ÚKLƆ́ KÚ ĀCOTƐ̄HƆ̄ 10
10
Upíta mla Ukɔnílīyɔ̄si
1Ɔ̄cɛ éyi yɔ̄ Usísarīya, nɛ̄ iyē nū lé ka Ukɔnílīyɔ̄si, otrɛ̄yí kú aícɔ́ɔja ofɛhɔ̄ kú ɔ́wá aícɔ́ɔja nēé hī ka Ɔ́wá kú Ítāli. 2Anú mɛ́mla aɔ́máapú nū dóódu gē gbā Ɔwɔicō ɛ̄gbā klla gē yúufi nū. Ó gē yá ācɛ Ujíyu ogbɛhá ɛhi kpɔngɔɔ ojigógó, ó klla gē gbɔ̄ɔkɔ lɛ Ɔwɔicō eko dóódu. 3Ɛ̄cī éyi, ɛplá oje ɛtá kú ɔlɛ́ɛnɔ ā, ó má alelékwū-ōtɛ̄hɔ̄ kú Ɔwɔicō cāā eko nɛ̄ obócádēde je ɔ́ ā. Anɔ́ɔ ó da ɔ́ kahíníī, “Ukɔnílīyɔ̄si.” 4Ó le eyī plla tū alelékwū-ōtɛ̄hɔ̄ ipú ufi anɔ́ɔ ó kahíníī, “Ɔdí nɛ, Óndú um?” Anɔ́ɔ Alelékwū otɛ̄hɔ̄ ā da ɔ́ kahíníī, “Ɔkɔ nāa gē gbā mɛ́mla ɛhi kú uwɔ nāa gē je ā le tíicō iyɔ̄bū Ɔwɔicō ɛɛ́, ó kē yɔ̄ ī tá uwɔ ohi ɛɛ́. 5Abālɔbányā, lɛ ācɛ ōhī tɛ̄hɔ̄ ga Ujɔ́pa, kéē lɛ ɔ̄cɛ éyi nɛ̄ iyē nū lé ka Usáyímɔ̄n Upíta ā hīgwú wā. Iyē nū ɔhá lé ka Upíta. 6Ó gbɔga ɔlɛ́ ɔ̄cɛ éyi nōo lé ka Usáyímɔ̄n ā, ó ī yúklɔ́ ɔkpɛ́bɛ́, nɛ̄ inu ɔlɛ́ nū kwu okónu ísu ā.” 7Eko nɛ̄ Alelékwū otɛ̄hɔ̄ nōo kɛlā lɛ ɔ́ ā nyɛ̄ɛ̄ ā, ó lɛ ɔ̄cocɛ̄hɔ̄ obɔ́tū kú nū ɛpa kpó hīgwú, mɛ́mla ícɔ́ɔ́ja éyi nōo gē gbā Ɔwɔicō ɛ̄gbā ŋmá ipú aɛ́nɛ̄ o gē yúklɔ́ lɛ ɔ́ ā. 8Anɔ́ɔ eko nōó lɛ ɔdā nōo yá ā ka lɛ uwá ā, ó lɛ uwá tɛ̄hɔ̄ ga Ujɔ́pa.
9Oŋmɔ́ɔ̄cī nū, abɔ̄ é yɔ̄ ī nyɔ̄ le bá lɛ Ujópa ā, Upíta le tá inicō ɛplá ɛnɔ oyɛ̄ɛyí ā kóō gbɔ̄ɔkɔ lɛ Ɔwɔicō. 10Anɔ́ɔ ɛmiyɛ gbɔɔ́ ō ŋmó ɔ̄ á, ó cɛgbá ɔdā nōó í lé. Amáŋ eko nēé yɔ̄ ī yá ɔdōlé ā, obócádēde gbɔɔ́ ō je ɔ́. 11Ó má ɔkpáncō bā ó le nwūla, anɔ́ɔ ó má odée nōo lɛbɛ̄ɛka idɔngwu nɛ̄hi nēé bī ɔ̄ ɔ́kíkā ɛnɛ ā yɔ̄ ī wāajɛ. 12Ígwu ɛyɛ́ɛyɛ́yí kú aɛ́bɛ́ ō lɛ ikpó ɛnɛ mɛ́mla ɛbɛ́ ō lɛ āpū mɛ́mla ígbáanɔ kú ɔkpáncō bá ipú nū. 13Anɔ́ɔ ó pó ɔkɔ nōo da ɔ́ kahíníī, “Cāŋjɛ Upíta, ŋmó ká ā klla lé.” 14Amáŋ Upíta kahíníī, “Ehée, Óndú. Ohígbū ka ń lé ɔdēelihɔ ámāŋ ɔda oblinyi jéjéē ɛ́ɛ́ ŋ́. 15Anɔ́ɔ ɔkɔ ā kɛlā lɛ ɔ́ igbo ɔmpa kahíníī, “Ɔdā nɛ̄ Ɔwɔicō ka ó le yēŋēē, ā híī hī ɔ̄ ka ɔdēelihɔ ŋ́.” 16Ó yá lɛ ā igbɛ ɛtá, anɔ́ɔ é kwú ɔdée ā ú gicō igbo ékpónú á.
