ÚKLƆ́ KÚ ĀCOTƐ̄HƆ̄ 22
22
Ɔkɛ̄lā kú Upɔ́lu lɛ ācɛ Ujíyu
(Ācot 9.1-19; 26.12-18)
1Upɔ́lu gɔkɔ gicō anɔ́ɔ ó kahíníī, “Ayínɛ́ mɛ́mla aádā um, aá jāhɔ̄ abɔ̄ nɛ̄ n gáā kɔɔkɔ kú um iyɔ̄bū aá abālɔbányā ā.”
2Abɔ̄ é le pó kóō gē kɛlā lɛ uwá ɔkɔ kú ucē kú ācɛ Ujíyu ā, é bá cíí fíyɛ́. Anɔ́ɔ ó kahíníī,
3 #
Ācot 5.34-39
“N wɛ ɔ̄cɛ Ujíyu, nēé ma Utásɔsi ipú Usilísiya, amáŋ é bī um jɛ̄ igelī nɛ̄hi nyā, n ke jɔ́kpá abɔ̄ kú Ugamálīyelu. É kē nwū um ɛlā ká n̄ yɛce īkpɛ̄la dóódu kú ipú íne kú aádā alɔ ā, n gē ya ɔtū caacaa kú ɛlā kú Ɔwɔicō ɛ́gɛ́nɛ̄ odúúdú aá gē yá ícɛ nyā. 4#Ācot 8.3; 26.9-11N kpó íkpɛ́lā kwu ācɛ o yɛ ɔwɛ nyā ā kōō yá kéē lɛ ācɛ ōhī kú uwā kpó ŋmó dúú, n gē kwú ācɛnyīlɔ mɛ́mla ācɛnyā kú ɔwɛ nyā, gē kpó uwā tū agbá, 5Otrɛ̄yí kú ācogwɛ́ɛya mɛ́mla odúúdú ukánsulu lɔfú cɛ̄ um ijáalí ka n yɔ̄ ī kɛlā ɔ̄kwɛ̄yi. N mīyɛ ɔkpá nēé tá gé lɛ ayínɛ́ alɔ kú Ujíyu nēe bá Udamásikɔ̄si ā ŋmá ɛgiyí uwā gē bī gé lɛ uwá. Anɔ́ɔ n le yɛ tá Udamáskɔ̄si gáā kwú ācɛ nēe bá abɔ́ɔ ā ká n̄ lɛ uwá kpó wā Ujerúsālɛm kéē lɛ italā yá uwā.
Upɔ́lu kɔ̄kā kú ɛ́gɛ́nɛ̄ ó piyabɔ̄ lɛ ā
(Ācot 9.1,19; 26.12,18)
6Abɔ̄ n yɔ̄ gē nyɔ̄ le bá lɛ Udamásikɔ̄si ā, ɛplá ɛnɔ oyɛ̄ɛyí, igbɛ ékpó ɔlá ōceyī nɛ̄hi ŋmá ɔkpáncō, le cɛ̄ jīla um tá. 7N mágwōnū gblugudu, anɔ́ɔ n pó ɔkɔ nōo da um ka, ‘Usɔ́lu, Usɔ́lu, ɔdíyá nāa ī yá um ŋmó ā?’ 8Anɔ́ɔ n tóohi ka, ‘A wɛ ɔ̄nyɛ nɛ̄, Óndú?’ Anɔ́ɔ ó da um ka, ‘Ami wɛ Ujísɔ̄si kú Unásārēti nāa gē yá ŋmó á.’ 9Ācɛ nēe bá mla um ā mɛ́ɛbɛ ā, amáŋ é pó ɔkɔ kú ɔ̄cɛ nōo kɛlā gā um ā ŋ́. 10“N ka, ‘Ɔdí nɛ̄ n géē yá ā, Óndú?’ Anɔ́ɔ Óndú ā da um ka, ‘Cāŋjɛ ká ā ga Udamásikɔ̄si, abɔ́ɔ nēé géē da uwɔ ɔdā dóódu nēé miya táajɛ gā awɔ ka ā yá ā á.’ 11Ɔlá nɛ̄hi nōo fíyajɛ nyaá nyaá ɛgiyí um mā í cɛ̄ gā um mɛ́ɛbɛ ŋ́, anɔ́ɔ aɔ́mpa um le abɔ̄ tū um abɔ̄ ga ipú Udamásikɔ̄si á.
