ÚKLƆ́ KÚ ĀCOTƐ̄HƆ̄ 16
16
Utímōti gaá blla Upɔ́lu iyē ipú Ulístra
1Upɔ́lu le tá Udábi mɛ́mla Ulístra dúú. Ɔyíkpó éyi yɔ̄ abɔ́ɔ, nēé hī ka Utímōti, ɔyínɔ̄nyīlɔ kú ɔnyā Ujíyu éyi nōo wɛ ɔyíkpó, amáŋ ádā nū wɛ ɔ̄cɛ Ugríisi. 2Ayínɛ́ nēe bá Ulístra mɛ́mla Ikoníyɔm ā ka olɔhi kú nū nɛ̄hi. 3Upɔ́lu tínē ká Utímōti kóō yɛce ɔ́, anɔ́ɔ ó cɛ̄ kéē lɛ ɔ́ apī hɛ́ á, ohígbū ka ācɛ Ujíyu nēe bá igelī abɔ́ɔ ā jé ka ádā nū wɛ ɔ̄cɛ Ugríisi. 4Abɔ̄ é bá ī yɛ ŋmá igelī éyi ga igelī ɔhá yɔ̄ ī da ācocɛ̄lɔ̄wɔicō kéē lɛ ɔdā nɛ̄ ācotɛ̄hɔ̄ mɛ́mla anyākwɔ́cɛ nēe bá Ujerúsālɛm ā yātū lɛyíkwu aíne ā tū. 5Anɔ́ɔ é lɔfú tū ācɛ icɔ́ɔci ā iyē kéē cɛ̄ɛ̄lā ā lɔɔlɔhi, anɔ́ɔ áluka kú ācɛ nēe ī cɛ̄lɔ̄ɔwɔicō gē lɛwa tōōtɔ̄ɔ̄ ɛ̄cī dóódu á.
Upɔ́lu yɛ bū Ésīya nɛ̄ŋcɛ́
6É bá ī yɛ ipú ajɛ kú Ufrayigíya mɛ́mla Ugalésīya ohígbū ka Alelékwū Ihɔ ā í cɛ̄ lɛ uwá tɔ́ɔna kú olɛhɔ̄ ā ajɛ kú Ésīya ŋ́. 7Eko nēé gā ocojōnjīlɛ̄ kú Umísīya ā, é yá kéē ga Ubitiníya, amáŋ Alelékwū kú Ujísɔ̄si í cɛ̄ lɛ uwá ŋ́. 8Anɔ́ɔ é le yɛ nyɔ̄ gaá bū ipú Umísīya ā, anɔ́ɔ é le yɛ ga Utrɔ́wasi á. 9Upɔ́lu le ɔ̄na nā otú ɔ́ɔmā. Ó má ɔ̄cɛ Umasɛdónīya éyi háyi yɔ̄ gē gbɔ̄ɔkɔ lɛ ɔ̄ kahíníī, “Le yɛ wā Umasɛdónīya gaá tá alɔ abɔ̄.” 10Ɔkwɔɔkwu nɛ̄ Upɔ́lu lɛ ɔ̄na nyā nā kwɛyí ā, alɔ le tútū ká ālɔ̄ nyɔ̄ Umasɛdónīya, Ohígbū ka alɔ le ɔ́ ŋmótū ka Ɔwɔicō hī alɔ igwú ká ālɔ̄ í tɔ́ɔna kú Ɔ̄kōolɔhi ā lɛ uwá á.
Upɔ́lu le yɛ nyɔ̄ Umasɛdónīya le táajɛ Ufilípayi
11Alɔ le tá úgbéenyi ŋmá Utrɔ́wasi anɔ́ɔ alɔ le yɛ kpaakpa le tá Usamótrēsi, anɔ́ɔ oŋmáɔ́ɔ̄cī nū alɔ le yɛ tá Unēyapólisi. 12Alɔ le yɛ ŋmá abɔ́ɔ i tá Ufilípayi, nōo yɔ̄ ipú ajɛ kú igelī nɛ̄hi kú Umasɛdónīya ɛga nɛ̄ ācɛ Uróm lā ā. Alɔ bá igelī nyā ɛ̄cī alɛwa. 13Ɛ̄cī Usábāti alɔ le bɛ̄cɛ ŋmá igelī ā le tá okónu ísu ɛga nɛ̄ alɔ leyīce ka ɛga nɛ̄ ācɛ Ujíyu gē túbá ī gbɔ̄ɔkɔ ā yɔ̄ ā. Alɔ má báajɛ le ɛlā ka lɛ ācɛnyā nēe wā í jīla tɔ̄há abɔ́ɔ ā. 14Ɔ̄cɛnyā éyi, nɛ̄ iyē nū lé ka Ulidíya, nōo ŋmá Utayatíra, ɔ̄cɛnyā nōo ī tɔ́hí īlī nōo wɛ oblúu bllábllá, nōo ī gbā Ɔwɔicō ɛ̄gbā ā. Anɔ́ɔ Óndú ā lɛ ɔ ɔtū túkwu ɛlā nɛ̄ Upɔ́lu yɔ̄ ī ka ā. 15Anɔ́ɔ eko nēé lɛ anú mɛ́mla ācɛ ɔlɛ́ nū yá ubatísim kwɛyí ā, ó gbɔ̄ɔkɔ lɛ alɔ kahíníī, “Ɔ́dāŋ́ ka aá cɛ̄ ipú ɔtú kú aá ka n le pīya ɔ̄cocɛlɔ̄ɔwɔicō ɛɛ́, ayíka aá wā í gbɔga ɔlɛ́ um.” Ó yá jāā gbéeko nōó lɛ alɔ ɔtū pīyeyī gaá le gbɔga abɔ́ɔ.
