Baɗitari 29

Yakub Ku Mzhitə Kutakəyir Laban

1Antə Yakub ku ləkəma ka mwarni, har ka mzhitə tsəɗiyir mjir raghəi. 2Aghəla tə tsa mzhitə vəi ni, təng vir laga tsa wutə jiɓə laga akwa mtaku, ka ciɓər təma apəpəi vəyari makər adzə jiɓə ni. Kamnyar akwa jiɓə ndaga antə ciɓayeri ni ana sa yimi. Tsuwa pelar hartə mnya jiɓə ni ol laga. 3Antə kəlara sakatə shanga ciɓayeri ni ku tsaptədzi anda, mjir ɓəla ana takələmta pela ni kazhar mnya jiɓə ni, ka na yimi aka təmayeri ni. Aghəla nda da ata jaktə takələmnya pela ni aka mnya jiɓə ni.

4Antə Yakub pəla aka mjir ɓəla ni abbər, “Maɗaməma, giri thlata ahar mə ri?”

Antə da pəla, “Yeru thlata ahar Haran.”

5Antə tsa pəla, “Giri asəndə Laban na ɓzər Nahor ya?”

Antə da pəla, “I, yeru asəndə ni.”

6Antə Yakub pəla, “Tsa lapiya ya?”

Antə da pəla, “Tsa lapiya kalau. Ndaka ngkwarni Rahila ma, akwa si ka təmayeri arni.”

7Antə Yakub pəla, “Pci tsu ol kamta, aɗi sakar ləvəi ka mwaɓiyayeri katagu wa. Antə na giri ala ɗa yimi ka da sa, ka giri jaktə mwantə ɗa akwa ɓəla.”

8Amma da pəla alari, “Yeru amzhi wa, tar ma shanga ciɓayeri ni ku tsaptədzi azi, ka mdə takələmta pela na ata mnya jiɓə ni, kambəla yeru mzhi na ala ɗa yimi.”

9Akəmata Yakub akuri gari ka da ni, təng təkəma Rahila ku si ka ciɓər təma kəga kwi na ar baba'ni, kamnyar tsa an akwa ɓəla ɗa. 10Sakatə Yakub wutə Rahila ka ciɓər təmar msəkər ni Laban ni, antə tsa mwari ata mnya jiɓə ni, ka takələmta pela na ata mnya jiɓə ni, ka na yimi aka təmayeri ar msəkərni ni. 11Antə Yakub vədzə mnyari aka Rahila, ka ləkwa tuwa ka kuraku. 12Antə Yakub pəla aka Rahila abbər tsa yangkura baba'ni, tsuwa tsa ɓzər Rubeka. Antə Rahila ku hwi ləha ka pəla aka baba'ni.

13Təkəma tə Laban nggatə ndər ni ata kəra Yakub na ɓzər ngkwarma'ni Rubeka ni, antə tsa tərɓəla ka huva kara thla kəmari. Sakatə da kəɓa antə tsa fəfahə ni ka vədzə mnyari alari, ka səvi ka tsa. Aghəla tə Yakub ku pəla alari shanga suayeri na ku hara, 14antə Laban pəla alari abbər, “Ai, gə mamshirna!” Antə Yakub ku ndzəndzi anda har ka hara thliya pal swakti.

Yakub Ku Kəl Leya Ka Rahila

Aghəla tə Yakub ku ndzəndzi adzə ni ar thliya pal, 15antə Laban pəla aka Yakub, “Aɗi abbər kamnyar tə mburu yangkur daci təng ga ata hara ali kəthlər gapani wa. Yiɗau antə ga ata bara kəi ntə ngə ri?” 16Kamnyar Laban ka maɗankwi suɗa, ngkwa na olari thləmari Leya ka na ntsahari tsuwa thləmari Rahila. 17Ar Leya ncari an ɓɗaku daci, amma ar Rahila tsa ɓzərngkwa na dakwi na ata hara ngguka aka mda.

