Mjir Rom 16

Bulus Akwa Thlawar Pazhayeri Arni

1I akwa bara pəla ala giri abbər Fibi na ngkwarma' mburu akwa Kristi ni, ngkwa na pwa. Tsa ana dlar mjir nuwa na ahar Kengkreya. 2Ka giri dlu ni akwa thləma Mthlaku, apatə mjir Hyel ana hara, ka giri dlar ni akwa kəlara su tə nuhum tsa asə bara akəla giri, kamnyar tsa ku kəɗar dlar mji hang, purəm kəga Iya.

3Ka giri thlawar Priska ka Akila, da pazhirna akwa kəthlər ar Kristi Yesu. #Kəth Apos 18:2 4Da ku psəmta mpika ɗa kamnyar na, natə aɗi I shira wa, amma shanga ikələziyayeri na aɗi ar mjir Yahudi wa, akwa usar ɗa.

5Ka giri thlawar ikələziya na ana kəɓa akwa kəyir ɗa tsuwa.

Ka giri thlawar ali Epayenetus, mdərna na hirhirari, mdə na baɗitə dlu Yesu ntangkəma akwa tsəɗi Asiya.

6Thlawar giri ali Maryamu, tsa na ku hara kəthlər ka duna kamnyar giri.

7Tsuwa ka giri thlawar ali Andronikus ka Yuniyas. Da an yangkuri ka tsuwa yeru ku ndzi akwa pərsəna ata kəma duku kəga da. Tsuwa akwa nca aposəlayeri ni, da mji tə mda ana wul ɗa ka daraja, tsuwa da ndzi mjir nu Kristi akəmata iya.

8Ka giri thlawar ali Ampiliyatus, mdərna natə I hirhira akwa Mthlaku.

9Ka giri thlawar Urbanus na mdər kəthlər nvwa mburu akwa Kristi, japu ka Istakis na mdərna natə I hirhira.

10Ka giri thlawar ali Apelles, tsa na ku nggitə su hang kamnyar Kristi. Ka giri thlawar mjir nuwa na akwa kutakəyir Aristobulus.

11Ka giri thlawar ali yangkuri Herodiyan. Ka giri thlawar ali mjir Mthlaku na akwa kutakəyir Narkissu.

12Ka giri thlawar ali Tirifaina ka Tirifosa na ana kəthlər aka Mthlaku.

Thlawar giri ali Persis mdərna natə I hirhira, na ku hara kəthlər ka duna aka Mthlaku.

13Thlawar giri ali Rufus na sənsəndari akwa kəthlərər Mthlaku, ka mama'ni natə tsa ana wul ra apa ɓzər ni. #Mar 15:21

14Ka giri thlawar Asingkiritus, ka Filigon, ka Hermes, ka Patrobas, ka Hermas, ka shanga maɗaməma na ata kəma duku kəga da.

15Thlawar giri ali Filologus, ka Juliya, ka Niriyus ka ngkwarma'ni, ka Olimpas, ka shanga mjir Hyel na ata kəma duku kəga da

16Ka giri thlawar nvwa giri ka paktər tsi na ɓɗakkarkara.

Shanga ikələziyayeri ar Kristi akwa thlawar giri.

Thlipayeri Na Akwa Tsikərari

17Antə I ata kiɗa akəla giri maɗaməma abbər, ka giri vədzə hangkala giri aka mji na ana səntə ndəkəmtadzi, ka səntə sur tsamta səla mjir nuwa, jili mji na ana hara dawakur ka su tə giri thliptə akwa addinər giri. Ka giri hwi vəi tə da ata. 18Kamnyar jili mji apani aɗi akwa hara kəthlər aka Kristi na Mthlakər mburu wa, amma su na msəra aka kuta ɗa daci. Tsuwa atar ndərayeri na msəramsəra ka ndərayeri na ar swaktə mda, da ana pwaktəmta mji na ka hangkal. 19Shanga mji ku nggata ata kəra laku tə giri ana kələngkər aka Mthlaku ka ɗəffa giri shang ni, tsuwa an su na hara tə I ka kucali ata kəra giri ni. I akwa bara ka giri ndzi ɗəɗu akwa hara su na ɓɗaku, tsuwa giri aɗiya hau mnya giri akwa su na ɗimi wa. 20Antə Hyelər msərakur ata hadləmta Shatan, ka na giri kuthlikur ata kərari.

Ka Mthlakər mburu Yesu ləkəma ka hara ala giri ɓɗakkur ba saka madi.

21Timothli, natə yeru akwa kəthlər ka tsa ata kəma duku akwa thlawar giri, shanga ɗa kəga Lukiyus, ka Yason, ka Sosipata, na mjir Yahudi akwa thlawar giri.

22I na Tartiyus, na akwa rəbutə wasika ngəni ni, akwa thlawar giri akwa thləma Mthlaku.

23Gayus, mdə natə I aviyarngkiɗa, natə shanga mjir nuwa ana kəɓa akwa kəyirni ni, akwa thlawar giri. Erastus na mdər kəsi kwaba ar di na ol ni, ka Kwartus na ɓzərma' mburu, japu akwa thlawar giri. #16:23 Bwar ola kakaɗayeri tə mdə rəbutə ka tsi waci ni aɗi ka vəras 24 nə wa. Vəras ni pəla, Ka Mthlakər mburu Yesu Kristi hara ala giri ɓɗakkur shanga giri. Amin.

Adduwa Na Akwa Tsikərari

25Kulini ka səli ndzi aka Hyel, na ka dunar namtə giri ka giri ndzi ɓəɓal apatə giri akwa nggatə labar na msəra tə I akwa ngkərari ata kəra Yesu Kristi ni. Tsuwa labar na msəra ni an ashir tə mdə ɗuwamta təng waci akwa baɗitər su. 26Amma kulini, mdə ku kəlar ni atar kakaɗayeri tə naɓiyayeri rəbuta ka ngkərɓəla aka shanga durayeri na akwa duniya. Tsuwa Hyel na ba saka madi ku tsawa abbər ka shanga mjir duniya hamta jiri alari ka kələngkər alari.

27Antə kulini, ka shanga səli ka olkur ndzi aka Hyel duku shini na ɗəɗu, atar Yesu Kristi, har ba saka madi! Amin!

Currently Selected:

Mjir Rom 16: KNB

Highlight

Copy

Compare