Mjir Rom 9
9
Hyel Ku Carɓəla Mjir Israila
1I akwa pəla jirkur akwa Kristi, I aɗi akwa thlandər wa. Kamnyar Mambəl na Ɓɗakkarkara an seɗar su na akwa ɗəffi, 2abbər ɗəffi ɓzəɓzari ka duna, ka tsuwa I ka damitədzi na akurkur wa akwa ɗəffi. 3Kamnyar maɗama'na natə da an durər na abwar dza. Kamnyar I tura abbər kuji kəi ndzi shushuwari, ka ndəkəmta ra ka Kristi, amma ka maɗama'na wutə mbantədzi, watau yangkuri na durərna. 4Da an mjir Israila natə Hyel carɓəla ka namtə ɗa ka da ndzi maɗa'ni, ka ncanta ala ɗa səliyir ni, ka mbwi alkawal ka da, ka na ala ɗa tsawu ni, ka ncanta ala ɗa lakur vəngkər səli na jirari, ka kəta ala ɗa alkawalayeri damwa. 5Da an ka kəkayeri na ka thləma ɗa tuwatuwari ni, watau Ibrahim, ka Ishaku, ka Yakub, tsuwa ma atar dza, Kristi ni səɓəla akwa durər ɗa, tsa na Hyel na ola ata kəra shanga su, ka huwa ndzi alari ba saka madi. Amin.
6Amma I aɗi akwa pəla abbər ndərər Hyel ku ndzi gapani wa. Awa, kamnyar aɗi shanga mjir Israila an mjir Israila na pəratə wa. 7Tsuwa aɗi namta abbər kəlara mdə na ku ndzi kəkar Ibrahim ni, ku ndzi ɓzərni na jirari wa. Kamnyar Hyel ku pəla aka Ibrahim abbər, “Atar Ishaku antə mda ata sə jika kəkayeri ar nga.”
8Ngəni akwa ncanta abbər aɗi mji na yaɓəladzi atar dza an maɗa' Hyel wa, amma tar mji tə mdə yaɓəla atar nghyaɓəlar alkawal antə mda ata jika ɗa abbər da an kəkayeri na jirari. 9Kamnyar nggədza su tə Hyel pəla akwa sakatə tsa hara alkawal aka Ibrahim ni, “Apta saka apani I ata ngka, antə Saratu ata wutə ɓzər sal.”
10Tsuwa aɗi an kurari wa. Kamnyar ɓzər ngəni Ishaku ni an kəkar mburu na ku sə kəl Rifkatu. Antə Rifkatu ku kətə hur ka yaɓəla alari maɗa' ɓuli. 11-12Amma təng akəmata mda ayaɓəla maɗa' ngəni suɗə ni, tə da aɗi hara su na ɓɗaku wala ɗimi katagu wa, antə Hyel pəla aka Rifkatu abbər, “Mdə na olari an ata sə hara mafakur aka na ntsahari.” Hyel pəla apani ni kamnyar ka su ni ndzi abbər kəlara mdə tə tsa ata carɓəlari, mda ata carɓəla ni ata kəra laku tə Hyel ɗəmha akwa, amma aɗi abbər kamnyar ɓɗakkurər kəthlərərni wa. 13Tsu apatə rəbutə rəbutari akwa kakaɗər Hyel abbər, “I ku hir Yakub, amma I ku nggəlar Isuwa.”
14Antə man su tə ka mburu pəlari? Hyel an kula jirkur ya? Awa, hun wa! 15Kamnyar tsa ku pəla aka Musa abbər,
“I ata hara ɓɗakkur aka kəlara mdə
natə I hir kəi hara alari ɓɗakkur.
Tsuwa I ata kətadzə kəlara mdə
natə I hir kəi kətadzə ni.”
16Apani Hyel andər carɓəla mdə tə tsa ata kətadzə ni, amma aɗi atar carər mda wala kamnyar ɓɗakkur kəthlərərni wa. 17Kamnyar kakaɗər Hyel ku pəla aka kuthlir Masar abbər, “I ku vəi nga kuthli kamnyar kəi kəthlər ka ga abwar ncantə dunar kuthlikurərna, ka shanga mjir duniya səndə ra ka hu ra.” 18Antə apani Hyel andər carɓəla ka tsa kətadzə mji laga, tsuwa tsa andər ɗəmha abbər ka mji laga ndzi ka kər ɓəɓalkur.
