔ̄ ɛga oŋmɛ́bɛ́ ā,
amáŋ omlede nōo dokónu iyɔ̄bu ɔ̄cɛ owá ɔ̄ ɔnwū ā,
ɛ́gɔ́ɔmā nōó nwūla okónu kú nū ŋ́ má.
33É lɛ ɔ́ tū wāajɛ, é klla nyí ɔ̄ ɛpɔ̄hi.
Ɔ̄nyɛ géē lɔfú jé ipɔ́ɔma kú nū glá ā?
Ohígbū ka oyēeyī kú nū gaá mɛ ŋmá ipú ɛcɛ nyā.”
34Anɔ́ɔ ɔ̄cɛ nēé búdá ā da Ufílīpu kahíníī, “Kócōō, ɔ̄nyɛ nɛ̄ ɔ̄comɛ́ɛbɛ ā ī kɛlā nyā lɛyíkwu ɔ́ ā? Ó gē ka lɛyíkwu iyī nū kɛ̄ɛ ka lɛyíkwu ɔ̄cɛ ɔhá?” 35Anɔ́ɔ Ufílīpu gbɔɔ́ ō kɛlā ŋmá ɔgba ékpó kú ɛlɔ̄ɔwɔicō ā, anɔ́ɔ ó le Ɔ̄kōolɔhi kú Ujísɔ̄si ā kā lɛ ɔ́. 36Abɔ̄ é bá ī yɛ ɔwɛ ā, é gā ɔgblɛga kú éŋkpɔ̄ éyi. Anɔ́ɔ ɔ̄cɛ nēé búdá ā kahíníī, “Pīyeyī, má éŋkpɔ̄. Ɔdí géē ci ubatísim ō yá um mɛ́ ā?” 37Anɔ́ɔ Ufílīpu da ɔ́ kahíníī, “Ɔ́dāŋ́ ka a bī odúúdú ɔtū kú uwɔ cɛ̄, ó géē tɔ́ɔtɛ́ glá.” Anɔ́ɔ ó tóohi kahíníī, “N cɛ̄ ka Ujísɔ̄si Ohɔ́nyɛtá wɛ Ɔyínɔ̄nyīlɔ kú Ɔwɔicō á.” 38Ó da ɔ̄cɛ o pɛ́ úgbɔ́nya ā kɔ́ɔ̄ māháyi. Anɔ́ɔ Ufílīpu mla udá kú Itiyópīya ā le hīlatá ga ipú éŋkpɔ̄ ā, anɔ́ɔ Ufílīpu lɛ Ubatísim yá ɔ̄ á. 39Anɔ́ɔ eko nēé le bɛ̄cɛ ŋmá ipú éŋkpɔ̄ wɛ ɛcɛ ā, Alelékwū kú Óndú ā kwú Ufílīpu ú, anɔ́ɔ ɔ̄cɛ nēé búdá ā í klla má ɔ̄ gɛ ŋ́ má. Amáŋ ó le yɛ tá ɔwɛ ɔlɛ́ nū yɔ̄ ī gwéeyē. 40Ufílīpu má iyīnū ajɛ kú Asɔ́tɔ̄si! Ó tɔ́ɔna kú Ɔ̄kōolɔhi ā abɔ́ɔ mɛ́mla ɛjɛ̄ɛ̄jī igelī nēe bá ɔwɛ ā jāā gbéeko nōó gāājɛ Usísarīya.
Currently Selected:
ÚKLƆ́ KÚ ĀCOTƐ̄HƆ̄ 8: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