17Anɔ́ɔ eko nɛ̄ Upíta yɔ̄ ī gbafíyóó kú ɔdā nōo géē wɛ ɛyí ɛbɛ nōó má ā, ācɛ nɛ̄ Ukɔnílīyɔ̄si tɛ̄hɔ̄ ā lɛ ɔ̄kā ɔlɛ́ Usáyímɔ̄n da, anɔ́ɔ é gaá háyi okómpīinu ɔlɛ́ ā á. 18Anɔ́ɔ é le ɔkɔ cɛyí dɔɔ̄kā ka, Ɔ̄cɛ dúú gbɔga amānyā lé ka Usáyímɔ̄n Upíta?” 19Upíta yɔ̄ ī gbafíyóó kú ɔdā nōo wɛ ɛyí ɛbɛ nyā, ɛ́ɛ́ nɛ̄ Alelékwū Ihɔ da ɔ́ kahíníī, “Má ɔ̄, ācɛ ɛtá bá gē dɔɔ̄kā awɔ. 20Cāŋjɛ, hīlatá, ká ā nyɔ̄ mla uwá, ā híī bíkpáajɛ ŋ́, ohígbū ka ami da uwá kéē wā á.” 21Anɔ́ɔ Upíta le hīlatá i tá ɛgiyí ācɛ ā, anɔ́ɔ ó da uwá kahíníī, “Ami nɛ̄ aá gē dɔɔ̄kā á. Ɔdíyá nɛ̄ aá wā ā?” 22Anɔ́ɔ é da ɔ́ kahíníī, “Ukɔnílīyɔ̄si tū alɔ ɛhɔ̄ á.” É klla kahíníī, “Ó wɛ ācɛ olɔhi nɛ̄ odúúdú ācɛ Ujíyu gē ka olɔhi nū ā. Alelékwū otɛ̄hɔ̄ nōo tīihɔ ā da Ukɔnílīyɔ̄si, otrɛ̄yí kú aícɔ́ɔja ofɛhɔ, ōyá olɔhi mɛ́mla ɔ̄cɛ o yúufi Ɔwɔicō ā, kóō lɛ ɛhɔ̄ tū fu uwɔ ká ā wā ɔlɛ́ nū, kóō pó ɔdā nāa géē ka ā.” 23Upíta le ācɛ ā hīgwú wā inu, anɔ́ɔ ó le ɔkɔ gbā lɛ uwá kéē le gbo pīyɛ̄ ɔ̄.
