Pristayeri 1
1
Lakur Hamta Saɗaka Mbamba
1Vir laga MTHLAKU ku kəga Musa akwa tentər tsaptədzi ka pəla alari abbər, 2“Pəla aka mjir Israila abbər, ‘Kəlara sakatə giri ata səntə saɗaka aka MTHLAKU antə tar ka waskəi kəɓəla thla akwa bəri arni wala təma wala kwi akwa dləmarni ka tsa hamta. 3Ma sur hamta saɗaka mbamba ar nga an thla antə tar ka tsa ndzi gyal na kula nangka. Tsuwa tar ka gə hamta saɗaka ni anyarmbwar Tentər vəngkər səli, antə I ata dluwari ala ga. 4Ga ata vəngkər tsiya ga ata kəra thlar saɗaka mbamba ni, antə I ata dlu saɗaka ni apa sur kəcimta ala gə bikər nga. 5Ga ata thlamta wulya gyal ni anda akəmi, antə pristayeri na akwa nyarmbwar Haruna ni ata kətə mamshari ka pshita ata shanga tenga bagaɗi na anyarmbwar tentər tsaptədzi ni. 6Ga ata hənəmta mwaɓi ni ka gə thləthlau raka raka, 7antə pristayeri na akwa nyarmbwar Haruna ata ɗəmhə udzəm mba u'u ata kəra bagaɗi mbamba ni ka njingkər u'u. 8Da ata putə dakulayeri ar kum ni, ka paktə ka kərari ka malari ata udzəm na akwa mba ata kəra bagaɗi ni. 9Amma tar kara kəcimta kariyir kutari ka səlayerari ka yimi, kambəla prist na ata hamta saɗaka ni mbamta ɗa tuktukku ata bagaɗi ni. Tsa an saɗaka mbamba swakti ka shiwur na msəra natə I ata dluwari ka kucali.’ ”
10“Ma ga ata hamta saɗaka mbamba ni ka təma wala kwi antə tar ka gə hamta gam wala nciwu na kula nangka. 11Mwantə mwaɓi ni təbwar yala ka bagaɗi ni ka gə thlamta wulyari akəmi, antə pristayeri ni ata pshitə mamshari ata shanga tenga bagaɗi ni. 12Ga ata thləthlau kum ni raka raka antə prist ni ata putə ɗa kəga kərari ka malari ata u'u na ata kəra bagaɗi ni. 13Tar kara kəcimta kari kutari ka səlayerari ka yimi, kambəla prist ni mbamta shanga saɗaka ni ata bagaɗi. Tsa an saɗaka mbamba swakti ka shiwur na msəra natə I ata dluwari ka kucali.”
14“Ma ga ata hamta saɗaka mbamba ni ka ɗikayeri, antə tar ka gə hamta bukəl wala ɓzər katapar. 15Antə prist ata mwantə ɗika ni ata bagaɗi, vəi tə tsa ata ndwaləmta wulya ɗika ni ka mbamta kərari ata u'u. Antə mamshari ata hwiyimta athlimbəla bagaɗi ni. 16Amma ar mbwashikari ka shishari mda ata ra pumtari akwa vəi pumta pənju abwa raghəi ka bagaɗi ni. 17Aghəla nda antə tsa ata kətə ɗika ni ata ɓəɓəkari ka ngkərtə ntau ni, ka mbamta ni ata kəra udzəm u'u na ata kəra bagaɗi ni. Tsa an saɗaka mbamba swakti ka shiwur na msəra natə I ata dluwari ka kucali.”
Currently Selected:
Pristayeri 1: KNB
Highlight
Copy
Compare
Share
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
