Mjir Rom 3

1Ka ma apani, man ampaniyir ndzi mdər Yahudi nə ri? Wala tsuwa man ampaniyir thla kaciya nə ri? 2Jiri, ampaniyari aɗi hang. Na ntangkəma, mjir Yahudi antə Hyel baɗitə hamta ala ɗa ndərərni ntangkəma. 3Amma ma mji laga akwa nca ɗa ndzi kula hamta jiri fa! Ndzəndziyir ɗa kula hamta jiri ni ata mzhi ngkatə Hyel ta ndzi ka jirkur ya? 4Awa, hun wa! Ku ndzi dwali ka Hyel ndzi ka jirkur wala ma shanga mji an ata ndzi mjir thlandər. Tsu apatə kakaɗər Hyel ku pəla, abbər,

“Ka mdə wutə ngə ka jirkur akwa gariyir nga,

ka gə səma akwa sakatə mda akwa hara ala gə shariya”

5Amma ma ɗimikurər mburu an ata ncantə ɓɗakkurər Hyel, man tə ka mburu pəla ri? Abbər Hyel aɗi hara kalkal akwa ɗi mburu nə wa ya? Ngəni an laku tə mji ana wul su akwa daci. 6Awa, hun wa! Kamnyar ma apani apa madi tə Hyel ata hara shariya aka mjir duniya tsu ri?

7Amma ma ndzəndziyirna na kula jirkur ni ata hara ka Hyel wutə səli atar ncantə jirkurərni, kamnyar mi tə har ba kulini Hyel ata pəlangkər ali abbər I mdər biku nə ri? 8Har mji laga akwa mnya ɗimi ala yeru abbər yeru akwa pəla nggwa, “Kamnyar mi tə mburu hara ɗimikur, kamnyar ka ɓɗakkur wutədzi wa ri?” Mji na akwa pəla su ngəni ata kəra yeru ni ata kəɓa ka shariya na kalkalari.

Mda Aɗi Na Ka Jirkur Wa

9To, ngəni akwa ncanta abbər mburu na mjir Yahudi ni, mburu ku təramta mambila mji ka ɓɗakkur ya? Awa, hun wa! Kamnyar yeru ku kurtə ncaɓəla abbər mjir Yahudi ka mji na aɗi mjir Yahudi wa shang kalkal akira dunar biku. 10Apatə kakaɗər Hyel pəla abbər,

“Mda aɗi na ɓɗaku wa,

mda aɗi wala duku wa.

11Mda aɗi na akwa nggaɓəla su wa,

mda aɗi na akwa bara Hyel wa.

12Shanga ɗa ku shinadzə bwahili aka Hyel,

ka ndzi kula ampani ata kəma duku.

Mda aɗi na akwa hara su ɓɗaku wa,

mda aɗi wala duku wa.

13Fulama ɗa ku ndzi apa kul na bwang,

akwa pwaktə mji ka kyanggyara ɗa.

Ndər na ana səɓəla akwa mnya ɗa

ndzi apa gwarər jataviyari.

14Gariyir ɗa an ncir nggənggəl su

ka mwavərkur.

15Da ana dəkəi mda ka tsi mda

kula shamta saka.

16Kəlara bwa tə da ku nuwa,

dəlpa ɗa ana ndzi ncir asar ka ɗəffə ɓzəɓza.

17Da asəndə lakur ndzi akwa msərakur

ka nvwa ɗa wa,

18tsuwa thlivər Hyel aɗi akwa ɗəffa ɗa wa.”

19Kulini mburu ku sənda abbər kəlara su tə tsawa akwa pəlari ni, tsa akwa gari aka mji na akira tsawu ni. Ngəni an kamnyar ka shanga mji hartə mnya ɗa, ka shanga duniya ndzi akira shariyar Hyel. 20Kamnyar mda aɗi na ata mzhi kəcimta kərni akəma Hyel atar mzhi ɓəlatə tsawu wa. Su tə tsawa ana harari an ka tsa ncanta ala mburu abbər mburu ku hara biku. #Gal 2:16

Jirkur An Tar Atar Hamta Jiri

21Amma kulini kam mdə ku kəlar laku laga tə mda ata mzhi namtə kərni kalkal akəma Hyel. Tsuwa mda aɗi ata wutə ɓɗakkur ngəni atar ɓəla tsawu wa, apatə kakaɗayeri ar Musa ka naɓiyayeri ku hamta seɗa ata kərari təng waci. 22Mda ata wutə ɓɗakkur ngəni akəla Hyel atar hamta jiri aka Yesu Kristi. Tsuwa kəlara mdə na ku hamta jiri, ata mzhi wutə ɓɗakkur ngəni, kamnyar zumzumkur aɗi wa. #Gal 2:16 23Kamnyar shanga mji ku hara biku, har tə ɓɗakkurər mburu aɗi mwantə su tə Hyel akwa barari kamnyar mbantə mburu nə wa. 24Amma atar cautər ɓɗakkur tə Hyel hara ala mburu, antə shanga mburu ku ndzi ka jirkur akəmari, atar Kristi Yesu na pəli mburu. 25Kamnyar Hyel hamta Yesu ka tsa ndzi saɗakar kələmta watsəɓər bikər mburu, kamnyar atar hamta jiri abbər Yesu ku hamta mpikari, ka pumta mamshirni, antə mji ata ndzi kalkal akəmari. Saɗaka ngəni akwa ncanta abbər Hyel ka jirkur akwa shanga su, kamnyar tsa ku mbwi ɗəffari ka yafitə mburu ata kəra shanga bikayeri tə mburu hara waci. 26Atar apani antə Hyel ncanta abbər tsa an ka jirkur ni, tsuwa tsa akwa hara ka kəlara mdə na ku hamta jiri aka Yesu ndzi kula biku akəmari.

27Ka ma apani, man tə mburu ata mzhi gaya ata kər ri? Ai suari aɗi wa. Kamnyar mi tə sur gaya aɗi wa nə ri? Mburu amzhi gaya ata kəra laku tə mburu akwa mzhi ɓəla tsawa akwa ya? Awa, ahara wa! Kamnyar ɓəla tsawa amzhi msərantə mburu wa, tar atar hamta jiri. 28Kamnyar mburu ku sənda abbər tar atar hamta jiri antə mda ata mzhi ndzi kula biku akəma Hyel, amma aɗi atar ɓəla tsawu wa. 29Nənga Hyel ni Hyelər mjir Yahudi shiɗa ri? Tsa aɗi Hyelər durayeri damwa wa ya? Tsa Hyelər durayeri damwa ja, swaiswai ma! 30Təng tə Hyel duku ni. Apani tsa ata hara ka shanga mji ndzi kula biku akəmari atar hamta jiri, wala ga an mdər Yahudi, wala ga an dur damwa. #Gal 3:20 31Ngəni akwa ncanta abbər ampaniyir tsawa aɗi kəra wa tar hamta jiri ya? Awa, hun wa! Ata vəya ndaga, har mburu akwa dunautə tsawu ni ma atar hamta jiri ni.

Currently Selected:

Mjir Rom 3: KNB

Highlight

Copy

Compare