Oŋmɔ́ɔ̄cī nū, ó nyāŋjɛ le yɛ mla uwá, ayínɛ́ ōhī nēe bá Ujɔ́pa ā lɛ ɔ́ bíyē nyɔ̄. 24Oŋmɔ́ɔ̄cī nū, é gā ajɛ Usísarīya ā. Abɔ̄ Ukɔnílīyɔ̄si yɔ̄ ī gbēyī uwā ā, ó lɛ aɔ́máapú nū mɛ́mla ɛ́nɛ́nɛ̄ aɔóklóbīya nū kpó hīgwú tɔ̄há. 25Abɔ̄ Upíta gáā bēhé ga inu ā, Ukɔnílīyɔ̄si jīla anú, anɔ́ɔ ó lɛ okwúukwu kwajɛ pī ɔ̄ ikpó kóō gbɔɔ́ ō gbā ɔ̄ ɛ̄gbā. 26Amáŋ Upíta kwú ɔ̄ ú cāŋjɛ, anɔ́ɔ ó kahíníī, “Cāŋjɛ, n wɛ ɔ̄cɛ bɛ̄ɛka awɔ ā dúú nɛ.” 27Upíta yɔ̄ ī kɛlā mla Ukɔnílīyɔ̄si abɔ̄ é yɔ̄ ī ga inu ā, anɔ́ɔ ó le ācɛ alɛwa má jīla abɔ́ɔ. 28Ó da uwá kahíníī, “Aá abɔ̄ aá jé ɛ́gɛ́nɛ̄ ó wɛ elihɔ ká Ɔ̄cɛ Ujíyu kóō pīya tɔ̄há mla ɔ̄cɛ aílɔ́wá ámāŋ ka o ga ɔlɛ́ nū ā. Amáŋ Ɔwɔicō le mafú gā um ɛɛ́ kā n̄ híī hī ɔ̄cɛ dúúmā ɔ̄cɛ elihɔ ámāŋ obɔ̄bí ŋ́. 29Ohígbū ɛ́gɔ́ɔmā, eko nāa le ɛhɔ̄ tū fu um ā, ń wā mla ɔtū ōbɛ́pa ŋ́. N̄ da aá ɔ̄kā abālɔbányā, ɔdíyá nɛ̄ ā tɛ̄hɔ̄ fú um ā?”
30Anɔ́ɔ Ukɔnílīyɔ̄si kahíníī, “Ɛ̄cī ɛnɛ nēe gaá yɛ ā, ɛpléeko nyā, n yɔ̄ ī gbɔ̄ɔkɔ #10.30 aɔ́kpá ōhī tá ka yɔ̄ i gbɔ̄ɔkɔ mla okónu ō gwū. inu ɔlɛ́ um ɛplá oje ɛtá kú ɔlɛ́ɛnɔ. Anɔ́ɔ igbeékpónú ɔ̄cɛ éyi nōo le otógwō nōo yɔ̄ Iceyīŋmáŋmá wiyē ā wā í háyi iyɔ̄bū um. 31Anɔ́ɔ ó kahíníī, “Ukɔnílīyɔ̄si, Ɔwɔicō le ɔkɔ nɛ̄ ā gbā ā pó ɛɛ́, ó kē le ɛhi kú uwɔ nāa ī yá ācogbɛhá ā má ɛɛ́. 32Ohígbū ɛ́gɔ́ɔmā, lɛ ɛhɔ̄ tū ga Ujɔ́pa ká ā gaá dɔɔ̄kā Usáyímɔ̄ni nēé hī ka Upíta ā. Ó gbɔga ɔlɛ́ Usáyímɔ̄ni, ɔ̄cɛ oyúklɔ́ ɔkpɛ́bɛ́ okónu ísu. 33Ohígbū ɛ́gɔ́ɔmā, n le ɛhɔ̄ tū fu uwɔ ikpíkpó, a kē yá lɔhi ɛ́gɛ́nɛ̄ a wā ā. Abɔ̄ ó lɛ á, odúúdú alɔ bá iyɔ̄bū Ɔwɔicō amānyā ká ālɔ̄ pó ɔdā dóódu nɛ̄ Óndú ā da uwɔ ka ka ā.”
