Mjir Rom 7

Kəldzi Ndzi Apa Mwardzər Mburu Ka Kristi

1Nənga giri aɗi nggaɓəla su tə I akwa pəlari ni wa ri, mjir yeru, abbər tsawa ka duna ata kəra mdə ni sakatə tsa tsu aɗi ka mpika? 2Wul giri bu, mwala na ka sal ana ndzi akwa ngyikar salngkiɗa akwa sakatə sal ni ka mpika. Amma ma sakatə salngkiɗa ni ku mti, tsa ku msər akwa ngyikar salngkiɗa na ata kərari ni. 3Amma ma sakatə salngkiɗa ni tsu ka mpika, antə tsa kəl sal damwa, mda ata pəla mwala ni akwa ləka. Amma ma sakatə salngkiɗa ni ku mti, tsa msərmsərari ta ngyikar salngkiɗa ni. Antə wala ma tsa an kəl sal damwa mda aɗi ata pəla tsa akwa ləkə wa.

4Antə ngəni an laku tə su ni akwa ni ala giri, maɗama'na. Mtər Yesu ata udzəm kadləkadla ku vu tə giri ndzi mtəmtari abwar tsawu ni. Antə kulini giri ku ndzi ar Kristi, natə mdə thlentə ka mpikə ni, kamnyar ka mburu mzhi namtə ndzəndziyir mburu ka tsa ndzi ka riɓa akwa kəthlərər Hyel. 5Sakatə mburu tsu akwa hara halayeri na ar dza, antə tsawu ni thlentə nggukayeri ar biku na akwa dza mburu, na vu mburu akwa hara suayeri na ɗimi ɗimi, natə watsəɓərni an mta. 6Amma kulini mburu ku msəra akwa tsawu ni, kamnyar mburu ku mti təbwar su na kəsi ala mburu kəra mburu ni. Kulini mburu ata mzhi hara kəthlər aka Hyel, aɗi akwa laku na waci atar nu tsawu na rəbutə rəbutari nə wa, amma akwa laku na bilənari atar kələngkər aka su tə Mambəl na Ɓɗakkarkara pəla.

Tsawa Ka Biku

7Ka kulini man tə ka mburu pəlari? Tsawu ka kərari ni biku ya? Awa, hun wa! Jiri ma an kamnyar tsawu nə wa, sakani I aɗi ata səndə su na biku nə wa. Kamnyar ma tsawa an ka pəla abbər, “Ga aɗiya nggukə sur mdə wa” wa, sakani I aɗi ata səndə su na nggukə sur mdə nə wa. 8Amma biku ni ku kəthlər ka tsawu ngəni, ka mburtə shanga mambila nggukayeri na akwa dzi. Ma tsawu ni aɗi wa, biku ata ndzi mtəmtari.

9Waci I ka mpika, akwa sakatə I aɗi səndə tsawu nə wa, amma sakatə I səndə tsawu antə biku thlatə ka mpika, 10antə arna I mta. Antə I nggaɓəla abbər tsawu natə mdə ɗəmha abbər ka tsa səntə mpikə ni, ku sə ndzi abbər arna tsa akwa sənta ali mta. 11Kamnyar biku ku wutə laku atar tsawu ni, ka pwaktəmta ra, ka tsi ra kəgari.

12Antə tsawu ka kərni tsa ɓɗakkarkara, antə tsuwa kəlara pal akwa nca tsawayeri ni ɓɗakkarkara, ka kalkal, ka tsuwa ɓɗaku. 13To kulini mda amzhi pəla abbər tsawu ngəni ɓɗaku ni ku səntə mta ali ya? Awa, hun wa! Biku ni an sənta ali mtə ni, tsa hara kəthlər ka tsawayeri na ɓɗakɓɗaku tə Hyel hamta ni kamnyar ka tsa tsi ra. Kamnyar atar tsawu ni antə mburu ata mzhi wutə vəi ɗimikura biku ni.

Ɓuji Na Akwa Ɗəffa Mda

14Mburu ku sənda abbər tsawu ni kamnyar mambələr mburu, amma arna I akwa hara su na təbwar dza, mdə ku ɗələmta ra apa mafa aka biku. 15I aɗi ana nggaɓəla su tə I ana hara wa. Kamnyar I aɗi ana hara su tə I akwa barari wa, amma I ana hara su tə I ku nggəlari. #Gal 5:17 16Amma ma I ana hara su tə I aɗi ana bara wa, to, ai, ngəni ku ncanta abbər tsawu ni ɓɗaku. 17Apani aɗi I an akwa hara su na ɗimi nə wa, amma biku na akwa dzi ni an akwa harari. 18Kamnyar I ku sənda abbər su aɗi akwa dzi ni na ɓɗakari wa. Kamnyar I ahir hara su na kalkalari, amma I amzhi harari wa. 19Kamnyar I aɗi ana hara su na ɓɗaku tə I akwa bara harari wa, amma su na ɗimi tə I aɗi akwa barari harari wa, antə I ana hara.

20Antə ma I ana hara su tə I aɗi akwa bara harari wa, ngəni ku ncanta abbər aɗi I an akwa harari kəra wa, amma biku na akwa dzi ni an akwa harari.

21Antə I wuta abbər an laku tə su ni ana mwa akwa, abbər kəlara sakatə I akwa bara kəi hara su na ɓɗaku, nggukər hara ɗimikur ana ndzi kudzəhə ka iya. 22Kamnyar I ana nggatə msərakur tsawur Hyel akwa ɗəffi. 23Amma akwa kəlara bwar dzi, I ana wutə dzam laga ka duna akwa mpa ka dzamərna akwa ɗəffi. Dzam ndaga ana namtə ra kəi ndzi mafar biku na tsu akwa dzi ni. 24I mdə na hilhilari! Wan ata msərantə ra akwa jili dza ngəni na ku ɗəmhədzi kamnyar mtə nə ri? 25Hyel ata harari! Usa alari atar Yesu Kristi na Mthlakər mburu! Apani giri ku wutə laku tə su ni akwa. I ka kəri akwa bara kəi ɓəlatə tsawur Hyel ka ɗəffi shang, amma kamnyar dzi na hir hara biku ni, I ku ndzi mafar biku.

Currently Selected:

Mjir Rom 7: KNB

Highlight

Copy

Compare