Baɗitari 34

Shekem Ku Ngkəi Dina Ka Pi Ka Tsa Ka Dwali.

1Vir laga antə Dina, ngkwa tə Leya yaɓəla aka Yakub ni, ku ləɓəla kamnyar wuli mwankir tsəɗi ni. 2Antə sakatə Shekem na ɓzər Hamor, na mdər Hivi, na kuthlir tsəɗi ni, wutə Dina antə tsa ngkəi ni ka pi ka tsa kula hirərni, ka hilantə ni. 3Antə hangkalari ku nutə Dina na ngkwar Yakub ni, tə tsa ku hir ngkwa ni ka duna, ka dingngga gari alari msəra msəra abbər tsa hir ni. 4Antə Shekem pəla aka baba'ni Hamor abbər, “Kəta ali ɓzərngkwa ngəni ka tsa ndzi mwalankiya.”

5Tsuwa sakanda Yakub ku kurtə nggata apatə Shekem hilantə ngkwarni Dina ni, amma tsa aɗi pəla suma katagu wa. Tsa mbwi ɗəffari akwa sək ka maɗashilərni na mwari akwa ɓəla thla akwa mtaku ni ngka avi katagu. 6Antə Hamor na baba' Shekem ni ləɓəla ka mwari adzə Yakub kamnyar gari alari. 7Hamor mzhitə kəyir Yakub ni sakatə kalkal maɗashilər Yakub ni ku səvi akwa mtaku ni. Sakatə da nggatə labar ni antə ɗəffa ɓzə ka duna, kamnyar Shekem ku tsi səliyir mjir Israila, atar pi ka ngkwar Yakub, kamnyar aɗi kalkal ka mdə hara su ngəni wa. 8Amma Hamor ku gari ka da ka pəla, “Hangkala ɓzərna Shekem ku nutə ngkwar giri, antə I akwa kiɗə kəra giri abbər ka giri zhar ni alari ka tsa kəla. 9Mbura hara kəldzi akwa daɓwa mburu. Giri ata kəl maɗankwiyir yeru, antə yeru ata kəl maɗankwiyir giri tsuwa. 10Giri ata mzhi ndzəndzi akwa nca yeru, ka mwari akwa kəlara vəi tə giri hira. Giri ata mzhi latə kəyir giri akwa tsəɗi ni, ka giri fəli akwa, ka wutə sur kəra giri.”

11Antə Shekem pəla aka baba' Dina ka maɗama' ngkwa ni na shili abbər, “Dlar gir ra kəi wutə mdəkur ata nca giri, antə shanga su tə giri, pəla kəi hamta I ata hamtari. 12Shanga puwar kəla ka shanga kari kəla tə giri thlamta ali, I ata hamtari. Arna ni giri ngkwar giri ka tsa ndzi mwalankiya daci.”

13Antə maɗashilər Yakub ku shinau aka Shekem ka baba'ni Hamor akwa lakur pwaktə ɗa, kamnyar tə tsa ku hilantə ngkwarma'ɗa. 14Antə da pəla ala ɗa abbər, “Yeru amzhi kətə ngkwarma' yeru ka yeru na aka mdə na aɗi thla kaciya wa wa, kamnyar ngəni ata ndzi sur səli ala yeru. 15Atar su ngəni daci antə yeru ata kələngkərari ala giri, abbər giri ata hir ka giri ndzi apa yeru, ka giri thla kaciya aka shanga mji shilər giri. 16Aghəla nda antə yeru ata hamta ala giri maɗankwiyir yeru ka giri kəla, tsuwa yeru ata kəl maɗankwiyir giri, tsuwa yeru ata ndzəndzi akwa nca giri ka mburu ndzi mji duku kəga giri. 17Amma ma giri aɗi ata hir ka giri thla kaciya wa, yeru ata kətə ngkwarma' yeru ka yeru təra.”

18Antə gari ngəni ku kəskəra Hamor ka ɓzərni Shekem. 19Antə ɓzərdakwi ni aɗi shamta saka akwa hara su tə da pəla ni wa, kamnyar tə tsa hir ngkwar Yakub ni ka duna. Tsuwa Shekem an ɓzər tə mdə hir nar səli ta shang akwa kutakəyir ɗa.

20Antə Hamor ka ɓzərni Shekem ku mwari akwa vəi tsaptədzi na akwa nyarfur di ni, ka gari aka mjir kuta di abbər, 21“Mji nayeri ni aɗi mji na mwavər wa, antə mbura zhar ɗa ka da ndzi akwa tsəɗi ni, ka da fəliyir ɗa, kamnyar tsəɗi ola tə da ata mzhi wutə vəi na ata mzhi ɗa. Mburu ata mzhi kəl maɗankwiyir ɗa, tsuwa mburu ata mzhi na ɗa maɗankwiyir mburu ka da kəla. 22Mji ngəni ata kələngkər ka da ndzəndzi akwa nca mburu, ka mburu ndzi mji duku kəga da, amma tar ma mburu ata hara su pal tə da pəla, an abbər tar ka shanga mji shilər mburu thla kaciya, apatə da ana hara kaciya. 23Ma mburu ku hara apani, ai mwaɓiyayeri arɗa na ol'ola, kəga kariyayeri arɗa, ka shanga mwaɓiyayeri arɗa na raka raka, ata sə ndzi ar mburu. Ar mburu təng ka mburu kələngkər aka su tə da pəla ni daci, ka da ndzəndzi akwa nca mburu.” 24Antə shanga mji na mwari akwa tsaptədzi akwa nyarfur di ni, ku dlu gariyir Hamor ka ɓzərni Shekem ni. Antə mdə ku thlamta kaciya aka shanga mji shili na akwa di ni. 25Akwa vir na makərkur sakatə mbəlkər kaciyar mji ni tsu akwa kətə ɗa, antə suɗa akwa nca maɗashilər Yakub, watau Simeyon ka Lawi na maɗama' Dina ni, fatə katsakarayeri arɗa, ka lətə kəra mjir di ni kula səndər ɗa, ka tsəgəi shanga mji shili. 26Da tsi Hamor ka ɓzərni Shekem, ka kəɓəla Dina akwa kəyir Shekem, ka təra ka tsa. 27Antə mambila maɗashilər Yakub ni mwari ka dlarhə mshiyayeri, ka famnya kariyir mjir di ni karkar, kamnyar tə mdə ku hilantə ngkwarma' ɗa. 28Da fatə thlayeri arɗa, kəga kwara, kəga kwi, kəga təma, ka shanga suayeri na akwa kuta di ka na aɓəla. 29Da famnya shanga su gənar ɗa, ka shanga suayeri na akwa kutakəyayeri arɗa, ka ngkəgəi mwankir ɗa kəga maɗankyarər ɗa na raka raka ka təra ka da.

30Antə Yakub pəla aka Simeyon ka Lawi, “Giri ku səntə bwani ata kəri, kamnyar giri ku hara tə I ndzi mdə na ɗimi aka mjir Kanana ka mjir Perizzi na akwa tsəɗi ni. Giri ka səndari abbər I aɗi ka mji hang wa, antə ma ɗa pangkərdzi ata kəri ka mpa, da ata tsi ra ka kurəmta mjir kutakəyirna.” 31Antə maɗa'ni pəla alari, “Antə ka yeru zhar ni ka tsa namtə ngkwarma' yeru apa karwa ya?”

Currently Selected:

Baɗitari 34: KNB

Highlight

Copy

Compare