18Yakub ku hir Rahila. Antə tsa pəla aka Laban, “I ata hara kəthlər ala ga ar məva murfa kamnyar kəi kəl Rahila ngkwar nga na ntsahari ni.”

19Antə Laban pəla, “Ai jiri, kuji kəi na ala gə ngkwarna ni, ta I ana aka mdə damwa. Antə ndzəndzi adzə ra.” 20Antə Yakub ku hara kəthlər ar məva murfa kamnyar Rahila, amma məva murfə ni ku ndzi alari apa vir yiɗauwa daci kamnyar tə tsa hir Rahila ka duna.

21Antə Yakub pəla aka Laban abbər “Hangkur məva tə mwa pəla ni ku kuri kulini, antə na ali mwalankiya kamnyar kəi ləmbwa adzə ni.” 22Antə Laban kəgatə shanga mjir di nda, ka vu tə mdə namtə susəmər kucali ar kəldzi ni. 23Amma akwa tahakər vir kəldzi ni, təng Laban kətə ngkwarni Leya ka mwantə ni aka Yakub. Antə Yakub ku ləmbwa adzə ni.

24Antə Laban ku kətə ngkwar kəyirni Zilpa, ka hamta aka Leya ka tsa ndzi ngkwarmbwarni.

25Sakatə viri ku kuri, antə Yakub nggaɓəla abbər azha Leya! Antə Yakub mwari adzə Laban ka pəla alari, “Man tə gə hara ali apani ri? Aɗi kamnyar Rahila antə I hara kəthlər ni wa ya? Kaha, kamnyar mi tə gə pwaktə ra ri?”

26Antə Laban ku shinau alari abbər, “Mda aɗi ana hara su apani akwa tsəɗiyir yeru wa, abbər ka yeru hamta ngkwar yeru na ntsahari aka sal kəmata ngkwa na olari wa. 27Ndzi ka sati na ar kucalər kəldzi ni kura, ka yeru na gə Rahila, ma ga ata jaktə hir hara kəthlər ali ar məva murfa damwa.”

28Antə Yakub ku hara apatə Laban pəla alari, ka kuri sati ni. Antə Laban kətə ngkwarni Rahila ka hamta alari ka tsa ndzi mwalankiɗa. 29Antə Laban kətə ngkwar kəyirni Bilha, ka na aka Rahila ka tsa ndzi ngkwarmbwarni tsuwa. 30Antə Yakub ku ləmbwa adzə Rahila. Antə tsa ku hir Rahila təramta Leya. Antə Yakub jaktə ləkwa hara kəthlər aka Laban ar məva murfa damwa.

Maɗa' Yakub

31Sakatə MTHLAKU wuta abbər Yakub aɗi hir Leya apa Rahila wa, antə tsa kəlar vəi yar Leya, ka hartə ar Rahila, tə tsa amzhi kətə hur wa. 32Antə Leya ku kətə hur ka yaɓəla ɓzər sal, ka vəta alari thləm Ruben, kamnyar tsa pəla, “MTHLAKU ku wutə bwani tə I akwa ka ni ɓzər. Antə kulini ja salngkəya ata hir ra.” 33Antə tsa jaktə kətə hur ka yaɓəla ɓzər sal damwa, ka vəta alari thləm Simeyon, kamnyar tsa pəla, “MTHLAKU ku jaktə hamta ali ɓzər sal damwa, kamnyar tsa ku nggata abbər mda aɗi akwa hir ra wa.” 34Antə tsa ku jaktə kətə hur ka yaɓəla tsu ɓzər sal, ka vəta alari thləm Lawi, kamnyar tsa pəla, “Akwa saka ngəni salngkəya ata fəfahə ra, kamnyar tə I ku yaɓəla alari maɗashili makər.” 35Antə tsa jaktə kətə hur damwa ka yaɓəla tsu ɓzər sal, ka vəta alari thləm Yahuda, kamnyar tsa pəla, “Kulini I ata hu Hyel.” Antə tsa thləthlatə ka yarni.

Currently Selected:

Baɗitari 29: KNB

Highlight

Copy

Compare