12Ɔ̄cɛ éyi lé ka Ananíyāsi lā abɔ́ɔ, ɔ̄cɛ o yúufi Ɔwɔicō nōo gē lɛ íne kú alɔ tū, ó klla kē wɛ ɔ̄cɛ nɛ̄ odúúdú ācɛ Ujíyu nēe lā abɔ́ɔ ā ka olɔhi nū. 13Anɔ́ɔ ó gā ɛgiyí um gaá háyi pī um, anɔ́ɔ ó da um ka, ‘Ɔyínɛ́ um, Usɔ́lu, lɛ eyī nwūla ká ā mɛ́ɛbɛ. ‘Ɛpléeko ɔ́ɔmā n gbɔɔ́ ō mɛ́ɛbɛ. 14Anɔ́ɔ ó ka, ‘Ɔwɔicō kú aádā alɔ le uwɔ fu ká ā jé ɔdā nōó miya kóō yá ā, ká ā má ɔ̄cocɛ̄hɔ̄ kú nū oyólɔhi ā, ká ā klla kē pó ɔkɔ kú nū, abɔ̄ ó yɔ̄ ī kɛlā gā awɔ abɔ̄yī nū ā. 15Ohígbū ka a géē wɛ ijáalí kú nū ká ā ka lɛ ɛjɛ̄ɛ̄jī ācɛ ɔdā nāa má, nāa kē pó ā. 16Ɔdí nāa ī gbēyī nū abālɔbányā kpɔ́ gɛ? Cāŋjɛ kéē lɛ ubatísim yá uwɔ, cɛ́ɛ́ kéē kwú íne nāa bīya ā í yá uwɔ ɛhi o ŋmá lɛ o gbɔ̄ɔkɔ lɛ ɔ́.’
17“Eko nɛ̄ n pīyɛyí wā Ujerúsālɛm kē yɔ̄ ī gbɔ̄ɔkɔ ipú Agblīihɔ-nɛ̄hi ā, n le ɔ̄na nā, 18n le Ujísɔ̄si má abɔ̄ ó yɔ̄ ī da um ka, ‘Gbo ɔ́ páápá ká ā nyɛ̄ɛ̄ fíya fíya ŋmá Ujerúsālɛm, ohígbū kéē gáā mīyɛ ijáalí nāa gáā cɛ̄ ohígbū um ā ŋ́.’ 19Anɔ́ɔ n ka, ‘Óndú, uwá abɔ̄yī uwā kē jé ka n ga ipú ɛgogbɔ̄ɔkɔ gaá kpó ācɛ nēe cɛ̄ɛ̄lā ā tū agbá klla ké ŋmó uwā ijē dúú. 20#Ācot 7.58Eko nēé kē ŋmó Usitífin nōo kɛlā lɛ ācɛ lɛyíkwu uwɔ ā, n kē māháyi ajaajɛ kē cɛ̄ kéē lɛ ɔ́ ŋmó, n klla kē leyīkwu úwé kú ācɛ nēe ŋmó ɔ̄ ā.’ 21Óndú ā da um ka, ‘Nyɔ̄, n géē tū uwɔ ɛhɔ̄ nyɔ̄ ɛga oligbó ligbó ga ɛgiyí aílɔ́wá ā.’”