É le Upɔ́lu mɛ́mla Usáyílāsi kpó tū Ijaló
16Ɛ̄cī éyi abɔ̄ alɔ bá gē nyɔ̄ ɛga ogbɔ̄ɔkɔ ā, ɔyípɛ̄nɔ̄nyā ɔfiyɛ éyi nōo lɛ anjɛnū nōo ī cɛ lɛ ɔ́ mɛ́ɛbɛ ā le yɛ jīla alɔ ɔwɛ. Ó gē yá ije nɛ̄hi gé lɛ aóndú nū ŋmá lɛ o má ācɛ ɛbɛ. 17Ó yɔ̄ ī kwūcē Upɔ́lu mɛ́mla alɔ yɔ̄ gē dɛ̄gba ī kahíníī, “Ācɛ nēe bá ā wɛ ācocɛ̄hɔ̄ kú Ɔwɔicō o lɔfú fíyɛ́ dúú! É gē tɔ́ɔna kú ɔwɛ nōó géē nya aá tá ā.” 18Ó yá ɛ̄nyā ɛ̄cī alɛwa, jāā gbéeko nɛ̄ Upɔ́lu le cɔ̄nū, anɔ́ɔ ó pīyeyī le ɛlā ka lɛ anjɛnū ā kahíníī, “N bī iyē kú Ujísɔ̄si Ohɔ́nyɛtá da uwɔ ká ā bɛ̄cɛ ŋmá ipú nū!” Anɔ́ɔ alelekwū nōo ī cɛ̄ lɛ ɔ́ mɛ́ɛbɛ le bɛ̄cɛ ŋmá ipú nū eko ɔ́ɔmā piíí ā á.
19Amáŋ eko nɛ̄ aóndú nū le má ka ile nēé lɔtūce ā le yɛ ā, é lɛ Upɔ́lu mɛ́mla Usáyílāsi kwú, anɔ́ɔ é lɛ uwá pī ga ōlihī iyɔ̄bū ācogbāājɛ. 20É lɛ uwá bī gé lɛ ācohɛ́pɔ̄. Anɔ́ɔ é kahíníī, “Ācɛ nēe bá ā wɛ ācɛ Ujíyu, é yɔ̄ ī junwalu ipú igelī kú ɔlɛ́ alɔ. 21É gē nwū uculo nōó yɔ̄ ipú íne nɛ̄ alɔ gē le tū ŋ́, abɔ̄ alɔ wɛ ācɛ Uróm ā.” 22Anɔ́ɔ ɛwa ā le cētū ipú uwā gbɔɔ́ ō ŋmó uwā ijē. Ācohɛ́pɔ̄ ā lɛ otógwō kú uwā híla ŋmá uwá iyē, anɔ́ɔ é le íkwu je kéē bī itali le uwá gɔ́ á. 23Eko nēé lɛ uwá gɔ́ igbo alɛwa ā, é lɛ uwá kpótū ijaló, é kē da ɔ̄cɛ ogbō-alagbá ā kɔ́ɔ̄ leyī hɛ́tū uwā lɔɔlɔhi. 24Abɔ̄ é lɛ íkwu nyā je lɛ ɔ́ ā, ó lɛ uwá kpótu ināgbá eyīpú, kē lɛ uwá ikpó kpó wū odó.
