ÚKLƆ́ KÚ ĀCOTƐ̄HƆ̄ 24
24
Igbómína Ufélīsi le ɛpɔ̄ ka tū Upɔ́lu
1Eko nɛ̄ ɛ̄cī ɛhɔ̄ le gla ā, Ananíyāsi, otrɛ̄yí kú ācogwɛ́ɛya, mɛ́mla ācɛ ōhī kú anyākwɔ́cɛ mɛ́mla ulɔ́ya, ɔ̄cɛ nēé hī ka Utatúlɔ̄si le pɛ́ wā. Anɔ́ɔ é lɛ ɔkwɛ̄lā kú uwā nēé kpó ce Upɔ́lu ā ka báajɛ iyɔ̄bū Igbómína ā. 2Eko nēé lɛ Upɔ́lu hīgwú ā, Utatúlɔ̄si gbɔɔ́ ō kpɛ́lā ce ɔ́ ka,
“Ɛ́nɛ́nɛ̄ Igbómína ojīlīmā, Ufélīsi. Abɔ̄ a wɛ otrɛ̄yí ojéeyī nɛ̄hi ā, alɔ bá ɛbɔ́ gbojī ajɛ nɛ̄hi, a klla yɔ̄ ī yá ɔdōlɔhi ɛ̄yīpɛ̄ ocɛgbá alɛwa ohígbū olɔhi kú ajɛ ɔlɛ́ alɔ. 3Alɔ tá uwɔ ahínyá nɛ̄hi ohígbū ɛjɛ̄ɛ̄jī ɔdā nēe bá ā. 4Amáŋ ɛ́gɛ́nɛ̄ ń tíne ká n̄ kpó eko kú uwɔ bónū gɔbū gɛ ŋ́ mā, n gē ba uwɔ ká ā bī ogbonɛnɛ kú uwɔ lɛ ɔkɔ kú alɔ nyā pó lígíí lɛ alɔ. 5Alɔ má ka ɔ̄cɛ ā wɛ ɔ̄cɛ ugbālū, gē cɛ̄ le ācɛ Ujíyu kéē cīlɛ̄fú ɛjɛ̄ɛ̄jī ɛcɛ nyā, ó klla kē wɛ otrɛ̄yí kú ɔwá Unásarín. 6Ó yá kóō nyīla Agblīihɔ-nɛ̄hi ā, amáŋ alɔ lɛ ɔ́ kwú gáā kɛpɔ̄ tū ɔ̄ ɛ́gɛ́nɛ̄ íne kú alɔ lɛ ā. 7Amáŋ Ulisíyāsi, otrɛ̄yí kú aícɔ́ɔja ā, gaá lɛ ɔ́ nú abɔ̄fú ŋmá abɔ̄ kú alɔ. Anɔ́ɔ ó da ācɛ nēe kpó ɔ̄ ɛpɔ̄ ā kéē wā ɛgiyí uwɔ. 8Ɔ́dāŋ́ nāa le ɔ̄kā da ɔ̄cɛ ā abɔ̄yī uwɔ, a géē jé ŋmá ɛgiyí nū odúúdú ɔdā nɛ̄ alɔ kpó ce ɔ́ ā.
9Ācɛ Ujíyu ā kē cɛ̄ tɔ̄há le ɛdɔ ɛlā ékpó ɔ́ɔmā kpó ce Upɔ́lu dúú.
10Igbómína ā le abɔ̄ yá lɛ Upɔ́lu kóō kɛlā, anɔ́ɔ Upɔ́lu kahíníī,
“Ɛ́gɛ́nɛ̄ n jé ka a húmáyī kɛpɔ̄ ajɛ nyā iháyí alɛwa ā, ɔtū he um nɛ̄hi bá n gē kɔkɔ kú um ā. 11Ɛ́gɛ́nɛ̄ a lɔfú bɔkwu nū í jé fíya glá ā, ó fíyɛ́ ɛ̄cī igwɛ́ɛpa nɛ̄ n nyɔ̄ Ujerúsālɛm gaá gbā Ɔwɔicō ɛ̄gbā ā ɛ́ɛ́ ŋ́. 12É kē má um bā n yɔ̄ gē táafú mla ɔ̄cɛ dúúmā ámāŋ ka ō wu ɔtū kú ɛwa klíicō ŋ́, ó kōō wɛ ipú Agblīihɔ-nɛ̄hi ámāŋ Ɛgogbɔ̄ɔkɔ ámāŋ ɛga dóódu kú igelī nɛ̄hi ā ŋ́. 13É kōō lɛ ijáalí kú ɛlā nēé kpó ce um ā ŋ́. 14Amáŋ n kē cɛ̄ ɛ̄nyā iyɔ̄bū uwɔ. N gē gbō Ɔwɔicō kú aádáádā alɔ ɛ̄gbā o ŋmá lɛ ō cɛ̄ɛ̄lā kú ɔwɛ ɔ́ɔmā nēé ka kóō wɛ ɛ̄kɛ̄mgbɛ̄ ā. N klla kē cɛ̄ɛ̄lā kú ɛjɛ̄ɛ̄jī ɔdā dóódu nēé tá ipú íne kú Umósīsi mɛ́mla ɛ̄nɛ̄ é tá tū ipú ɔkpá kú ācomɛ́ɛbɛ ā. 15N yɔ̄ ī gbēyī ī kpɔ́tū ce ka Ɔwɔicō géē je odúúdú ācɛ nēe gekwú ā, kwu ācɛ oyólɔhi mɛ́mla ācɛ o yá ɔdōbɔ̄bí, héyī ŋmá ɔlékwū. 