Baɗitari 49
49
Gari Na Aghəlta Shang Tə Yakub Hara Aka Maɗashilərni
1Antə Yakub kəgatə maɗashilərni ka pəla ala ɗa, “Tsaptə girdzi ata kəma duku, kamnyar kəi pəla ala giri su na ata sə wutə giri akwa virayeri na ata sə si akəmazi.
2“Tsaptə girdzi ka giri nggata, giri na maɗashilər Yakub,
ka giri nggatə gariyir baba' giri Yakub.”
3“Gə na Ruben,
ga an yarakəmarna,
ga an duni ka ɓzər na ntangkəma ar dunar salkurərna,
ga an olta shang akwa olkur ka duna.
4Ga aɗi nkahənkahari wa,
gə ndzi apa yimər pərtu,
ga aɗi ata jaktə ndzi na ntangkəma wa.
Kamnyar ga ku lətə dəkələr baba' nga
ga ku ləta ka diɓəranta.”
5“Gə na Simeyon, ka gə na Lawi
giri an mji ka ɓzərma'ni.
Katsakarayeri ar giri an sur thlentə hangkal.
6I aɗi ata vu mnyi akwa sauriyir giri wa,
wala ləkwa tsaptədzi ar giri wa.
Kamnyar giri ana tsi mji ma ɗəffa giri ku ɓzi,
ka ɓəgələmta səla gyalayeri kula suari aɗi.
7Ɗəffa giri ni ata ndzi shushuwari,
kamnyar giri ka ɗəffu na mwavər,
ka ɗəffa giri na bwarbwar ni,
tsa an ɗəffu na ɗimi.
I ata ndəkəmta giri akwa tsəɗiyir Yakub,
kəi titiləmta giri akwa nca mjir Israila.”
8“Gə na Yahuda,
maɗama' nga ata sə hu nga.
Ga ata sə fəfahə wulya dawayeri ar nga
maɗada' nga ata sə zuzuri akəma ga.
9Yahuda, ga ku ndzi apa ɓzər tsəngi,
na haɗa thlata akwa ɓɗəmnya kum tə tsa tsi.
Tsa ana pəpəi ka ndərardzi
apa mwala tsəngi,
mda aɗi na ata nggitə ndəra alari wa.
10Zwalər kuthlikur aɗi ata ndəka ka tsiya gə wa,
wala ndəka ka mjir nyarmbwar ngə wa,
kamnyar ka mdə sənta ala gə tsəma,
ka durayeri tsuwa kələngkər ala ga.
11Nfur anap ata sə yatədzi hang,
har ka mdə mbwi ɓzər kwara ata.
Ga ata sə kəcə ləptər nga akwa yimər anap kamnyar hangkurari,
akwa yimər anap na mamza pitu apa mamshi.
12Nca ga ata hara mamza pitu
kamnyar hangkur yimər anap.
Thlira ga ata hara mwapu shalaku,
kamnyar hangkur uwa hadlu.”
13“Gə na Zebulun,
ga ata sə ndzi ata mnya manda,
mnya manda ni ata sə ndzi tashar sharayeri ar yimi,
antə kəla tsəɗiyir nga ata sə mzhitə Sidon.”
14“Gə na Issakar,
gə ndzi apa kwara na ka duna,
na pəpəi ka akwa daɓwa thlambəlayeri ar fa kəla.
15Kamnyar ga ku wutə vəi ghərəmtaghəra na ɓɗaku
tsəɗi na ata hara ngguka aka mda.
Antə ga ku hamta kər nga kamnyar kəl kəla,
ka hara kəthlər ar dwalikur apa mafa.”
16“Gə na Dan,
ga an ata sə hara shariya aka mjir nga,
apa pal akwa nca nyarmbwar Israila.
17Ga ata sə ndzi pwapu ata mnya laku,
pwapu na ka gwar ata mnya laku,
na ata kal matədukwa taku,
kamnyar ka mdər fəl taku ni təri təbwa hili.”