25Amáŋ ɛplá ahāpotú, Upɔ́lu mɛ́mla Usáyílāsi bá gē gbɔ̄ɔkɔ yɔ̄ ī gwííjē lɛ Ɔwɔicō, aálagbá ohile ā kē bá gē pó tā ɔ̄ lɛ uwá. 26Igbeékpónú ajɛ gbɔɔ́ ō jíliyē nɛ̄ɛ̄nɛ̄hi, nōo yá ká ināgbá ā kóō jíliyē ŋmá ajīlɛ̄yí inu ga itikpa kú nū. Ikpíkpó ɔ́mā, ɔdōgwɔ̄wɛ dóódu le kpó nwūla, anɔ́ɔ agbá kú ɔnyɔɔnyɛ kē le kpó wī. 27Eko nɛ̄ ɔ̄cɛ ogbō-alagbá ā le héyī kē le má bā odúúdú ɔwɛ kú ināgbá ā le kpó nwūla ā, ó lɛ ɛ̄wā kú nū pi ŋmá apɛ́ kóō gaá ŋmó iyī nū, abɔ̄ ó gbɛlá ka aálagbá ā é le pɛ́ kwu ā. 28Amáŋ Upɔ́lu dɛ̄gba kahíníī, “Ā híī yá iyī uwɔ ɔdā dúúmā ŋ́, ohígbū ka odúúdú alɔ bá amānyā ā.” 29Anɔ́ɔ ó ka kéē lɛ agege bī wā, anɔ́ɔ ó le inya kwu fíya ga eyīpú, le okwúukwu kpó kwajɛ gblugudu iyɔ̄bū Upɔ́lu mɛ́mla Usáyílāsi gē yúufi ī fīyégbúlú kpákpákpá. 30Anɔ́ɔ ó lɛ uwá kpó wɛ̄ɛcɛ, anɔ́ɔ ó kahíníī, “Aɔ́kpani um, ɔdí nɛ̄ n géē yá ɛ́ɛ́ kéē lɛ um nyatá ā?” 31É tóohi kahíníī, “Cɛ̄ɛ̄lā kú Óndú Ujísɔ̄si cɛ́ɛ́ é géē lɛ uwɔ nyatá, awɔ mɛ́mla ācɛ ɔlɛ́ uwɔ.” 32Anɔ́ɔ é le ɛlā kú Óndú ā ka lɛ anú mɛ́mla ɛjɛ̄ɛ̄jī ācɛ ɔlɛ́ nū. 33Áwa ékpó ɔ́ɔmā piíí ā, ogbō-alagbá ā le uwá kpó, le uwá ágbe na. Anɔ́ɔ é lɛ ubatísim yá anú mɛ́mla ɛjɛ̄ɛ̄jī ācɛ ɔlɛ́ nū ikpííkpó ɔ́ɔmā á. 34Ó kē lɛ uwá kpó wā ɔlɛ́ nū, lɛ ɔdōlé je lɛ uwá. Anú mɛ́mla ɛjɛ̄ɛ̄jī ācɛ ɔlɛ́ nū gwéeyē nɛ̄hi ohígbū kéē cɛ̄ɛ̄lā Ɔwɔicō ɛɛ́.
35Amáŋ abɔ̄ eyī le nyā ā, ācohɛ́pɔ̄ ā lɛ idáhandā tū nyɔ̄ kahíníī, “Lɛ ācɛ ā hɛ́tá.” 36Anɔ́ɔ ogbō-alagbá ā lɛ ɛlā ā da Upɔ́lu kahíníī, “Ācohɛ́pɔ̄ ā lɛ ɛhɔ̄ tū wā kéē lɛ aá hɛ́tá ɛɛ́. Ohígbū ɛ́gɔ́ɔmā, aá le bɛ̄cɛ kú aá nyɔ̄ ɛbɔ́.” 37Amáŋ Upɔ́lu da uwá kahíníī, “É ŋmó alɔ ɛpɔ̄bí kú ɔdōbɔ̄bí dúú nɛ̄ alɔ yá ŋ́, nááná é kē le alɔ gɔ́ ɔtāhɛ̄ ɛwa, alɔ nēe wɛ ācɛ ajɛ kú Uróm! Anɔ́ɔ ē kē lɛ alɔ kpótú ipú ināgbá. Anɔ́ɔ abālɔbányā é tínē kéē kpó alɔ bɛ̄cɛ wɛɛlɛ ɛkwūbá āā? Alɔ tá. Éē gā abɔ̄yī uwā gaá kpó alɔ bɛ̄cɛ.” 38Idáhandā ā gaá lɛ ɛpɔ̄ ɛlā nyā kpó lɛ ācohɛ́pɔ̄ ā, anɔ́ɔ ufi yá uwā abɔ̄ é le pó kéē wɛ ācɛ ajɛ kú Uróm ā. 39Anɔ́ɔ é le pɛ̄ wā gaá le abɔ̄ kwajɛ lɛ uwá, anɔ́ɔ é lɛ uwa kpó wɛ̄ɛcɛ ŋmá ipú agbá. Anɔ́ɔ é ké lē da uwá kéē nyɛ̄ɛ̄ ŋmá igelī kú ɔlɛ́ aá á. 40Abɔ̄ é nyɛ̄ɛ̄ ŋmá ināgbá ā, é le pɛ́ ga ɔlɛ́ Ulidíya. É le ācocɛ̄lɔ̄wɔicō má abɔ́ɔ, é le ɛlā ō tū ɔ̄cɛ ɔtū kwɔtū ka lɛ uwá, anɔ́ɔ é kē nyɛ̄ɛ̄ á.
Currently Selected:
ÚKLƆ́ KÚ ĀCOTƐ̄HƆ̄ 16: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