Ɗəffə Bwarbwarkur Ar Hyel Ka Kətadza Arni
19Nuhum mdə laga ata pəla, “Ka ma tsa an vu mda akwa harari, kamnyar mi tə tsa ata jaktə wul vəi shar mdə nə ri? Wan ata mzhi beɗəmta su tə tsa ku ɗəmha aka mdə ri?”
20Ga aɗiya gari apani wa diya! Gə wa ri shang tə ga ata yu mnya Hyel ni? Su tə mda an hənta ata mzhi pəla aka mdə na həntə ni ni abbər, “Kamnyar mi tə gə həntə ra apani ri ya?” 21Nənga mdər hən tughum aɗi ka duna ata kəra həyirni, ka tsa həntə tughum pal na ɓɗakari, ka tughum damwa na ndzangari, ka həi duku wa ri?
22Tsu apani antə Hyel ana hara. Wala tə Hyel ka dunar ncantə ɗəffə bwarbwarkurərni ka kuthlikurərni ata kəra mji na ɓzamtə ɗəffari tə kalkal ka mdə kurəmta ɗa ni, tsa ana hara kəmar ka mbwi ɗəffari, ka hara ala ɗa ka hangkal. 23Tsa ana hara apani ni kamnyar ncantə jili olkur səli tə tsa kəgari aka mji tə tsa ku kətadzə ɗa ni, natə tsa ɗəmhə ɗa təng akwa baɗitari kamnyar ka da sə ndzi ata kəra səliyirni. 24Watau mburu tə tsa ku kəga mburu ni, aɗi akwa nca mjir Yahudi daci wa, amma har akwa nca mji na aɗi mjir Yahudi wa. 25Tsu apatə tsa pəla akwa kakaɗər Hoseya abbər,
“Mji natə hwatə da aɗi mjirna wa,
I ata kəga da ‘Mjirna.’
Dur natə hwatə I aɗi hir ɗa wa,
I ata kəga ɗa abbər,
‘Natə I hirhira.’
26Tsuwa akwa vəi tə mdə pəla ala ɗa abbər,
‘Giri aɗi mjirna wa,’
anda antə mda ata kəga ɗa abbər,
‘Maɗa' Hyel na ka mpika.’ ”
27Ata kəra Israila, antə Ishaku haptə kurakari ka pəla,
“Wala tə mjir Israila ku hara hang
apa hangkur wuyakər mnya manda,
təng mji laga raka akwa nca ɗa daci
antə mda ata sə mbantə ɗa.
28Kamnyar Mthlaku ata sə hara shariya
aka shanga mjir duniya kula shamta saka.”
29Tsu apatə Ishaya ɗa pəla abbər,
“Ma kamnyar Mthlaku na ka Duna ta Shang
an aɗi mbilar maɗankyar laga raka ala mburu wa,
sakani mburu ku ndzi apa Sodom,
ka namtə mburu apa Gomora.”
Adduwar Bulus Kamnyar Mjir Israila
30Antə man tə ka mburu pəla ri? Ai wala durayeri damwa na aɗi akwa bara namtə kərɗa kula biku akəma Hyel wa ni, ku namtədzi kula biku akəma Hyel atar hamta jiri. 31Amma mjir Israila na akwa bara namtə kərɗa kula biku atar ɓəla tsawu ni, aɗi mzhi ɓəlatə tsawu ni wa. 32Kamnyar mə ri? Kamnyar tə da aɗi bara atar lakur hamta jiri wa, amma atar ɓɗakkur kəthlərər ɗa. Antə da ku tsamta səla ɗa ata pelar tsamta səl, 33apatə kakaɗər Hyel pəla abbər,
“Wul I akwa nci pela laga akwa Sihiyona
na ata hara ka mji tsamta səla ɗa,
pelar gagəma na ata hara ka da ndla.
Amma kəlara mdə na ku hamta jiri alari,
tsa aɗi ata ləkwa səli wa.”
Currently Selected:
Mjir Rom 9: KNB
Highlight
Copy
Compare
Share
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