18“MTHLAKU,
I akwa səka ka gə mbantə ra.”
19“Gə na Gad,
sojayeri ata sə ra dlər nga,
amma ga ata shinardzi ka kədləmta ɗa tsu ata səla ɗa.”
20“Gə na Asher,
ga ata wutə susəma na ɓɗaku hang,
susəma na ata ndzi kalkal aka kuthli.”
21“Gə na Naftali,
gə ndzi apa kimar natə mdə msəranta,
na ana ya maɗa' na ɓɗakɓɗaku.”
22“Gə na Yusuf,
ga an ɓzər na ndzi apa tsiya nfur anap na ana ya hang.
Nfu na ata mnya vəi kucirkila,
natə tsiyayerari ana hwi ka ndlətə kəra kadaka.
23Mjir sha ku ra pungkərdzi ala ga,
ka shishitə nga, ka hara ala gə bwani.
24Amma wala apani laliyir nga
ku thləthlatə gyang kula kənggərantədzi,
tsuwa shaha ga ku wutə duna
atar dunar Hyel na ka Duna ta Shang na ar Yakub
akwa thləma Mdər Ɓəla, na Gagəmar Israila.
25Atar Hyelər baba' nga na ana dlar nga,
Na ka Duna ta Shang na ana vədzə ala gə barka,
barkayeri ar yimərhyel
ka barkayeri ar yimi na zurang akira di,
barkayeri ar mji ka da ya maɗankyar hang
ka ar mwaɓiyayeri ka da ya maɗa' hang tsuwa.
26Ka barkayeri ar baba' nga təramta
barkayeri ar garayeri na ba saka madi,
ka suayeri na ɓɗakɓɗaku ar ɗəɗəgəlayeri na aɗi təng waci.
Ka barkayeri ngəni ndzi ata kəra ga, Yusuf,
ata murkəma mdə tə mdə namtə ni zum ta maɗama'ni.”
27“Gə na Benjamin,
ga an mwavər apa kilamtaku na ka mi.
Ma ɗəɗəpa tsa ana ɓɗəmnya su tə tsa tsi,
ma tahaku tsa ana ndəndəkəmta su tə tsa fatsa.”
28Shanga mji ngəni an mjir nyarmbwar Israila na kumnya suɗə ni. Tsuwa ngəni an su tə baba' ɗa pəla ala ɗa sakatə tsa akwa vədza ala ɗa barka. Apani tsa ku hamta aka waskəi barka na kalkal ka tsa.
Yakub Ku Mti
29Antə Yakub tsawa aka maɗashilərni abbər, “Kulini I abaka mta, kəi mwari adzə kəkayeri arna. Ka giri ra harəmta ra adzə kəkayeri arna akwa kur pela na akwa bəbalər Efron na mdər Hitti, 30watau akwa kur pela na akwa fakər Makpela, abwa raghəi ka Mamre, akwa tsəɗi Kanana. Ka giri harəmta ra akwa kur pela natə Ibrahim masta ata kəma duku ka bəbalari akəla Efron na mdər Hitti abbər ka tsa ndzi vəi harəmta mjirni ni. 31Anda antə mdə ku harəmta Ibrahim ka mwalankiɗa Saratu. Tsuwa tsu anda antə mdə harəmta Ishaku ka mwalankiɗa Rubeka. Tsuwa tsu anda antə I harəmta Leya. 32Ka giri harəmta ra anda, akwa kur pela na akwa bəbal natə mdə masta akəla mjir Hitti ni.” 33Sakatə Yakub ku kuri gari ni aka maɗashilərni, antə tsa jaktə fatə səlari ka puta ata dəkələrni ka pəpəi, ka mpikəmta mpikərni na tsikərari, ka mta, ka ra wutə kəkayeri arni.
Currently Selected:
Baɗitari 49: KNB
Highlight
Copy
Compare
Share
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