16Anɔ́ɔ ohígbū ɔ́ɔmā n gē cēyītīkwū eko dóódu ká n̄ lɛ ɔtū ōbɛ́ɛpa ipú oyēēyī kú um ɛgiyí Ɔwɔicō mɛ́mla alɛɛcɛ ŋ́. 17#Ācot 21.17-28Abɔ̄ ń yɔ̄ ŋ́ iháyí alɛwa ā, n pīyɛyí wā Ujerúsālɛm mla ije nɛ̄ n bī gé lɛ ācɛ ɔlɛ́ um ā, cɛ́ɛ́ kú n̄ géē lɛ ɛya gwó dúú. 18Eko nɛ̄ n yɔ̄ gē yá lɛ ā, é má um bā n lɛ iyē gwu ipú Agblīihɔ-nɛ̄hi, ɛwa í bá abɔ́ɔ ŋ́ mā ā, útú í ke hɛ́ ŋ́ dúú. 19É cíkā kéē bá amānyā iyɔ̄bū uwɔ kéē kpɛlā ce um ɔ́dāŋ kéē bī ɛlā dúúmā lɛyíkwu um. 20Ó lɛ ā ŋ́ nɛɛ ācɛ nēe bá ā abɔ̄yī uwā kéē ka ɔdōbɔ̄bí dúúmā nēé má ɛgiyí um ā tɛ́ɛ́cɛ eko nɛ̄ n háyi iyɔ̄bū Ukánsulu ā. 21#Ācot 23.6Ɔdā ékpónú nēe má ā wɛ ɛgba nɛ̄ n dɛ̄ abɔ̄ n yɔ̄ ɔtāhɛ̄ uwā ka, ‘Ohígbū ohéyī ŋmá ɔlékwū nēe gē kɛpɔ̄ tū um iyɔ̄bū aá ícɛ nyā ā.’”
Ufɛ́līsi lɛ ɛpɔ̄ ā ci
22Amáŋ Ufɛ́līsi, abɔ̄ ó kē jé ɛlā kú ɔwɛ ā lɔhi ā, ó lɛ ɛpɔ̄ ā pi tá kahíníī, “Eko nɛ̄ Ulisíyāsi, otrɛ̄yí kú aícɔ́ɔja ā gā, ɛ́ɛ́ nɛ̄ n géē hɛ́pɔ̄ á.” 23Ó le ɔ́da je lɛ otrɛ̄yí aícɔ́ɔja ofɛhɔ̄ ā kóō kwú Upɔ́lu ú tá ijaló, amáŋ kɔ́ɔ̄ kē bēē je ɛga lɛ ɔ́, ká ɔ̄ kē lɛ ɛga je lɛ aóklóbīya nū kéē bēē nyɔ̄ í tá ɔ́ abɔ̄ ɔwɛ dúú nōo he uwá ɔtū.
24Abɔ̄ ɛ̄cī dēē yɛ ā, Ufélīsi mɛ́mla ɔnyā nū Udurusíla, nōo wɛ ɔyínɔ̄nyā kú ɔ̄cɛ Ujíyu ā le pɛ́ wā. Ó lɛ ɛhɔ̄ tū kéē lɛ Upɔ́lu bī wā, anɔ́ɔ ó le ahɔ̄ je lɛ ɔ́ abɔ̄ ó kɛlā ohígbū ocɛ̄ɛla kú Ohɔ́nyɛtá Ujísɔ̄si ā. 25Amáŋ abɔ̄ Upɔ́lu yɔ̄ gē miya ɛlā mla uwá lɛyíkwu ɔdā olɔhi nɛ̄ ɔ̄cɛ ī yá, o cīyɔ̄cɛ-bī, mɛ́mla ɛ̄cī nɛ̄ Ɔwɔicō géē hɛ́pɔ̄ kú ācɛ kú ɛcɛ ā, ufi le Ufɛ́līsi kwú, anɔ́ɔ ó kahíníī, “Nyɔ̄ abālɔbányā ɛ́ɛ́. Eko nɛ̄ n lɛ ɛga lɛ, n géē hī uwɔ igwú.” 26Ó kē kpéyī ce ka Upɔ́lu ɔ́ɔ géē je ómíci lɛ anúɔ. Anú yá nōó gē tɛ̄hɔ̄ fu ɔ́ kóō kɔ̄kā lɛ ɔ́ eko tééko á. 27Amáŋ eko nɛ̄ iháyí ɛpa le gla ā, Upɔsíyɔ̄si Ufɛ́sitɔ̄si miyɛ ɔkwu Ufɛ́līsi. Abɔ̄ Ufɛ́līsi gē tíne kóō yá olɔhi lɛ ācɛ Ujíyu ā, Ufɛ́līsi habɔ̄ Upɔ́lu tá ipú agbá.
Currently Selected:
ÚKLƆ́ KÚ ĀCOTƐ̄HƆ̄ 24: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