Upɔ́lu ka anúɔ wɛ ɔyí ajɛ kú Uróm
22O jāā gaá kwu ɛlā nyā é le ahɔ̄ je lɛ ɔ́, anɔ́ɔ é le ɔkɔ cɛyí gbɔɔ́ ō dɛ̄gba kahíníī, “Lɛ ɔ̄cɛ ā bī nyɔ̄! Le ɔ́ ŋmó! Ohígbū kóō cíkā kóō yēeyī ŋ́!” 23É bá yɔ̄ ī dɛ̄gba gē jíla úwé kú uwā icō klla gē tá úmlá gicō, 24Otrɛ̄yí kú aícɔ́ɔja ā le íkwu je lɛ aícɔ́ɔja kéē kwú Upɔ́lu ú bī wā ipú ɔlɛ́ aícɔ́ɔja. Anɔ́ɔ ó le ɔ́da je lɛ uwá kéē lɛ ɔ́ gɔ́ o yá ɛ́ɛ́ kéē lɛ ɔkwu ɔdā nōo yá ɛ́ɛ́ nɛ̄ ācɛ Ujíyu bá yɔ̄ ī dɛ̄gba ɛ́gɔ́ɔmā ā jé. 25Eko nēé lɛ ɔ́ gbō kéē gá ɔ̄ itali ā, Upɔ́lu da otrɛ̄yí kú aícɔ́ɔja ofɛhɔ̄, nōo háyi pī ɔ̄ ā kahíníī, “Íne ā jɛga ga awɔ ká ā gɔ́ ɔ̄cɛ nōo wɛ ɔyí ajɛ kú Uróm eko nɛ̄ á ŋmó ɔ́ ɛpɔ̄bí kú ɔdā dúú ŋ́ nɛɛ?” 26Eko nɛ̄ otrɛ̄yí kú aícɔ́ɔja ofɛhɔ̄ ā lɛ ɔ́ɔmā pó ā, ó le tá ɛgiyí otrɛ̄yí ā gaá da ɔ́ kahíníī, “Ɔdí nɛ̄ aá yɔ̄ ī yá ā mɛ́ɛ̄ ā? Ɔ̄cɛ ɔ́ɔmā wɛ ɔyí ajɛ kú Uróm nɛ̄ n.” 27Anɔ́ɔ otrɛ̄yí ā gaá da ɔ́ kahíníī, “Ka gā um, a wɛ ɔyí ajɛ kú Uróm nɛɛ?” Upɔ́lu tóohi kahíníī, “Īī n wɛ.” 28Otrɛ̄yí ā tá ohi kahíníī, “N cíla ije nɛ̄hi ɛ́ɛ́ nɛ̄ n je pīya ɔyí ajɛ kú Uróm á.” Upɔ́lu kahíníī, “Ami ā é ma um ɔyí ajɛ.” 29Anɔ́ɔ ācɛ nēe gáā da ɔ́ ɔ̄kā ā le hɛ́ gɛcɛ hɛ̄ ɔ̄ tá ikpííkpó ɔ́ɔmā. Ufi gbɔɔ́ ó yá otrɛ̄yí ā dúú, ohígbū kóō le jé ka Upɔ́lu wɛ ɔyí ajɛ kú Uróm mla ohígbū ka ó le agbá kwu ɔ́ abɔ̄.
Ɛlā nɛ̄ Upɔ́lu ka lɛ ójila ohɛ́pɔ̄ ā
30Oŋmɔ́ɔ̄cī nū, abɔ̄ otrɛ̄yí ā tíne kóō bɔkwu ɛlā nɛ̄ ācɛ Ujíyu kpó ce ɔ́ ā, ó le agbá wī ŋmá Upɔ́lu abɔ̄. Ó le íkwu je lɛ aótrɛ̄yí kú ācogwɛ́ɛya mɛ́mla odúúdú aúkánsulu ā kéē le jīla. Anɔ́ɔ ó lɛ Upɔ́lu bī wāajɛ, kwú ɔ̄ ú háyi iyɔ̄bū uwā.
Currently Selected:
ÚKLƆ́ KÚ ĀCOTƐ̄HƆ̄ 22: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
