ÚKLƆ́ KÚ ĀCOTƐ̄HƆ̄ 14
14
Upɔ́lu mla Ubánābas bá Ikónīyɔm
1Ɔdā ékpónú nōo híkpó du uwā ipú ajɛ kú Ántiyɔ̄ku kú Upisídiya ā yá Ukónīyɔm. Upɔ́lu mɛ́mla Ubánābasi le tá Ɛgogbɔ̄ɔkɔ ā, anɔ́ɔ é le ɛlɔ̄ɔwɔicō ka ɔwɛ nōo yá ká ɛwa nɛ̄hi kú ācɛ Ujíyu mɛ́mla aílɔ́wá kéē cɛ̄ɛ̄lā Ujísɔ̄si. 2Amáŋ ācɛ Ujíyu nēé cɛ̄ ŋ́ mā ā, lɛ ɔtū kú aílɔ́wá ā wu klíicō, é kla lɛ uwá ɔtū bīya lɛyíkwu Upɔ́lu mɛ́mla Ubánābasi. 3Nááná ā, ācotɛ̄hɔ̄ ā bá abɔ́ɔ aláadi alɛwa, bá ī kɛlā kú Ujísɔ̄si ā tɛ́ɛcɛ pāālā, Óndú ā le mafú ka ɔdā nēé yɔ̄ ī ka ā wɛ ɔkwɛ̄yi eko nēé kɛlā lɛyíkwu ogbonɛnɛ kú nū lɛ uwá ā. Anɔ́ɔ ó je ɔfú lɛ uwá kéē yá ɔdōcābɔ̄ mɛ́mla ɔdīdáagó. 4Amáŋ ācɛ kú igelī nɛ̄hi ā le kɔ̄ ɛpa, ācɛ ōhī yɛce ācɛ Ujíyu, ācɛ ōhī kē yɛce ācotɛ̄hɔ̄ ā. 5Anɔ́ɔ aílɔ́wá mɛ́mla ācɛ Ujíyu mɛ́mla aótrɛ̄yí kú uwā, lɛ ujɔ̄ tū kéē lɔfú kpó kwu Upɔ́lu mɛ́mla Ubánābasi. É klla kē le miya kéē lɛ ɛcɔ̄ tá kla uwá ā dúú. 6Eko nɛ̄ ayíkpó ā le ujɔ̄ kú uwā ā jé ā, anɔ́ɔ é le pɛ́kwu gā aígelī nɛ̄hi kú Ulístra mɛ́mla Udábi, igelī nɛ̄hi kú Ulayikónīya klla yɛ jāā ga aígelī nɛ̄hi nēe yɛ jīla ajɛ ā tá ā. 7É tɔ́ɔna kú Ɔ̄kōolɔhi ā abɔ́ɔ dúú.
Ipú Ulístra mɛ́mla Udábi
8Ipú ajɛ kú Ulístra ó lɛ ɔ̄cɛ éyi yɔ̄ nōo wɛ ocīkpó ŋmá ipú. Ó kē yāwu jééjéē ɛ́ɛ́ ŋ́. 9Ɔ̄cɛ āa cīce le ahɔ̄ jē lɛ Upɔ́lu abɔ̄ ó yɔ̄ ī kɛlā ā. Upɔ́lu le má ka ó cɛ̄ɛ̄lā, ka ɔ̄cɛ kē hɛ́ ɔ̄ tá glá, anɔ́ɔ ó le eyī plla tū ɔ̄ eyī glīglī 10ó le ɔkɔ cɛyí le ɛgba dɛ̄ kahíníī, “Cāŋjɛ háyi icō kpaakpa!” Anɔ́ɔ ɔnyīlɔ ā le ómbli tá gicō kpá, gbɔɔ́ ō yāwu. 11Anɔ́ɔ eko nɛ̄ ójila ā lɛ ɔdā nɛ̄ Upɔ́lu yá ā má ā, é je ɔkɔ kú uwā gicō anɔ́ɔ é ka ɔkɔ Ulayikónīya kahíníī, “Aɔ́wɔ ā le pɛ́ wāajɛ gé lɛ alɔ bɛ̄ɛka ācɛ ā ɛɛ́!” 12Anɔ́ɔ é hī Ubánābasi ka Uséyɔ̄si, anɔ́ɔ é hī Upɔ́lu ka Uhémēsi ohígbū ka anú wɛ ɔkɛ̄lā kú ācɛ ɛpa ā á. 13Anɔ́ɔ ɔ̄cogwɛ́ɛya kú Uséyɔ̄si nɛ̄ Agblīihɔ-nɛ̄hi kú nū yɔ̄ iyɔ̄bū kú igelī ā bī ɛna nēé le o tátɔ̄há kú ododó tū uwā ɔkɔ ā wā okómpinu, anɔ́ɔ anú mla ɛwa kú ācɛ ā tínē kéē lɛ ɛya gwó lɛ ayíkpó ā. 14Amáŋ eko nɛ̄ Ubánābasi mla Upɔ́lu, ɔ̄cocɛ̄hɔ̄ ā, le pó á, é lɛ úwé kú uwā híla, anɔ́ɔ é le pɛ́ bɛ̄cɛ ga ɛgiyí ācɛ ā, bá yɔ̄ ī dɛ̄gba ka, 15#Oyɛb 