Ɛlā nɛ̄ Upíta ka ā
34 #
Obla 10.17
Anɔ́ɔ Upíta nwūla okónu kahíníī, “Ɔkwɛ̄yi, n le jé ka Ɔwɔicō í má eyīgoo kú ɔ̄cɛ ŋ́. 35Amáŋ ipú éwo dóódu ɔ̄cɛ dúúmā nōo yúufi nū, nōo kē yá ɔdā okpaakpa ó gē mīyɛ anú. 36Aá jé olɛhɔ̄ nɛ̄ Ɔwɔicō tū gé lɛ ācɛ Ísrɛ̄lu, yɔ̄ ī tɔ́ɔna kú Ɔ̄kōolɔhi kú ɛbɔ́ ŋmá ɛgiyí Ujísɔ̄si Ohɔ́nyɛtá nōo wɛ Óndú kú ɔdā dóódu kú odúúdú ācɛ. 37Aá jé ɔdā ocɛgbá nɛ̄hi nōo yá nēé tɔ́ɔna nū ɛbɛɛbɛ kú Ujudíya, ó hútu ŋmá Ugálīli igbīhi olɛhɔ̄ ka ācɛ kéē le pīyabɔ̄ cɛ́ɛ́ kéē lɛ ubatísim yá uwā nɛ̄ Ujɔ́ni oyúbatísim cɛ̄ ā. 38Aá jé ka Ɔwɔicō le Alelékwū Ihɔ mɛ́mla ɔfú kpó lɛ Ujísɔ̄si kú Unásārēti. Ó gē yɛ ga ɛbɛɛbɛ, yɔ̄ ī yá ɔdā olɔhi lɛ ācɛ, ó klla gē há ācɛ dóódu nɛ̄ ebilíi bībáajɛ ā tá, ohígbū ka Ɔwɔicō yɔ̄ mla anú. 39Alɔ kē wɛ ijáalí kú ɔdā dóódu nōó yá ipú ajɛ kú ācɛ Ujíyu mɛ́mla ipú Ujerúsālɛm dúú. É lɛ ɔ́ nyɔ́kpá kóō gekwú. 40Amáŋ Ɔwɔicō kwú ɔ̄ ú héyī ŋmá ɔlékwū oŋmɔ́cī ɔ́mɛtá, anɔ́ɔ ó le yá kóō lɛ iyī nū mafú, 41ó wɛ odúúdú ācɛ Ujíyu nēé ma ɔ́ fú lɛ uwá ā ŋ́, amáŋ ó le ɔ́ mafú lɛ alɔ nēe wɛ ijáalí nɛ̄ Ɔwɔicō fu ɛɛ́ mā ā, alɔ nēe lé klla gwá mla anú eko nēé je ɔ́ héyī ŋmá ɔlékwū ā. 42Anɔ́ɔ ó le íkwu je lɛ alɔ kā ālɔ̄ tɔ́ɔna kú Ɔ̄kōolɔhi ā lɛ ācɛ Ujíyu, cɛ́ɛ́ kú ālɔ̄ cījáalí ka Ujísɔ̄si wɛ ɔ̄cɛ nɛ̄ Ɔwɔicō fu kóō wɛ ɔ̄cɛ ohɛ́pɔ̄ kú ācɛ oyēeyī mɛ́mla ācɛ nēe gekwú ā. 43Odúúdú ācomɛ́ɛbɛ ā le ɛlā ka lɛyíkwu ɔ́, bá ī ka ka odúúdú ācɛ nēe cɛ̄ɛ̄lā nū ā, Ɔwɔicō géē je íne nēé bīya ā yá uwā ɛhi o ŋmá lɛ ɔfú kú iyē nū.”
Alílɔ́wá mīyɛ Alelékwū Ihɔ
44Abɔ̄ Upíta yɔ̄ ī ka ɛ̄nyā ā, Alelékwū Ihɔ ā wā í ce ɛyí kú odúúdú ācɛ nēe pó ɛlā ā. 45Anɔ́ɔ ācɛ nēe cɛ̄ ŋmá ipú ācɛ Ujíyu nēe wā mla Upíta ā le kpó hídáagó, ohígbū keé lɛ ɛhi kú Alelékwū Ihɔ kpó lɛ aílɔ́wá dúú. 46Ohígbū keé pó abɔ̄ é bá ī ka ucē ɛyɛ́ɛyɛ́yí, klla bá ī cɛ̄tra Ɔwɔicō ā. 47Anɔ́ɔ Upíta dɔɔ̄kā kahíníī, “Ācɛ nēe bá nyā mīyɛ ɛhi kú Alelékwū Ihɔ ɛ́gɛ́nɛ̄ alɔ mīyɛ ā dúú, ɔ̄cɛ dúúmā lɔfú ci o bī éŋkpɔ̄ lɛ yá uwā ubatísim glá ā?” 48Anɔ́ɔ ó da uwá kéē bī iyē kú Ujísɔ̄si Ohɔ́nyɛtá le yá uwā ubatísim. Anɔ́ɔ é da ɔ́ kóō dēē yɔ̄ mla uwá ɛ́ɛ́.
Currently Selected:
ÚKLƆ́ KÚ ĀCOTƐ̄HƆ̄ 10: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
