Pristayeri 12

Kəcimtadzər Mwanki Aghəla Ya

1MTHLAKU ku pəla aka Musa, 2ka tsa pəla aka mjir Israila abbər, “Ma mwala ku kətə hur ka yaɓəla ɓzər sal, tsa ata hara vir murfa akwa dlimburkur, tsu apa akwa sakar wul thlali arni. 3Akwa vir na nciskur antə mda ata thlamta kaciya aka ɓzəngkyar ni. 4Aghəla nda mwala ni ata jaktə hara vir makkumari ka makər kwabə mamshi ni athləthlata. Akwa sakatə mwala ni akwa mamshi tsa aɗi ata tsəkwar kəlara su na kəcəkəcari wa, wala mwari akwa vəi vəngkər səli wa, tar ma virayeri ar mamshi ni ku təramta. 5Ma mwala ku ya ɓzərngkwa tsa ata hara sati suɗa akwa dlimburkur, tsu apa akwa sakar wul thlali arni. Mwala ni ata jaktə hara vir ngkwakumari ka ngkwa kwabə mamshi ni athləthlata. 6Ma sakatə virayeri ar mamshi ku kuri, wala kamnyar ɓzər sal wala ɓzərngkwa, antə tsa ata si adzə prist. Tsa ata səntə ɓzər gam na ka məvari pal kamnyar saɗaka mbamba ka ɓzər katapar, wala bukəl kamnyar saɗakar biku anyarmbwar tentər tsaptədzi. 7Antə prist ni ata hamta ɗa aka MTHLAKU ka kiɗə tifəmtar biku alari, antə tsa ata ndzi kəcəkəcari. Nayeri ni an su tə mwala na yaɓəla ɓzər sal wala ɓzərngkwa ata hara ri. 8Amma ma mwala ni amzhi wutə ɓzər gam wa, tsa ata səntə bukəl suɗa wala maɗa' katapar suɗa. Duku ata ndzi kamnyar saɗaka mbamba ka dukwari kamnyar saɗakar biku. Prist ni ata hamta ɗa kamnyar ka mdə kəcimta alari bikərni, antə tsa ata ndzi kəcəkəcari.”

Currently Selected:

Pristayeri 12: KNB

Highlight

Copy

Compare