20.11; Aíjē 146.6 “Aóklóbīya, ɔdí nɛ̄ aá yɔ̄ ī yá ā? Alɔ wɛ ācɛ bɛ̄ɛka aá ā nɛ, ācɛ nēe ī kwú bɛ̄ɛka aá ā dúú. Alɔ bī Ɔ̄kōolɔhi gé lɛ aá, ká aá habɔ̄ ɔdā icííci nēe bá ā tá, ká aá pīyeyī tá Ɔwɔicō oyēeyī, ɔ̄cɛ nōo yá ɔkpáncō mɛ́mla ɛcɛ mɛ́mla ísu mɛ́mla ɔdā dóódu nēe bá ipú uwā ā. 16Eko otɛtɛ ā, ó cɛ̄ ka éwo dóódu kéē yāwu ɔwɛ kú ɔtú uwā. 17Amáŋ, ó kē habɔ̄ iyī nū tá icííci nōó lɛ ijáalí ŋ́ nɛɛ ŋ́. Ohígbū kóō gē ma ogbonɛnɛ kú nū fú ŋmá lɛ ɔwɔ nōo ī yā ŋmá ɔkpáncō mɛ́mla aɔ́dɛ̄hɔ̄ ō yá eko kú uwā. Ó kē je ɔdōlé lɛ aá klla ī yá ká ɔtū kóō he aá.” 18É bī ɛlā nēe bá ā ɔkābɔ̄fú le ɛya nēé gáā gwó lɛ uwá ā ci.
19Ācɛ Ujíyu ōhī le pɛ́ ŋmá Ántiyɔ̄ku mɛ́mla Ikónīyɔm anɔ́ɔ é gaá lɛ ācɛ ā ɔtū pīya tá iyī uwā, anɔ́ɔ é le ɛcɔ̄ tá klá Upɔ́lu á. Abɔ̄ é gbɛlá ka ɔ́ɔ gekwú ɛɛ́ mā, é lɛ ɔ́ pi tɛ́ɛcɛ ŋmá igelī ā. 20Amáŋ eko nɛ̄ ayíkpó ā le jīla pīya anú tá ā, ó cāŋjɛ, le tá igelī ā. O ŋmɔ́ɔ̄cī nū, anú mla Ubánābasi le yɛ tá Udábi.
Okwúcē nyɔ̄ Ántiyɔ̄ku
21Upɔ́lu mɛ́mla Ubánābasi le ɔna kú Ɔ̄kōolɔhi ā tá ipú igelī kú Udábe anɔ́ɔ é le ācɛ alɛwa pīya ayíkpó á. Anɔ́ɔ é kwúcē ga Ulístra, é le tá Ikónīyɔm mɛ́mla Ántīyɔ̄ku kú Upisídiya. 22Abɔ́ɔ ā é lɔ́fú tū ācocɛ̄lɔ̄wɔicō ā iyē. É kē bá ī tū uwā ɔtū kwɔtū kéē yɔ̄ ī cɛ̄lɔ̄ɔwɔicō kpɔ́. Anɔ́ɔ é le nwū uwā ka o ŋmá ōwē nɛ̄hi piíí ɛ́ɛ́ nɛ̄ alɔ géē gā ajɔ̄ɔ̄cɛ́ kú Ɔwɔicō glá á. 23Upɔ́lu mɛ́mla Ubánābasi le anyākwɔ́cɛ fu ipú icɔ́ɔci dóódu, anɔ́ɔ eko nēé le okónu gwū le ɔkɔ gbā le Ɔwɔicō ā, é le ācɛ ā kpó tū Ondú nēé lɔtūce ā abɔ̄.
24Eko nēé le yɛ bū ajɛ kú Upisídīya ā, é gā ajɛ kú Upamfílīya. 25Eko nēé le ɔna kú olɛhɔ̄ ā tá kwɛyí ipú Upɛ́ga ā, anɔ́ɔ é le pɛ́ tá Atálīya á. 26O ŋmá abɔ́ɔ ā é le yɛ úgbéenyi kwúcē wā Ántiyɔ̄ku, ɛga nēé kpó uwā tū Ɔwɔicō abɔ̄ kóō leyīkwu uwá ohígbū úklɔ́ nēé yá kwɛyí ā. 27Anɔ́ɔ eko nēe gāājɛ ā, é lɛ ācɛ kú icɔ́ɔci ā hīgwú tɔ̄há, anɔ́ɔ é le odúúdú ɔdā nɛ̄ Ɔwɔicō bī uwā yá ā kpó ka lɛ uwá, mɛ́mla ɛ́gɛ́nɛ̄ ó nwūla ɔwɛ lɛ aílɔ́wá kéē cɛ̄ɛ̄lā nū lɛ ā. 28Anɔ́ɔ é kē yɔ̄ mla ācocɛ̄lɔ̄wɔicō ā abɔ́ɔ ɔyā alɛwa.
Currently Selected:
ÚKLƆ́ KÚ ĀCOTƐ̄HƆ̄ 14: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
